“မၞိဟ်ဗြဴစိုပ်ဒၟံၚ် ဨရိယာပၞာန်တအ်ဂှ် အတိုၚ်ဂွံလဝ်ပရိုၚ်ဂှ်တှ်ေ ကံၚ်ဇြဳပၞာန် သ္ပအနိၚ်အထက်သ္ပ ကောန်ဗြဴတုဲမှ ဒးဒုၚ်ဂစိုတ်လဝ် ဂတမုက်အပါဂှ် အကာဲအရာဗီုဏံ ဒှ်ဒၟံၚ်ရ”

ညးဗြဴပ္ဍဲတွဵုရးကရေၚ်ဍာဲတအ်ဂှ် ပ္ဍဲမွဲကာလဒပ်ပၞာန်သီအဝဵုဏံ ဒးဒုၚ်ရပ်ဒၟံၚ် ဟွံဗဗွဲကဵုဓဝ်၊ ဒးဒုၚ်ဍဵုဍိုက် ပျဲပျာံပြိုက်ဂစိုတ်လဝ်၊ ဒးဒုၚ်သ္ပကောန်ဗြဴ၊ ဟိုတ်နူပရေၚ်ကံၚ်ဇြဳပၞာန် ဗတိုက်ပန်ကဵုလွဟ်ဇၞော် ဗတိုက်ကဵုပၞာန်ကျာကံၚ်ဇြဳပၞာန်တုဲ ဒးဒုၚ်ဒၟံၚ်ဘဲဒဏ် သ္ကာတ်တ်မြဟ်ဟ်ရ။ ဆ္ဂး ညးဗြဴပ္ဍဲတွဵုရး ကရေၚ်ဍာဲတအ်ဂှ် ပ္ဍဲအကြာပရေၚ်ဍဵုဍိုက်ကရေပ်ဓရတ်ကံၚ်ဇြဳပၞာန်ဏံ ရီုဗၚ်ဒၟံၚ်ရေၚ်သ္ကအ်တုဲ ဆက်ပါလုပ်ဒၟံၚ် ပ္ဍဲအခန်ကဏ္ဍ မဒတုံစှ်ေဂှ်ရ။

ဟိုတ်ဂှ်ရ ပ္ဍဲမွဲကာလသီအဝဵုဏံ စပ်ကဵုအခက်ခုဲညးဗြဴတအ် ဒးဆေၚ်ဒၟံၚ်မုက်ကီု၊ ပရေၚ်ညးဗြဴတအ် ရီုဗၚ်ထ္ၜလာ်ဒၟံၚ် ညးသ္ကအ်ကီု၊ အကာဲအရာပရေၚ်ပါလုပ် ပ္ဍဲပၠန်ဂတးက္ညၚ်တုဲ ဆက်စၠောံသၟာန်လဝ်ကဵု ညးလုပ်ဂကောံ ညးရေၚ်တၠုၚ်ကေၚ်ကာဗဟဵု ဗော်သွးညးဗြဴကရေၚ်ဍာဲ (KyWo) ခရေဿတေန်ရ။

-ကၠာအိုတ်ဏံ ညးဗြဴပ္ဍဲတွဵုရးကရေၚ်ဍာဲတအ်ဂှ် ဒးဆေၚ်ဒၟံၚ်မုက်ကဵု အကာဲအရာ ဗီုပြၚ်လဵုနွံရော။

ပရေၚ်ဟွံဂီုကၠီု သွာၚ်စိုတ်ဓာတ်၊ ပရေၚ်ဟွံဂီုကၠီု ဆေၚ်စပ်ကဵုလိၚ်၊ ပရေၚ်ဟွံဂီုကၠီု ဆေၚ်စပ်ကဵုရုပ်ဝတ္ထု၊ ပရေၚ်ဟွံဂီုကၠီု စပ်ကဵုပရေၚ်ပိုန်ဒြပ် ပိုဲတအ်ဒးဒုၚ်စဒၟံၚ်သိုၚ်ရ။ နကဵုအဲမွဲတၠကီု သီုကဵုညးဍုၚ်ကွာန်တအ်သီုဖအိုတ် ဒးဒုၚ်ဒၟံၚ်ဗီုဏံဏောၚ် အဲထေၚ်ကေတ်ရ။ ပ္ဍဲဂိတုဏံတှ်ေ သာတုဲပရေံကၠုၚ်ရ။ ညးဗြဴစိုပ်ဒၟံၚ် ပ္ဍဲဨရိယာပၞာန်တအ်ဂှ် တ္ၚဲတုဲကၠုၚ်ဏံဂှ်ရ ပိုဲဂွံလဝ်ပရိုၚ်။ အေတှ်ေ ကံၚ်ဇြဳပၞာန် သ္ပကောန်ဗြဴတုဲ ဂစိုတ်ထောံလဝ် ဂတမုက်အပါညး အကာဲအရာဗီုဏံ ဒှ်ဒၟံၚ်ရ။

