ပ္ဍဲကၟိန်ဍုၚ်သေန်ကောပေါဝ် ပရေၚ်ပလေဝ်ပလေတ် ဒဒှ်မကၟာတ်စဵုဒၞါလဝ် အခေါၚ်သ္ပမ္ၚဵုထပ်တဲ မၞိဟ်တြုံလိၚ်တုပ်တံဂှ် ဟွံအံၚ်ဇၞး

သေန်ကာပေါဝ်၊ အဝ်ဂါတ် (၂)

စပ်ကဵုသၞောဝ်ဥပဒေ ခေတ်ကိုဝ်လိုဝ်နဳ မၞိဟ်တြုံရေၚ်သ္ကအ် ဆက်ဆောံလိၚ်မ္ဂး ဒှ်ဒုဟ်ဂှ်ဝွံ တၚ်ဒုၚ်လျိုၚ် နူကဵုဝန်ဇၞော်ကဆံၚ်လ္တူ မစဵုဒၞါကဵု ပရေၚ်သ္ပမ္ၚဵုထပ်တဲ သာ်လဵုဟွံဟီုဂှ်ဝွံ ပရေၚ်သဳကၠဳ အကြာညးဍုၚ်ကွာန် ပ္ဍဲသေန်ကာပေါဝ်ဂှ် ဂွံတိုန်အသိၚ်ရ။

အတိုၚ်ဂလာန် ဝန်ဇၞော်အပ္ဍဲဍုၚ် ကေုာံ သၞောဝ်ဥပဒေ K.Shanugam ဂှ်မ္ဂး “နကဵုအလဵုအသဳ အခိၚ်ကလေၚ်ဇွိတ်သပေါတ်ဒၟံၚ် စေဝ်ပၞောန်ဂှ် ပရေၚ်မလုပ်သၞောဝ် စပ်ကဵုသ္ပမ္ၚဵုထပ်တဲတံဂှ် ပ္ဍဲကဵုရုၚ်သၞောဝ်ဓဝ်ဂမၠိုၚ် ညံၚ်ဂွိုအ်ဒးဒုၚ်တၚ်ကော်ဆဴတံ ဗီုလဵုဂွံစဵုဒၞါရောဟီုဂှ် ချပ်ဗ္စာဒၟံၚ်ရ” သာ်ဝွံ သ္ဂးရ။

ကၟိန်ဍုၚ်လ္ၚဵု လ္တူဂၠးတိဏံဂှ် ဂ္စါန်ဒၟံၚ် သွက်ဂွံသ္ပစၟတ်သမ္တီ ပရေၚ်သ္ပမ္ၚဵုထပ်တဲလိၚ်တုပ်တံကီုလေဝ် သေန်ကာပေါဝ်ဝွံ နဒဒှ်သ္ဂောံသ္ပစၟတ်သမ္တီ ပရေၚ်ထပ်တဲအကြာလိၚ်တုပ်တံဂှ် ညံၚ်မၞိဟ်သ္ဍိုက်မၠိုက်လိၚ်တုပ်တံ၊ မၞိဟ်ပြံၚ်သၠာဲလဝ်လိၚ်တံ ကေုာံ ဗွိုၚ်ညးသ္ဍိုက်မၠိုက်လိၚ်တုပ်ရေၚ်သ္ကအ်တံ ဂွံပါလုပ်ကၠုၚ် ဂၠိုၚ်ၚ်ဂှ် ဗီုလဵုဂွံကၠောန်ရောဟီုဂှ် ဒးကၠေံစိုတ်လွဳပရာဒၟံၚ်ရ။

ပွမကၠေံစိုတ်လွဳပရာဗွဲ မဂၠိုၚ်ဂၠေၚ် သွက်ဂွံတးပါဲ အရာမကၟာတ်စဵုဒၞါ စပ်ကဵု ပရေၚ်ဆက်ဆောံလိၚ် အကြာမၞိဟ်တြုံရေၚ်သ္ကအ် မကော်ဂး သၞောဝ်ဥပဒေ ရာဇသာတ်ဇၞော်ဍုၚ်သေန်ကာပေါဝ် ၝောံပိုဒ် 377A ဂှ် သၞာံဗွဲမလအ်လ ပ္ဍဲကဵုရုၚ်သၞောဝ်ဓဝ်တံဂှ် ကျဗြံလဝ်ရ။

