ပ္ဍဲလက်ထက်ကံၚ်ဇြဳပၞာန် သၟာကမၠောန်တအ်ဂှ် ဒးဒုၚ်ရေက်ကးဒၟံၚ် သြန်ဂိတုၚုဟ်ကမၠောန်ကီု၊ ဒးဒုၚ်စကာဒၟံၚ်ကမၠောန် ဗွဲအဓမ္မကီု၊ တၠကမၠောန်တအ်ဂှ် ကေတ်အခေါၚ်ခိုဟ် လ္တူဟွံဂွံစဵုဒၞာလဝ်ကဵု သၞောဝ်ဥပဒေတုဲ စကာဒၟံၚ်သၟာကမၠောန်တအ် အရိုဟ်ဒဒှ်တ္ၚဲ စဵုကဵု ပွိုၚ် (၁၂) နာဍဳကီု၊ သီုကဵုတ္ၚဲအဒိုတ် လေဝ် စကာကဵုစှ်ေဒၟံၚ်ကမၠောန် ဗွဲအဓမ္မရ။
သၟာကမၠောန်ဒးဒုၚ်စကာဒၟံၚ် ဗွဲအဓမ္မတအ်ဂှ် မ္ၚးနူဟွံဂွံသြန်ဂိတု ၚုဟ်ကမၠောန်ပေၚ်ၚ်ဂှ် ၜိုန်ရဒးစှ်ေဒၟံၚ် အခိၚ်အပဵုကီုလေဝ် ဟွံက္လိဂွံၚုဟ်အခိၚ်ပဵုတုဲ ပရေံအိုတ်ဂှ် အခေါၚ်အရာလွဳလွတ်ဂဥုဲ ကေုာံ အခေါၚ်ၜံၚ်ပၟတ်တအ်လေဝ် ဒးဆောံလေၚ်ဒၟံၚ်ရ။ ဟိုတ်ဂှ်ရ ပ္ဍဲလက်ထက်ကံၚ်ဇြဳပၞာန် အကာဲအရာသၟာ ကမၠောန်တအ် ဒးဒုၚ်ဍဵုဍိုက်ဒၟံၚ်၊ အခက်ခုဲသၟာကမၠောန်တအ်ဒးဒုၚ်ဆေၚ်ဒၟံၚ်မုက်ကီု၊ ပရေၚ်က္လိဂွံ အခေါၚ်စဵုဒၞာ နူသၞောဝ်ဥပဒေကီု၊ အကာဲအရာသၟာကမၠောန်တအ် ဒးဆောံလေၚ်ဒၟံၚ် အခေါၚ်အရာတုဲ ဆက်စၠောံသၟာန်လဝ်ကဵု ဥက္ကဋ္ဌသမဂ္ဂသၟာကမၠောန် (FGWM) ဒဝ်မိုဝ်စန္ဒာမျေတ်ရ။
-ကိုပ်ကၠာအိုတ်ဏံ ပ္ဍဲလက်ထက်ကံၚ်ဇြဳပၞာန် စပ်ကဵုအကာဲအရာသၟာကမၠောန်ကၟိန်ဍုၚ်ဗၟာတုဲ ဟီုထ္ၜးကဵုညိ။
ပ္ဍဲကၟိန်ဍုၚ်ဗၟာ ကြဴနူဒပ်ပၞာန်သီလဝ်အဝဵုဟွံဗဗွဲဓဝ်တုဲ ပ္ဍဲကဵုသၟာကမၠောန်တအ်ဂှ် ပရေၚ်ဍဵုဍိုက် ပ္ဍဲဗွိုၚ်ကမၠောန်၊ ပရေၚ်ဖံက်ပ္ကဝ် အခေါၚ်အရာမၞိဟ်၊ အခေါၚ်အရာသၟာကမၠောန်ဂှ် ဒးဆေၚ်ဒၟံၚ်မုက် အကာဲအရာပရေံအိုတ်ရလေဝ်။ ကဵုၚုဟ်မးကမၠောန်သဝ်အိုတ် ဟွံပြံၚ်သၠာဲလဝ်ဂှ်ကဵု လ္တူၚုဟ်မးဗွဝ်ဖျာ က္ဍၚ်ဒၟံၚ်ဏံ သြန်လုပ်၊ သြန်တိတ် ဟွံရုံဂပ်ဂှ်လေဝ် သၟာကမၠောန်ကၟိန်ဍုၚ်ဗၟာတအ် အကာဲအရာဒးဒုၚ်ဒၟံၚ် အခိၚ်လၟုဟ်ဏံမွဲဂကူရ။
