ညးတာလျိုၚ်ဒပ်ဗၠာဲသၟိၚ် သေံ-ဗၟာ ၜါကၟိန်ဍုၚ်တအ်ဂှ် ပ္ဍဲဂိတုမေ တုဲကၠုၚ် စၟတ်တ္ၚဲ (၂၅)ဂှ် သွက်ဂွံပံၚ်တောဲစဵုဒၞာ ပရေၚ်ကူသာန်သွံရာန်မၞိဟ် တတ်ကၠောပယျဵုကေုာံ ပရေၚ်တတ်ကၠောံအာကၠုၚ် မွဲဒမြိပ်ပယျဵု ဟွံလုပ်ကဵုသၞောဝ်ဂှ် ပရေၚ်သဳကၠဳလဝ် ၜါလ္ပာ်နွံကၠုၚ်ရ။ မွဲလ္ပာ်ပၠန်ဂှ် ကောန်ကမၠောန်ဆုဲပြံၚ်ကၟိန်ဍုၚ်ဗၟာဂှ် ပ္ဍဲဂိတုဏံ ဒးဒုၚ်ရပ်ဒၟံၚ် အဆက်ဆက်ရ။
ဟိုတ်ဂှ်ရ အကာဲအရာ ဒပ်ဗၠာဲသၟိၚ် သေံ-ဗၟာ ၜါကၟိန်ဍုၚ် ဆဵုဂဗသဳကၠဳလဝ်ကီု၊ ပရေၚ်ဇီုကပိုက် က္တဵုဒှ်ကၠုၚ်မာန်ကီု၊ ယဝ်ရ Move Forward Party ဇၞးလဝ်ပေါဲရုဲမာဲဂှ် ဒှ်ကၠုၚ်အလဵုအသဳမ္ဂး ပရေၚ်ပြံၚ်သၠာဲ မုနွံကၠုၚ်မာန်ကီု။ စပ်ကဵုအကာဲအရာဏံတုဲ ဆက်စၠောံသၟာန်သွဟ်လဝ်ကဵု ဥူအောၚ် နူဇာနှိက်အခေါၚ်အရာသၟာကမၠောန်ဆုဲပြံၚ် MWRN ရ။
-ကၠာအိုတ်ဏံ အကာဲအရာသၟာကမၠောန်ဆုဲပြံၚ်ကၟိန်ဍုၚ်ဗၟာ တတ်ကၠောံကၠုၚ်ပယျဵု ဒးဒုၚ်ရပ်ဒၟံၚ်ဂှ် ဟီုထ္ၜးကဵုညိ။
ဍုၚ်မိ ကၟိန်ဍုၚ်ဗၟာပိုဲဂှ် စတမ်နူ ၂၀၂၁ ဖေဖဝ်ဝါရဳ စၟတ်တ္ၚဲ (၁) တုဲ သၟတ်၊ မၞိဟ်တၟိ၊ မၞိဟ်အဝဲခိုဟ်၊ မၞိဟ်အဇာလ္ဒောဝ် နွံဒၟံၚ်ပ္ဍဲဍုၚ်တအ်သီုဖအိုတ်ဂှ် ကမၠောန်ဇကုကဵုဇကု ဒၟာနူဒတူလာၚ်ကၠုၚ်ခိုဟ်ဟ် ဟွံမာန်ဂှ် နကဵုညးတအ် ဒၞာဲချောဲၜတ် ဍာ်ကေဝ် သွက်ညးတအ် ဒၞာဲကမၠောန်ကၟိတ်နွံဂှ် ဆုဲပြံၚ်အာဒၟံၚ်အိုတ်ရ။ ပ္ဍဲအရာပြံၚ်ဆုဲဂှ် နွံဒၟံၚ်ဗီုပြၚ် ၜါဗီုရ။ လ္ၚဵုဂှ်လေဝ် မၞိဟ်အာ မလေဝ်ယှာ၊ သေၚ်္ကာပေါဝ်၊ ကိုဝ်ရဳယျာသၠုၚ်ကျာ ဂျပါန် ဟွံလုပ်ကဵုသၞောဝ်နွံကီု လ္ၚဵုဂှ် ကိုဝ်ရဳယျာသၠုၚ်ကျာ၊ သေၚ်္ကာပေါဝ်တအ်လေဝ် ပိုၚ်ခြာလဝ် ဍာ်ဒကေဝ်နွံဒၟံၚ်ဂှ်ရ အာနဒဒှ်သၟာကမၠောန်သာမညတုဲ ဍုၚ်သေံ ကၠောန်ကမၠောန်လောဲမံၚ်ဂှ်လေဝ် သီုကဵုပရေၚ်ဟွံဂီုကၠီုညးတအ်၊ ပရေၚ်ဟွံပြေပြံၚ်ညးတအ် သွက်ဂွံသောၚ်ကလးပရေၚ်စသုၚ်မံၚ်စံၚ်မာန် ဍုၚ်သေံ ဒှ်ဍုၚ်ဇိုၚ်ဝုတ်ဒိုဟ်ဂှ် တတ်ကၠောံပယျဵုဒၞက် ဗီုလၟုဟ်ဏံလုပ်စိုပ်တုဲ ပရေၚ်ပ္တိတ်ဒၟံၚ်ဇြဟတ်ဂှ် ဒေါံအာမာန်ဟွံသေၚ်ပုဟ်ဂှ် အဲထေၚ်ကေတ်ရ။ ဒဵုကဵုအခိၚ် ကၟိန်ဍုၚ်ညိၚ်ဝတ်ၜိုဟ်သြိုဟ်တေံ ပိုဲဒးမၚ်ဏောၚ်။ ကၟိန်ဍုၚ်ဇကုလေဝ် ယဝ်ရသာယာဖဲသ္အဳဏောၚ်၊ ပရေၚ်ဂီုကၠီုနွံဏောၚ်၊ အခေါၚ်ဂွံပ္တန်ပ္တဴဘဝ ဗၠးဗၠးၜးၜးဏောၚ်တှ်ေ တမ်ရိုဟ်ကောန်ဂကူမၞိဟ်တအ်ဂှ် ဖျေံသ္ဇိုၚ်ပ္ဍဲဍုၚ်ဇကုတုဲ ကၠောန်တွဵုရလေဝ်။ အကာဲအရာလၟုဟ်ဂှ်တှ်ေ မၞိဟ်ဍောတ်တ်တအ် မၞိဟ်အဇာလ္ဒောဝ်တအ်သီုဖအိုတ်ဂှ် ပ္ဍဲကၟိန်ဍုၚ်ဇကု ဒတူလာၚ်ဟွံဂွံဂှ်ရ ဂစာန်ကၠုၚ်သွက်ဂွံတိတ်ဍုၚ်သ္အာၚ်ရဂှ် အဲညာတ်ကေတ်ဒၟံၚ်ရ။
-ပ္ဍဲဂိတုမေ စၟတ်တ္ၚဲ (၂၅) ဂှ် ပ္ဍဲပရေၚ်ညးတာလျိုၚ်ဗၠာဲသၟိၚ် သေံ-ဗၟာ ၜါဍုၚ်တအ် ဆဵုဂဗသဳကၠဳဂှ် ပရေၚ်ကူသာန်သွံရာန်မၞိဟ် တတ်ကၠောံပယျဵုဒၞက်ကဵု ပရေၚ်လုပ်တိတ်အာကၠုၚ်ဒၟံၚ် ဟွံလုပ်ကဵုသၞောဝ် ပ္ဍဲမွဲဒမြိပ်ပယျဵုဂှ် သွက်ဂွံပံၚ်တောဲစဵုဒၞာအာ သဳကၠဳလဝ်နွံရ။ ပ္ဍဲလ္တူဏံ ဗီုလဵုညာတ်ကေတ်ရော။
