“ကောန်ဒပ်(ကံၚ်ဇြဳပၞာန်)မုက်ပၞာန်ဂှ် ဗွဲတၟေၚ်တှ်ေ ကပေါတ်ကညောတ် ပရေၚ်ပိုၚ်ပြဳ ကောန်ဒေသတအ် ပၠံၚ်ၜးဘပဠကေတ် စံၚ်ပလီုထောံလဝ် နွံရ။ ပ္ဍဲဒေသဒပ်မဟာ ၁၊ ဒပ်မဟာ ၂၊ ဒပ်မဟာ ၃၊ ဒပ်မဟာ ၅၊ ဒပ်မဟာ ၆ တအ်ဂှ် ဆက်ဒှ်ဒၟံၚ်ဖိုဟ်ဏီ”
ပ္ဍဲတိဍာ်ထိၚ်ဒဝ်ကဝ်ဒူလေဝ် သ္ပတမ်နူဒပ်ပၞာန်သီအဝဵုတုဲ ဒဵုကဵုအခိၚ်တ္ၚဲဏံ ပရေၚ်ချဳဒရာၚ် ဒပ်ကံၚ်ဇြဳပၞာန်ကဵု ဒပ် BGF ကေုာံ ပရေၚ်ဖံက်ပ္ကဝ်အခေါၚ်အရာမၞိဟ်ကၠောန် သ္ပဒၟံၚ် ဂၠိုၚ်ကၠုၚ်တိုန်ဒၟံၚ်အရိုဟ်ဒဒှ်တ္ၚဲဂှ်ရ ညးဍုၚ်ကွာန် (၄) ကိုတ်ပြၚ် ဒးဂျိုၚ်ဒၟံၚ်လမျီု သီုစိုတ်ဖေက်ဂၟံက်တုဲ ဒးဂြိပ်ဒဴဒၟံၚ် ပ္ဍဲဒၞာဲဗၠးဘဲရဂှ် ဗဟဵု KNU လလောၚ်တြးလဝ် ပ္ဍဲကဵုဂိတုမေ စၟတ်တ္ၚဲ ၁၁ ဏံရ။
ဟိုတ်ဂှ်ရ ပ္ဍဲတိဍာ်ဗော်သွးကောန်ဂကူကရေၚ် KNU ဂှ် အခက်ခုဲညးဍုၚ်ကွာန် ဒးဂြိပ်ဒဴပါဲဒၟံၚ်ဘဲပၞာန် ဒးဆေၚ်ဒၟံၚ်မုက်ကီု၊ ပရေၚ်ဒပ်ကံၚ်ဇြဳပၞာန် ဖံက်ပ္ကဝ်ဒၟံၚ် အခေါၚ်အရာမၞိဟ်ကီု၊ အရီုဗၚ်ဗ္စာရဏာပရေၚ်မၞိဟ် ဆက်နွံဒၟံၚ်ပၟိက်တအ်ကီု စပ်ကဵုအကာဲအရာဂမၠိုၚ်ဏံတုဲ ဆက်စၠောံသၟာန်လဝ်ကဵု ညးတာလျိုၚ်စန္ဒက်ဆဝ်ပ္ၚုဟ် ဂကောံအခေါၚ်အရာမၞိဟ်ကရေၚ် KHRG သဝ်နန္ဒဇြူရ။
-ကိုပ်ကၠာအိုတ်ဏံ ပ္ဍဲဂိတုဨဗြဴ (၁) ဂိတုကဵု ဂိတုမေလၟုဟ်ဏံ ပရေၚ်ကံၚ်ဇြဳပၞာန် ဖံက်ပ္ကဝ်ဒၟံၚ်အခေါၚ်အရာမၞိဟ် ပ္ဍဲတိဍာ် KNU ကဵု အကာဲအရာချဳဒရာၚ်ပရေၚ်ပၞာန် ဗီုပြၚ်လဵု ဆက်နွံဒၟံၚ်ရော။
