သၞောဝ်ဥပဒေဒက်ပ္တန်ဍုၚ်မန် ညံၚ်သ္ဂောံချူခၞံဒတုဲ အပ္ဍဲပွိုၚ် (၆) ဂိတုဂှ် ကောံဓရီုပရေၚ်ဂကူမန် သ္ဂုတ်သွာတ်

မတ်မလီု၊ မေ (၇)
သၞောဝ်ဥပဒေသ္ဇိုၚ် ဒက်ပ္တန်ကၟိန်ဍုၚ်ပံၚ်ကောံဖေဝ်ဒရာ ကေုာံ သၞောဝ်ဥပဒေသ္ဇိုၚ် ဒက်ပ္တန်ဍုၚ်မန်ဂှ် ကၠုၚ်စိုပ် အပ္ဍဲပွိုၚ် (၆) ဂိတုဏံ ညံၚ်ဂွံချူခၞံဒတုဲ သ္ဂုတ်သွာတ်လဝ် ပ္ဍဲကောံဓရီုပရေၚ်ဂကူမန်ရောၚ် ညးမၞုံအခေါၚ်ဟီုဂး ကောံဓရီုပရေၚ်ဂကူမန် သၞာံ (၂၀၂၂) နာဲဝဏ္ဏမာန် ဟီုကဵုဌာန်ပရိုၚ်သြၚ်လောန်တိုၚ်(မ်) ရ။

သွက်ဂွံချူခၞံ သၞောဝ်ဥပဒေသ္ဇိုၚ် ကၟိန်ဍုၚ်ပံၚ်ကောံဖေဝ်ဒရာ ကေုာံ သၞောဝ်ဥပဒေသ္ဇိုၚ် ဍုၚ်မန်ဂှ် ဒက်ပ္တန်လဝ် ကမ္မတဳပရေၚ်ချူခၞံပ္ညဳပ္ညပ် နကဵုညးစၞး (၁၂) တၠ နူသွာၚ်ခမဳသၚ်မန်၊ ဗော်ဍုၚ်မန်တၟိ၊ ဗော်ညဳသၟဟ်မန် ကေုာံ သွာၚ်မှာဇန်မန်နာနာတံရ။

ကမ္မတဳဂှ်ဝွံ ဒးချူခၞံ သၞောဝ်ဥပဒေသ္ဇိုၚ်ဒက်ပ္တန် ကၟိန်ဍုၚ်ပံၚ်ကောံ ဖေဝ်ဒရာ ကေုာံ သၞောဝ်ဥပဒေသ္ဇိုၚ် ဒက်ပ္တန်ဍုၚ်မန်ဂှ် အပ္ဍဲပွိုၚ် (၆) ဂိတုဒတုဲ တုဲ ကာလချူခၞံတုဲမ္ဂး ပ္ဍဲကောံဓရီု သွာၚ်သီုဖအိုတ် မပါလုပ်မွဲဂှ် သွက်ဂွံသ္ပအာဒတန် နွံရောၚ်ဂးရ။

