ပေါဲရုဲမာဲကၟိန်ဍုၚ်သေံ ဗော်ပရေၚ်ဍုၚ်ကွာန် ပြိုၚ်ပ္ကာန်တံၚ်ဂြဲဒၟံၚ်မာဲဂှ် ကၠောန်ဗဒှ်လဝ် ပ္ဍဲကဵုဂိတုမေ စၟတ်တ္ၚဲ (၁၄) ဏံရ။ ဟိုတ်ဂှ်ရ အကာဲအရာပေါဲရုဲမာဲသေံကဵု ပရေၚ်ပၠန်ဂတးကၟိန်ဍုၚ်ဗၟာကီု၊ ကြဴနူပေါဲရုဲမာဲတုဲ ပရေၚ်ပြံၚ်သၠာဲမူဝါဒဒှ်ကၠုၚ်မာန်ကီု၊ ပရေၚ်ဇီုကပိုက်ဒး လ္တူပၠန်ဂတးက္ညၚ်ဗၟာ နွံကၠုၚ်ဗီုပြၚ်လဵုမာန်ရော။ စပ်ကဵုအကာဲအရာဏံတုဲ ဆက်စၠောံလဝ်သၟာန်လဝ်ကဵု ဒါရိုက်တာ ပရေၚ်ဆက်ဆောံဍုၚ်သ္အာၚ် ISP Myanmar မဒှ်ညးလ္ၚတ်ပါ်ပါဲပရေၚ်ဍုၚ်ကွာန် ဥူအောၚ်ဒူညုၚ်ရ။
-ကိုပ်ကၠာအိုတ်ဏံ ပ္ဍဲပေါဲရုဲမာဲသေံဂှ် ဗော်တအ်ဂှ် အကာဲအရာ တၚ်ဂွံဇြဟတ်ဗီုလဵု တၠုၚ်လအာမူဝါဒဗီုလဵုနွံရော သ္ၚဳဂၠိပ်ထ္ၜးကဵုညိ။
ပေါဲရုဲမာဲဂှ်တှ်ေ စဒှ်လဝ် ပ္ဍဲဂိတုမေ စၟတ်တ္ၚဲ (၁၄) ဂှ်ရ။ အဓိကဂှ်တှ်ေ အတိုၚ်တၚ်ဂၞၚ်ဆန္ဒညးဍုၚ်ကွာန်၊ လိက်ပရိုၚ်၊ ဌာနသုတေသနတအ် ကံက်ကေတ်လဝ်ရ။ အခိၚ်ကံက်ကေတ်လဝ်ဂှ် မၞိဟ်ဒးစိုတ်ဂၠိုၚ် ဂြိပ်ဒၟံၚ်ဂတဂှ်တှ်ေ နဒဒှ်သ္ကိုပ်ဝန်ဇၞော်ဂှ် ပဳတာရ။ ညးဂှ်တှ်ေ က္ဍိုပ်သ္ကိုပ် ဗော် Move forward party ညးဂှ်တှ်ေ မၞိဟ်ဒးစိုတ်ဂၠိုၚ်ဒၟံၚ်။ ဒုတိယဂှ် ကောန်ဝုတ်တက်ဇြေန် ဗက်ဒၟံၚ် ဒၞာဲဒုတိယရ။ ယဝ်ဒးဟီုကဵုဗော်တှ်ေ ဗော်ဖျူထိုၚ်ဂှ် ဒှ်ဗော်တက်ဇြေန် က္ဍိုက်ဒၟံၚ်က္ဍိုပ် အခိၚ်ကၠာတေံရ။ အခိၚ်လၟုဟ်ဏံ ညးဂှ် မၞိဟ်ဒးစိုတ်ဂၠိုၚ်။ ဒုတိယဂှ်တှ်ေ ဗော် Move forward party သၟတ်တအ် ညးချဳဒရာၚ်ကတိုၚ်ကၟဟ်တအ် က္ဍိုပ်ဒၟံၚ်က္ဍိုပ်ဂှ်လေဝ် မၞိဟ်ဒးစိုတ်ဂၠိုၚ်ဒၟံၚ်ရ။ တအ်ဏံဂှ်တှ်ေ အကာဲအရာသ္ၚဳဂၠိပ်ပါ်ပါဲဒၟံၚ် အခိၚ်လၟုဟ်ဏံရ။
-ပ္ဍဲကဵုဗော်တအ်ဂှ်တှ်ေ စပ်ကဵုပရေၚ်ကၟိန်ဍုၚ်ဗၟာတုဲ တၚ်မူဝါဒညးတအ်ဟီုဂးဒၟံၚ် ဗီုပြၚ်လဵု နွံရော။
