(ကံပေါက်) ၊ အဝ်ဂါတ် (၂)
ပ္ဍဲဗ္ဒါဲဒဵု (ဖွားရှၚ်မ) မၞုံဒေသ (ကံပေါက်)၊ ပွိုၚ်ဍုၚ်ဍာ်ဗု၊ ရးဒေသဇၞော်တၞၚ်သဳဂှ် ပ္ဍဲဂိတုအဝ်ဂါတ် (၁) ပယျာံဂယးဂှ် ပၠံၚ်သၟုဟ်ဓာတ်သဘာဝ ကုမ္ပဏဳသေံ PTTEP ဒးဒုၚ်ဖံက်ဗ္တိုဟ်လဝ်ရဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကုပၠံၚ်သၟုဟ်ဓာတ်သဘာဝ (ဇောတိက) ကုမ္ပဏဳသေံ PTTEP ဂှ် ဂကောံဟွံတီယၟုမွဲတၠ ကၠုၚ်စိုပ်ပါမ်မာၚ် ဖံက်ဗ္တိုဟ်လဝ်ရ။
ဟိုတ်နူပၠံၚ်သၟုဟ်ဓာတ်သဘာဝ ဒးဒုၚ်ဖံက်ဗ္တိုဟ်ဂှ်ရ ပၠံၚ်ဂှ် ဗ္တိုဟ်ထ္ကးအာတုဲ သၟုဟ်ဓာတ်သဘာဝတံ ဇီပြိုဟ်တိတ် က္တဵုဒှ်လဝ်ကီုလေဝ် မၞိဟ်ဂွံဝပ်ဇီုကပိုက်ဂှ် ဟွံမွဲရ။
အတိုၚ်ဂလာန် ညးဒေသတံဂှ်မ္ဂး ပၠံၚ်သၟုဟ်ဓာတ်သဘာဝဂှ်ဝွံ အကြာဂကောံဒပ်ကံၚ်ဇြဳပၞာန်တံ မကေတ်လဝ်ပရေၚ်ဂီုကၠီုဂှ် ဒးဒုၚ်ဖံက်ဗ္တိုဟ်လဝ်ရဂှ် ဟီုရ။
ဗွဲကြဴပၠံၚ်သၟုဟ်ဓာတ်သဘာဝ ဗ္တိုဟ်အာတုဲဂှ် ကောန်ဒပ်ကံၚ်ဇြဳပၞာန်တံကဵု သၞာဲဒဴကုမ္ပဏဳတံ အာစိုပ်စၟဳစၟတ်လဝ်တုဲ ကၠောန်ၜိုတ်ပလေဝ်ပလေတ်ဒၟံၚ်ရဂှ် သ္ဂးရ။
ကုမ္ပဏဳသေံ PTTEP ဂှ်ဝွံ နူကဵုဒၞါဲဂအာၚ်ကၠောန် ကၠေၚ်ဍေန်ကဵု သၟုဟ်ဓာတ်သဘာဝ (ဇောတိက) သြၚ်ဇမ္ၚောဲဂှ် တတ်ကၠောံရးတၞၚ်သဳတုဲ နူကဵုပၠံၚ်အပ္ဍဲတိဂှ်မွဲကဆံၚ် ပလံၚ်ဗစိုပ်ဒၟံၚ်သၟုဟ်ဓာတ်သဘာဝ ပ္ဍဲဍုၚ်သေံရ။
ကုမ္ပဏဳသေံ PTTEP ဝွံ ပ္ဍဲကဵုကမၠောန်ကၠေၚ်ဍေန် ကဵု သၟုဟ်ဓာတ်သဘာဝတံဂှ် ဒှ်ကုမ္ပဏဳ ပံၚ်တောဲလဝ်ကဵု ဌာနဝန်ဇၞော်ဓာတ်လလဳ ကေုာံ ဇြဟတ်ဓာတ်လလဳကၟိန်ဍုၚ်ဗၟာ မွဲရ။
ပၠံၚ်သၟုဟ်ဓာတ်သဘာဝ ကုမ္ပဏဳသေံ PTTEP ဂှ် ဂကောံလဵုဖံက်ဗ္တိုက်ပလီုပလာ်လဝ်ရောဟီုဂှ် လလောၚ်ပ္တိတ်လဝ် ဟွံမွဲဏီရ။
ပရိုၚ်−သြၚ်လောန်တိုၚ်(မ်)
sanlontai