ထြာမ်ကဵုသတိ ကုအဳရာန် ယဝ်ဟွံကေတ်တၚ်တုပ်စိုတ်နျူကလဳယျာမ္ဂး ဒးဆေၚ်အာမုက် ကုပရေၚ်ဗ္တိုက် ဟွံကေၚ်ဂဗမွဲလှ်ေဂှ်ဏောၚ်

ဒိုဝ်ဟာ၊ မေ ၁၈

နကဵုအဳရာန် ဒးရုဲစှ်သ္ဂုတ်သွာတ် ညံၚ်ဟွံဂွံကၠောန်ပ္တိတ်လွဟ်နျူကလဳယျာဏောၚ်တုဲ ဟွံသေၚ်မ္ဂး ဒးဆေၚ်အာမုက် ကုပရေၚ်ဗ္တိုက်မၞိဟ်ဂမၠိုၚ် ဟွံကေၚ်ညာတ်မွဲလှ်ေတံဂှ်ဏောၚ် သမ္မတအမေရိကာန် ဒဝ်နေဝ်ထြာမ် ဟီုလဝ် အပ္ဍဲဝိုၚ်စသုၚ်ပယျာံဂယး တၠကမၠောန်ပရေၚ်ပိုန်ဒြပ်ဂမၠိုၚ် မတိုန်စိုပ်ကၠုၚ် ပ္ဍဲဍုၚ်ဒိုဝ်ဟာ ပ္ဍဲဂိတုမေ ၁၅ ပယျာံဂယးဂှ်ရ။

သမ္မတအဳရာန် မာသံက် ပဳဇြက်ခဳယာန် ဟီုလဝ်ပြဟ်ဟ်တေံ ဒဒှ်ရဒုၚ်တဲဟွံမာန် စပ်ကဵုပရေၚ်အာတ်မိက် သွက်ဂွံပလီုကၠေံ စမြိုၚ်နျူကလဳယျာတဳဟဳရာန်တံဂှ်ရ။

နကဵုအဳရာန် ဗလးအာတဲ အခေါၚ်မဂွံရပ်စပ်စကာ ဇြဟတ်ဓာတ်နျူကလဳယျာဂှ် ဟွံသေၚ်၊ ၜိုန်ဒးဒုၚ်ဓရတ်ဒၟံၚ်ကီုလေဝ် ဟိုတ်နူအကာဲအရာသာ်လဵုမွဲဒှ်ဒှ် ဗလးအာအခေါၚ်အရာညးတံ ဟွံသေၚ်ပုဟ်ဂှ် သမ္မတအဳရာန် ဟီုရ။

သွက်ဂွံဒ္ဂေတ်ဗက် အတိုၚ်ဍုၚ်သ္အာၚ်တအ် မအာတ်မိက်လဝ် သွက်ဂွံဒေါအ်ဒေၚ်ကဵု တၚ်ရန်တၟံသ္ဂောံကၠောန်ပ္တိတ်လွဟ်နျူကလဳယျာဂှ် အဳရာန် ယဝ်ကၠောန်မ္ဂး ကၠောန်ကၠုၚ်မာန်ကီုလေဝ် ဂွံကေတ်တၚ်တုပ်စိုတ်ဒတုဲဂှ် နွံပၟိက်ဒၟံၚ်ဏီရောၚ် ထြာမ် ဟီုရ။

ပရေၚ်လစွံစိုတ်လ္တူအဳရာန် ဂွံဆက်ကြံၚ်မ္ၚိုဟ်အာဂှ် အမာတ်ရဳပါပလေတ်ကာန် အပ္ဍဲကၠတ်ထဝ် ဖ္တိုက်ဖ္အောဝ်လဝ် ထြာမ်ရောၚ် ဂွံတီကေတ်ရ။

စပ်ကဵုကိုန်စဳမာန်နျူကလဳယျာညးတံတုဲ အဳရာန် ပ္တိတ်ဒၟံၚ်ဇြဟတ် ညံၚ်ဂွံဂွံပရေၚ်ထံက်ဂလာန် နူရုယှာကဵုကြုက်ရ။

အဳရာန်ဝွံ ပ္တိတ်ဒၟံၚ်ဇြဟတ် ဂွံပ္တိတ်လွဟ်နျူကလဳယျာ​ရောၚ် ဍုၚ်သ္အာၚ်ဂမၠိုၚ် ဒှ်ဒၟံၚ်သံသယကီုလေဝ် ကိုန်စဳမာန်နျူကလဳယျာညးတံဝွံ ဒှ်သွက်ပရေၚ်ၜိုဟ်လလမ်သက်က်ရောၚ် တဳဟဳရာန် ခၠေဝ်ပလန်ကၠုၚ်လဝ်ရ။

နူကဵုတၚ်တုပ်စိုတ်နျူကလဳယျာ မထ္ပက်လဝ်စၟတ်တဲ အကြာအဳရာန်ကဵု ဍုၚ်ဇြဟတ်ဇၞော်ဂမၠိုၚ်ဂှ် ဒဝ်နေဝ်ထြာမ် နုက်ပ္တိတ်လဝ် အမေရိကာန်တုဲဂှ် တဳဟဳရာန် ကၠောန်ပ္တိတ်ဂလိုၚ်ပ္တိုန်ဒၟံၚ် ပရေၚ်သ္အးဇ္ၚးယူရေနဳယာန် စဵုကဵုကဆံၚ် ကြပ်ကၠောန်ပ္တိတ်လွဟ်မာန်ရ။

Ref: Fox News

Leave a Reply

Your email address will not be published. Required fields are marked *