အလဵုအသဳသေံ ပ္တိတ်ကဵုစၟတ်တဲ အခေါၚ်ကၠောန်ကမၠောန် ကုသၟာကမၠောန်ဗၟာ ဟွံလုပ်သၞောဝ်တံရောၚ်

မတ်မလီု၊ ဂျူလာၚ် (၉)

ကုသၟာကမၠောန်ကၟိန်ဍုၚ်ဗၟာ မတတ်ကၠောံပယျဵုဒၞက် ဟွံဗဗွဲဓဝ်တုဲ လုပ်စိုပ်ကၠုၚ်တံဂှ် ပ္တိတ်ကဵုအာ အခေါၚ်ကၠောန်ကမၠောန် (တၞးကာဒ်အရံၚ်သာ်ပ္ကဴ) ဂှ်ရောၚ် အလဵုအသဳသေံ သ္ပဒတန်လလောၚ်တြးလဝ်ရ။

သၟာကမၠောန်ဆုဲပြံၚ် နူကဵုကၟိန်ဍုၚ်ဗၟာ၊ လာအိုဝ်၊ ကာမ္ဗောဒဳယျာ၊ ဝေဒ်နာမ် မလုပ်စိုပ်ကၠောန်ကမၠောန် သ္ပဒတဴဒၟံၚ် ပ္ဍဲကၟိန်ဍုၚ်သေံ ဟွံမွဲကဵုသက်သဳ ဟွံလုပ်သၞောဝ်တံဂှ် ကၠောန်သ္ပကဵုအာ တၞးကာဒ်အရံၚ်သာ်ပ္ကဴ မကော်ဂး စၟတ်တဲအခေါၚ်ကၠောန်ကမၠောန်ရောၚ်ဂှ် အလဵုအသဳသေံ သ္ပဒတန်လဝ် ပ္ဍဲကဵုဂိတုဂျူလာၚ် (၅) တုဲကၠုၚ်တေံရ။

ညးစိုန်သ္ကီု ပရေၚ်သၟာကမၠောန်ဆုဲပြံၚ်တံဂှ် ပွမကၠောန်ၜိုတ် သွက်ဂွံပ္တိတ်ကဵု စၟတ်တဲအခေါၚ်ကၠောန်ကမၠောန် သၟာကမၠောန်ဟွံလုပ်သၞောဝ်တံဂှ်ဝွံ ရေၚ်တၠုၚ် သွက်ဂွံဗပေၚ် တၚ်နွံပၟိက် သၟာကမၠောန်ကၟိန်ဍုၚ်သေံရဂှ် သ္ၚဳဂၠိပ်လဝ်ရ။

အလဵုအသဳသေံ ထ္ပက်ကဵုစၟတ်တဲ အခေါၚ်ကၠောန်ကမၠောန် သာ်ဏံဂှ်ဝွံ ဒှ်အခေါၚ်အရာ သွက်သၟာကမၠောန်ဆုဲပြံၚ်ဗၟာတံရဂှ် ညးကဵုကသပ်ဂၞန် ဇာဇၞိက်အခေါၚ်အရာ သၟာကမၠောန်ဆုဲပြံၚ် ဥူအံၚ်ကျဝ် ဟီုရ။

“အလဵုအသဳသေံဂှ် လက္ကရဴကိုဝ်ဝေဒ်တုဲဂှ် မိက်ဂွံသၠုၚ်ပ္တိုန် ပရေၚ်ပိုန်ဒြပ်ဍေံတံဂှ် မွဲသ္ကုတ်၊ မွဲပၠန်ဂှ် လုပ်စိုပ်စ္ၜုဲစ္ၜော် ပ္ဍဲကၟိန်ဍုၚ်ဏံတုဲမှ နကဵုဘဝကမၠောန်ဟွံမွဲဂှ် အခိၚ်လဵုမှ ဂွံအခေါၚ်ကၠောန်ကမၠောန်ရော သာ်ဏံ သွက်ဂကောံမၞိဟ် မမၚ်စၟဳဒၟံၚ်တံဂှ် ဒှ်လက္ချန် မပြေပြံၚ်ကလိကလောတ် ဗွဲမလောန်ဂှ် ပိုယ်တံ ဂွံဆဵုကေတ်ရ” သာ်ဝွံ သ္ဂးရ။

