ဗေဂျေၚ်၊ ဖေဖဝ်ဝါရဳ ၁၆
သွက်ပြဿနာ ပရေၚ်ပိုန်ဒြပ်ကေုာံ ပရေၚ်ဂီုကၠီု ဍုင်ယူရောပ်တံဂှ် တင်စုတ်ဒုဟ်ကဵု အလဵုအသဳကြုက် ဟွံဂွံရောၚ် ဝန်ဇၞော်ဍုၚ်သအာၚ်ဝါမ်ယိ ဗတိုက်ဖအောဝ်ဏာ ဝန်ဇၞော်ဍုၚ်သအာၚ် ပြၚ်သေတ်ကဵု ဂျာမနဳတံရ။
ဝါမ်ယိ ဗတိုက်ဖအောဝ်ဏာ ပ္ဍဲပေါဲသဳကၠဳဍုၚ်မျူနေတ် က္ဍိုပ်သ္ကိုပ်ဂၠးကဝ်အဆံၚ်သၠုၚ်တုဲ ဟီုဂးလဝ်အတိုၚ်ဏံကီု မဳဒဳယာကြုက်တံ ချူလဝ်ပ္ဍဲဖေဖဝ်ဝါရဳ ၁၄ ဂှ်ရ။
ပ္ဍဲဖေဖဝ်ဝါရဳ ၁၃ ကၠောန်လဝ်ပေါဲသဳကၠဳ ပရေၚ်ဂီုကၠီု က္ဍိုပ်သ္ကိုပ်ဂၠးကဝ်အဆံၚ်သၠုၚ်တုဲ အခိၚ်ဆဵုဂဗလဝ်ကဵု ဝန်ဇၞော်ဍုၚ်သအာၚ်ပြၚ်သေတ် ယာန်နိုအာ ဗာရအ်ကေုာံ ဝန်ဇၞော်ဍုၚ်သအာၚ် ဂျာမနဳ ယိုဟာတ် ဝါဒဳဖူတံ ဒၞာဲမ္ၚးဂှ် ဝါမ်ယိ ဟီုလဝ်အတိုၚ်ဏံရောၚ်။
အခိၚ်သမဂ္ဂယူရောပ် အဃောဂစာန်ယှအ်ဖျေံ ပရေၚ်မ္ဒးဗ္ဒဗ္ဒာဲမံၚ် လ္တူအမေရိကာန်ကေုာံ ကြုက်တံဂှ် ကြုက်ဂှ် ဒှ်မိသဟာဲပတေဟ်စဂွံ တံၚ်တဲခိုဟ်မွဲရောၚ် ဝါမ်ယိသ္ဂးရ။
ပရေၚ်ကြုက်တဴတက်မံၚ်တံဂှ် ဒှ်အခေါၚ်အရာသွက်ယူရောပ်တံမဒှ်တုဲ တၚ်ကော်ဆောသွက်ယူရောပ်တံဂှ် မံက်တိတ်ကၠုၚ်မံၚ် နူဍုၚ်ကြုက်ဟွံသေၚ်ပုဟ် ဝါမ်ယိ ဟီုရ။
အလုံဂၠးကဝ်မွဲ ပွကၠောန်ကေတ်မံၚ်မွဲလပါ်ဓဝ်တံ၊ ပွမစဵုဒၞာဂုဏ်ဖဵုပိုန်ဒြပ်ဇကုတံကေုာံ ဍုၚ်ဒုၚ်သ္ဇိုၚ်ကဵုဇြဟတ်အဝဵုတံ အခိၚ်ပဵုဂၠိုၚ်တိုန်မံၚ်ဏံ နတဲမူဝါဒပရေၚ်ဟီုဖဵုစှ်ေစှ်ေ လုက်စုက်အာကဵုကြုက်ထေက်ရောၚ် ဝါမ်ယိဟီုရ။
အကြာပိုဲညးတံၜါလပါ်ဂှ် ဒှ်သ္ကံတံၚ်တဲညးသ္ကံတုဲ သၞဟွံသေၚ်ရောၚ် ကေုာံ ပရေၚ်ဗ္ဒဗ္ဒာဲညးမွဲကေုာံညးမွဲတံဂှ် အရာဆက်စပ် ဒှ်အန္တရာဲ ဖဵုပိုန်ဒြပ်ဟွံသေၚ်ရောၚ် ဝန်ဇၞော်ဍုၚ်သအာၚ်ကြုက် သ္ဂးရ။
ကၠောန်အာပရေၚ်ပံၚ်တောဲ ဗွဲမကၠးမးတံဂှ် သွက်ပရေၚ်ဂီုကၠီု အန္တရာဲဟွံသေၚ်ရောၚ် ညးဟီုရ။
ပ္ဍဲကဵုသၞာံတုဲတုဲတေံ စပ်ကဵုကြုက် ပၠုပ်လဝ်ကွဳစက်ဇြဟတ်လလဳတုဲ အကြာကြုက်ကဵု ယူရောပ်တံ အရေဝ်ဂၠိုၚ်ကၠုၚ်လဝ် နွံရ။
ပရေၚ်ဆက်ဆောံ အကြာကြုက်-ယူရောပ် ညံၚ်ဂွံတဴတက်အာ စၞောန်ပ္ညုၚ်သောၚ်ၚ်ကၠးကၠးတံ ညံၚ်ဂွံမံက်တိတ်ကၠုၚ်မာန် ပြၚ်သေတ်ကဵု ဂျာမနဳတံ ဘိုၚ်ရီုဗၚ်ညိ ဝါမ်ယိ ဗတိုက်ဖအောဝ်ဟီုလဝ်ရောၚ်။
Ref:AFP