ဒူဗိုၚ်၊ ဂျောန် ၂၀
သမ္မတထြာမ် ဒဝ်နေဝ်ထြာမ် ဖအောဝ်ကၠုၚ်အဳရာန် သွက်ဂွံဖျေံလွဟ်တုဲ က္ဍိုပ်သ္ကိုပ်အဳရာန် အာယာတဝ်လာ အလဳ ခါမေနဳ ခၠေဝ်ပလန်ကၠုၚ် ပ္ဍဲဂိတုဂျောန် ၁၈ တေံဂှ်တှ်ေ ယဝ်အမေရိကာန် ဗ္တိုက်ကၠုၚ်ညးတအ်မ္ဂး ပြဒ္ဒညာအဆက်လက္ကရဴ ကလေၚ်ပလေဝ်ဟွံဂွံတအ် ဒှ်ကၠုၚ်ဏောၚ်ဂှ် ကဵုလဝ်သတိရ။
အစဳဇန်ဗ္တိုက်အာအဳရာန်ဂှ် ထြာမ် တုပ်လဝ်စိုတ်တုဲကီုလေဝ် ဟွံဂွံသ္ဂုတ်သွာတ်ဏီပုဟ်ဂှ် ဌာန်ပရိုၚ်အမေရိကာန် CBS ထ္မံက်ထ္ၜးလဝ်ရ။
ယဝ်အဳရာန် ဗလးကၠေံကိုန်စဳမာန်နျူကလဳယျာညးတအ်မ္ဂး သမ္မတအမေရိကာန် သ္ဂုတ်သွာတ်လဝ် သွက်ဂွံရုပ်သီအာအစဳဇန်ဗ္တိုက်ဂှ်ဏောၚ်ဂှ် ဌာန်ပရိုၚ်ဂှ် နိဿဲကေတ် သၞာဲဒဴထံၚ်ပရိုၚ်မွဲတၠ ဟီုလဝ်ဂှ်တုဲ ထ္မံက်ထ္ၜးလဝ်ရ။
က္ဍိုပ်သ္ကိုပ်ခါမေနဳ ဟီုကၠုၚ်လဝ် ဒဒှ်ရသဘဴအဳရာန် ဂွံခၠေဝ်ပလန်ကၠုၚ်လ္တူပရေၚ်ဘပဠတအ် ခိုဟ်ဟ် ဟွံမွဲလဝ်ပုဟ်ဂှ်တုဲ နကဵုညးတအ် ပွမကဵုကေတ်ပရေၚ်ဂီုကၠီုအနိၚ် ဟွံသေၚ်မ္ဂး ပွမကဵုဝေၚ်ပၞာန်အနိၚ်တအ်ဂှ် ဒုၚ်တဲဟွံသေၚ်ပုဟ်ဂှ် ဟီုလဝ်ရ။
ရုယှာဂှ်တှ်ေ ဒဒှ်မအေဿရေ ဗ္တိုက်ဒၟံၚ်အဳရာန်ဂှ် ဟွံလုပ်သၞောဝ်ရောၚ် ဟီုလဝ်တုဲ နူကဵုကိုဝ်ရဳယျာသၟဝ်ကျာဂှ်တှ်ေ ပွမဗ္တိုက်ဒၟံၚ်အဳရာန်ဂှ်ဝွံ ကလိလောန်ဒၟံၚ် အမှုရာဇဝတ်လ္တူဂကူမၞိဟ်တံဏောၚ်ဂှ် ဟီုလဝ်ရ။
ထြာမ် ကဵုကၠုၚ်အမိၚ် သွက်ဂွံဖျေံလွဟ်ဂှ်တှ်ေ ဒုၚ်တဲဟွံမာန်ပုဟ်ဂှ် ခါမေနဳ ကလေၚ်ခၠေဝ်ကၠုၚ်လဝ်ရ။
အခိၚ်ညးတအ် ပညဳဒၟံၚ်ကုအမေရိကာန် နနဲတိုက်ရိုက်ဟွံသေၚ်ဏံဂှ် အေဿရေ ပၞတ်စိုတ်တုဲဗ္တိုက်ဒၟံၚ်ညးတအ်ဏောၚ်ဂှ်လေဝ် ခါမေနဳ ဂးရ။
ပ္ဍဲပရေၚ်အေဿရေ ဗ္တိုက်ကၠုၚ်ဒၟံၚ် ဒၞါဲဒတန်နျူကလဳယျာ အဳရာန်တအ်ဂှ် အမေရိကာန် ချပ်ဒၟံၚ်သ္ဂောံပါလုပ်အာကီုဂှ်လေဝ် ပရိုၚ်တိတ်ဒၟံၚ်ရ။
အေဿရေ ဗ္တိုက်ကၠုၚ်တုဲ ပ္ဍဲကဵုရုၚ်စက်နျူကလဳယျာအဳရာန် ဒၞါဲရုၚ်စက်သၟဝ်တိ လီုလာ်ဟွံလောဲတအ်ဂှ် အမေရိကာန်မွဲရ ပလီုကၠေံမာန်ရောၚ် ညးလ္ၚတ်ပရေၚ်ပၞာန်ဂမၠိုၚ် ဟီုရ။
အကြာဏံ ဟိုတ်နူအေဿရေ ဗ္တိုက်ကၠုၚ်ဂှ်တုဲ ဒၞါဲဒတန်နျူကလဳယျာအဳရာန် ၜါဒၞါဲ လီုအာလဝ်ရောၚ် ဂကောံကုလသမဂ္ဂ မၚ်ရံၚ်နျူကလဳယျာဂှ် ဟီုလဝ်ရ။
Ref: Agencies