ဟၟဲပုဟ်။ ပ္ဍဲသၞောဝ်ဥပဒေပေါဲရုဲမာဲသေံ စၟတ်ပိုၚ်ခြာ ပျးဌာန်လဝ်ဂှ်တှ်ေ စပ်ကဵုမူဝါဒပရေၚ်ဍုၚ်သ္အာၚ်တုဲ ဟီုဂးဟွံဂွံပုဟ် ပိုၚ်ခြာလဝ်ရ။ ဗော်လဵုလေဝ် ဟွံဟီုပုဟ်။ ဗွဲတၟေၚ်တှ်ေ ညးတအ်ဂှ် သွက်ပရေၚ်ဍုၚ်ညးတအ်ရ စွံဒၟံၚ်အာရီု။ မူဝါဒဒုၚ်သ္ဇိုၚ်ကဵု ညးဍုၚ်ကွာန်ရ။ ဗွဲတၟေၚ်တှ်ေ ကဵုစရိတ်ထံက်ပၚ်မုဏောၚ်။ ဗီုဏံ စန္ဒက်မာဲဂှ် ဍေံဂၠိုၚ်ရ။
-ပေါဲရုဲမာဲတုဲ ပ္ဍဲဂကောံအလဵုအသဳတိုန်ကၠုၚ်တၟိဂှ် သွက်ပၠန်ဂတးက္ညၚ်ဗၟာ ပရေၚ်ထံက်အရီု ပရေၚ်ဇီုကပိုက်ဗီုပြၚ်လဵု နွံကၠုၚ်မာန်ရော သ္ၚဳဂၠိပ်ကဵုညိ။
သွဟ်ပေါဲရုဲမာဲလၟုဟ်ဂွံဟီုဂှ် ပြဟ်ဒၟံၚ်ဏီ။ ညးဍုၚ်ကွာန်ဒးစိုတ်ဂှ် မွဲကဏ္ဍ။ ဆ္ဂးဂှ် မွဲလ္ပာ်ဂှ်လေဝ် သွဟ်ပေါဲရုဲမာဲဂှ် ပ္ဍဲဂိတုဂျူလာၚ် ၜိုတ်သတ္တာဟပဌမမှ ဂွံတီကၠးဏောၚ်။ ဣဏံ ဒှ်အကာဲအရာမွဲရ။ တုဲပၠန် မွဲဂှ် တၠုၚ်လအာသဘာဝပေါဲရုဲမာဲသေံဂှ် ဒးတီလဝ်ဏောၚ်။ သွက်ညးစၞးကၠတ်ထဝ်သၟဝ် (၅၀၀)ဂှ် ကၠောန်ဗဒှ်ပေါဲရုဲမာဲရ။ မွဲလ္ပာ်ပၠန်ဂှ် ကၠတ်ထဝ်လ္တူ (၂၅၀) ဂှ် အလဵုအသဳသီအဝဵုကၠာတေံ ခါန်ကၞက်လဝ် (၂၅၀) နွံရ။
ပံၚ်သီုဖအိုတ် (၇၅၀)တုဲမှ ဒးရုဲစှ် သ္ကိုပ်ဝန်ဇၞော်ဏောၚ်။ အောန်အိုတ်ဒးဂွံမာဲ (၃၇၆)မှ ဂွံဒုၚ်ရုဲပ္တိုန်သ္ကိုပ်ဝန်ဇၞော်ဂွံရ။ ညးဂှ် ဒှ်အလဵုအသဳရော ဂွံဟီုဂှ် ပြဟ်ဒၟံၚ်ဏီ။ မွဲလ္ပာ်ဂှ် ယဝ်ရဒးဟီုတှ်ေ ဗော်နွံပၟိက်ကဵုဒပ်ပၞာန် ဟွံဇၞးမာဲကွေံကွေံပုဟ်။ ဆ္ဂးဂှ် ယဝ်ရပံၚ်ကဵု (၂၅၀)နူကၠၚ်ဏံတှ်ေ ညးတအ်လေဝ် ဒှ်အလဵုအသဳမာန်ဒၟံၚ်။ အကာဲအရာဏံ နွံမံၚ်။ နွံမွဲဂှ်တှ်ေ စပ်ကဵုပၠန်ဂတးက္ညၚ်တှ်ေ ဂွံဟီုချိုတ်တ်ပၠိုတ်တ် ဟွံဂွံပုဟ်။ အလဵုအသဳသေံဂှ် ပ္ဍဲကၟိန်ဍုၚ်ဗၟာ အလဵုအသဳလဵုဒှ်ဒှ် ဆက်ဆောံတွဵုရ။ အလဵုအသဳပၞာန်သၟးဟွံသေၚ်ပုဟ် အလဵုအသဳ ပရေံနူဏံလေဝ် ဆက်ဆောံဂှ်ရ။ မုဒှ်ရောတှ်ေ ညးတအ်ဂှ် ဒှ်ဍုၚ်ဇိုၚ်ဝုတ်ဒိုဟ်မွဲဍုၚ်။ နကဵုတၚ်ထ္ၜးဟိုတ်ပရေၚ်ဂီုကၠီု ပရေၚ်ပိုန်ဒြပ်တုဲ ဆက်ဆောံတွဵုရ။ မွဲလ္ပာ်ပၠန်လေဝ် လ္ပာ်ဂကောံဒစဵုဒစးဂှ်လေဝ် ညးတအ်ဟွံကၠဟ်ထောံပုဟ် ဆက်ဆောံဂှ်ရ။ ဆ္ဂးဂှ် ဒးရံၚ်ကဵု ဒတုဲဖိုလ်ဏောၚ်။ မွဲအံၚ်ဂှ်တှ်ေ ကံက်ကေတ်အခေါန် ကုမ္ပဏဳကၠေၚ်ဍေန်သေံ PPT ဏောၚ်ဟီုတုဲ ဘပဠလဝ်ရ။ ကိစ္စဏံ NUG ကၠောန်လဝ် နွံရ။ ဂၠံၚ်ဍာန်ဆက်စၠောံဗၞိက် ဂၠံၚ်ကွဳစက်ဇၞော် ဗြဝတဳ – မာချံက်ဂှ်လေဝ် ပ္ဍဲလ္တူဏံ သေံ ကြိုက်စိုတ်ဏောၚ် ဟွံထေၚ်ပုဟ်။
-ယဝ်ရဗော်တက်ဇြေန်သ္ကိုပ်ဝန်ဇၞော်တြေံ(ဗော်ဖျူထိုၚ်) ဇၞးဏောၚ်တှ်ေ ပရေၚ်ပြံၚ်သၠာဲဗီုပြၚ်လဵု ဒှ်မာန်ရော။
လ္ပာ်ဗော်ဖျူထိုၚ်ဂှ်တှ်ေ ဒးဇၞးဏောၚ်၊ ပတှ်ေကေတ်လဝ် ဒးဒှ်အလဵုအသဳဏောၚ်။ ယဝ်ရကလေၚ်ရံၚ်တှ်ေ နူကဵုလက်ထက်သ္ကိုပ်ဝန်ဇၞော်တက်ဇြေန် အခိၚ်ကၠာတေံ စပ်ကဵုကၟိန်ဍုၚ်ဗၟာတုဲ ညးတအ်ချပ်လဝ် နွံဒၟံၚ်ရ။ တၚ်တုပ်စိုပ် ပရေၚ်ပံက်တောဲ ကျောက်ဖရာ-မေဝ်ခေါၚ် နွံရ။ ကၟိန်ဍုၚ်ပန်ဍုၚ်ပံၚ်တောဲတှ်ေ နကဵုသၞောတ်ပရေၚ်ပိုန်ဒြပ်မွဲဓဝ် ကၠောန်သ္ပအာ ပရေၚ်ဖောအ်ဗြေဝ်ဏောၚ်ဟီုဂှ် အိုၚ်ဒဳယာမွဲဂကူရ။ ဗဟဵုလ္ဒောဝ်ဂှ်တှ်ေ သေံ ၊ ဗၟာ၊ ကမ္ဘောဒဳယျာ၊ လာအိုဝ်ဟီုတှ်ေ တၚ်ချပ်ဂၞန်လဝ်ဗီုဏံ ကေၚ်နွံလဝ်ရ။ ယဝ်ရဗော်ဖျူထိုၚ်ဇၞးအာဏောၚ်တှ်ေ တၚ်ချပ်လဝ်ဏံ ကလေၚ်ဒှ်ကၠုၚ်မာန်ဏောၚ်။
-အလဵုအသဳတိုၚ်ကၠုၚ်ဂှ် သွက်ဂွံပြံၚ်မူဝါဒပရေၚ်ဍုၚ်သ္အာၚ်ညးတအ် မွဲလစုတ်ဓဝ် ဟွံလောဲပုဟ်ဟီုဂှ် မုဟိုတ်ရော။ ဟိုတ်နူပရေၚ်ပြံၚ်သၠာဲ ဟၟဲဂှ်ရ။ ပရေၚ်ဇီုကပိုက်ဒး လ္တူပၠန်ဂတးက္ညၚ် ဍိုန်လျဏောၚ် ဟီုမာန်ဟာ။