သ္ကုတ်လကြဴဏံ ပိုဲဂွံမိၚ်ကေတ်လဝ်ဂှ်တှ်ေ နူဒေသကာန်ချနပူရဳ ဒေသပယျဵုသေံ ဗၟာဂှ် လုပ်စိုပ်ကၠုၚ်ဒၟံၚ်ဂၠိုၚ်အိုတ် ဂွံညာတ်ကေတ်ရ။ ပ္ဍဲမာချံက်-ဗြဝတဳဂှ်တှ်ေ ဟိုတ်နူဇြဟတ်ပရေၚ်ဂီုကၠီုဂၠိုၚ်ဒၟံၚ်တုဲ နူဂၠံၚ်ဂှ် ဒၟာနူပတေၚ်ဂြတ်လဝ် ဂၠိုၚ်ဒၟံၚ်တုဲ ညးကူသာန်ပလံၚ်မၞိဟ်(ပွဲစား)တအ်လေဝ် ယဝ်ရဍေံတအ် ရပ်ဂွံတှ်ေ ဒၟာန်နူဂွိၚ်ဖေက်ဒးဒုၚ်ဒုဟ်ဒဏ်ကူသာန်သွံရာန်မၞိဟ်တုဲ ပ္ဍဲဒၞာဲဍေံတအ်ဗၠးၜးဂှ် ရုဲစှ်ကေတ်ဂှ်ရတှ်ေ ပိုဲဂွံညာတ်ကေတ်ဒၟံၚ် ဂၠိုၚ်အိုတ်ဂှ် လုပ်ကၠုၚ်ဒၟံၚ် နူကဵုကာန်ချနပူရဳ ဂၠိုၚ်အိုတ်ရ။
-ပ္ဍဲပေါဲရုဲမာဲသေံဂှ် လ္ပာ် Move Forward Party ဂွံဇၞးလဝ်ရ။ ဍေံတအ်ဂွံဇၞးလဝ်တုဲ ယဝ်ရစိုပ်အခိၚ်ကေတ်တာလျိုၚ် ဒက်ပ္တန်အလဵုအသဳမာန်တှ်ေ ပ္ဍဲလ္တူသၟာကမၠောန်ဆုဲပြံၚ် ပရေၚ်ဇီုကပိုက်ကၠုၚ် ဗီုပြၚ်လဵု နွံကၠုၚ်မာန်ရော။
စပ်ကဵုအရာဏံတုဲ ဒးမၚ်ရံၚ်ကျောဝ်ဒၟံၚ် ဗွဲမဂၠိုၚ်ဏီရ။ စိုတ်ဒှ်ဓဝိၚ်လေဝ် ဒှ်မံၚ်ကီုရ။ ပ္ဍဲအကာဲအရာလၟုဟ်ဏံ ပ္ဍဲဍုၚ်သေံ ပေါဲရုဲမာဲဇၞော်ဇၞော် တုဲဒှ်အာယျ ၜိုန်ဟီုကီုလေဝ် ဗော်ဇၞးလဝ်မာဲ ဂွံဒက်ပ္တန်အလဵုအသဳမာန် ဒဵုကဵုအခိၚ်လၟုဟ် ဟၟဲဏီရ။ ၜိုတ်အကာဲအရာပ္ညဳပ္ညပ်ဒၟံၚ်ဓဝ်ရ နွံမံၚ်။ ဗော်ဂွံလဝ်အဝဵုလၟုဟ်ဏံ က္ဍိုပ်သ္ကိုပ်ဒပ်ပၞာန် ဂအုပ်သ္ကိုပ်ဗိုလ်ဇၞော်ပရာဝေါ်ဂှ်လေဝ် အခိၚ်ကာလနွံဒၟံၚ် နဒဒှ်အလဵုအသဳမၚ်သ္ၚိ ဗီုလၟုဟ်ဏံ အာဆဵုဂဗသဳကၠဳဟီုဂှ် နကဵုပိုဲ ဒးစွံသတိဇၞော်ဇၞော်တုဲ ဒးမံၚ်တန်တဴဏောၚ် အဲညာတ်ကေတ်ရ။ ဍေံဂှ်တှ်ေ အတိုၚ်ပဝ်လဇြဳကၠာတေံရ ပံၚ်ဗ္စပ်ကဵု က္ဍိုပ်သ္ကိုပ်ပၞာန်ဗၟာရ။ လုကဴဗော်တၞောဝ်ဒတောဝ်တၟိ Move Forward Party ဟွံစိုပ် အကာဲအရာအုပ်ဓုပ်ပိုၚ်ပြဳဍုၚ်ဏီတှ်ေ ညးဍုၚ်ကွာန်ပိုဲ ဒးအာကၠုၚ်မံၚ်စံၚ် ကဵုသတိဏောၚ်။ ပ္ဍဲပယျဵုတအ်ဂှ် ပရေၚ်ရပ်စပ်ဒၟံၚ်၊ ပရေၚ်ကေတ်ဒၟံၚ်အရေဝ်တအ် ကၠောန်သ္ပဒၟံၚ်ဟီုဂှ်လေဝ် ဂွံဆဵုကေတ်ဒၟံၚ်ရ။ တအ်ဏံဂှ် ဒၟာနူဒှ်အန္တရာယ်မွဲဂကူဂှ်ရ ဒးဝေၚ်ပါဲထေက်ဏောၚ်။
-ပ္ဍဲဂိတုမေ စၟတ်တ္ၚဲ(၂၆)ဂှ်လေဝ် ဖံၚ်ဒေယှေန်အခေါၚ်အရာသၟာကမၠောန် LRF ဇာနှိက်အခေါၚ်အရာသၟာကမၠောန်ဆုဲပြံၚ် MWRN တအ်ဂှ် အာဆဵုဂဗသဳကၠဳလဝ်ကဵု ဌာနဝန်ဇၞော်သၟာကမၠောန်ရဂှ်ဓမံက်ထ္ၜးလဝ်ရ ပရောပရောဆဵုဂဗသဳကၠဳလဝ် အဓိကဂှ် ဟီုထ္ၜးကဵုညိ။
ယဝ်ဒးရံၚ်အာတှ်ေ က္ဍိုပ်သ္ကိုပ် Move Forward Party မာဿတာပဳတာဂှ် ဒက်ပ္တန်ဗော်တုဲ ပ္ဍဲပွိုၚ် ၃ သၞာံဂှ် မူဝါဒစပ်ကဵုကၟိန်ဍုၚ်ဗၟာဂှ် ဓမံက်ပ္တိတ်လဝ်ပိုတ်တ်သ္ကုတ်တ်ဂှ်လေဝ် ဒှ်သၟတ်မွဲတၠတုဲ လုပ်အာဝၚ်ဇၞော်ဇၞော်ရ။ ဌာန်ပရိုၚ်ပ္ဍဲဍုၚ်တအ်ဂှ် ဟီုထိုၚ်သးဒၟံၚ်ဗွဲမဂၠိုၚ် ဓမံက်ထ္ၜးဒၟံၚ်ဂှ် ဂွံညာတ်ကေတ်ရ။ ညးဂှ် နဒဒှ် သၟတ်မွဲတၠ ၚုဟ်က္တဵုဒၟံၚ်ရ။ ပလေဝ်ပလေတ်လဝ် သၞောတ်စှ်ေစှ်ေ ကော်လဝ်ချဴကဵုအနာဂတ်ရ။ ဟိုတ်နူပလေဝ်ပလေတ်ပြံၚ်သၠာဲမူဝါဒတြေံတြဟ်တေံဂှ်ရ ညးမၞုံအခေါၚ်ကဵုမာဲ ပ္ဍဲဍုၚ်ညးတအ် ၅၂ ပြကောဋိကိုတ်ဗွဲမဂၠိုၚ်ဂှ် ကဵုလဝ်မာဲထံက်ဂလာန်ညးရ။ ယဝ်ရံၚ်အာတှ်ေ ပိုဲဂှ် ပလေဝ်ပလေတ်ပြံၚ်သၠာဲအနာဂတ်တုဲမှ ဒက်ပ္တန်အာကၟိန်ဍုၚ်တၟိ ဗဗွဲဓဝ် ဗၠးၜးဏောၚ် ဟီုကြီုလဝ်ကီု တၚ်တၟေၚ်မွဲဂှ် စပ်ကဵုကၟိန်ဍုၚ်ဗၟာတုဲ ပ္တိတ်တြးကၠုၚ်လဝ် လိက်ဂံၚ်ၚ်သ္ကာသ္ကာ၊ တုဲပၠန် ပ္တိုန်လဝ်လိက်ဒစဵုဒစးဟီုထောံရ။ ညံၚ်ကၟိန်ဍုၚ်ပိုဲဂွံစိုပ်အာဒမၠု စပ်ကဵုကိစ္စဒပ်ပၞာန် သီကေတ်လဝ်အဝဵုဂှ် နကဵုညး ဒဒှ်ရဒစဵုဒစးအာ သ္ကာတ်တ်မြဟ်ဟ်ဂှ် ဟီုပ္တိတ်လဝ်တအ်ဂှ် တအ်ဏံဂှ် ညးဂှ် ဂကောံအလဵုအသဳ ဟွံသေၚ်ဏီပုဟ်။ ညးဂှ်ဆၜိုတ် ဗော်မွဲညိကီု။ ပ္ဍဲဍုၚ်သေံ ဗော်နွံဒၟံၚ် (၇၀)ဗော်ဂှ် ညးကၠာအိုတ်ရ ဒစဵုဒစးကဵုအရာဏံ ။ နူကအခိၚ်ဂှ်ရ မၚ်ရံၚ်ဒၟံၚ်ရ။ လကြဴဏံ ပ္ဍဲအခိၚ်စန္ဒက်မာဲ ကာလပေါဲရုဲမာဲဂှ် ကၠိုဟ်ကေတ်ဒၟံၚ် ဘဝညးဍုၚ်ကွာန် မၞုံပ္ဍဲကၟိန်ဍုၚ်ဗၟာတအ်ရ။ ထံက်ရံၚ်ဒၟံၚ်ရ။ နကဵုညး ယဝ်ရဂွံအခေါၚ်ဒက်ပ္တန်အလဵုအသဳမ္ဂး ကၠောန်ကဵု ပရေၚ်အရီုဗၚ်ဗ္စာရဏာပရေၚ်မၞိဟ်ဏောၚ်။ ပံၚ်တောဲကဵု အမေရိကာန်ကဵု ဥရောပတအ်တုဲ ရေၚ်တၠုၚ်ကဵု ဒတုဲဖိုလ်သွက်ကၟိန်ဍုၚ်ဗၟာဏောၚ်ဂှ် ဟီုလဝ်နွံရ။ အခက်ခုဲသၟာဆုဲပြံၚ်ကၟိန်ဍုၚ်ဗၟာတအ်ဂှ် တော်ဗ္စာရဏာဒးဒၟံၚ်ရ။ ကၠိုဟ်လေဝ် ကၠိုဟ်ကေတ်ဒၟံၚ်ရ။ ဟိုတ်နူဟီုလဝ် ကၠောန်သ္ပကဵု ညံၚ်ဘဝညးတအ် ဂွံခိုဟ်ကၠုၚ်ဏောၚ်ဂှ်ရ ပိုဲတအ်စၟဳမၚ်ဒၟံၚ်ရ။ နကဵုညး ယဝ်ဒက်ပ္တန်အလဵုအသဳတုဲ အုပ်ဓုပ်ကၟိန်ဍုၚ်မာန်ဏောၚ်တှ်ေ ဘဝသၟာကမၠောန်ဆုဲပြံၚ် နွံပ္ဍဲဍုၚ်သေံတအ်၊ ဘဝကောန်ဍုၚ်အရၚ်ပံၚ်စုၚ် အာစိုပ်ဒၟံၚ် ပယျဵုတအ်ဂှ်၊ ဘဝညးဍုၚ်ကွာန်ပိုဲ ဒးဆဵုဂဗဒၟံၚ် တၚ်ခက်ခုဲ ပ္ဍဲဍုၚ်တအ်ဂှ် ၜိုတ်ညးသ္ပမာန် ပံၚ်ဗ္စပ်ကဵုကၟိန်ဍုၚ်နာနာတုဲ ရီုဗၚ်ကဵုဏောၚ်ဟီုဂှ် ပိုဲပတှ်ေကေတ်လဝ်ရ။