ပ္ဍဲတိဍာ်ထိၚ်ဒဝ် KNU ပ္ဍဲဂိတုဨဗြဴ ကဵုဂိတုမေဏံဂှ် စပ်ကဵုပရေၚ်ကံၚ်ဇြဳပၞာန် ဖံက်ပ္ကဝ်အခေါၚ်အရာမၞိဟ်တုဲ အတိုၚ်ပိုဲပကောံပကေဝ်ဂွံလဝ်ဂှ်တှ်ေ ပရေၚ်ဗတိုက်ပန်ကဵုက္ၜၚ်ကျာ၊ ပရေၚ်သုၚ်စောဲ နဒဒှ်ဒေၚ်ဒုၚ်ဒၞာမၞိဟ် ပရေၚ်ပြိုက်ဂစိုတ်တအ်၊ ပရေၚ်ပျဲပျာံဍဵုဍိုက် အရာတအ်ဏံဂှ် ဆက်က္တဵုဒှ်ဒၟံၚ်ဖိုဟ်ရ။ ပရေၚ်ဖံက်ပ္ကဝ်အခေါၚ်အရာမၞိဟ်ဂှ် ဗွဲတၟေၚ်တှ်ေ ဒှ်ဒၟံၚ် ပ္ဍဲတိဍာ်ဒပ်မဟာ ၁၊ ဒပ်မဟာ ၂၊ ဒပ်မဟာ ၃ ကဵုဒပ်မဟာ ၅ ဂှ်တှ်ေ ပရေၚ်ဍေံတအ်ဗပေၚ်ဒပ်မုက်ပၞာန်အရန် နွံဒၟံၚ်ရ။ ကောန်ဒပ်(ကံၚ်ဇြဳပၞာန်)မုက်ပၞာန်ဂှ် ဗွဲတၟေၚ်တှ်ေ ကပေါတ်ကညောတ် ပရေၚ်ပိုၚ်ပြဳ ကောန်ဒေသတအ် ပၠံၚ်ၜးဘပဠကေတ် စံၚ်ပလီုထောံလဝ် နွံရ။ ပ္ဍဲဒေသဒပ်မဟာ ၁၊ ဒပ်မဟာ ၂၊ ဒပ်မဟာ ၃၊ ဒပ်မဟာ ၅၊ ဒပ်မဟာ ၆ တအ်ဂှ် ဆက်ဒှ်ဒၟံၚ်ဖိုဟ်ဏီရ။
-စပ်ကဵုအကာဲအရာ ခရိုၚ်ဒူပလာယာ ဒပ်မဟာ(၆)တုဲ ဟီုထ္ၜးကဵုညိ။
စပ်ကဵုအကာဲအရာခရိုၚ်ဒူပလာယာ ဒပ်မဟာ(၆)ဂှ်တှ်ေ ပရေၚ်ဗတိုက်ကဵုက္ၜၚ်ကျာ ဆက်ဒှ်ဒၟံၚ်ဖိုဟ်ရ။ ပရေၚ်ပန်ပှ်ောကြာန်န်ဒမာန်ဒမာန် ဆက်ဒှ်ဒၟံၚ်ပေါဲဗတိုက်ဏီ။ တုဲပၠန် ပရေၚ်ရပ်ဒက်ဟွံဗဗွဲဓဝ် ပရေၚ်ဍဵုဍိုက်ပျဲပျာံတအ်ဂှ်တှ်ေ ဆက်ဒှ်ဒၟံၚ် ပ္ဍဲတိဍာ်ဒပ်မဟာ ၆ ဖိုဟ်ရ။ ဟိုတ်နူပရေၚ်ပန်ပှ်ောကဵုက္ၜၚ်ကျာ ပရေၚ်ပန်ဖျေံလွဟ်ဇၞော်တုဲ ဘာကျာ်တအ်၊ ဘာဗုဒ္ဓဘာသာ၊ ရုၚ်ဂဥုဲ၊ ဗ္ဒမ်ကဵုဂဥုဲ ပရေၚ်ဇီုကပိုက်ဒးဒၟံၚ် ဆက်နွံဒၟံၚ်ဖိုဟ်ဏီရ။ ချိုတ်တ်ပၠိုတ်တ်ဂှ်တှ်ေ အခိၚ်လၟုဟ်ဏံ ဟွံဂွံလဝ်တၚ်ဂၞၚ်ဏီရ။ သ္ၚိဒၟံၚ်ဒးလီုလာ်အာလဝ် မူစိမရော။ ဘာကျာ်၊ ဘာလကျာ် လီုလာ်အာလဝ်ဟီုဂှ် ပြဟ်ဟ်ဏံ ပိုဲ ဟီုဟွံဂွံဏီ။ ပ္ဍဲလ္တူပေါဲဗတိုက် ပန်ပှ်ောဒၟံၚ်ကြာန်န် ပရေၚ်ဗတိုက်ကဵုက္ၜၚ်ကျာ ဒှ်ဒၟံၚ်ဂှ်တှ်ေ ကောန်ဒေသညးဍုၚ်ကွာန်တအ် ဒးဂြိပ်ဒဴဒၟံၚ်ဖိုဟ်ဏီရ