-ညးဗြဴလ္တူဍုၚ်တအ်ကဵု ညးဗြဴပါဲဘဲပၞာန်တအ် အကာဲအရာဗီုလဵု နွံဒၟံၚ်​ရော။ ဗီုပြၚ်လဵု တၞဟ်ခြာဒၟံၚ်ရော။

အကာဲအရာညးဗြဴလ္တူဍုၚ်ကဵု ညးဗြဴပါဲဘဲပၞာန်တအ်ဂှ်တှ်ေ ဟွံဂီုကၠီုဂှ် တုပ်ဒၟံၚ်ညးသ္ကအ်ရ။ ယဝ်တိတ်မ္ၚးဏောၚ်တှ်ေ ပြဟ်ဟ်ဏံ အကာဲအရာဂွံဂံၚ်အာ ညးမွဲဓဝ်ဂှ် ဟၟဲပုဟ်။ ကလေၚ်စဴဍုၚ်တုဲ လုပ်ဒၟံၚ် ပ္ဍဲဒၞာဲပါဲဘဲပၞာန်လေဝ် ပရေၚ်ဂီုကၠီုဟၟဲပုဟ်။ ပရေၚ်ဍိုက်ဟရိုက် ကဵုဇိုၚ်တဲလေဝ် နွံဒၟံၚ်။ ပိုဲဒးဆဵုဂဗလဝ်ရ။ အကာဲအရာဒးဆဵုဂဗဒၟံၚ်ကဵု ပရေၚ်ရပ်ဒက်လေဝ် ပိုဲဆဵုလဝ်နွံ။ အခေါၚ်အရာကမၠောန်လေဝ် ဟၟဲပုဟ်။ ပရေၚ်ဂီုကၠီုလေဝ် ဟၟဲ။ အရာရာအိုဿီုရ။ အခေါၚ်အရာမၞိဟ် ပိုဲကောန်မၞိဟ်တအ် ဂွံဒုၚ်စသိုၚ်နွံဒၟံၚ်ဂှ် ပိုဲသီုညးဖအိုတ် ဒးဒုၚ် ဆောံလေၚ်ဒၟံၚ် အကာဲအရာဗီုဏံလေဝ် ဒှ်ဒၟံၚ်ရ။

-ပ္ဍဲပၠန်ဂတးတွဵုရးကရေၚ်ဍာဲဂှ် အခန်ကဏ္ဍညးဗြဴတအ် ၜိုတ်ဂလိုၚ်လဵု ပၟိက်ဇၞော်ဒၟံၚ်ရော။ လ္တူဏံ သ္ၚဳဂၠိပ်ထ္ၜးကဵုညိ။

