မဝ်သကို၊ လန်ဒန်၊ အဝ်ဂတ် ၃၀
ညံၚ်ဂွံကေတ်အာ တၚ်တုပ်စိုတ် ပရေၚ်ၜိုဟ်လလမ်ကု ယူခရုၚ်ဂှ် သွက်ဂွံကဵုအာ ဇြဟတ်ဟရိုဟ်မဝ်သကို ပရေၚ်အေန္ဒိယရာန်မံၚ် ကၠေၚ်ဍေန်ရတ်ယှာ ဂွံဒေါအ်အာ နကဵု အမေရိကာန် ကံက်ဟပဵုပတိုန်အကံက်ဂှ် ညံၚ်ရဴသ္ပစာန်စးအာ ပ္ဍဲဂိတုသိပ်တမ်ပါဏံ နယူဒေလဳ ဟပဵုရာန်အာ ကၠေၚ်ဍေၚ်ရတ်ယှာရောၚ် တၠဗၞိက်တံ ဟီုဏာရ။
ပ္ဍဲသၞာံ ၂၀၂၂ ရတ်ယှာ ၜက်ၜေတ်လုပ်ဗတိုက် ယူခရုၚ်တုဲ ရဲဍုၚ်ပလိုတ်တံ ဖျေံလဝ်ဒဏ်ကၟာတ်ဆိုအ်ထောံ လ္တူကမၠောန်ကၠေၚ်ဍေန် ရတ်ယှာတံရ။
ဟိုတ်ဂှ်တုဲ ပရေၚ်ကမၠောန်သ္အးကၠေၚ်ဍေန် အေန္ဒိယတံ ရာန်ဂွံလဝ် ကၠေၚ်ဍေၚ်ရတ်ယှာ ၚုဟ်မးသာသာတုဲ ဒှ်ကၠုၚ် ညးရာန်ကေတ်ဂၠိုၚ်အိုတ်ရ။
ဒၟာနူရာန်ကေတ်မံၚ်ဗီုတံဏံဂှ် သမ္မတအမေရိကာန် ဒဝ်နေဝ်ထရ ပျုတ်ဗ္ဒေက်ဟီုဏာတုဲ လ္တူဗၞိက် အေန္ဒိယပလံၚ်နင်တံ စနူအဝ်ဂတ် ၂၇ ဂှ်တုဲ ကံက်အခေါန် ၅၀% ရ။
စပ်ကဵုပရေၚ်သဳကၠဳပရေၚ်ကူသာန်တံတုဲ နယူဒေလဳ စဳဇန်မံၚ်ကဵု ဝါယှေန်တန် ဟီုမံၚ်ကီုလေဝ် နူကဵု ထရ ဆက်နၚ်လဝ်ဖုၚ် အလန်ကဵုအလန်တံဂှ် နကဵု ညးတာလျိုၚ် အေန္ဒိယတံ ကလေၚ်ဏာပရိုၚ်ဟၟဲပုဟ် သ္ဂးရ။
ပ္ဍဲအကြာဏံ သ္ကိုပ်ဝန်ဇၞော်အေန္ဒိယ နရန်ဒရာ မိုဒဳဝွံ သွက်ပရေၚ်ဆက်ဆောံ ဇြဟတ်ဂွံခိုဟ်ကဵု ရတ်ယှာ၊ ကြုက်တံဂှ် ဂစာန်မံၚ်တုဲ နကဵု အေန္ဒိယတံ ကုဇကုဟေၚ် ဒးပတေဟ်ထက်ရ ဟီုလဝ်ရ။
နကဵု သမဂ္ဂယူရောပ်ကဵု အမေရိကာန်တံဂှ် ကပေါတ်ဗၞိက်နူရတ်ယှာ နွံကဵုၚုဟ်မး နကဵုဒဝ်ဠာဗဳလဳယာန်ဗွဲမဂၠိုၚ်တံ ရာန်ကေတ်မံၚ်ကီုလေဝ် ကံက်ဟပဵုတိုန် အခေါန်လ္တူပိုဲဂှ်မ္ဂး စကာမံၚ် ၜါသၞောတ်ရောၚ် ညးတာလျိုၚ် အေန္ဒိယတံ စောဲစပ်လဝ်ရ။
အေန္ဒိယ ယဝ်ရ ဟွံရာန်ကၠေၚ်ဍေန်မ္ဂး သြန်လုပ် ရတ်ယှာ ယုတ်ဒေက်အာ ဇၞော်ကဵုဇြဟတ်ဒှ်အာမာန်တုဲ သွက်ဂွံဆက်ဗတိုက်အာ ယူခရုၚ်ဂှ် ဆဵုညာတ်အခက်အခုဲမာန်ရောၚ်။
ဆဗၞတ်ကၠေၚ်ဍေန် ရာန်လဝ်နူရတ်ယှာ ဂိတုအဝ်ဂတ်ဏီ ပ္ဍဲဂိတုသိပ်တမ်ပါဏံ သွက်ဂွံထပဵုပတိုန်ရာန်အာ နူ ၁၀% ဂှ် ဒဵုကဵု ၂၀% ရောၚ် နူကဵုရိုဟ်ကၞက်ပရိုၚ် ပရေၚ်သွံရာန်မံၚ်ကၠေၚ်ဍေန် အေန္ဒိယ ၃ ဒၞာဲတံ ဟီုရ။
နကဵု ပရေၚ်ကမၠောန်ကၠေၚ်ဍေန် ပ္ဍဲပွိုၚ်မွဲဂိတု သေတ်တေန်ဗါဏံဂှ် မွဲတ္ၚဲ ကၠေၚ်ဍေန်စေဝ်ပံၚ် နူ ၁၅၀၀၀၀ စဵုကဵု ၃၀၀၀၀၀ ရာန်အာဏောၚ်ဂှ် ဂွံတီကေတ်ဇရေၚ်ပရိုၚ်တမ်ရိုဟ်တံရ။
Ref:Reuters