မဝ်သကိုဝ်၊ ဨပရဴ ၂၃
ဟိုတ်နူတၚ်ဒတူလိုၚ် အလဵုအသဳသမ္မတအမေရိကာန် ဒဝ်နေဝ်ထြာမ် ဟွံကဵုအခေါၚ်ယူကရုၚ် ဒှ်ကောန်ဂကောံနေတဝ်ဂှ်တုဲ နကဵုရုယှာ ဒဒှ်ရပြေတဴစိုတ်ဂှ် ပ္ဍဲဂိတုဨပရဴ ၂၁ တေံ နန်ကရေမ္မလေန် ဟီုလဝ်ရ။
ဆ္ဂး စပ်ကဵုပရေၚ်ထြာမ် မဟီုကၠုၚ်လဝ် ဒဒှ်ရစၟဳစလဝ် အပ္ဍဲသတ္တာဟဏံ ဂွံတၚ်တုပ်စိုတ်ပရေၚ်ၜိုဟ်လလမ်ဏောၚ်ဂှ်တုဲ နန်ကရေမ္မလေန် မုဟွံဟီုလဝ်ရ။
သမ္မတထြာမ် မဂ္စါန်ဒၟံၚ် သ္ဂောံဒုၚ်သ္ပစၟတ်သမ္တီ နဒဒှ်ညးထ္မံက်ပရေၚ်ၜိုဟ်လလမ်မွဲဂှ် မွဲဏှမွဲဏှ ဟီုကၠုၚ်ဒၟံၚ် ဒဒှ်မမိက်ဂွံပတုဲကၠေံ ပေါဲပၞာန်ယူကရုၚ် မလအ်ကၠုၚ်ပွိုၚ်ပိသၞာံဂှ်ရ။
အလဵုအသဳထြာမ်ဂှ်တှ်ေ ပေါဲပၞာန်ယူကရုၚ်ဂှ် စၟတ်ကေတ်လဝ် နဒဒှ်ပေါဲပၞာန်စၞး အကြာအမေရိကာန်ကဵု ရုယှာရ။
နကဵုယူကရုၚ် ဂွံဒှ်ကောန်ဂကောံမဟာမိတ် နေတဝ်ဂှ် ဟွံဒးသဳကၠဳရပုဟ်ဂှ် ဂအုပ်ဗိုလ် ညးစၞးအမေရိကာန် ကိတ် ကဳလံက် ဟီုလဝ် ပ္ဍဲဂိတုဨပရဴ ၂၀ တေံရ။
ညးမၞုံအခေါၚ်ဟီုဂး နန်ကရေမ္မလေန် ဒဳမဳထရဳ ပက်သကပ်ဂှ်တှ်ေ ဟိုတ်နူတၚ်ဒတူလိုၚ်အမေရိကာန်တုဲ ဒဒှ်ရညးတံ ပြေစိုတ်ဂှ်ကီု ဒဒှ်ရတုပ်တဴ ကုလစွံစိုတ်ညးတံဂှ် ဟီုလဝ်ရ။
ပ္ဍဲဂကောံမဟာမိတ် နေတဝ် သၟဝ်သ္ကိုပ်သ္ကအမေရိကာန်ဂှ် ယဝ်ယူကရုၚ် လုပ်စိုပ်ကၠုၚ်မ္ဂး ဒှ်ကၠုၚ်အန္တရာယ် လ္တူဒတုဲဖဵုရုယှာတံဏောၚ်ဂှ်ကီု၊ အရာဏံဝွံ ပ္ဍဲကဵုဟိုတ်ပရူပရာအဓိက ပေါဲပၞာန် မက္တဵုဒှ်ဂမၠိုၚ် ဒှ်တဴမွဲဂှ် ညးမၞုံအခေါၚ်ဟီုဂး ပက်သကပ် ဟီုဂးလဝ်ရ။
ပ္ဍဲသၞာံ ၂၀၂၂ တေံ သမ္မတ ဗလာဒဳမာ ပူတေန် ကဵုလဝ်အမိၚ် သွက်ဂွံဗ္တိုက်ၜက်ၜေတ် ယူကရုၚ်ဂှ်ရ ကြဴနူပေါဲပၞာန် cold war တုဲဂှ် ဍုၚ်ရးပလိုတ်ကဵု ရုယှာ ဒိဓဗတ်ဆေၚ်ကၠုၚ်မုက် ပရေံအိုတ်မွဲ က္တဵုဒှ်လဝ်ရ။
သမ္မတအမေရိကာန်တြေံ ဂျဵုဗိုၚ်ဒေန်၊ က္ဍိုပ်သ္ကိုပ်ယူရောပ် ကေုာံ ယူကရုၚ်တံ ဟီုကၠုၚ်လဝ် ပရေၚ်ၜက်ၜေတ်ရုယှာဂှ်ဝွံ ဒှ်ပွပ္တိတ်ဇြဟတ် သ္ဂောံသီကၠေံ ဍုၚ်မၞုံကဵုအဝဵုစၟိန်ပြမာန်မွဲတုဲ ဗ္တိုက်ဖလှေက်အာ ဒပ်ရုယှာတံဏောၚ်ဂှ် ဟီုလဝ်ရ။
အကြာပူတေန်ကဵု ထြာမ်ဂှ် သဳကၠဳလဝ် သွက်ပရေၚ်ၜိုဟ်လလမ်ယူကရုၚ် နွံကီုလေဝ် ရုယှာ ဗလးကဵုအာတိဍာ်တံဂှ်ဟွံသေၚ်တုဲ ညံၚ်ယူကရုၚ် ဟွံဂွံဒှ်ကောန်ဂကောံနေတဝ်ဂှ် အာတ်မိက်လဝ် ဗွဲမခိုၚ်ကၠိုက်ရ။
Ref: Reuters