-မိက်ဂွံထပ်ဟီုဗပေၚ်နွံတှ်ေ ဟီုထ္ၜးကဵုပၠန်ညိ။
ပိုဲဂှ် နွံကၠုၚ်ပ္ဍဲဍုၚ်သေံ ဗ္ဒာဲကဵုဗွဝ်စှ်သၞာံတုဲ ကောန်ကမၠောန်ဆုဲပြံၚ်တအ် ပံၚ်ကောံတုဲ ဒက်ပ္တန်ကၠုၚ် ဗီုပြၚ်သမဂ္ဂဂှ်ရ ပ္ဍဲအကာဲအရာသၟာကမၠောန်ပကတိဂှ် မုဒးဆေၚ်ဒၟံၚ်မုက်ရော။ ဓဝ်ဂဝိၚ်စံၚ်တူ သၟာကမၠောန်တအ်ဂှ်မုရော။ တၚ်ဝါတ်ဂါတ်ခက်ခုဲဏံသီုဖအိုတ်ဂှ် လ္ၚတ်ဂၠိုက်ဂၠာဲတုဲမှ ပိုဲဂှ် ဒှ်အကာဲအရာပ္တိုန်ထ္ၜးဒၟံၚ်ကဵု အလဵုအသဳသေံလၟိုန်ရ။ ပ္ဍဲကဵုတ္ၚဲသၟာကမၠောန်ဂၠးကဝ် တ္ၚဲမေဒေသီုဖအိုတ်ဂှ် သဳကၠဳကဵု သမဂ္ဂသၟာကမၠောန် နွံပ္ဍဲဍုၚ်သေံတအ်သီုဖအိုတ်ရ။ အရာလဵု ထေက်ကဵုဒးကၠောန်ရောဟီုဂှ် ပိုဲအာတ်မိက်ဒၟံၚ် အလဵုအသဳသေံလၟိုန်ရ။ လၟုဟ်ဏံ ပိုဲအာတ်မိက်လဝ်ဂှ်တှ်ေ ဂိတုမေ စၟတ်တ္ၚဲ (၁)ဂှ် အာဆဵုဂဗလဝ်နမၞိဟ်တုဲ ဒှ်ဗီုပြၚ်ထပ်ပ္ညဳပ္ညပ်လဝ်ရ။ ကောန်ဍုၚ်ပိုဲထ္ပက်လဝ်စၟတ်တဲလိက်ကသုၚ် MOU ကဵုဍုၚ်သေံဂှ် အခိၚ်လၟုဟ်ဏံ ဟိုတ်နူပေၚ်ကၠုၚ်ပန်သၞာံဂှ်ရ ကိစ္စကလေၚ်စဴဍုၚ်ဇကုတုဲ ဒးထ္ပက်စၟတ်တဲလိက်ကသုၚ်တၟိဂှ် အကာဲအရာအခိၚ်လၟုဟ်ဏံ ဟိုတ်နူကၟိန်ဍုၚ်ဟွံညိၚ်ဝတ်ဏီဂှ်ရ အရာဏံဂှ် ညံၚ်ဂွံဒှ်နဲကဲခိုဟ်အိုတ် နကဵုဌာနဝန်ဇၞော်သၟာကမၠောန်ဍုၚ်သေံ ပ္ဍဲဍုၚ်ဏံ စဳဇန်ရေၚ်တၠုၚ်ကဵုညိဂှ်လေဝ် ထပ်တုဲမိက်ဂွံအာတ်မိက်ဏာရ။