တဳဟဳရာန်၊ မေ ၂၀
စပ်ကဵုကိုန်စဳမာန်နျူကလဳယျာ တဳဟဳရာန်တုဲ အခိၚ်လၟုဟ် သဳကၠဳဒၟံၚ်တံ နွံဒၟံၚ်ကီုလေဝ် ဝန်ဇၞော်ကာဍုၚ်သ္အာၚ် အဗာတ် အာရက်ချဳဂှ်တှ်ေ ဂွံတၚ်တုပ်စိုတ် ကုဍုၚ်ဇြဟတ်ဇၞော်ဂမၠိုၚ်ကဵုဒှ် ဟွံဂွံကဵုဒှ် ဆက်ကၠောန်အာ ပရေၚ်သ္အးဇ္ၚးယူရေနဳယာန်ဏောၚ်ဂှ် ပ္ဍဲဂိတုမေ ၁၈ တေံ ဟီုလဝ်ရ။
ယဝ်အမေရိကာန် စိုတ်လုပ်စ သွက်ဂွံကၠောန် ညံၚ်အဳရာန်ဟွံဂွံပိုၚ်ပြဳလွဟ်နျူကလဳယျာ ဍာံပြမ္ဂး ကလိဂွံတၚ်တုပ်စိုတ်မာန်ရောၚ် ဝန်ဇၞော်အာရက်ချဳ ချူလဝ် ပ္ဍဲမဳဒဳယျာပရေၚ်မၞိဟ် X ရ။
သွက်ပရေၚ်သဳကၠဳပ္ညဳပ္ညပ်ဇြိုဟ်နက် မကေတ်တၚ်သောၚ်ကလး ညံၚ်သွဟ်သာ်ဏံ ဂွံတိတ်ချိုတ်ပၠိုတ်ဂှ် ညးတံ ဒှ်ဒၟံၚ်ဒတုဲရရောၚ်ဂှ်လေဝ် ညး ဟီုရ။
ဆ္ဂး ဂွံတၚ်တုပ်စိုတ်ကဵုဒှ် ဟွံဂွံကဵုဒှ် ဆက်ကၠောန်အာ ပရေၚ်သ္အးဇ္ၚးပ္ဍဲအဳရာန်ဏောၚ်ဂှ် ညး ဟီုဗပေၚ်လဝ်ရ။
အခိၚ်လၟုဟ် အဳရာန် ကၠောန်ပ္တိတ်သ္အးဇ္ၚးဒၟံၚ် ယူရေနဳယာန် စဵုကဵု ၆၀ ပြကောဋိကိုဋ်ပြၚ်တုဲ ဂၠိုၚ်နူကဵု အရာမခုတ်ပ္တန်လဝ် ပ္ဍဲတၚ်တုပ်စိုတ် သၞာံ ၂၀၁၅ တေံ ၃ ဒဿမ ၆၇ တၟံကၠံကီုလေဝ် အောန်ဒၟံၚ်နူကဵုကဆံၚ်ပ္တိတ်လွဟ်ဂွံ ၉၀ တၟံကၠံဂှ်ဏီရ။
တၚ်ရန်တၟံ နျူကလဳယျာညးတံဝွံ ဒှ်သွက်လ္ပာ်အရာပ်ရပ်စပ်စကာသၟးရတုဲ ဒှ်သွက်ပရေၚ်ၜိုဟ်လလမ်ရောၚ် လ္ပာ်အဳရာန် ဟီုလဝ်ရ။
အခေါၚ်ကၠောန်ပ္တိတ်သ္အးဇ္ၚး ယူရေနဳယာန် သွက်ပရေၚ်ၜိုဟ်လလမ်ဂှ်ဝွံ ဒှ်ကိစ္စဟွံဒးပညဳမွဲဏောၚ်ဂှ် အဳရာန် ဟီုရ။
ဆ္ဂး သၞောတ်ဗ္ၜတ်ၜိုတ်လဵုမ္ဂး ဂွံသ္အးဇ္ၚး ယူရေနဳယာန်ဂှ်ရော၊ ဗၞတ်ၜိုတ်လဵုမ္ဂး ကၠောန်ပ္တိတ်ဂွံရောဟီုဂှ် ရေၚ်တၠုၚ် နကဵုတၚ်တုပ်စိုတ်ယာယဳ ကေုာံ ပရေၚ်သၞောတ်ဗ္ၜတ်လဝ်တံမာန်ရောၚ် အဳရာန် ဟီုလဝ်ရ။
နကဵုအဳရာန် ယဝ်ဟွံကေတ်တၚ်တုပ်စိုတ် နျူကလဳယျာပုဟ်ဟီုမ္ဂး ဒးဂဗအာကဵု ပရေၚ်ဗ္တိုက်ဟွံကေၚ်ဂဗမွဲလှ်ေတံဏောၚ်ဂှ် သမ္မတအမေရိကာန် ဒဝ်နေဝ်ထြာမ် ဘပဠလဝ်ရ။
Ref: AFP