မဝ်သဂိုဝ်၊ ဂျောန် ၁၉
ပရေၚ်အေဿရေ ဆက်ဗ္တိုက်ကၠုၚ်မံၚ်အဳရာန်ဂှ် ဟွံလုပ်သၞောဝ်ပုဟ်ဂှ် ပ္ဍဲဂိတုဂျောန် စၟတ်တ္ၚဲ ၁၇ တေံ ဌာနဝန်ဇၞော်ကာဍုၚ်သ္အာၚ်ရုယှာ ဟီုလဝ်တုဲ သွက်ပဋိပက္ခ မဆက်စပ်ကဵုကိုန်စဳမာန်နျူကလဳယျာဒဳဟဳရာန်ဂှ် ဂၠါဲအာသွဟ်နူကဵုဂၠံၚ်ကလုတ်တမာန်ရဏောၚ်ဂွံဂှ် ဟီုလဝ်ရ။
ဒဒှ်မအေဿရေ ဆက်ဗ္တိုက်ကၠုၚ်ဒၟံၚ် ဒၞါဲဒတန်နျူကလဳယျာ အဳရာန် မရန်လဝ်သွက်ပရေၚ်ၜိုဟ်လလမ်ဂှ်ဝွံ ရံၚ်ကဵုသၞောဝ်ဂၠးတိမ္ဂးလေဝ် ဟွံလုပ်သၞောဝ်တုဲ ခၞံဗဒှ်ဒၟံၚ်အန္တရာယ်ဒုၚ်တဲဟွံမာန် သွက်ဂီုကၠီုဂၠးတိဂှ်တုဲ လ္တူဂၠးတိဏံ ညံၚ်ဘဲကပ်နျူကလဳယျာမွဲဂွံဒှ်ကၠုၚ်ဂှ် ဓရိုဟ်ဏာဒၟံၚ်ဏောၚ် ထ္မံက်ထ္ၜးလဝ် ပ္ဍဲတၚ်လလောၚ်တြးဌာနဝန်ဇၞော်ကာဍုၚ်သ္အာၚ်ရုယှာ နူကဵုထလဳဂရာမ်ရ။
တၚ်တုပ်စိုတ် ညံၚ်ဟွံဂွံတြးနျူကလဳယျာဂှ် အဳရာန် တုပ်လဝ်စိုတ်ဖိုဟ်တုဲ သ္ဂောံဂွံတၚ်တုပ်စိုတ်နျူကလဳယျာတၟိ ကုအမေရိကာန်ဂှ်လေဝ် ပလေဝ်ပလေတ်ဒၟံၚ်ဂှ် ရုယှာ ဟီုရ။
စပ်ကဵုဗ္ၜတ် ရုၚ်စက်နျူကလဳယျာအဳရာန် ဇီုကပိုက်လီုလာ်အာဂှ်တုဲ သောဲသောဲဗြောဲဗြောဲဂှ်တှ်ေ မၚ်စၟဳဒၟံၚ် အခိၚ်အေဂျေန်ဇြဳ အဏုလက်ကၠိုက်ဍုၚ်နာနာ ဒုၚ်စဳရေၚ်ဂှ် ရုယှာ ဟီုရ။
သွက်ဂွံပါလုပ် နဒဒှ်ညးပညဳကဵုအကြာ ပ္ဍဲပဋိပက္ခအေဿရေ ကေုာံ အဳရာန်ဂှ် ဒှ်ဒၟံၚ်ဒတုဲရရောၚ် ရုယှာ ဟီုလဝ်တုဲ စပ်ကဵုကိစ္စသ္ဂောံဒုၚ်တဲ ယူရေနဳယာန် အဳရာန်တအ် မသ္အးဇ္ၚးလဝ်ဂှ်လေဝ် သဳကၠဳဒၟံၚ်ဖိုဟ်ရောၚ် သ္ဂးရ။
ယဝ်အဳရာန် ဂွံအာလွဟ်နျူကလဳယျာမ္ဂး ဒှ်ကၠုၚ်ဘဲအန္တရာယ် သွက်ဍုၚ်ညးတံ ဂွံဒတူလိုၚ်ဂျိုၚ်လမျီုဏောၚ်ဂှ်ရ မ္ဒးဗ္တိုက်လဝ်အဳရာန်ရောၚ် အေဿရေ ဟီုတဴရ။
ပ္ဍဲကဵုပရေၚ်အေဿရေ ဗတိုက်ကၠုၚ် ရုၚ်စက်အဳရာန် မဒှ်ရုၚ်စက်နျူကလဳယျာသၟဝ်တိဂှ် ညံၚ်အမေရိကာန်ဂွံပါလုပ်ကၠုၚ်ဂှ် ချပ်ဒၟံၚ်ရောၚ် ပရိုၚ်ဂမၠိုၚ် ထ္မံက်ထ္ၜးလဝ်ဂှ်ရ အကာဲအရာကြံၚ်မ္ၚိုဟ် ဆက်သၠုၚ်တိုန်ကၠုၚ်မာန်ရ။
Ref: Reuters