လတ်အာန်ဂျလိသ်၊ ဂျောန် ၁၀
ညးထ္ၜးဆန္ဒဟွံပြေတဴစိုတ် လ္တူပရေၚ်ဍိုက်ဗ္တိုက်ဒၟံၚ် ညးဆုဲပြံၚ်မံၚ်တန်တဴတံ အခိၚ်ဆေၚ်မုက် ကုကောန်ဂကောံ ပရေၚ်ထိၚ်ဒဝ်သၞောဝ်ဥပဒေဂှ် ပ္ဍဲကဵုတ္ၚဲထ္ၜးဆန္ဒ မရနုက်ကဵုတတိယဂှ် ကွဳစက်မၞုံလဒေါဝ်ဍုၚ် လတ်အာန်ဂျလိသ် ဍုၚ်အမေရိကာန် ဒးဒုၚ်စံၚ်လဝ်ရ။
ကောန်ဂကောံမၚ်မွဲကောန်ဂကူ သမ္မတအမေရိကာန် ဒဝ်နေဝ်ထြာမ် မဖျေံလဝ်ဂမၠိုၚ် ရပ်စပ်မခတိုဟ်ဍာ်ရမတ်တုဲ ပ္တိတ်ကၠုၚ်ဇြဟတ် သွက်ဂွံပါ်ထ္ကးမၞိဟ်ဂှ်ရ ကောန်ၚာ်သၟတ်မွဲတၠ မပါလုပ် မၞိဟ်ဗွဲမဂၠိုၚ် ဇီုကပိုက်ကလိဂွံလဝ်ဝပ် နွံရ။
ကောန်ဒပ်ဂမၠိုၚ် ကြဴနူပါ်ထ္ကးဂကောံမၞိဟ် ထ္ၜးဒၟံၚ်ဆန္ဒ မကၟာတ်လဒဵုလဝ်ဂၠံၚ်ဇၞော် ဍုၚ်လတ်အာန်ဂျလိသ်ဂှ်တုဲ ဒပ်ဗၠာဲသၟိၚ် ကဵုကၠုၚ်အမိၚ် ညးမထ္ၜးမံၚ်ဆန္ဒ မကောံဒၟံၚ်ပ္ဍဲလဒေါဝ်ဂၠံၚ် ဍုၚ်လတ်အာတ်ဂျလိသ် သွက်ဂွံတိတ်စ္ဍး လွာဲဂှ်ရ။
သမ္မတထြာမ်ဂှ်တှ်ေ စဵုဒၞါတုဲဟီုဒၟံၚ် ပြဝဒပ်မၚ်မွဲကောန်ဂကူ ညးမဗလးလဝ်ဂှ်တုဲ ညံၚ်သၞောဝ်ဥပဒေဂွံအုပ်ဓလီု ရေၚ်တၠုၚ်လဝ်ရောၚ် ဂးရ။
သ္ကိုပ်အုပ်ဓုပ်တွဵုရး ဂဴလဳဝှဝ်နဳယျာ ဂါဗေန် နျူသောန်ဂှ်တှ်ေ အာတ်မိက်လဝ် သွက်ဂွံကလေၚ်ရုပ်သီကဵု ဒဒှ်မမဖျေံလဝ်ကောန်ဒပ်တံဂှ်တုဲ သွက်ပြဝဟွံလုပ်သၞောဝ်ဏံဂှ် စောဲအာဂဗုတ် လ္တူအလဵုအသဳဏောၚ်ဂှ် ဟီုလဝ်ရ။
ညးထ္ၜးဆန္ဒဂမၠိုၚ် စံၚ်လဝ်ကွဳစက်မသက္ကုမၞိဟ်ဒဳ နွံဒၟံၚ်လဒေါဝ်ဍုၚ်တံဂှ်ရောၚ် ဒပ်ဗၠာဲသၟိၚ် ဟီုရ။
ထြာမ်ဂှ်တှ်ေ ပ္ဍဲဍုၚ်လတ်အာန်ဂျလိသ် ဒဒှ်ရအကာဲအရာပရေံဒၟံၚ်ဂှ်ကီု၊ သွက်ဂွံရပ်ဒက် ညးမကၟာတ်လဝ်မုက်မတ်ဂှ် ဖ္တိုက်ဖ္အောဝ်လဝ် နူကဵုလပှ်ကျာရ။
အပ္ဍဲကဵုပရေၚ်ဟွံညိၚ်ဝတ် စက္တဵုဒှ်ကၠုၚ် ဟိုတ်နူလုပ်ဍိုက်ဗ္တိုက်ဒး ညးဆုဲပြံၚ်မံၚ်တန်တဴ ပ္ဍဲဂိတုဂျောန် ၈ တေံဂှ်တုဲ မၞိဟ်ဟွံအောန်နူ ၁၀ တၠ ဒးဒုၚ်ရပ်လဝ်ရ။
အခိၚ်ဖျေံစွံလဝ် ဂကောံဒပ်မၚ်မွဲကောန်ဂကူ ဂဴလဳဝှဝ်နဳယျာ ၃၀၀ တုဲဂှ် သွက်ဂွံဖျေံစွံလဝ် သီုကဵုကောန်ဒပ်မရေန်တံဂှ်လေဝ် စဳဇန်လဝ်ရောၚ် ဂွံတီကေတ်ရ။
Ref: BBC