အရီုဗၚ်ဗ္စာရဏာပရေၚ်မၞိဟ်လေဝ် ဆက်နွံဒၟံၚ်ပၟိက်ဏီရ။ နကဵုညးဍုၚ်ကွာန် ဒးဂြိပ်ဒဴပါဲဓလေတ်ဒၟံၚ်ဂှ် ဒၟာနူဒးဂြိပ်ဒဴဒၟံၚ် ပ္ဍဲဒေသညးတအ်ဂှ်ရ ဖျေံသ္ဇိုၚ်ဟွံဂွံဏီရ။ ပရေၚ်ညိၚ်ဝတ်ဟၟဲဏီ။ ပရေၚ်ဂီုကၠီုဟၟဲဏီဂှ်ရ ဗဒိုပ်ပါဲပၞာန်တအ်လေဝ် ဆက်နွံဒၟံၚ်ပၟိက်ကဵု အရီုဗၚ်ဗ္စာရဏာပရေၚ်မၞိဟ်ဏီရ ညးတအ်လေဝ် ဒးဂြိပ်ဒဴပါဲဓလေတ်ဒၟံၚ်ဖိုဟ်ရ။
-ပ္ဍဲတိဍာ် KNU ဂှ် ပရေၚ်ဒပ်ကံၚ်ဇြဳပၞာန် ဖံက်ပ္ကဝ်ဒၟံၚ်အခေါၚ်အရာမၞိဟ် ပ္ဍဲခရိုၚ်လဵု ဒှ်ဒၟံၚ်ဂၠိုၚ်အိုတ်ရော။
ပ္ဍဲဒပ်မဟာ ၃၊ ဒပ်မဟာ ၁၊ ဒပ်မဟာ ၅ ကဵုဒပ်မဟာ ၆ ဂှ် ပရေၚ်ဖံက်ပ္ကဝ်အခေါၚ်အရာမၞိဟ် ဒှ်လဝ်ဂၠိုၚ်အိုတ် ပိုဲဟီုဂွံရ။ အဓိကဂှ် ပေါဲဗတိုက်ဆက်ဒှ်ဒၟံၚ်ရ။ ပရေၚ်ပန်ဖျေံလွဟ်ဇၞော်ကြာန်န်၊ ပရေၚ်ဗတိုက်ကဵုက္ၜၚ်ကျာ ဆက်ဒှ်ဒၟံၚ်ရ။ ကောန်ဒေသညးဍုၚ်ကွာန်တအ် ဇီုကပိုက်ဒးဒၟံၚ်ဘဲဝပ်။ ဒးချိုတ်ဒၟံၚ်ရ။ ဒးမံၚ်ဒၟံၚ်ကဵု စိုတ်ဖေက်ရ။ အခေါၚ်ဂွံအာကၠုၚ်ဗၠးဗၠးၜးၜး ဟၟဲဏီပုဟ်။ ပရေၚ်ဂယိုၚ်လမျီုလေဝ် ဟိုတ်နူပေါဲဗတိုက်တုဲ ဒးဆဵုဂဗဒၟံၚ်ကဵု တၚ်အခက်ခုဲဗွဲမဂၠိုၚ်ရ။ တုဲပၠန်ပြသၞာမာၚ်တိုပ်တိလေဝ် ဆက်နွံဒၟံၚ်ဖိုဟ်ရ၊ အခေါၚ်ဂွံအာကၠုၚ် ဗၠးၜးဟၟဲဏီပုဟ်။ ပရေၚ်တေၚ်ဂြတ် နွံဒၟံၚ်ရ။ အခေါၚ်အာတရဴလေဝ် ဟၟဲဏီ။ ဗွဲတၟေၚ်တှ်ေ ကပေါတ်ဗီုကဵု ဂဥုဲဇဗတအ်ဂှ် ယိုက်ကေတ်ဏာနၚ် ဟွံဂွံဏီ။ ယဝ်ရရပ်ဂွံ ညးဍုၚ်ကွာန်တအ် ယိုက်ဏာနၚ်တှ်ေ ကၠောန်ပဒၟံၚ် ပရေၚ်ပျဲပျာံဍဵုဍိုက်နွံရ။ တအ်ဏံဂှ် ဒှ်အကာဲအရာ ဒပ်မဟာ ၁၊၃၊ ၅၊ ကဵု ၆ ဒှ်ဒၟံၚ်အခိၚ်လၟုဟ်ဏံရ။
-အကာဲအရာပရေၚ်ဘဝ၊ ပရေၚ်ပိုန်ဒြပ်၊ ပရေၚ်အာကၠုၚ် ညးဍုၚ်ကွာန် မၞုံပ္ဍဲပွိုၚ်ဍုၚ်ကအ်ကြိက်ကဵု ပွိုၚ်ဍုၚ်လှာဒကှ် လလောၚ်တြးလဝ် ပရေၚ်အုပ်ဓုပ်ပၞာန်ဂှ် အကာဲအရာဟွံဂီုကၠီု ဗီုပြၚ်လဵု ဂွံညာတ်ကေတ်ဒၟံၚ်ရော။
