ဝါယှေန်တန်၊ ဖေဖဝ်ဝါရဳ ၅
သမ္မတ ဒဝ်နေဝ်ထရ ဍုၚ်အမေရိကာန် ညံၚ်ဂွံဒှ်ကၠုၚ် ဍုၚ်တၠအဝဵုဂှ် ပြံၚ်သၠာဲမံၚ်ရောၚ် ဂကောံအခေါၚ်အရာမၞိဟ်တံဟီုကဵုလဝ်သတိ ပ္ဍဲဖေဖဝ်ဝါရဳ ၄ ရ။
ပ္ဍဲပွိုၚ်၄၀ သၞာံဏံ အလုံဂၠးကဝ်မွဲ ဇြဟတ်ဒဳမဝ်ကရေသဳ အောန်အိုတ်ဒှ်ကၠုၚ်မံၚ်ရောၚ် ဂကောံအခေါၚ်အရာမၞိဟ်တံဟီုရ။
ဟိုတ်နူဒဝ်နေဝ်ထရ စိုပ်ကၠုၚ်သ္ၚိစၠတ်ဗတာၚ်ဂှ် ဒးဇီုကပါ်မံၚ်ကဵု ဇြဟတ်ဟရိုဟ်ရတ်ယှာကဵု ကြုက်တံတုဲ အသိၚ်အခေါၚ်အရာမၞိဟ်တံ ယအ်စှ်ေအာမံၚ်ရောၚ် ဂကောံသုတေသနကဵု အခေါၚ်အရာမၞိဟ် ဖျေံသ္ဇိုၚ်နယူယံက်တံ ဒုၚ်စဳရေၚ်လဝ် ပ္ဍဲကဵုလိက်ဒုၚ်စဳရေၚ်လၟေၚ်သၞာံရ။
ဥပဒေဒုၚ်လဝ်သ္ဇိုၚ်ကဵု သၞောတ်စေဝ်ပၞောန်ဂၠးကဝ်တံ ဒးဒုၚ်ဖံက်ပကဝ်လဝ်ရောၚ် ဂကောံအခေါၚ်အရာမၞိဟ် ဟီုရ။
ပ္ဍဲအမေရိကာန် ထရ ဟွံရှ်ေသှ်ေအခေါၚ်အရာမၞိဟ်ဂှ် ထ္ၜးလဝ်ထေၚ်ၚ်လဵုလဵုတုဲ ပရေၚ်ဖံက်ပကဝ်တံလေဝ် ကၠးမးမံၚ်ရောၚ် ဂကောံဏံဟီုလဝ်ရ။
ပရေၚ်ပကီုပရာတ် ထေက်ကဵုဒၞာဲဟွံသေၚ် ကေုာံ ဖျေံစွံလဝ် အေဂျေၚ်သဳ ထိၚ်ကြာပ်မၞိဟ်လုပ်တိတ်ကေုာံ အကံက်ခေါန်တံတုဲ ဖံက်ပကဝ်ဥပဒေ ရပ်စပ်ဍဵုဍိုက်ကၠုၚ်လၟိဟ်ကဵုကၠံတံဂှ် ရဲဂကောံအခေါၚ်အရာမၞိဟ်တံ ထံက်ထ္ၜးလဝ်ရ။
ထေၚ်ခယျသၞပရေၚ်ဍုၚ်ကွာန်ညးတေံ၊ ညးတာလျိုၚ်တြေံ ဟီုဂးပါ်ပါဲလ္တူညးတေံဂှ် ထရ စွံလဝ်ပွန်ရောၚ် ဂကောံဏံ ဟီုရ။
နူကဵုဗၚ်နဳဇဲလာ ညးပြံၚ်ဆုဲမံၚ်စံၚ် ၂၅၂ တၠတံဂှ် ပြံၚ်ပဆုဲဏာထံၚ်အေဝ်လ်သာဗေဒို နနဲအဓ္ဓမဂှ် အမေရိကာန် ဖံက်ပကဝ်လဝ် အမှုရာဇဝတ်ရောၚ် ဂကောံအခေါၚ်အရာမၞိဟ်တံ ဟီုရ။
သၞောတ်ဒဳမဝ်ကရေသဳတံ ပ္ဍဲကဵုကၟိန်ဍုၚ်သိုဝ်ဗဳယက် နူကဵုအဆံၚ် ၁၉၈၅ တေံ ယအ်စှ်ေအာလဝ် ဂကောံအခေါၚ်အရာမၞိဟ်တံ ဟီုရ။
ရတ်ယှာကဵုကြုက်တံ အခေါၚ်သၠးပွးအောန်စှ်ေကၠုၚ် နူကဵု ၂၀ သၞာံပြၚ်တေံတုဲ အမေရိကာန်လေဝ် အတိုၚ်ဂှ်ကီု ဂကောံဏံ ဟီုရ။
ညံၚ်ဂွံဒစဵုဒစးအာ အကံက်ခေါန်ထရ သ္ပလဝ်ညံၚ်လွဟ်ကီု ဍုၚ်ဂၠးကဝ်တံ ဒပ်ဂကောံမဟာမိတ်တုဲ ညံၚ်ဂွံဒတူလိုၚ်အာမွဲစွံမာန် စွံအဲပရဲကဵု အခေါၚ်အရာမၞိဟ်တံ ညိ သ္ကိုပ်စၞောန်ပ္ညုၚ် ဖိလေတ်ပဳ ဗိုလိုပဳယောန် ဆဝ်ဗ္ၚုဟ်လဝ်ရ။
ဍုၚ်ဒက်ပတန်လဝ်မဟာမိတ်တံဂှ် ဒုၚ်သ္ဇိုၚ်ကဵု မူဝါဒ ဒဳမဝ်ကရေသဳ၊ ဥပဒေဂၠးကဝ်ကေုာံ အခေါၚ်အရာမၞိဟ်တံတုဲ ဒက်ပတန်အာထေက်ရောၚ် ဟီုဂးလဝ် မဒှ်ရ။
Ref:AFP