နျူဒေလဳ၊ ဨပရဴ ၂၅
ပ္ဍဲဒေသ ကာတ်ယှမဳယျာ ဒၞါဲအိန္ဒိယအုပ်ဓုပ်ဂှ် ဟိုတ်နူသၟာသေနာတ်ဂမၠိုၚ် ဗ္တိုက်ကၠုၚ်တုဲ ညးအာတရဴဂေတ်ဂၠးတိ ၂၆ တၠ လမျီုဒးအိုတ်အာတုဲ အိန္ဒိယ ဗက်ဗဒဴပ္တိတ် ကလုတ်တမာန်ပါကေဿတာန်တုဲ ကၟာတ်လဒဵုလဝ် ပယျဵုၜါဍုၚ်တုဲ သီုကဵုဒေါအ်ထောံ တၚ်တုပ်စိုတ်ပါ်ပရအ်ရပ်စပ်ဍာ်တုပ်ပ်ဂှ်ရ။
ပ္ဍဲကဵုပရေၚ်ဗ္တိုက်ဏံဂှ် ညးတံ ပါလုပ်ဆက်စပ်လဝ် ဟွံမွဲပုဟ်ဂှ် ပါကေဿတာန် တးပါဲလဝ်တုဲ သွက်ဂွံခၠေဝ်ပၠန် ကုပရေၚ်အိန္ဒိယ ကေတ်ကၠုၚ်အရေဝ်တံဂှ် ပ္ဍဲဂိတုဨပရဴ ၂၄ တေံ ကၠောန်ဗဒှ်လဝ် ကောံဓရီုပရေၚ်ဂီုကၠီုကောန်ဂကူမွဲရ။
သၟာသေနာတ် နူဂြိုပ် စိုပ်ကၠုၚ် ပ္ဍဲဒေသပါဟေဝ်ဂါန် ဒၞါဲညးအာတရဴဂေတ်ဂၠးတိတံ ကၠုၚ်စိုပ်ဂေတ်ဝေၚ်လေပ်မွဲဂှ်တုဲ ပန်ပှော်ဗ္တိုက်လဝ်ရ။
ပရေၚ်ဗ္တိုက်သာ်ဏံဂှ်ဝွံ ဒှ်တၠတဲဂကောံလဵုရောဟီုဂှ် လလောၚ်တြးလဝ် ဗွဲမလုပ်သၞောဝ်ဟွံမွဲကီုလေဝ် မဳဒဳယျာလ္ၚဵုတံဂှ်တှ်ေ ဒဒှ်ရဒှ်တၠတဲ ဂကောံမဆက်စပ်ကဵု Lashkar-e-Taiba ဖျေံသ္ဇိုၚ်ပါကေဿတာန်ဏံ မာန်ဂှ် ထ္မံက်ထ္ၜးလဝ်ရ။
သ္ကိုပ်ဝန်ဇၞော်အိန္ဒိယ နာရာန်ဒရာမိုဝ်ဒဳဝွံ သရောပ်ခမၞန်ထောံလၟေၚ်တရဴဍုၚ်သ္အာၚ်တုဲ စဴကၠုၚ်နျူဒေလဳတုဲ သဳကၠဳဒၟံၚ်ကဵု ဇၞော်သ္ကိုပ်ပရေၚ်ဂီုကၠီုဂမၠိုၚ်ရ။
ညးမကလိလောန်ဒး ပရေၚ်ဗ္တိုက်တံဂှ် ဗလးကဵုဟွံသေၚ်ပုဟ်ဂှ် သ္ကိုပ်ဝန်ဇၞော် မိုဝ်ဒဳ ဟီုကြီုလဝ်ရ။
ပ္ဍဲဒေသကာတ်ယှမဳယျာ သီုအိန္ဒိယ သီုပါကေဿတာန် မဟီုလဝ် ညးတံပိုၚ်ဂှ် ပရေၚ်ဒစဵုဒစးပၠန်ဂတး ပရေၚ်အိန္ဒိယအုပ်ဓုပ်ဂှ် နွံကၠုၚ်ဒၟံၚ် ကဵုစှော်သၞာံ ဗွဲမလအ်လရတုဲ အပ္ဍဲပရေၚ်ဗ္တိုက်ဂမၠိုၚ်ဂှ် မၞိဟ်ဂၠိုၚ်ကဵုလ္ၚီ ဒးချိုတ်အာလဝ်ကီုလေဝ် ပွမဗ္တိုက် ညးအာတရဴဂေတ်ဂၠးတိတံဂှ်တှ်ေ ဒှ်ပရေၚ်မဇြိုၚ်တုဲက္တဵုဒှ်မွဲရ။
တၚ်တုပ်စိုတ်ပါ်ပရအ်ဍာ် ကုပါကေဿတာန် ပွိုၚ်တြဴစှ်ေသၞာံပြၚ်ဂှ် ပ္ဍဲဂိတုဨပရဴ ၂၃ အခိၚ်ဗ္တံဂှ် အိန္ဒိယ ဒေါအ်ထောံလဝ်ရ။
ပယျဵုၜါဍုၚ်ဂှ်လေဝ် အိန္ဒိယ ကၟာတ်ထောံလဝ်တုဲ အာဇီုကပိုက်ကဵု ပရေၚ်ဗၞိက်ဂေတ်ဂြိပ်မာန်ရ။
အလဵုအသဳနျူဒေလဳ သီုကဵုရုပ်သီလဝ် အခေါၚ်ကောန်ဍုၚ်ပါကေဿတာန်တံ ဟွံဒးကေတ်ဝဳဇြာဂှ်ရ။
ကလုတ်တမာန်အိန္ဒိယ စပ်ကဵုလ္ပာ်ပၞာန် နွံပ္ဍဲပါကေဿတာန်ဂှ် ကလေၚ်ကော်ဖျဴလဝ် နျူဒေလဳတုဲ ကလုတ်တမာန်ပါကေဿတာန် စပ်လ္ပာ်ပၞာန်တံဂှ်လေဝ် သွက်ဂွံတိတ်စ္ဍးနူဍုၚ် အပ္ဍဲပွိုၚ်မွဲသတ္တာဟဂှ် စၞောန်ပ္ညုၚ်လဝ်ရ။
Ref: BBC