ဍုၚ်သေံဂှ်ယဝ်ရရံၚ်ကဵု အာဇြဳယာန်တှ်ေ သေံဂှ် စပ်ကဵုပရေၚ်ကၟိန်ဍုၚ်ဗၟာတှ်ေ ပရေၚ်က္ဍိုက်က္ဍိုပ်ဏောၚ်ဟီုဂှ် ဍုၚ်သှ်ေဒၟံၚ်တအ် စွံလဝ်စိုတ်ရ။ ပ္ဍဲဍုၚ်ဗၟာ ယဝ်ရပြသၞာ ဒှ်ကၠုၚ်မွဲမွဲတှ်ေ ဒးဒုၚ်နူကဵုဍေံတအ်။ သၟာဒဒိုက်တအ်တိတ်ကၠုၚ်ကီု ဗီုနူကၠာဏံ ပၟတ်ပၞာန်ထၞာန်ကၠုၚ်ကီု ဗီုပြၚ်ဏံဂှ် ဍေံတအ်ဒှ်ဓဝိၚ်ဂွိၚ်ဒၟံၚ်ရ။ တၚ်ထ္ၜးဟိုတ်စပ်ကဵုကပရေၚ်ဂီုကၠီုဂှ် မွဲ။ တုဲပၠန် သှ်ေဒၟံၚ်ဂှ် ကိစ္စဂဥုဲၜူမာဲလေဝ် နွံဒၟံၚ်။ ပရေၚ်ကူသာန်သွံရာန်မၞိဟ်လေဝ် နွံ။ တၚ်ထ္ၜးဟိုတ်ပရေၚ်ဂီုကၠီုဂှ် မွဲ။ ပရေၚ်ပိုန်ဒြပ် ပရေၚ်ဒတုဲဖိုလ်တအ် နွံဒၟံၚ်ဏီရ။
-အလဵုအသဳသေံအခိၚ်လၟုဟ်ဏံ မူဝါဒညးတအ်ဗီုပြၚ်လဵု နွံဒၟံၚ်ရော။ ပရေၚ်ပံၚ်တောဲရေၚ်တၠုၚ်ဂှ် လၟောဝ်အာဒၟံၚ် လ္ပာ်ကံၚ်ဇြဳပၞာန်ဟာ လ္ပာ်ဂကောံဒစဵုဒစးတအ်ရော ဗီုလဵုညာတ်ရော။
လၟောဝ်အာဒၟံၚ်လ္ပာ်လဵုရောဂွံဟီုဂှ် ဝါတ်ဒၟံၚ်။ ညးတအ်ဂှ် အာဒၟံၚ် ပရေၚ်ကာတ်ဗ္ဒာဲ နတဲရ။ ဝန်ဇၞော်ပရေၚ်ဍုၚ်သ္အာၚ်သေံလၟုဟ်ဂှ် လကြဴညးဗော်ဟၟဲပုဟ်။ ညးဂှ်နူသၞာဲဒဴကဵုဗျူရိုဝ်ကရေဇြဳ ကဆံၚ်တိုန်ကၠုၚ်သိုက်က်တုဲ ဒှ်ကၠုၚ်ဝန်ဇၞော်ပရေၚ်ဍုၚ်သ္အာၚ်ရ။ ဂုဏ်နူဂှ်ရ အခိၚ်လၟုဟ် သုၚ်စောဲဒၟံၚ် ဝါဒညးကီု လကြဴလေဝ် သွက်ဂွံဒှ်ကၠုၚ်ဗီုဏံဂှ် ဂၠိုၚ်ရ။
-အလန်လကြဴအိုတ်ဏံ စပ်ကဵုပေါဲရုဲမာဲသေံတုဲ မုမိက်ဂွံထပ်ဟီုတၞဟ်သ္အာၚ်နွံဏီရော နွံတှ်ေ ဟီုထ္ၜးကဵုညိ။
နွံဒၟံၚ် မွဲရ။ ပ္ဍဲပေါဲရုဲမာဲဏံ ဟွံညိၚ်ဝတ်မွဲသာ်ဂှ် ဖျူထိုၚ် ဂွံဇၞးဟွံမာန်ပုဟ်။ သ္ပမဇ္ဇျဟ်ကဵု ပၟိက်ဆန္ဒညးဍုၚ်ကွာန်တုဲ ယဝ်ရအလဵုအသဳတအ်တိုန်ကၠုၚ်တှ်ေ ဒှ်ကၠုၚ် ပြသၞာမာန်ဏောၚ်။ ကောန်ကမၠောန်ကောန်ကၟိန်ဍုၚ်ဗၟာ နွံဒၟံၚ်အဏံ ညးဍုၚ်ကွာန်တအ်ဂှ် ယဝ်ရမံၚ်သ္ၚောဲသ္ၚောဲခြာခြာကဵု ပရေၚ်ဍုၚ်ကွာန်ညးတအ်တှ်ေ သာတုဲ ခိုဟ်ဏောၚ်။