သွက်သ္ဂောံဂွံ တၞးကာဒ်အရံၚ်သာ်ပ္ကဴဂှ် တၠကမၠောန်တံဂှ် ဒးပ္တိုန်အာတ်မိက်လဝ် အခေါၚ်ကၠောန်ကမၠောန် (Work permit ) အပ္ဍဲပွိုၚ် (၆၀) တ္ၚဲ ကုဌာနက္ဍိုပ်ပ်ဂၠိုက်ဂၠါဲကမၠောန်ဂှ်တုဲ သွက်ဂွံပၠောပ်စရၚ်ယၟုဂှ် သြန်ၝာတ် (၁၀၀) ၊ သွက်ဂွံပ္တိုန်အာတ်မိက် စၟတ်တဲကၠောန်ကမၠောန်ဂှ် သြန်ၝာတ် (၉၀၀) ၊ အပံၚ်ဖအိုတ် (၁၀၀၀) ၝာတ် ၚုဟ်အိုတ်ရောၚ်။

တၞးကာဒ်အရံၚ်သာ်ပ္ကဴ အလဵုအသဳသေံ မပ္တိတ်ကဵုဂှ်ဝွံ စဵုကဵုဂိတုဖေဖဝ်ဝါရဳ သၞာံ ၂၀၂၃ ဂှ် အာယုက်မၞုံတုဲ ထပ်ပပဵုအာယုက် (၂) သၞာံပၠန်မာန်ရောၚ်။

ညးကဵုကသပ်ဂၞန် ဇာဇၞိက်အခေါၚ်အရာသၟာကမၠောန်ဆုဲပြံၚ် ( MWRN) ဥူအံၚ်ကျဝ်ဂှ် ၜိုန်ရအလဵုအသဳသေံ ပ္တိတ်ကဵုတၞးကာဒ်အရံၚ်သာ်ပ္ကဴ ဂှ်ကီုလေဝ် ဒၟါနူအစဳဇန်တုဲ နူကဵုဒေသပယျဵုဒၞက်ဂှ်မွဲကဆံၚ် သၟာကမၠောန်ဆုဲပြံၚ်ကၟိန်ဍုၚ်ဗၟာ ဟွံလုပ်သၞောဝ်တံ သာတုဲ လုပ်စိုပ်ကၠုၚ်မာန်ရောၚ်ဂှ် သ္ၚဳဂၠိပ်လဝ်ရ။

“အကာဲအရာ ကၠာတေံရဂှ် ညးမလုပ်စိုပ်ကၠုၚ် ဟွံဗဗွဲဓဝ် နူကဵုပယျဵုတံဂှ် အရိုဟ်ဒဒှ်တ္ၚဲ လုပ်စိုပ်ဒၟံၚ် နကဵုလၟိဟ်ဗွဲမဂၠိုၚ်ဂၠေၚ်ရ၊ ကၠောန်ကဵုဗီုဏံရောၚ် လလောၚ်ပ္တိတ်ကၠုၚ်ဂှ် နကဵုလၟိဟ်ဗွဲမဂၠိုၚ် ထပ်လုပ်စိုပ်ကၠုၚ်မာန်ရောၚ်ဂှ် အဲသ္ၚဳဂၠိပ်ကေတ်ရ” သာ်ဝွံ သ္ဂးရ။

အခိၚ်လၟုဟ်ဂှ် အတိုၚ်သၞောတ် MOU လိက်ကသုက်တုပ်စိုတ် သေံ−ဗၟာ ၜါဍုၚ်ဂှ်မ္ဂး ကုသၟာကမၠောန်ဆုဲပြံၚ်တံဂှ် နူကဵုဂၠံၚ်တရဴလုပ်သၞောဝ်ဂှ် ၜိုန်ရပလံၚ်ကဵုဒၟံၚ် လ္ပာ်သေံတေံကီုလေဝ် ပ္ဍဲမွဲဒမြိပ်ပယျဵုဂှ် ပွမလုပ်စိုပ်တတ်ကၠောံ ဟွံဗဗွဲဓဝ် သၟာကမၠောန်ဆုဲပြံၚ်ဗၟာတံဝွံ ဒှ်ဒၟံၚ်ညံၚ်ကဵုလၟေၚ်တ္ၚဲရ။

အတိုၚ်တၚ်လလောၚ်တြး သၟိၚ်တၠအဝဵုသေံဂှ်မ္ဂး သၟာကမၠောန်ဆုဲပြံၚ် ကၟိန်ဍုၚ်ဗၟာ မတတ်ကၠောံ ပယျဵုတုဲ လုပ်စိုပ်ကၠုၚ်တံဝွံ သရောပ်မ္ဂး မွဲဂိတု လၟိဟ်မၞိဟ် နူကဵု (၃၀၀၀) စဵုကဵု (၄၀၀၀) နွံဒၟံၚ်ဂှ် လလောၚ်ပ္တိတ်လဝ်ရ။

ပရိုၚ်−သြၚ်လောန်တိုၚ်(မ်)