-အခိၚ်ကာလသီအဝဵု လအ်ကၠုၚ်ဗက်ဂှ် သၟာကမၠောန်တအ် ဒးဆေၚ်ဒၟံၚ်မုက်ကဵု အခက်ခုဲဂၠိုၚ်အိုတ်ဂှ် မုရော။
ပ္ဍဲဍုၚ်ဗၟာဂှ် ၚုဟ်မးသၟာကမၠောန် လီုလာ်ဒၟံၚ်ယျဂှ် ဟီုစကြပ်ဂွံရ။ မုဒှ်ရောတှ်ေ သၟာကမၠောန် စသြန်ဂိတု စိစောန်တအ်ဂှ် သီုဒုဟ်ဒဏ်ဟၟဲမွဲသာ် နုက်ပ္တိတ်ထောံ နူကမၠောန်ရ။ သၟာကမၠောန်တအ် အောန်စှ်ေ၊ ကမၠောန်လေဝ်ဒးဒုၚ်နုက် ပ္တိတ်ထောံ။ မွဲလ္ပာ်ပၠန်ဂှ် ဗ္ဂေတ်ဒၟံၚ်ကမၠောန်ကဵု သၟာကမၠောန်လိၚ်တ္ၚဲတအ်ရ။ ရုၚ်စက်တအ်ဂှ် ပ္ဍဲလ္ပာ်ဏံ ထ္ၜးဒၟံၚ်ကၟာတ်ရုၚ်တုဲ။ ထ္ၜးဒၟံၚ်ကောန်ကမၠောန် အောန်ယအ်စှ်ေရ။ ပ္ဍဲဒၞာဲတၞဟ် ကလေၚ်ပံက်လဝ်ရုၚ်စက်တုဲ ဍဵုဖျေံလဝ် ၚုဟ်ကမၠောန်တုဲ ခါန်ကၞက်လဝ် သၟာကမၠောန်တ္ၚဲ ကဵုလဝ် ၚုဟ်မးသဝ်သဝ်ရ။ ကော်ကေတ်ဒၟံၚ်အခိၚ်အပဵု ဂၠိုၚ်။ ကဵုဇြဟတ်ဒရိုဟ်တုဲ အကာဲအရာ ဒးစှ်ေကဵုဒၟံၚ် သၟးသၟးတအ်၊ ဒးစှ်ေအခိၚ်အပဵုလေဝ် ပ္ဍဲကဵုဗွိုၚ်ကမၠောန်ဂှ် ယဝ်ရစှ်ေကမၠောန် အခိၚ်အပဵု တှ်ေ ဒၟာနူဒးဒုၚ်သ္ပအနိၚ်အထက်တုဲ သၟာကမၠောန် ဒးအိုတ်လဝ်လမျီုလေဝ် နွံ။ စှ်ေအခိၚ်အပဵုတုဲ အခိၚ်စဴဂှ် ဟိုတ်နူဟွံဖန်ဇန်ကဵု ဖေဝ်ရဳတုဲ ဒးဒုၚ်သ္ပအနိၚ်အထက် အကြာဂၠံၚ်တုဲ သၟာကမၠောန် ဒးဒုၚ် အိုတ်လဝ်လမျီုလေဝ် နွံရ။
– ပ္ဍဲဗွိုၚ်ကမၠောန်ဂှ် သၟာကမၠောန်တအ် ဒးဆဵုဂဗဒၟံၚ်ကဵု ပရေၚ်ဒးဒုၚ်ဍဵုဍိုက် ဗီုပြၚ်လဵုရော။ ပ္ဍဲလ္တူဏံ မုကံၚ်ဇြဳပၞာန် ကၠောန်ရေၚ်ကဵုမုရော။