ညးဗြဴပိုဲဂှ် ပ္ဍဲကဵုအကြာပေါဲဗတိုက် သွက်ပရေၚ်ဂီုကၠီုကောန်ဇာတ်ဇကု၊ ကၟိန်အိန်ထံၚ်ဇကု သွက်ပရေၚ်ဂီုကၠီုဇကုဇကုဂှ် ၜိုတ်မာန်ကဵုမာန် ဒုၚ်ဒၟံၚ်ဒဒိုက်ပေၚ်ၚ်တုဲ ညးတအ်မံၚ်ဒၟံၚ်ဂှ် ပိုဲဂွံညာတ်ကေတ်ရ။ ဣဏံဂှ် ဒှ်တၚ်ဂွံဇြဟတ်ညးဗြဴပိုဲ မွဲတၚ် ဂွံဆဵုကေတ်ရ။ ပ္ဍဲညးဍုၚ်ကွာန်ပါဲဒၟံၚ်ဘဲပၞာန်တအ်ဂှ်တှ်ေ အခန်ကဏ္ဍညးဗြဴတအ် အကာဲအရာက္ဍိုက်က္ဍိုပ်မာန်ဒၟံၚ်ဂှ် ဂွံညာတ်ကေတ်ရ။ လၟုဟ်ဏံ ကြဴနူစကစ သီကေတ်အဝဵုတုဲဏံ ပ္ဍဲညးဗြဴပိုဲ ပရေၚ်ဍုၚ်ကွာန်၊ ပရေၚ်ပိုန်ဒြပ်ဟီုဂှ် ဒှ်ကၠုၚ် အကာဲအရာမၞိဟ်တြုံဟေၚ် ကၠောန်ဂွံဟွံသေၚ်ပုဟ်။ အလဵုညးဗြဴတအ် က္ဍိုက်က္ဍိုပ်ဟေၚ်မှ ဒှ်အကာဲအရာတတ်ကၠောံအာမာန်ဏောၚ်ဂှ် ညးတအ်ပတှ်ေကေတ် ဒုၚ်ကၠုၚ်တဲမာန်ဂှ်လေဝ် ဂွံဆဵုညာတ်ကေတ်လဝ်ရ။ ပ္ဍဲကဵုကဝ်မတဳပါဲပၞာန်ဂှ်တှ်ေ ၜိုတ်တၚ်ဂၞၚ်ကံက်ဂွံလဝ်ဂှ် ပရေၚ်ညးဗြဴပါလုပ်ဂှ်လေဝ် ပါလုပ် လၟိဟ်ဂၠိုၚ်ကၠုၚ်ဒၟံၚ်ရ။ တၚ်ဏံမွဲတၚ်လေဝ် ပိုဲဂွံဆဵုကေတ်လဝ် နွံရ။ အခန်ကဏ္ဍ ပရေၚ်က္ဍိုက်က္ဍိုပ်ကဵုဒှ်၊ အခန်ကဏ္ဍပဝ်လဇြဳကဵုဒှ်၊ ပ္ဍဲကဵုကဏ္ဍကၠုၚ်စိုပ်ဂှ် ပါလုပ်ဒၟံၚ်ပေၚ်ၚ်ကၟိုဟ်ဟ်ဂှ်လေဝ် နွံရ။

-ပရေၚ်ဍဵုဍိုက်ညးဗြဴတအ်နွံဒၟံၚ်ဂှ် နကဵုဂကောံညးဗြဴမွဲဂကောံ မုကၠောန်ရေၚ်တၠုၚ် ရီုဗၚ်ကဵုလဝ် နွံဒၟံၚ်ကီုရော။

အခန်ကဏ္ဍအဓိကဂှ်တှ်ေ သွက်ဂွံသောၚ်ကလး ကိစ္စက္တဵုဒှ်ဒၟံၚ် အခိၚ်လၟုဟ်ပြဟ်ဟ်ဏံမာန်ဂှ် ဂကောံညးဗြဴပိုဲဗွဲမဂၠိုၚ် ရီုဗၚ်ကဵုဒၟံၚ် သွာၚ်ထံက်ပၚ်ကဵုဇွောံ ညးပါဲဘဲပၞာန်တအ်လေဝ် နွံရ။ ပ္ဍဲကဵုအခန်ကဏ္ဍသွာၚ်ပၞာန်လေဝ် အာတုဲ ပိုဲကၠောန်ရေၚ်တၠုၚ်ကဵုလေဝ် နွံရ။ ပံၚ်တောဲကဵု တၠပညာစဳကၠး၊ တၠပညာဂဥုဲတအ်တုဲ အကာဲအရာလွဳလွတ်ကဵုဒၟံၚ်ဂဥုဲ ပ္ဍဲဗဒိုပ်ပါဲပၞာန်လေဝ် နွံ။ လၟုဟ်တှ်ေ ပိုဲဂှ် ညးဗြဴမၞုံကဵုဒၟုၚ်ဒၠေၚ်ဗွဲမဂၠိုၚ်တအ် ဃောပါဲဒၟံၚ်ဘဲပၞာန်ဏံဂှ်ရ အာဒၟံၚ်နကဵုဗီုပြၚ် ပါလုပ်ရီုဗၚ်ဒၟံၚ် ညးဍုၚ်ကွာန်ဇကု ညးမွဲကဵုမွဲဂှ် ဂၠိုၚ်ရ။ သ္ဇိုၚ်ဝန်ပရေၚ်ထတ်ယိုတ်တအ်လေဝ် ၜိုတ်ဍစိုပ် ၜိုတ်သ္ပမာန် ဒှ်ဒၟံၚ်အကာဲအရာ နူညးဍုၚ်ကွာန် ရီုဗၚ်ကဵုညးဍုၚ်ကွာန်မှ သောၚ်ကလးမာန်ဏောၚ်တှ်ေ အကာဲအရာဒးကၠောန်ရေၚ်တၠုၚ်ဒၟံၚ် ပရေၚ်ရံၚ်စံၚ်ထ္ၜလဘာ်ရေၚ်သ္ကအ် ဒးအာဒၟံၚ်ဗီုဏံရ။

