ၜၚ်ကံက်၊ ဨပရဴ ၂၄
အခိၚ်ပၞာန်အပ္ဍဲဍုၚ် ဒှ်ဒၟံၚ်ဏံ ဟိုတ်နူတိချဳအာလဝ်တုဲ ပရေၚ်လီုလာ်ဇီုကပိုက်ဒးတံ နွံဒၟံၚ်တၟာဂလိုၚ်ကီုလေဝ် ပ္ဍဲဍုၚ်ဗၟာ ဆက်ရေၚ်တၠုၚ်အာ အစဳဇန်ဂွံသိုၚ်ခၞံရုၚ်စက်ကဵုဇြဟတ်ဓာတ် နျူကလဳယျာဏောၚ်ဂှ် ကမ္ပဏဳအလဵုအသဳရုယှာပိုၚ် မဍိုက်ဍိုပ်ကိုန်စဳမာန်ဂှ် ဟီုကဵု ဌာန်ပရိုၚ်ရိုက်တာရ။
ပ္ဍဲဂိတုမာတ်တေံ ကၠာကသဳတိ ဇြဟတ်မၞုံ ၇ ဒဿမ ၇ မဂ္ဂနဳကျုတ် ဟွံဂွံချဳဏီ ၜိုတ်ပိသတ္တာဟဂှ် အကြာသ္ကိုပ်ပၞာန်ဇၞော် မေန်အံၚ်လှာၚ်ကဵု သမ္မတရုယှာ ဗလာဒဳမာပူတေန်တအ် တုပ်လဝ်စိုတ် သွက်ဂွံသိုၚ်ခၞံထၟာဲဓာတ်နျူကလဳယျာ အဇာဍောတ် ပ္ဍဲဍုၚ်ဗၟာရ။
ပ္ဍဲကဵုတၚ်တုပ်စိုတ်ဏံဂှ် တၚ်မဖျေံစၟတ်လဝ် သ္ဂောံပံၚ်တောဲရေၚ်တၠုၚ်အာ ရုၚ်စက်ကဵုဇြဟတ်ဓာတ်နျူကလဳယျာ မကၠောန်ပ္တိတ်ဇြဟတ်ဓာတ်ပၟတ် ၁၁၀ မဳဂါဝပ် မပါလုပ် ထၟာဲဓာတ်ၜါမ နူကဵုကဝ်ပဝ်ရေယှေန်နျူကလဳယျာ အလဵုအသဳရုယှာ Rosatom မကၠောန်ပ္တိတ်လဝ်တံ ပါလုပ်ရ။
ကသဳတိ မချဳအာလဝ် ခြာဟွံလအ်တေံဂှ် ဇီုကပိုက်ဒး အစဳဇန် Rosatom ဍုၚ်ဗၟာ ဟွံမွဲပုဟ်ဂှ် ရုၚ်လလောၚ်ပရိုၚ်ကမ္ပဏဳ ပလံၚ်ဗစိုပ်လဝ်အဳမေဝ်တုဲ ခၠေဝ်ပလန်လဝ်ရ။
ပ္ဍဲကဵုအဳမေဝ်ဂှ်တှ်ေ ဒဒှ်ရ Rosatom ဒ္ဂေတ်ဗက်ဒၟံၚ် စေဝ်ပၞောန်ဂွံဒုၚ်ဘဲတိချဳ မတေၚ်ဂြတ်ဂမၠိုၚ်၊ သၞောဝ်အစာံပတှ်ေဖျေံစိုတ်ဂွံ၊ ပရေၚ်ဗၠးဘဲဍုၚ်နာနာတံဂှ် ထ္မံက်ထ္ၜးလဝ်ရ။
ပ္ဍဲဍုၚ်ဗၟာ ဟိုတ်နူဘဲတိချဳတုဲ စမြိုၚ်သ္ဇိုၚ်အဓိကဂမၠိုၚ် ဒးလီုလာ်အာကီုလေဝ် အတိုၚ်မစဳဇန်လဝ်ဂှ် ကမ္ပဏဳဂှ် သိုၚ်ခၞံဒၟံၚ် ရုၚ်စက်ကဵုဇြဟတ်ဓာတ်နျူကလဳယျာဖိုဟ် မဒှ်ရ။
ဆ္ဂး အခိၚ်မသိုၚ်ခၞံ၊ ဒၞါဲဒတန် ကေုာံ တၚ်နၚ်ဗွဲလစှ်ေဂမၠိုၚ်ဂှ် ကမ္ပဏဳ Rosatom ဟွံဂွံထ္မံက်ထ္ၜးလဝ်ရ။
စကာထၟာဲဓာတ် RITM-200N နူကမ္ပဏဳဏံ မကၠောန်ပ္တိတ်လဝ် သွက်ဂွံရပ်စပ် ပ္ဍဲက္ၜၚ်ကရေက်ဍာ်ကလောံတံဂှ်တုဲ စဳဇန်ဒၟံၚ် သွက်ဂွံသိုၚ်ခၞံ ရုၚ်စက်ကဵုဇြဟတ်ဓာတ်နျူကလဳယျာ ပ္ဍဲဍုၚ်ဗၟာရ။
Ref: Reuters