ၜၚ်ကံက်၊ ဂျောန် ၂၆
ဗော်ဗောန်ဇာဲထာဲ မဒှ်ဗော်ဇၞော်အိုတ် မရနုက်ကဵုဒုတိယ ပ္ဍဲကဵုဂကောံအလဵုအသဳပံၚ်ကောံဍုၚ်သေံဂှ် အပ္ဍဲသတ္တာဟတုဲကၠုၚ်တေံ နုက်တိတ်လဝ်နူဂကောံအလဵုအသဳပံၚ်ကောံဂှ်တုဲ ဒဒှ်ရဓဝ်ပတှ်ေဟွံမွဲ လ္တူဂကောံအလဵုအသဳ သ္ကိုပ်ဝန်ဇၞော် ဗဴဓံၚ်ဓာန် ယှေန်နာဝါထရာဂှ် ပၠောပ်အာဂလာန် ပ္ဍဲကၠတ်ထဝ်ဏာၚ် ပ္ဍဲဂိတုဂျောန် ၂၄ တေံ ဟီုလဝ်ရ။
စပ်ကဵုဗီုပြၚ်အလဵုအသဳသေံ ရပ်စပ်ဒၟံၚ်ပြဒ္ဒညာပယျဵု ကုကာမ္ဗောဒဳယျာ မသ္ကာတ်မြဟ်ကၠုၚ်ဒၟံၚ်ဂှ်တုဲ အခိၚ်ဇြဟတ်ဓရိုဟ် နူညးဍုၚ်ကွာန်တအ် ဂၠိုၚ်ကၠုၚ်ဂှ် အပ္ဍဲသတ္တာဟဂတဏံမ္ဂး နကဵုသ္ကိုပ်ဝန်ဇၞော် အာယုက်မၞုံ ၃၈ သၞာံဏံ ဒးဒုၚ်အာသ္ဂုတ်သွာတ် အတိုၚ်ကၠတ်ထဝ် ဖျေံဂှ်ဏောၚ်။
ဟိုတ်နူပြဒ္ဒညာဏံတုဲ ဗော်ဖဳထာဲ သ္ကိုပ်ဝန်ဇၞော်ဏံ အဝဵုဂွံဆက်တန်ကြန်အာဂှ် ဒှ်ဒၟံၚ်အန္တရာယ်ရ။
စပ်ကဵုပြဝညးတုဲ ရုၚ်သၞောဝ်ဓဝ်သၞောဝ်သ္ဇိုၚ်ကၟိန်ဍုၚ် သွက်ဂွံဂၠိုက်ဂၠါဲစၟဳတ်ကဵုဂှ် ဂကောံအမာတ်ကၠတ်ထဝ်မွဲဂကောံလေဝ် အာတ်မိက်လဝ်ဂှ်ရ နကဵုသ္ကိုပ်ဝန်ဇၞော် ဗဴဓံၚ်ဓာန် ဟိုတ်နူအစဳဇန်သာ်ဏံတုဲ ဒးဒုၚ်ပတိတ်ကၠေံ နူကဆံၚ်ဒၞါဲညးမာန်ရ။
ဂကောံဒစဵုဒစး အလဵုအသဳဂမၠိုၚ်လေဝ် စနူဂိတုဂျောန် ၂၈ ဏံတုဲ စဳဇန်လဝ် သွက်ဂွံတိတ်ဂၠံၚ် ထ္ၜးဆန္ဒ ညံၚ်သ္ကိုပ်ဝန်ဇၞော် ဂွံနုက်တိတ်ကဵုဒၞါဲညးရ။
သ္ကိုပ်ဝန်ဇၞော်သေံ ဗဴဓံၚ်ဓာန် ကေုာံ သ္ကိုပ်ဝန်ဇၞော်တြေံ ကာမ္ဗောဒဳယျာ ဟောန်သာန် တက်လဝ်ကျာနကဵုဖုၚ်ဂှ် မံက်တိတ်အာတုဲ အဝဵုစၟိန်ပြမာန် ကေုာံ ဂုန်သိက္ခာဍုၚ်သေံ ဒးဆောံလေၚ်မာန်ရောၚ်တုဲ ဗော်ဗောန်ဇာဲထာဲ နုက်တိတ်လဝ် နူကဵုဂကောံအလဵုအသဳပံၚ်ကောံဂှ်ရ။
အပ္ဍဲပွိုၚ်မတက်လဝ်ကျာနကဵုဖုၚ်ဂှ် ဗဴဓံၚ်ဓာန် ဖျဝ်စိုတ်တုဲ တက်လဝ်ကျာ ကုဟောန်သာန် သၟာပရေၚ်ဍုၚ်ကွာန်ဝှ်ကြံၚ် ကာမ္ဗောဒဳယျာဂှ်တုဲ ညးပါဲပါဲလဝ်ဇၞော်သ္ကိုပ်ဒပ်ပၞာန် မသီလဝ်အဝဵုပ္ဍဲဍုၚ်ညး ဂၠိုၚ်ၚ်ကဵုဝါဂှ်ရ။
ဒဒှ်မတက်လဝ်ကျာကဵုဖုၚ်ဂှ် မံက်တိတ်အာလဝ်ဂှ်ရ ဗဴဓံၚ်ဓာန် ကလေၚ်ဒုၚ်လဝ်ဂုန်တုဲ သွက်ဂွံပြံၚ်လှာဲ ဂကောံအလဵုအသဳ ပါလုပ်သီုကဵုဝန်ဇၞော်ကာစဵုဒၞါဂှ် စဳဇန်ဒၟံၚ်ရ။
နကဵုညးတအ် သ္ဂုတ်သွာတ်လဝ်အပ္ဍဲဗော်ညးတအ် သွက်ဂွံပၠောပ်အာဂလာန် ဒဒှ်ရဓဝ်ပတှ်ေဟွံမွဲ လ္တူသ္ကိုပ်ဝန်ဇၞော်ဂှ် ညးမၞုံအခေါၚ်ဟီုဂးဗော်ဗောန်ဇာဲထာဲ သောန်ဆာဲ ဟီုလဝ်ရ။
ဗော်ဖဳထာဲဂှ်တှ်ေ ဒဒှ်ရညးတအ် ဂွံလဝ်ပရေၚ်ထံက်ဂလာန် နူကဵုအမာတ်ကၠတ်ထဝ် ၜိုတ်ကဝက်ပြၚ်ဂှ်တုဲ ဟွံဒးဂွိၚ်ပုဟ်ဂှ် ဟီုလဝ်ရ။
Ref: Reuters