-အလန်လကြဴအိုတ်ဏံ ဆေၚ်စပ်ကဵုအကာဲအရာညးဗြဴ ပ္ဍဲတွဵုရးကရေၚ်ဍာဲ ဒးဒုၚ်ဆေၚ်ဒၟံၚ်တုဲ မုမိက်ဂွံထပ်ဟီုဗပေၚ်နွံဏီရော။

ၜိုတ်သ္ပမာန် မၞိဟ်ဗြဴကဵုဒှ်၊ ညးဍုၚ်ကွာန်ကဵုဒှ်၊ ပရံၚ်လဝ်စိုတ်ဓာတ်တုဲ ဒုၚ်ဒဝ်ဒၟံၚ်ရ။ ညးဍုၚ်ကွာန်တအ်လေဝ် ရီုဗၚ်မၚ်မွဲဒၟံၚ် ညးသ္ကအ်ရ။ ညးဗြဴဍပရေၚ်ထတ်ယိုတ် ဟွံစိုပ်တအ်ဂှ်တှ်ေ သွက်ညးဗြဴ မၞုံဒၟုၚ်ဒၠေၚ်တအ်ဂှ် ပိုဲ နူလ္ပာ်ဂကောံမၞိဟ်ဗြဴတအ် ၜိုတ်မာန်ကဵုမာန် ရီုဗၚ်ကဵုလဝ် စရိတ်ၜံၚ် နွံ။ ညးဗြဴလေပ်လဝ်ကွတ်ဂဥုဲတအ်လေဝ် ကလေၚ်ရီုဗၚ်ကဵုဒၟံၚ် ညးသ္ကအ် နွံရ။ ပ္ဍဲဒၞာဲဂဥုဲစဵုဒၞာ ဍစိုပ်ဟွံသေၚ် ဒှ်ဒၟံၚ်မွဲဒၞာဲဂှ် ဒှ်ဒၟံၚ် တၚ်ကော်ချဴဇၞော်ကဵုဇြဟတ်ရ။ အရာဏံလေဝ် ဒှ်ဒၟံၚ်အကာဲအရာ မၞိဟ်ဇၞော်တအ်ရ စဳမာန်ဖန်ဖက်ကဵုမာန် ဒှ်ဒၟံၚ်ဂှ်ရ ပိုဲဂှ် မံၚ်ဒၟံၚ်ကရောံညးဍုၚ်ကွာန်သ္ဇိုၚ်တအ် ကြပ်ပ်လၟိုန်ရ။ တၚ်ဍိုန်လျဂှ် ၜိုတ်သ္ပမာန် လ္ပာ်ပိုဲ ရနုက်ဗပေၚ်ကဵုဒၟံၚ်။ သွက်အကာဲအရာ ပိုဲစန္ဒက်ဂွံဂှ်တှ်ေ ဒှ်အရာ ပိုဲဒးက္လေၚ်သုၚ်စောဲမာန်ဂှ်ဏောၚ် အတိုၚ်ပရေၚ်ဆဝ်ပ္ၚုဟ် ဗက်ကဵုကဏ္ဍဆေၚ်စပ်တအ်လေဝ် ပိုဲကၠောန်သ္ပကဵုဒၟံၚ်ရ။ အဓိကဂှ် ပိုဲညးဗြဴဟီုဂှ် ဒှ်မိယာဲရ။ သွက်ဂကောံကၟိန်အိန်ထံၚ်ဇကု ဂွံၜိုဟ်သြိုဟ် ပိုဲနွံဒၟံၚ်ပၟိက်ရ။ ဆဂး ပ္ဍဲအကာဲအရာဒေါံဟွံဂွံမွဲ ဒးကၠောန်သ္ပဒၟံၚ် အကာဲအရာဓမံက်ပ္တိုန်ပေါဲဗတိုက်ရ။ ဆဂးဂှ် မုဒှ်ဒှ်ရ ညးဇၞော်ဆေၚ်စပ်တအ်ဂှ်တှ်ေ ပိုဲမိက်ဂွံကဵုဏာကသပ်ရ။ မိက်ဂွံကဵုဘိုၚ်ချပ်ကဵု သွက်ပရေၚ်ဂီုကၠီု ညးဗြဴကဵု ကောန်ၚာ်တအ်ကီုရ။