ဝါယှေန်တန် သိုလ်၊ အဝ်ဂတ် ၂၇
အခိၚ် သ္ၚိစၠတ်ဗု ဒုၚ်တဲဆဵုဂဗလဝ် သမ္မတကိုရဳယာတၟိ လဳဂျေမျံၚ်ဂှ် နကဵုသမ္မတအမေရိကာန် ဒဝ်နဝ်ထရ မိက်ဂွံဆဵုဂဗကဵု က္ဍိုပ်သ္ကိုပ်ကိုရဳယာသၟဝ်ကျာ ကေန်ဂျုၚ်အာန်ကီု ပ္ဍဲအဝ်ဂတ် ၂၅ ဂှ် ဟီုဂးဏာရ။
ပ္ဍဲကဵုသၞာံဏံ မိက်ဂွံဆဵု ကေန်ဂျုၚ်အာန်ရောၚ် ထရ ဟီုလဝ်ကဵု အစာပရိုၚ်တံတုဲ အခိၚ်ဒးရဂှ် သွက်ဂွံဆဵုဂဗအာ စၟဳမံၚ်ရောၚ် ဟီုဏာရ။
အကြာ ကိုရဳယာသၠုၚ်ကျာကဵု အမေရိကာန်တံ အခိၚ်ပရေၚ်ဆက်ဆောံ ကြံၚ်မ္ၚိုဟ်မံၚ်ဏံ သမ္မတၜါဍုၚ် အလန်ပထမ ဆဵုဂဗညးသ္ကံရ။
ပ္ဍဲကဵုဂိတုဂျူလိုၚ်တေံ ၜိုန်ရဂွံကၠုၚ်လဝ် တၚ်တုပ်စိုတ် ပရေၚ်ကူသာန်ဗၞိက်ကီုလေဝ် အကြာ ကိုရဳယာကဵု အမေရိကာန်တံ ဆေၚ်စပ်ကဵု ဓါတ်လလဳနျူကလဳယာ၊ စရိတ်စကာပရေၚ်ပၞာန် ကေုာံ တၚ်တုပ်စိုတ် ပရေၚ်ကူသာန်သွံရာန်တံတုဲ ဒးဆက်သဳကၠဳအာ နွံမံၚ်ဖိုဟ်ရောၚ်။
နကဵုတၚ်တုပ်စိုတ် ပရေၚ်ကူသာန်ဗၞိက်မွဲသကုတ်မွဲသကူ နူကဵုကိုရဳယာသၠုၚ်ကျာ သွက်ဂွံဓလိုက်အာတမ်ရိုဟ် ဒဝ်ဠာအမေရိကာန် ၃၅၀ ဗဳလဳယာန် တုပ်လဝ်စိုတ်နွံရ။
ကိုန်အစဳဇန်နျူကလဳယာ ကိုရဳယာသၟဝ်ကျာ သွက်ဂွံသၠုၚ်ပတိုန်အသိၚ်ဂှ် ကေန်ဂျုၚ်အာန် စၞောန်လဝ်တုဲ ပရေၚ်ပံၚ်တောဲပကတ်ပကေၚ်ပၞာန် ကိုရဳယာသၠုၚ်ကျာကဵု အမေရိကာန်တံ ကၠောန်လဝ်ဂှ် ပျုတ်ဗဒေက်ဟီုဂးလဝ်ရ။
နကဵုထရဂှ် အပ္ဍဲဂၠးကဝ်ဏံ ဍုၚ်မွဲဟေၚ်ပိုတ်မံၚ်ၜါသကုတ်ဏံ ညံၚ်ကလေၚ်ဒှ်အာမွဲဍုၚ် ဖန်ဗ္ဒျ်အာကဵု ပရေၚ်ၜိုဟ်လလမ်မာန်ရောၚ် သမ္မတလဳ ဟီုရ။
ပရေၚ်ပိုန်ဒြပ် ကိုရဳယာသၠုၚ်ကျာတံဂှ် ဗွဲမဂၠိုၚ် ဒးဗ္ဒးဗ္ဒါဲမံၚ် လ္တူအမေရိကာန်ဒှ်မံၚ်တုဲ စရိတ်ဘဏ္ဍာကောန်ပၞာန် ဖျေံကဵုလဝ်ဒပ်တံဂှ် ကိုရဳယာသၠုၚ်ကျာ ညံၚ်ဂွံဒုၚ်ဖအိုတ်ကဵု အမေရိကာန် အာတ်မိက်လဝ်ရ။
ကိုရဳယာသၠုၚ်ကျာဝွံ ဒုၚ်စမံၚ်ကဵု ပရေၚ်အမေရိကာန် စဵုဒၞာကဵုလဝ်ဏံတုဲ ဍုၚ်ဝွံသြန်လုပ်မံၚ် ဗွဲမဂၠိုၚ်ရောၚ် ထရ ဟီုဂးလဝ်နွံရ။
ပ္ဍဲကာလ အယုက်သမ္မတထရ အလန်ပထမတေံ ကေၚ်ဆဵုလဝ်ကဵု ကေန်ဂျုၚ်အာန်ကီုလေဝ် မုတၚ်နင်မွဲသာ်မှ ဂွံလဝ်တၚ်တုပ်စိုတ်ဟၟဲပုဟ်။
ပ္ဍဲလက်ထက် သမ္မတကိုရဳယာ သၠုၚ်ကျာ လဳဏံ အကြာကိုရဳယာသၟဝ်ကျာ ပရေၚ်ကြံၚ်မ္ၚိုဟ်မံၚ်တံ သွက်ဂွံယှအ်ဖျေံအာ၊ ညံၚ်ဂွံပြေပြံၚ်မာန် စက်သၠဲရမျှာၚ်တြးဝါဒ ဗဂပ်စွံလဝ်ဒၞာဲပယျဵုတံဂှ် ကလေၚ်ရုပ်သီလဝ်ကီုလေဝ် ကိုရဳယာသၟဝ်ကျာဂှ် ဟီုဂးပါ်ပါဲမံၚ် ပရေၚ်ကမၠောန်ကိုရဳယာ သၠုၚ်ကျာတံဖိုဟ်ရ။
Ref:Reuters