ပ္ဍဲကဵုဗွိုၚ်ကမၠောန်အခိၚ်လၟုဟ်ဂှ် သၟာကမၠောန်တအ် ဒးဒုၚ်ဖံက်ပ္ကဝ်ဒၟံၚ် အခေါၚ်ဒက်ပ္တန်ဂကောံကဵု ပရေၚ်ဒးဒုၚ်စကာဒၟံၚ် ဗွဲအဓမ္မ ဂၠိုၚ်အိုတ်ရ။ ပ္ဍဲကဵုဗွိုၚ်ကမၠောန်တှ်ေ ဗွိုၚ်ကမၠောန်ဂှ် တုပ်ဒၟံၚ်ကဵု နရက် ဒးကၠောန်ဒၟံၚ်ရ။ မာန်နေဂျာတအ် ၊ ကောန်ဍုၚ်သ္အာၚ်တအ်ကီု သီုကဵုတၠကမၠောန်တအ်ဂှ် စကာဒၟံၚ် ဗွဲအဓမ္မ ဘပဠဒၟံၚ်တုဲ မၞိဟ်ဍေံတအ်ဟွံဒးစိုတ်တှ်ေ ပ္တိတ်ထောံနူကမၠောန် မွဲလွာဲဂှ်ရ။ စှ်ေအခိၚ်အပဵုဂှ် ဟွံဟွံစှ်ေပုဟ် ယဝ်ရသၟာကမၠောန်တအ် ဟီုကယျာန်တှ်ေ တ္ၚဲယး ညံၚ်ဟွံဂွံစှ်ေကမၠောန် ဒးဒုၚ်နုက်ပ္တိတ် ထောံ နူကမၠောန်တအ်။ လ္တူအာတ်မိက်ကၠုၚ် ဗ္ၜတ်ယာတ် လောန်ၜက်နူသၞောတ်ဂှ် ယဝ်ရဟွံပေၚ်တှ်ေ သၟာကမၠောန်ဒးစှ်ေကဵု ကမၠောန်အခိၚ်အပဵုကီု၊ တုဲပၠန် စှ်ေအခိၚ်အပဵုတုဲ အခိၚ်စဴဂှ် ဟွံဖန်ဇန်ကဵုလဝ် ကွဳစက်ဖေဝ်ရဳဂှ် ပြဟ်ဟ်ဏံ ပရေၚ်ဒးဒုၚ်ဍဵုဍိုက် ဂွံဆဵုကေတ်ဒၟံၚ် အခိၚ်လၟုဟ်ဏံရ။ ပ္ဍဲဗွိုၚ်ကမၠောန် ယဝ်ရဆဵုဂဗကၠုၚ်ကဵု ပရေၚ်ပ္ကီုပရာပ်လိၚ်မ္ဂး ဟိုတ်နူဂွိၚ်ဖေက် ဒးတိတ်နူကမၠောန်တုဲ သၟာကမၠောန် ဟွံဂံၚ်ဟီုလေဝ် နွံရ။ တၠအဝဵုကဵု တၠကမၠောန်တအ်ပံၚ်ညးသ္ကအ်တုဲ ရေက်ကးဇြောတ် ဒၟံၚ်ဆီသၟာ ကမၠောန်တအ်ရ။
-လက်ထက်ကံၚ်ဇြဳပၞာန် အကာဲအရာသၟာကမၠောန် MOU ကၟိန်ဍုၚ်ဗၟာကဵု သၟာကမၠောန် စိုပ်ဒၟံၚ်ဍုၚ်သ္အာၚ် တအ် အကာဲအရာ နွံဒၟံၚ်ဗီုလဵုရော။
အာကၠောန်ဒၟံၚ်ကမၠောန် ကဵုသၞောတ် MOU ပ္ဍဲဍုၚ်ဇိုၚ်ဝုတ်ဒိုဟ်ဂှ် နွံဒၟံၚ်ကီု သၟာကမၠောန် အာလဝ်ဂၠံၚ် ဟွံလုပ်သၞောဝ်တုဲ ကၠောန်ဒၟံၚ်ကမၠောန်ဂှ် နူကဵုဍုၚ်ဗၟာ အရိုဟ်ဒဒှ်တ္ၚဲ တိတ်ဒၟံၚ်ဍုၚ်သ္အာၚ် ဗ္ဒာဲကဵုကၠံ အရိုဟ်ဟ်တ္ၚဲတုဲ အာကၠောန်ဒၟံၚ်ကမၠောန်ညးသ္ကံရ။ ပ္ဍဲကဵုဍုၚ်ဂှ် ကမၠောန်အောန်ကြဳဒၟံၚ်၊ ၚုဟ်ကမၠောန်၊ သြန်ဂိတုအောန်ဒၟံၚ်တုဲ သြန်လုပ်ကဵု သြန်တိတ်ဟွံကိတ်တုဲ ပ္ဍဲကဵုအကာဲအရာ ဒတူလာၚ်ဟွံဂွံ သီုကဵု ခက်ခုဲနာနာ တိတ်ဍုၚ်မ္ၚးတုဲ ကၠောန်ကမၠောန်လေဝ် ပ္ဍဲကဵုဒဒှ်သၟာကမၠောန်ဆုဲပြံၚ်တအ်ဂှ် ဒးဒုၚ်ပါ်ကဆံၚ် ဆက်ဆောံတအ် အခက်ခုဲအရေဝ်ဘာသာတအ် နွံဒၟံၚ်ရ၊ အခိၚ်ကော်ကမၠောန်ကဵု ကမၠောန်ဒးကၠောန် ဍာံဍာံဂှ် လဟီုကဵုကမၠောန် ဟွံကိတ်ညဳကီု ၊ ဟွံတုပ်ကီုဂှ် နွံမံၚ်။ ၚုဟ်ကမၠောန်သြန်ဂိတုတအ် ဟွံဂွံပေၚ်ၚ် ပရေၚ်ဒးဒုၚ်နုက်ပ္တိတ်ထောံ နူကမၠောန်လေဝ် သၟာကမၠောန်ဆုဲပြံၚ်တအ် ဒးဆဵုဂဗဒၟံၚ်ရ။
-ပ္ဍဲကဵုဍုၚ်ဂှ် ပရေၚ်ဓလိုက်တံရိုဟ်တၟိတၟိ၊ ရုၚ်စက်တၟိတအ် လုပ်ကၠုၚ်လဝ်ရဂှ် ကံၚ်ဇြဳပၞာန် ဟီုလဝ်နွံရ။ အရာတအ်ဏံ ဒှ်အထံက်အရီု သွက်သၟာကမၠောန်ရုၚ်စက်တအ် ဍာံဍာံရဟာ။
ပရေၚ်ဓလိုက်တံရိုဟ်တၟိတၟိ လုပ်ကၠုၚ်ဂှ် မိၚ်မံၚ်ရ။ ပ္ဍဲရုၚ်စက်ဂှ် ဗ္ကန်ကေတ်ဒၟံၚ်ယာတ်ဂှ် ဂွံထပ်မိၚ်လဝ်ရ။ ဒှ်အထံက်အရီုကဵု သၟာကမၠောန်တအ်ဟာ ဟွံဒှ်ပုဟ်ဟာဟီုဂှ် ဒှ်အကာဲအရာ ပိုဲဒးမၚ်ရံၚ်ကျောဝ်ရ။ အခိၚ်လၟုဟ်ဂှ်တှ်ေ သၞောဝ်ဥပဒေ စဵုဒၞာကဵု သၟာကမၠောန်တအ်ဂှ် နူကဵုကၠာတေံလေဝ် ဟၟဲပုဟ်။ အခိၚ်လၟုဟ်တှ်ေ သွက်ဂွံဒးဟီုဟၟဲရ။ တၠအဝဵုကဵု တၠကမၠောန်တအ်ပံၚ်တောဲတုဲ ပ္ဍဲခေတ်ပရေံပရေံ ကၠောန်ဒၟံၚ်ဗီုဏံဂှ် ဂွံအထံက်အရီုကဵု သၟာကမၠောန်တအ် ဒှ်မာန်ဟွံသေၚ်ပုဟ်။ သွက်ဂွံဒှ်မာန်ဂှ်တှ်ေ သွက်တၠအဝဵုတအ်ကဵု တၠကမၠောန်တအ်ဂှ် ဒှ်မာန်ဏောၚ် ဗီုဏံဂှ် ဂံၚ်ဟီုပေၚ်ၚ်ရ။ တၠကမၠောန်ဟီုဂှ် အခိၚ်လဵုလေဝ် ဟွံစွံစေတနာ လ္တူသၟာကမၠောန်တအ်ပုဟ်။ သွက်ဖိုလ်ပရဲဍေံတအ်ရ ဍေံတအ်ရံၚ်တုဲ သွက်ဂွံရေက်ကးဇြောတ်ဆီကဵု သွက်ဂွံပ္တိတ်ပရဲရ ဍေံတအ်ကၠောန်သ္ပဒၟံၚ်လၟိုန်ရ။
