ဂျေရုသလေင်၊ အဝ်ဂတ် ၂၄
သွက်ဂွံသီပလှ်ထောံကၠေံလွဟ်ကီု ညံၚ်ဂွံဗလးကဵု ရဲပးဒၞန်ဒးဒုၚ်ရပ်လဝ် သီုဖအိုတ်တံဂှ် နကဵုဂကောံဟာမက်သ်တံ ဟွံတုပ်စိုတ်မ္ဂး ဂါဇာသဳတဳ ဒးဒုၚ်ပလီုကၠေံရောၚ် ဝန်ဇၞော်ပရေၚ်စဵုဒၞာ အေတ်သရေ ဟီုဏာရ။
ဍုၚ်ဂၠးကဝ်ဂမၠိုၚ်ကဵု နူကဵုအပ္ဍဲဍုၚ်တံ ၜိုန်ရစဵုစးမံၚ်ကီုလေဝ် သွက်ဂွံဝေၚ်အာပၞာန်ဇြဟတ်ဇၞော်ဇၞော် ဗတိုက်အာ ဂါဇာသဳတဳဂှ် ဂကောံအလဵုအသဳ အေတ်သရေ ကဵုဏာအခေါၚ်တုဲ ပရေၚ်လဟီုဂး ဝန်ဇၞော်ပရေၚ်စဵုဒၞာ အေတ်သရေ ကာတ်ဇ် မံက်တိတ်ကၠုၚ်ရ။
ပွိုၚ် ၆၀ တ္ၚဲ သွက်ဂွံဒေါအ်အာပန်ပှော်ဂှ် ကာတာကဵု အိဂျေတ်တံ လုပ်အကြာပညဳပညပ်ကဵုလဝ် တၚ်ကော်ဘိက်လက်ကရဴအိုတ်ဏံ ပ္ဍဲအဝ်ဂတ် ၁၈ ဂှ် ဂကောံဟာမက်သ်တံ တုပ်လဝ်စွံနွံရ။
အတိုၚ်လဟီု သ္ကိုပ်ပညဳပညပ်ကာတာတံ ယဝ်ရၜါလပါ် ဂွံတင်တုပ်စိုတ်မ္ဂး ရဲပးဒၞန်ၜိုတ်ကဝက် ကလေၚ်ဗၠးကၠုၚ်မာန်ရောၚ်။
ဆဂး လ္တူတၚ်ပတိုန်ထ္ၜးလဝ်ဏံ သ္ကိုပ်ဝန်ဇၞော် အေတ်သရေ နေတေန်ညာဟု ဗီုပြၚ်ညံၚ်ရဴပါဲတးထောံတုဲ နကဵုတၚ်နင်အေတ်သရေတံ ဒုၚ်တဲမာန်ကီု ပေါဲပၞာန်ဂါဇာ ညံၚ်ဂွံတုဲဒှ်အာကီု ရဲပးဒၞန်သီုဖအိုတ်တံ ညံၚ်ဂွံတိတ်ဗၠးမာန် သွက်ဂွံကၠောန်အာ ပေါဲချပ်ဂၞန်တၟိ ကဵုလဝ်စၞောန်နွံ သ္ဂးရ။
ပေါဲပၞာန် ပွိုၚ် ၂၂ ဂိတုလံကၠုၚ်တုဲ ပၞောဝ်ကဵု ရဲဒးဒုၚ်လဝ်ပးဒၞန် ၅၀ တၠမ္ဂး ၜိုတ် ၂၀ ရ လမျီုဂျိုၚ်တဴမံၚ်ဏီ အေတ်သရေ ပတေဟ်ကေတ်လဝ်ရ။
ဒၞာဲကၠောန်အာ ပေါဲချပ်ဂၞန်တၟိ သ္ပဒတန်တုဲဗက်ဂှ် ဗလးဏာ သ္ကိုပ်ပညဳပညပ်တံရောၚ် နိဿဲကဵု ညးတာလျိုၚ်တံတုဲ မဳဒဳယာအေတသရေ ချူလဝ်ရ။
သွက်ဂွံ ထိၚ်ချုက်အာ ဂါဇာသဳတဳကဵု ညံၚ်ဂွံဗတိုက်သၠေက်ကၠေံ ဂကောံဟာမာတ်သ်ဂှ် ကဵုလဝ်အခေါၚ် ဒပ်ပၞာန် တုဲတုဲရောၚ် သ္ကိုပ်ဝန်ဇၞော် အေတ်သရေ ဟီုရ။
ညံၚ်ဂွံ ဒေါအ်ထောံပေါဲပၞာန် တၚ်နၚ်အေတ်သရေ ခုတ်လဝ်တံဂှ် ဟွံတုပ်စိုတ်မ္ဂး က္ဍိုပ်သ္ကိုပ်ဟာမာတ်သာ် နွံမံၚ်ဂါဇာတံကီု သွက်ရဲမုဒိၚ်ဂမၠိုၚ်တံ ပါၚ်တြၚ်နာရက် ပံက်ကၠုၚ်ဏောၚ် ဝန်ဇၞော် အေတ်သရေ ကာတ်ဇ် ဟီုလဝ် ပ္ဍဲအဝ်ဂတ် ၂၂ တေံရ။
ဍေံတံဟွံတုပ်စိုတ်မ္ဂး ၝောံဍုၚ်ဇၞော် ဟာမာတ်သ်တံ ဂါဇာသဳတဳ ဟီုဂှ် ညံၚ်ရဴ ဍုၚ်ရာဖာကီု ဍုၚ်ဗိက်ဟာနန်တံကီု ဒှ်အာမာန်ရောၚ် ညးဟီုရ။
အပ္ဍဲကဵု ပရေၚ်လဝေၚ်ပၞာန် အေတ်သရေ အာစိုပ်ဒတုဲဂှ် ဍုၚ်ၜါဍုၚ်ဏံ ညံၚ်ရဴဂအုံထၟိက်ဇၞော်ဇၞော် ဒှ်အာလဝ်ရ။
ယဝ်ရအေတ်သရေ ကၠောန်ကၠုၚ် ပရေၚ်လဝေၚ်ပၞာန်တၟိမ္ဂး ပ္ဍဲဂါဇာဝွံ ပြဿနာ ထံက်ပၚ်ပရေၚ်ဗစာရဏာ မၞိဟ်တံ ပဵုတုဲပရေအ်အာမာန်ရောၚ် ပရေၚ်ဒှ်ဒွိၚ်နာနာတံ သၠုၚ်တိုန်မံၚ်ရ။
Ref:BBC