ၜင်ကံက်၊ ဖေဖဝ်ဝါရဳ ၄
သွက်ဂွံကလေၚ်ဒက်ပတန်အာ ပရေၚ်ဆက်ဆောံ အကြာဗမာကဵု အာသဳယာန်တံဂှ် ညံၚ်ဂွံကဵုအာအရီုဗၚ်မာန် နကဵုမၞိဟ်ပ္ညဳပ္ညပ်အကြာ နူကဵုအလဵုအသဳသေံ မၚ်ရေၚ်တၠုၚ်ကဵုမံၚ်ရောၚ် ဝန်ဇၞော်ဍုၚ်သ္အာၚ် သဳဟာဆက် ဖူအာန်ကာတ်ကွေ ဟီုရ။
ပ္ဍဲဖေဖဝ်ဝါရဳ ၂ ဆဵုဂဗလဝ်ကဵု ကံၚ်သဳပရေၚ်ဂီုကၠီုကောန်ဂကူတုဲ ဗွဲကြဴဂှ် ဝန်ဇၞော်ဍုၚ်သ္အာၚ် ဟီုလဝ်အတိုၚ်ဏံရ။
ဂၠံၚ်ဍာန်နဲကဲ သွက်ဂွံပ္ညဳပ္ညပ်အာကဵု ညးတာလျိုၚ်ပၞာန်ဗမာတံဂှ် ပေါဲရုဲမာဲတုဲ ညံၚ်ဂွံလ္ၚတ်အာအကာဲအရာ ဍုၚ်ဗမာလက်ကရဴအိုတ်ဂှ် ကၠောန်ဗ္ဒျ်လဝ် ကောံဓရီုဏံ မဒှ်ရ။
ဂၠံၚ်ဍာန် သွက်ဂွံပ္ညဳအာကဵု ဂကောံကောန်ဍုၚ်အရၚ်ရပ်လွဟ် အကြာပယျဵုၜါဍုၚ်ဂှ်လေဝ် အလဵုအသဳသေံ လ္ၚတ်မံၚ်ရောၚ်။
တုဲပၠန် စပ်ကဵုကမၠောန်လီသြန်အန်လိုၚ်တံ ပရေၚ်ရာဇဝတ်ၜက်ပယျဵုဍုၚ်တံ၊ သွက်ဂွံဗတိုက်သရိုဟ်အာ ပရေၚ်ကူသာန်သွံရာန်ဂဥုဲၜူမာဲတံ ဂၠံၚ်ဍာန်သ္အးဍာ်ၜဳကၠိခန်မံၚ်အကြာၜါဍုၚ်ကီု ညးတာလျိုၚ်သေံတံ သဳကၠဳလဝ်ရ။
ဟိုတ်နူပၞာန်အပ္ဍဲဍုၚ်ဗမာဂှ် ပရေၚ်ကူသာန်သွံရာန်ဗၞိက်အကြာၜါဍုၚ် ဒှ်မံၚ်အခက်အခုဲ ဂၠံၚ်ဍာန်နဲကဲ ညံၚ်လမျီုဂွံကလေၚ်လုပ်မာန်ဂှ် ညးတာလျိုၚ်သေံတံ သဳကၠဳလဝ်ရ။
ပရေၚ်ကြံၚ်မ္ၚိုဟ်မံၚ်တံ ညံၚ်ဂွံယအ်အာ၊ ပရေၚ်ညိၚ်ဝပ် ညံၚ်ဂွံကလေၚ်ဂွံတိုန်၊ စပ်ကဵုပြဿနာဍုၚ်ဗမာတုဲ ဗီုပြၚ်စပ်ကဵုအရာပရေၚ်ဆက်ဆောံကလုတ် တင်ဒတူလိုၚ်ကၠးကၠးမးမးညံၚ်ဂွံနွံ ချပ်ဗ္စာသဳကၠဳလဝ်ရ။
သွက်ဂွံသၠုၚ်ပတိုန်အာ ပရေၚ်ဆက်ဆောံ ဒပ်ပၞာန်ဗမာကီု ဂကောံတၞဟ်တံကီု ညးတာလျိုၚ်သေံတံ တုပ်စိုတ်ညးသ္ကံရ။
ညးတာလျိုၚ်သေံတံ အာသဳကၠဳကဵု ညးတာလျိုၚ်ဒပ်ပၞာန်ဗမာတံတုဲ ယဝ်ရပြပြံၚ်မ္ဂး ပတိုန်ထ္ၜးအာကဵု အဆံၚ်အာသဳယာန်ရောၚ် ဝန်ဇၞော်ဍုၚ်သ္အာၚ်သေံ ဟီုလဝ်ရ။
ပြဟ်ဟ်ဏံ နူကဵုအာသဳယာန် ဟွံသ္ပစၟတ်သမ္တီပေါဲရုဲမာဲဗမာဏီ လလောၚ်တြးလဝ်ရ။
Ref:Bangkokpost