ၜင်ကံက်၊ ဖေဖဝ်ဝါရဳ ၁၁
ပ္ဍဲပေါဲရုဲမာဲဍုၚ်သေံ ဒၞာဲဆန္ဒမာဲ ဗီုပြၚ်ကဵုမာဲလၟေၚ်ဓမ္မတာဟွံသေၚ် ဒှ်မံၚ်ပရေၚ်ကယျာန်ထဝါတ်တံဂှ် ညံၚ်ဂွံကလေၚ်ရိုဟ်အာလၟိဟ်မမာဲ ဗော်ညးဍုၚ်ကွာန်အာတ်မိက် ပ္ဍဲကဵုဖေဖဝ်ဝါရဳ ၉ ရ။
ဗွဲတၟေၚ် မၞိဟ်ဟွံလုပ်စရၚ်မာဲတံ လၟိဟ်ဂၠိုၚ်အာကဵုသၞောတ်ထ္ၜတ်တုဲ ပ္ဍဲကဵုဒၞာဲဆန္ဒမာဲ လင်ပၚ်ကဵု ခေါန်ကာအာန်တံ ညံၚ်ဂွံကလေၚ်ရိုဟ်ကဵုလၟိဟ်မာဲပၠန် ဗော်ညးဍုၚ်ကွာန် အာတ်မိက်လဝ်မဒှ်ရ။
လၟိဟ်မာဲဂွံဇၞး နွံညိညမာန်ကီုလေဝ် ညးဍုၚ်ကွာန်တံ စုတ်လဝ်မာဲ ၇၀၀၀ ပြင်ဂှ် ဟွံလုပ်ဗဗွဲသၞောဝ်ဂးတုဲ အပ္ဍဲကဵုဒေသလၚ်ပၚ် ဒၞာဲဆန္ဒမာဲ ၂ ဒၞာဲဂှ် ညံၚ်ကလေၚ်ရိုဟ်ကဵု လၟိဟ်မမာဲ က္ဍိုပ်သ္ကိုပ်ဗော်ညးဍုၚ်ကွာန် နာတာဖန် အာတ်မိက်လဝ်ရ။
အကြာဗော်ဇၞးဗော်ကျမာဲ လၟိဟ်မာဲၜိုတ်ကၠံဟေၚ်ရဒှ်မံၚ် ပ္ဍဲဒေသခေါန်ကာအာန် ဒၞာဲဆန္ဒမာဲ ၃ ဒၞာဲဂှ် မာဲလၟေၚ်ဍာံဟွံသေၚ်တုဲ ဟွံလုပ်သၞောဝ်ရောၚ် ခုတ်စၟတ်လဝ်နွံဂှ် ညံၚ်ဂွံကလေၚ်စၟဳစၟတ်ကဵု ဗော်ညးဍုၚ်ကွာန် အာတ်မိက်လဝ် မဒှ်ရ။
သွက်အလံၚ်ညးစၞးကဵု ညးထံက်ဂလာန်ဗော်တံ ညံၚ်ဂွံပလံၚ်ပရိုၚ်အာပရိုၚ် ပရေၚ်ဒဒှ်လၟေၚ်ဍာံဟွံသေၚ်တံ နဒဒှ်ညးကဵုကသပ်ဥပဒေ ရုဲစှ်ခါန်ကၞက်ကဵုလဝ် မေတ်သတာ တဳရာရောၚ် နာတာဖန် ဟီုရ။
စပ်ကဵုစဳဇန်ပံၚ်တောဲပံက်အာအလဵုအသဳကု ဗော်ဗောန်ဂျိုၚ်ထာဲ ဂွံလဝ်မာဲဂၠိုၚ်အိုတ်ဂှ် ဗော်ညးဍုၚ်ကွာန်တးပါဲတုဲ ပရေၚ်ဆက်စၠောံဟၟဲညးသ္ကံပုဟ် ဟီုရ။
ပံၚ်တောဲအာကဵု ဗော်ဗောန်ဂျိုၚ်ထာဲ ဂွံလဝ်အဝဵုလၟုဟ် ဂကောံအလဵုအသဳ သ္ကိုပ်ဝန်ဇၞော် အနုတေၚ်တံဟွံသေၚ်ပုဟ် က္ဍိုပ်သ္ကိုပ်ဗော်ညးဍုၚ်ကွာန် နာတာဖန် ဟီုလဝ်ရ။
သွက်ဂွံအံၚ်ဇၞးကဵုကျအာပေါဲရုဲမာဲဂှ် ဒၟာနူဟိုတ်နာနာသာ်ဒှ်မာန်တုဲ ကလေၚ်သ္ၚဳဂၠိပ်အာရောၚ် မေတ်သတာ နာတာဖန် သ္ဂးရ။
ဟွံမာန်ပ္ဍဲကဵုပေါဲရုဲမာဲကီုလေဝ် သွက်ဖဵုဂုဏ်ညးဍုၚ်ကွာန်ဂမၠိုၚ်တံ ဆက်ယိုက်ဂၠေၚ်အာတာလျိုၚ်တုဲ ယဝ်ရကဵုလဝ်ဖျုန်ပထမ သွက်ဂုဏ်ဖဵုပိုန်ဒြပ်ဍုၚ်မ္ဂး ပရေၚ်ကျဍာံဍာံဟၟဲပုဟ် က္ဍိုပ်သ္ကိုပ်ဗော်ညးဍုၚ်ကွာန် ဟီုလဝ်မဒှ်ရ။
Ref:Bangkokpost