ကၟိန်ဍုၚ်သေံ မလေပ်ပတှ်ေကေတ် ပရေၚ်ဘာသာ ဇြိုဟ်ဟ်နက်က်တုဲ ကွေတ်ဗိုန်ဂှ်ဝွံ အပ္ဍဲသၞာံဏံ ပ္ဍဲကဵုအာယှဒိုဟ်အဂၞဲ မကဵုအခေါၚ်ဗွဲမလုပ်သၞောဝ် ကုသမဂ္ဂညးသ္ဍိုက်မၠိုက်လိၚ်တုပ်တံဂှ် ဒှ်ကၠုၚ်ကၟိန်ဍုၚ်ကိုပ်ကၠာအိုတ်ရ။

သၞောဝ်ဥပဒေ ခေတ်ကိုဝ်လိုဝ်နဳဂှ်ဝွံ တၚ်ဒတူလိုၚ် သေန်ကာပေါဝ် လ္တူဂကောံဗွိုၚ် LGBTQ တံဂှ် သကဵုမံက်ကၠးလဝ်တုဲ ကၠာတေံ ဇၟာပ်ပ်ပရေၚ်သဳကၠဳ သ္ဂောံပြံၚ်လှာဲဥပဒေဂှ်မ္ဂး နူကဵုဂကောံပရေၚ်ဘာသာတံ ဒစဵုဒစးကၠုၚ်လဝ်ရ။

ပ္ဍဲကဵုဗွိုၚ်မှာဇန် ကၟိန်ဍုၚ်သေန်ကာပေါဝ် ပရေၚ်ဘာသာတၞဟ်ခြာတံဂှ် ကောန်ကၟိန်ဍုၚ်သေန်ကာပေါဝ် ဗ္ဒါဲ (၁၉) တၟံကၠံဂှ်ဝွံ စၟတ်သမ္တီလဝ် နဒဒှ်ကောန်ဘာသာခရေတ်ယှာန်တံတုဲ ဗုဒ္ဓဘာသာဂှ် ဒှ်ဂကောံဇၞော်အိုတ် (၃၁) တၟံကၠံရ။

ထိုၚ်ဝါန်ဝွံ ဒှ်ကၟိန်ဍုၚ်အာယှ မသ္ပလဝ်စၟတ်သမ္တီ ကုပရေၚ်သ္ပမ္ၚဵုထပ်တဲအကြာညးလိၚ်တုပ်တံ မွဲဍုၚ်ဓဝ်ရ။

ပ္ဍဲကၟိန်ဍုၚ်ဝေဒ်နာမ်ဂှ် ဆောဖွက်ညးလိၚ်တုပ်တံဂှ် ၜိုန်ရကဵုလဝ်အခေါၚ် သ္ပပေါဲမ္ၚဵုထပ်တဲ သၚ်္ကေတတံကီုလေဝ် သ္ဂောံသ္ပတၠလယိုၚ်ပ္တန်အိန်ထံၚ်တံဂှ် ဟွံသ္ပလဝ်စၟတ်သမ္တီရ။

ဟံၚ်ကံၚ်ဝွံ ၜိုန်ရဟွံကဵုလဝ်အခေါၚ်ကီုလေဝ် သွက်ဂွံကော်နၚ် ပွံၚ်အိန်ထံၚ် ညးသ္ဍိုက်မၠိုက်လိၚ်တုပ်တံ အပ္ဍဲကၟိန်ဍုၚ်ဂှ်ကဵု ဝဳဇြာမဗ္ဒါဲဒလာဲဒၟံၚ် ဆောဖွက်ညးတံဂှ် ကဵုလဝ်အခေါၚ်ရ။

ကၟိန်ဍုၚ်ဗၟာ၊ မလေဝ်ယှာ၊ သေန်ကာပေါဝ် ကေုာံ ဗရူနာၚ်တံဂှ် ဒှ်ကၟိန်ဍုၚ်အာယှဂမၠိုၚ် မလလောၚ်ပ္တိတ်လဝ် သၞောဝ်ဥပဒေ စေဝ်ပၞောန်မကၟာတ်စဵုဒၞါလဝ် ပွမဆက်ဆာံလိၚ် အကြာမၞိဟ်လိၚ်တုပ်တံရ။

Ref: Bangkok Post