အကာဲအရာပရေၚ်မၞိဟ်ဂှ် အခေါၚ်အာကၠုၚ်ဗၠးၜးဟၟဲဏီ။ ပရေၚ်တေၚ်ဂြတ်တအ် နွံဒၟံၚ်ရ။ တုဲပၠန်ကမၠောန်ပရေၚ်ဂယိုၚ်လမျီုတအ်ဂှ် ဒးဆဵုဂဗဒၟံၚ်ကဵု အခက်ခုဲဗွဲမဂၠိုၚ်ဖိုဟ်ရ။ တၚ်နွံပၟိက် သွက်ပရေၚ်ဂယိုၚ်လမျီု အခိၚ်ဒးအာကၠုၚ်တရဴတအ်ဂှ် ပရေၚ်တေၚ်ဂြတ် နွံရ။ ဂွံပ္ဍိုက်ဏာနၚ် သောၚ်သောၚ်ၜးၜးဟၟဲရ။ ဗွဲတၟေၚ်တှ်ေ ဂဥုဲဇဗ၊ ပၟတ်ခရက်တအ် မပ္တံဗီုဏံ ပရေၚ်ပ္ဍိုက်ပလံၚ်ဗစိုပ် ဟွံဂွံဏီ။ စပ်ကဵုမာၚ်တိုပ်တိတုဲ စကစ သာတုဲ ပတေၚ်ဂြတ်လဝ် နွံရ။ မာၚ်ဍေံတအ်တိုပ်လဝ်တိဂှ် အခိၚ်ပြေၚ်ဂၠဴညးဍုၚ်ကွာန်တအ် လိုန်ဒးဂှ် မ္ၚးနူတိရစ္ဆာန်ပြေၚ်ဂၠဴညးဍုၚ်ကွာန်တအ် ဒးချိုတ် သီုကဵုအာတ်ဒၟံၚ်သြန်လေဲ နူညးဍုၚ်ကွာန်တအ်ဏီရ။ အကာဲအရာဗီုဏံ ဒှ်ဒၟံၚ်ရ။ တုဲပၠန် စပ်ကဵုမာၚ်တိုပ်တိတုဲ ပ္ဍဲဒပ်မဟာဗွဲမဂၠိုၚ်ဂှ်လေဝ် အန္တရာယ်ဏံ ဆက်နွံဒၟံၚ်ဖိုဟ်ဏီရ။ ပ္ဍဲဒပ်မဟာ ၁၊ ၃၊ ၅၊ ၆ ဂှ် အန္တရာယ်ဆက်နွံဒၟံၚ်ဖိုဟ်ဏီရ။
– အရီုဗၚ်ဗ္စာရဏာပရေၚ်မၞိဟ်တအ် စိုပ်ဒၟံၚ်ဇရေၚ်ညးပါဲဒဴဘဲပၞာန် ရုံရုံဂပ်ပ်ကီုဟာ။ အကာဲအရာပရေၚ်ရီုဗၚ် နူဗလးမုက်တိဂှ်ရော အခက်ခုဲဗီုလဵု နွံဒၟံၚ်ရော။
အရီုဗၚ် နူကဵုအထံက်ပၚ်ဗ္စာရဏာပရေၚ်မၞိဟ် စိုပ်ဒၟံၚ်ဇရေၚ်ညးပါဲဘဲပၞာန်တအ်ဂှ် သရောပ်တုဲ ယဝ်ရဒးဟီုတှ်ေ တၚ်နွံပၟိက်ဂှ် နွံဒၟံၚ်ဖိုဟ်ရ။ အကာဲအရာပရေၚ်ထ္ၜလဘာ် ပ္ဍဲဗလးမုက်တိလေဝ် ဇြဟတ်ဍိုန်ဒၟံၚ်ဖိုဟ်။ ဟိုတ်ဂှ်ရ အရီုဗၚ်ဗ္စာရဏာပရေၚ်မၞိဟ်တအ်ဂှ် ဗွဲတၟေၚ်တှ်ေ ပရေၚ်ရီုဗၚ်ထ္ၜလဘာ်ကဵု ဇရေၚ်ညးဍုၚ်ကွာန်ဒးဂြိပ်ဒဴဒၟံၚ်ဂှ် နွံဒၟံၚ်ပၟိက်ဖိုဟ်ရ။ တၚ်ဝါတ်ဂါတ်ခက်ခုဲဂှ်တှ်ေ ကဵုပေါဲဗတိုက်ဆက်ဒှ်ဒၟံၚ်ဏံ ကဵုညးဍုၚ်ကွာန်တအ်ဂှ် ဇြဟတ်ဍိုန်ဒၟံၚ်ဏီ ဟီုစမာန်ရ။ ဟိုတ်နူပရေၚ်ဟွံဂီုကၠီုတုဲ အရီုဗၚ်ဗ္စာရဏာပရေၚ်မၞိဟ် ပရေၚ်ပလံၚ်ဗစိုပ် ဇရေၚ်ဗဒိုပ်ပါဲပၞာန် ဗွဲမဂတာပ်အခိၚ် ဇြဟတ်ဍိုန်ဒၟံၚ်ဏီ ဟီုစဂွံရ။
– အလန်လကြဴအိုတ်ဏံ မုမိက်ဂွံထပ်ဟီုဗပေၚ်နွံရော နွံတှ်ေ ဟီုထ္ၜးကဵုညိ။
ပ္ဍဲမွဲကာလ ပရေၚ်စကစသီအဝဵု ပွိုၚ်၂ သၞာံပြၚ်ဏံဂှ် ဗီုပြၚ်တၠအဝဵုပေၚ်ၚ် ပရေၚ်ဍေံတအ် သ္ပရှ်ေသှ်ေဒ္ဂေတ်ဗက် အခေါၚ်အရာမၞိဟ် ညိဟၟဲပုဟ်။ ဟွံဒ္ဂေတ်ဗက်သၞောဝ်ဥပဒေ သၞောတ်ဗ္ၜတ်ကၟိန်ဍုၚ်နာနာမွဲသာ်တုဲ ဖံက်ပ္ကဝ်ဒၟံၚ် မံက်က်ထေၚ်ၚ် နွံရ။ အရာတအ်ဏံဂှ် ဒှ်အရာက္တဵုဗဒှ်ကဵု ပရေၚ်ဒးဒုၚ်ဂိ အကာဲအရာပရေံအိုတ်ရ။ အတိုၚ်အလုံမွဲကၟိန်ဍုၚ်ကီု၊ သွက်တွဵုရးကရေၚ်ကီု ပရေၚ်ဖံက်ပ္ကဝ်အခေါၚ်အရာမၞိဟ် ဒှ်ဒၟံၚ်အရိုဟ်ဟ်တ္ၚဲရ။ တုဲပၠန် ဂဗုတ်ရာဇဝတ် ဗၠးတိတ်နူသၞောဝ်ကီု ဂဗုတ်ရာဇဝတ် က္လိလောန်ဒၟံၚ် လတူကောန်ဂကူမၞိဟ်လေဝ် အရိုဟ်ဒဒှ်တ္ၚဲ ဒှ်ဒၟံၚ်သီုအလုံမွဲဍုၚ်ရ။ အရာဏံဂှ် ပိုဲတအ် နူကဵုသွာၚ်ဇကုသၟဟ်အစောံမာန် ဒးဘိုၚ်ကရိုၚ်ပလေံကမၠက်ကဵုဏောၚ်။ ဒးကမၠေံဖအိုတ်ထောံ ပရေၚ်ဖံက်ပ္ကဝ် တၠအဝဵုပၞာန်တအ်ဏောၚ်။ သွက်ပရေၚ်ဗဗွဲဓဝ် ညးဒးဒုၚ်က္လိလောန်တအ်ဂှ် ဒးဘိုက်ကရိုၚ် ကၠောန်ရေၚ်တၠုၚ်ကဵုဏောၚ်။ နကဵုညးက္လိလောန်လဝ်လေဝ် ညံၚ်ပရေၚ်ကေတ်လျိုၚ် ပရေၚ်ဒုၚ်လျိုၚ် ဂွံနွံကၠုၚ် ဒးဘိုၚ်ကၠောန်ဏောၚ်။ သွက်ပရေၚ်အုပ်ဓုပ်တၠအဝဵုပၞာန် ဂွံအိုတ်အာ နကဵုကဆံၚ်ကၟိန်ဍုၚ် ကဆံၚ်ကၟိန်ဍုၚ်နာနာ ဒးဘိုၚ်ကၠောန် ရေၚ်တၠုၚ်ကဵုဏောၚ် မိက်ဂွံဟီုဏာရ။