အေတ်သတာန်ဗူလ်၊ အဝ်ဂတ် ၂၉
တူရကဳ ပံၚ်ဗစပ်လဝ် သၞောတ်ပရေၚ်စဵုဒၞာဂၠံၚ်ကျာတုဲ ကဵုလဝ်ယၟု ဇာနှိက်ပသဲဍာၚ်ဂှ် သမ္မတ အာဒိုဂါန် ဆက်မိတ်ထ္ၜးဏာ ပ္ဍဲအဝ်ဂတ် ၂၇ ရ။
ပြဟ်ဟ်မွဲချောဲဍောတ်ဏံဂှ် သွက်ဍုၚ်ဇကုကဵု သွက်လၟေၚ်ကမၠောန် ပရေၚ်စဵုဒၞာဇကုပိုဲတံ အခိၚ်ကိစ္စဇၞော်မွဲချောဲဍောတ်ဟေၚ် ဒှ်မံၚ်ရဏောၚ် သမ္မတ အာဒိုဂါန် ဟီုရ။
သၞောတ်စဵုဒၞာပရေၚ်ဂၠံၚ်ကျာ ဖျေံသ္ဇိုၚ်ဗလးဍာ် ကဵု သၞောတ်ပရေၚ်စဵုဒၞာ ဗလးတိ၊ ကိရိယာပါမ်အာရီု ပရေၚ်စဵုဒၞာဗလးကျာ တူရကဳတံဂှ် နကဵုဇာနှိက် ပံၚ်ဗစပ်လဝ်တုဲ ဒက်ပ္တန်အာ သၞောတ်ပရေၚ်စဵုဒၞာပၞာန်ကျာ ဇာနှိက်ပသဲဍာၚ်ရောၚ် ပ္ဍဲသၞာံအာ ဂိတုအဝ်ဂတ်တေံ တူရကဳ လလောၚ်တြးကၠုၚ်လဝ်ရ။
ပ္ဍဲကဵုကိုန်အစဳဇန်လက်ကြဴအိုတ်ဏံ ဒဝ်ဠာ ၄၆၀ ပြကောဋိကိုတ် ၚုဟ်မးနွံ ယာန် ၄၇ မ ပါလုပ်တုဲ ဒှ်မံၚ် သၞောတ်မိသဟာဲပိုဲတံ ဒးဂၞပ်ဇြဟတ်စိုတ်ကီု သၞောတ်သၞတံ သွက်ဂွံဖေက်လေဝ် ဒှ်ကီုရောၚ် အာဒိုဂါန် ဟီုရ။
ဆဂး သၞောတ်ပရေၚ်စဵုဒၞာ ဂၠံၚ်ကျာဏံ ၜိုတ်အခိၚ်လဵု စကာဂွံပေၚ်ၚ်မာန်ဂှ် အလဵုအသဳ ထမံက်ပတိတ်လဝ်ဟၟဲဏီ။
တူရကဳတံ ပ္ဍဲသၞာံ ၂၀၁၉ တေံ နူကဵုရတ်ယှာ ရာန်ကေတ်လဝ် သၞောတ်ပရေၚ်စဵုဒၞာကမ်သၠောဝ် S-400 တုဲ သွက်ဂွံထပေၚ်ဇြဟတ် သၞောတ်ပရေၚ်စဵုဒၞာဂၠံၚ်ကျာ ညးတံဂှ် ဂစာန်ကၠုၚ်မံၚ်ရ။
ဟိုတ်နူကမၠောန်ပွဏံဂှ် နူကဵု ကိုန်စဳဇန် ၜၚ်ကျာဟဇဵုပၞုက်ဇကု F-35 အမေရိကာန် သ္ကိုပ်သ္ကလဝ်တံ ဒးနုက်ပတိတ်ထောံတုဲ သွက်ပရေၚ်စဵုဒၞာ ဗွိုၚ်အာန်ကာရာ မ္ဒးဆောံလေၚ်အာလဝ်ရ။
ပ္ဍဲဍုၚ်ဇိုၚ်ဝုတ်ဒိုဟ် သဳရဳယာကဵု ယူခရုၚ် ပၞာန်ဒှ်မံၚ်တုဲ ခြာဟွံလံဏီဂှ် ဟိုတ်နူ အေတ်သရေ ဗတိုက်လဝ် အဳရာန်ဂှ်ရ သွက်တူရကဳ နွံကၠုၚ်ပၟိက် အရာဂွံသၠုၚ်ပတိုန် သၞောတ်ပရေၚ်စဵုဒၞာဂၠံၚ်ကျာတံရ။
နကဵုတူရကဳ တၚ်နွံပၟိက်အရၚ်ဇကုတံ ညံၚ်ဂွံဍိုက်ပေၚ်ဂှ် ကၠောန်အာရောၚ်ဒှ်တုဲ နကဵုနဲပညာဇကုတံဂှ်လေဝ် ပၠအာတရဴ ဂၠးကဝ်ဏောၚ် အာဒိုကာန် ဟီုရ။
ပ္ဍဲသၞာံ ၁၉၇၄ တေံ စပ်ကဵုပရေၚ်ၜက်ၜေတ်လဝ်ကဵု သိုက်ပရာတ်သ်တုဲ လ္တူတူရကဳ အမေရိကာန် မာတ်ဆိုအ်ထောံ လွဟ်လက်နက်တုဲ ဗွဲကြဴ သွက်ပရေၚ်စဵုဒၞာကုညးတံ တူရကဳ ဓလိုက်စုတ်လဝ်တမ်ရိုဟ်ဗွဲမဂၠိုၚ်တုဲ အလဵုဇကုညးတံ ညံၚ်ဂွံပတိတ်ကေတ် လွဟ်လက်နက်ရုံရုံဂပ်ဂပ်မာန်ဂှ် ဂစာန်မံၚ်ရ။
Ref:AP