“သၞောဝ်သ္ဇိုၚ်ဒက်ပ္တန် ကၟိန်ဍုၚ်ပံၚ်ကောံဖေဝ်ဒရာဂှ်တှ်ေ ဂွံတၚ်တုပ်စိုတ် ကဵုကောန်ဍုၚ်အရၚ် မၞုံဒၟံၚ် ပ္ဍဲကၟိန်ဍုၚ်ဗၟာတံ အိုဿီုတုဲမှ သၞောဝ်သ္ဇိုၚ်ဒက်ပ္တန် ကၟိန်ဍုၚ်ပံၚ်ကောံဖေဝ်ဒရာ မံက်တိတ်ကၠုၚ်ဏောၚ်၊ ဆ္ဂး သၞောဝ်သ္ဇိုၚ်ဒက်ပ္တန်ဍုၚ်မန်ဂှ် ဟိုတ်နူသ္ပအစာံလဝ်ကဵု အလုံဂကူမန်မွဲဂှ်ရ ၜါဏံဂှ် တၚ်တၞဟ်ခြာ နွံရ၊ ပ္ဍဲမူဖေဝ်ဒရာဂှ်တှ်ေ ပ္ညဳပ္ညပ်ကုကောန်ဍုၚ်အရၚ်တံတုဲ ကာလဂွံတၚ်တုပ်စိုတ်မှ သ္ဂုတ်သွာတ်ဂွံရောၚ်၊ ဆ္ဂး ပ္ဍဲမူဍုၚ်မန်ဂှ်တှ်ေ အပ္ဍဲပွိုၚ် (၆) ဂိတုဏံ ချူခၞံတုဲဗက် သ္ပဒတန်မာန်ရောၚ်” သာ်ဝွံ ညးမၞုံအခေါၚ်ဟီုဂး ကောံဓရီုပရေၚ်ဂကူမန် သၞာံ ၂၀၂၂ နာဲဝဏ္ဏမာန် ဟီုကဵုဌာန်ပရိုၚ်သြန်လောန်တိုၚ်(မ်) ရ။

ပ္ဍဲကောံဓရီုပရေၚ်ဂကူမန် မကၠောန်ဗဒှ်လဝ် ပွိုၚ် (၄) တ္ၚဲဂှ် ဂကောံခမဳသၚ်မန်၊ ဗော်ဍုၚ်မန်တၟိ၊ ဗော်ညဳသၟဟ်မန် ကေုာံ ဂကောံမှာဇန်မန်နာနာတံ ပါလုပ်တုဲ ဂကောံပံၚ်ကောံဂကူမန် မသ္ပစၞးကဵု အလုံမွဲဂကူမန် ညံၚ်သ္ဂောံမံက်တိတ်ကၠုၚ်ဂှ် ဒက်ခၞံပ္အပ်ပြာပ်ကဵုတာလျိုၚ် ကုဂကောံပ္ညဳပ္ညပ်( သွာၚ်ဇဳ) မွဲဂကောံရ။

သ္အာၚ်နူဂှ်ပၠန် တ္ၚဲကောန်ဂကူမန် သွက်ဂွံကၟာတ်ရုၚ် ဗွဲမလုပ်သၞောဝ် ပ္ဍဲဒေသကောန်ဂကူမန်တံမာန်ဂှ် အလုံကောန်ဂကူမန် ဂကောံညးကုညး သွာၚ်ဇဳ ညံၚ်ဂွံဂိုတ်ဂ္စါန်လွဳပရာအာကီု ပ္ဍဲတ္ၚဲကောန်ဂကူမန် ညးဍုၚ်ကွာန်မန်တံ နအလဵုဆန္ဒဇကု ကၟာတ်ရုၚ်ကၟာတ်ကမၠောန်တုဲ ညံၚ်ဂွံထ္ၜးစိုတ်ဓာတ် ဆဳဇာတိမာန်ဇာတိ အလုံဂကူမာန်ဂှ် နူကောံဓရီု ဖ္တိုက်ဖ္အောဝ်လဝ်ရ။

ပ္ဍဲကောံဓရီု ပရေၚ်ဂကူမန် မကၠောန်ဗဒှ်လဝ် နူဂိတုမေ စၟတ်တ္ၚဲ (၂) စဵုစိုပ် စၟတ်တ္ၚဲ (၅) ပွိုၚ် (၄) တ္ၚဲဂှ် ကၠောန်ဗဒှ်လဝ် ပ္ဍဲတိဍာ်ဗော်ဍုၚ်မန်တၟိ ဗ္ဒိုပ်ညဳသာ၊ ဌာနပရေၚ်ပညာကောန်ဂကူမန် မၞုံဒေသကၞောတ်ၜဳရေဝ်တေံတုဲ ညးစၞး (၂၅၀) ပြၚ် တိုန်စိုပ်သဳကၠဳလဝ်ရ။

ပရိုၚ်−သြၚ်လောန်တိုၚ်(မ်)