-ပ္ဍဲလက်ထက်ကံၚ်ဇြဳပၞာန် သွက်အခေါၚ်အရာ၊ အခေါၚ်ဒုၚ်စသိုၚ်သၟာကမၠောန်တအ် ကဵုဒၟံၚ်အရီုဗၚ် ဗီုပြၚ်လဵုနွံရော။
ပ္ဍဲကဵုအကာဲအရာဗီုလၟုဟ်ဏံဂှ် သွက်တၠကမၠောန်တအ်ဂှ် မုလေဝ်အခေါၚ်ကၠောန်ဟၟဲ ကၠောန်လေဝ် ဟွံဂွံပုဟ်။ သၟာကမၠောန်တအ်ဂှ် သွက်အခေါၚ်အရာဇကု ဂွံအာတ်မိက်မာန် အခေါၚ်အရာသီုဖအိုတ် သွက်ဂွံအာတ်မိက်သောၚ်ကလးမာန်ဂှ် နကဵုဇြဟတ်ပံၚ်ကောံဂှ်ရ ဆၜိုတ်ကသပ်ရ ဂွံကဵုဏာရ။
-အလန်လကြဴအိုတ်ဏံ နဒဒှ်ညးရေၚ်တၠုၚ်ကဵုဒၟံၚ်ကေၚ်ကာသၟာကမၠောန်မွဲတၠ အခိၚ်လၟုဟ်ဏံ မုမိက်ဂွံဟီုဗတိုက်ဖ္အောဝ်ကဵုကသပ် ကုသၟာကမၠောန် ပ္ဍဲဍုၚ်မ္ၚးဍုၚ်တအ် နွံရော။ ဟီုထ္ၜးကဵုညိ။
အခိၚ်လၟုဟ်ဏံ ပ္ဍဲဍုၚ်ကီု၊ မ္ၚးဍုၚ်ကီု သၟာကမၠောန်စိုပ်ဒၟံၚ်ကမၠောန်တအ်ဂှ် ဒးဆေၚ်ဒၟံၚ်မုက်ကဵု အခက်ခုဲပံၚ်နှဴ ဟွံတုပ်သၟဟ်ညးသ္ကအ်ရ။ အရာတအ်ဏံ ဟိုတ်နူသၞောတ်တၠအဝဵုပၞာန် ပရေံပရေံဏံရ။ ဂုဏ်နူဂှ်ရ ပိုဲတအ်ကဵု ညးဍုၚ်ကွာန်တအ်သီုဖအိုတ်ဂှ် လုပ်ဒၟံၚ်ပေါဲဗတိုက် သၞောတ်တၠအဝဵုသီုဖအိုတ် စဵုကဵုခရိုဟ်ကၟိုၚ်အိုတ်ရ။ သၞောတ်တၠအဝဵုပၞာန် ဒေါံခရိုဟ်တုဲမှ သွက်ပိုဲကီု သၟာကမၠောန်တအ်ကီု သြန်ဂိတုရုံရုံဂပ်ပ် ပ္ဍဲကဗွိုၚ်ကမၠောန်ခိုဟ်ဟ်ဂွံကၠောန်မာန်ဂှ်ရ သွက်သၞောတ်တၠ အဝဵုသီုဖအိုတ် ဂွံဒေါံခရိုဟ်စှ်ေဂှ် သတီုသၟာကမၠောန်တအ် ပ္ဍဲကဵုပေရၚ်ပၠန်ဂတးက္ညၚ်လေဝ် ညံၚ်ဂွံပါလုပ် ပ္ဍဲဂတအိုတ် စဵုကဵုသၞောတ်တၠအဝဵုပၞာန် ရိုဟ်ကၞက်ဂွံပိုတ်အာတေံညိဂှ် နကဵုအဲ မိက်ဂွံဗတိုက်ဖ္အောဝ်ဏာရ။