လာန်ကာဝဳ၊ ဂျာန္နဝါရဳ ၂၁
နကဵုကံၚ်ဇြဳပၞာန် ဒေါအ်ဒေၚ်ကၠေံ ပရေၚ်ဗ္တိုက်ဂၠါဲသၞတံဂှ်လွာဲဂှ်တုဲ သွက်ဂွံစပေါဲသဳကၠဳတံဂှ် ဒးရေၚ်တၠုၚ်ထေက်တုဲ ပေါဲရုဲမာဲဂှ်တှ်ေ ဒှ်ကိစ္စဒးကဵုက္ဍိုပ်ဟွံသေၚ်ပုဟ်ဂှ် ဍုၚ်အာဇြဳယာန်ဂမၠိုၚ် ဟီုလဝ် ပ္ဍဲဂိတုဂျာန္နဝါရဳ ၁၉ တေံရ။
ဂကောံဝေၚ်ဒၟံၚ်ပၞာန် ပ္ဍဲဍုၚ်ဗၟာတံသီုဖအိုတ် ဂွံဒေါအ်ဒေၚ်ပရေၚ်ဗ္တိုက်တံကီု၊ ပ္ဍဲပရေၚ်ကဵုအရီုဗၚ်ပရေၚ်ဗ္စာရဏာမၞိဟ်တံဂှ်လေဝ် ဟွံမွဲကဵုပွတာဒၞါ သွက်ဂွံကဵုအခေါၚ်လုပ်စိုပ်ဂှ် ဂကောံလုပ်ဍုၚ်အာဇြဳယာန်ဂမၠိုၚ် ဒဒှ်ရဖ္တိုက်ဖ္အောဝ်လဝ်ကံၚ်ဇြဳပၞာန်ဂှ် ဝန်ဇၞော်ကာဍုၚ်သ္အာၚ်မလေဝ်ယှာ မဂွံဒုၚ်ကေတ်လဝ်လျိုၚ် ဥက္ကဌအာဇြဳယာန် သၞာံဏံဂှ် ဟီုလဝ်ရ။
နကဵုကံၚ်ဇြဳပၞာန် ချပ်လဝ် ဂွံကွာ်ဂၠံၚ်လဵုရောဟီုဂှ် မလေဝ်ယှာ မိက်ဂွံတီရောၚ် ဝန်ဇၞော်ကာဍုၚ်သ္အာၚ် မိုဝ်ဟာမက် ဟာသာန် ဟီုလဝ် ပ္ဍဲပေါဲသောၚ်ကလးလိက်ပရိုၚ်ရ။
ကြဴနူဝန်ဇၞော်အာဇြဳယာန်ဂမၠိုၚ် ဆဵုဂဗသဳကၠဳ ပ္ဍဲတ္ကအ်လာန်ကာဝဳတုဲဂှ် ညးဟီုလဝ် သာ်ဏံရ။
ပေါဲရုဲမာဲဂှ်တှ်ေ ဒှ်ကိစ္စသ္ဒးကဵုက္ဍိုပ်ဟွံသေၚ်တုဲ ပရေၚ်ဒေါအ်ပန်ပှော်ဂှ်ဟေၚ် ဒှ်ကိစ္စဒးကဵုက္ဍိုပ်ဏောၚ်ဟီုဂှ် ဟီုလဝ်ကဵုညးတံ (ကံၚ်ဇြဳပၞာန်) ဂှ်ရောၚ် ဝန်ဇၞော်ကာဍုၚ်သ္အာၚ် မလေဝ်ယှာ ဟီုလဝ်ရ။
ကံၚ်ဇြဳပၞာန်ဝွံ အလုံဍုၚ်မွဲဂှ် ကျဒၟံၚ်ပၞာန်တုဲ ပ္ဍဲကဵုအကာဲအရာ မထိၚ်ဒက်လဝ်တိဍာ်ကၟိန်ဍုၚ် ပိဂအုံမွဲဂအုံရမာန်ဂှ် စဳဇန်ဒၟံၚ်သ္ဂောံကၠောန်ဗဒှ်ပေါဲရုဲမာဲ နကဵုအရီုဗၚ်ကြုက်တုဲ ကံက်လဝ် စရၚ်လၟိဟ်မၞိဟ်ရ။
ပေါဲရုဲမာဲ ကံၚ်ဇြဳပၞာန် မကၠောန်ဗဒှ်အာဂှ်ဝွံ ပေါဲရုဲမာဲဗၠးၜးဗဗွဲဓဝ်မွဲ ဂွံဒှ်ကၠုၚ်ဟွံမွဲပုဟ်ဂှ် ဂကောံဇြဟတ်ဒဳမဝ်ကရေဇြဳ အပ္ဍဲဍုၚ်တံကဵု ဍုၚ်ပလိုတ်တံ ဟီုလဝ်ရ။
ကြုက် ကဵုကၠောန်ဗဒှ်ပေါဲရုဲမာဲတုဲ ညံၚ်ကံၚ်ဇြဳပၞာန် အဝဵုဂွံတန်ကြန်ဂှ် ပ္တိတ်ဒၟံၚ်ဇြဟတ်ရောၚ် ပရေၚ်ပါ်ပါဲတံလေဝ် မံက်တိတ်ဒၟံၚ်ရ။
နကဵုဝန်ဇၞော်ကာဍုၚ်သ္အာၚ် မလေဝ်ယှာ ခြာဟွံလအ် အာစိုပ်နေဗျဳဒဝ်ဏောၚ်ဂှ်လေဝ် ကဵုလဝ်သမ္တီရ။
မလေဝ်ယှာ မဒှ်ကၠုၚ်ဥက္ကဌအာဇြဳယာန် သွက်သၞာံဏံဂှ် ဂွံထ္မံက်ရုပ်ရဴတၚ်တုပ်စိုတ်အာဇြဳယာန် ၅ တၚ်ဂှ် ဂကောံမဆက်စပ်သီုဖအိုတ် နွံပ္ဍဲဍုၚ်ဗၟာတံ သွက်ဂွံဒ္ဂေတ်ဗက် အရာမ္ဒးဒ္ဂေတ်ဗက်တံသီုဖအိုတ်ဂှ် ဖ္တိုက်ဖ္အောဝ်လဝ်ရ။
နကဵုမလေဝ်ယှာ မဂွံဒုၚ်လဝ်တဲ ဂကူရိုဝ်ဟေန်ဂျာ ဗွဲမဂၠိုၚ်ဂၠေၚ်ဂှ်လေဝ် ဂွံသောၚ်ကလး ပြဒ္ဒညာဍုၚ်ဗၟာဂှ် ကဵုက္ဍိုပ်ရေၚ်တၠုၚ်ဒၟံၚ်ကီုလေဝ် တၚ်တုပ်စိုတ်အာဇြဳယာန် ၅ တၚ် ရုပ်ရဴဂွံမံက်ကၠုၚ်ဂှ်တှ်ေ လုကဴကံၚ်ဇြဳပၞာန် ဟွံဒေါအ်ပရေၚ်ဗ္တိုက်တံဂှ်ပုဟ်ဟီုမ္ဂး သ္ဇက်ဂွံဒှ်ကၠုၚ်အောန်တဴကွေံကွေံဂှ် ညးလ္ၚတ်ဂမၠိုၚ် ဟီုလဝ်ရ။
Ref: Reuters