ဟိုတ်ဂှ်ရ အကာဲအရာပရေၚ်ပၞာန် ပ္ဍဲကဵုဒေသဂှ်၊ ပရေၚ်ပၞာန်လ္ပာ်ကံၚ်ဇြဳပၞာန် ပလေဝ်ပလေတ်ကၠုၚ်၊ ၜိုတ်ဂလိုၚ်လဵု ဂကောံဇြဟတ်ပၠန်ဂတးတအ် ထိၚ်ဒဝ်မာန်ကၠုၚ်ရော စပ်ကဵုအကာဲအရာဏံတုဲ ဆက်စၠောံသၟာန်လဝ်ကဵု ညးမၞုံအခေါၚ်ဟီုဂး ဒပ်ပၠန်ဂတးဍုၚ်မန် (MSRF) နာဲနဂါရ။
-ကၠာအိုတ်ဏံ ပ္ဍဲခရိုၚ်မတ်မ်လီု ဗွဲတၟေၚ်တှ်ေ ပ္ဍဲရေဝ်၊ ဇြပ်ဗုတအ် နကဵုဒပ်ကံၚ်ဇြဳပၞာန် ပ္ဍဲပွိုၚ်ၜါသၞာံပြၚ်ၚ်ဏံ မုဇီုကပိုက် ဒးလီုလာ်က္တဵုဒှ်လဝ်နွံရော။ မုဒးဗလးလဝ်တဲ နွံဒၟံၚ်ကီုရော။
နူဒပ်ပၞာန်သီအဝဵုတုဲ သ္ကုတ်လကြဴဏံ၊ ကြဴနူဗတိုသရိုဟ်ကုတ်ဗပိုတ်ရိုဟ်ကၞက် တၠအဝဵုပၞာန်တုဲဂှ် ညးဍုၚ်ကွာန်တအ် ပၠန်ဂတးလဝ် ပ္ဍဲကာလပွိုၚ် (၂) သၞာံပြၚ်ဏံ ပ္ဍဲကဵုခရိုၚ်မတ်မလီု ရေဝ်ကဵု သၠုၚ်ကျာဇြပ်ဗုဂှ်တှ်ေ ပရေၚ်အုပ်ဓုပ်ကၠဵုပၞာန်ကဵု ပရေၚ်ဂီုကၠီုသၞောဝ်ဥပဒေဂှ် စဵုကဵုလီုလာ်အာပေၚ်ၚ် ဒှ်ကၠုၚ်ဒၟံၚ်ယျ ဟီုစဂွံရ။ ဂဗုတ်ရာဇဝတ်၊ ဂဗုတ်ကၠတ်ဂၠံက်တအ် ဗွဲတၟေၚ်တှ်ေ ဂၠိုၚ်တိုန်ကၠုၚ်ဒၟံၚ် ဇၞော်ကဵုဇြဟတ်ရ။ မွဲအခိၚ်ဓဝ်ဂှ် သ္ဂံၚ်ပၠန်ဂတးပိုဲ အခိၚ်ဟွံရုဲ လုပ်တိတ် ပ္ဍဲကွာန်ဇၞော်လ္ၚဵုဂှ် မာန်ကၠုၚ်ရ။ ဗဒိုပ်ဗၠာဲသၟိၚ် ပွိုၚ်ဍုၚ်ရေဝ်ကဵု သၠုၚ်ကျာပွိုၚ်ဍုၚ်ဇြပ်ဗုဗွဲမဂၠိုၚ် ဒးကၟာတ်သီကၠုၚ်၊ ဒးထောံလဝ်ရ။ ရံၚ်ကေတ်ကဵု အကာဲအရာဏံတုဲ ပရေၚ်ထိၚ်ဒဝ်တိဍာ်ကၠဵုပၞာန်တအ် ဒးဆဵုဂဗဒၟံၚ်ကဵု ပရေၚ်ဆောံလေၚ် ဇၞော်ကဵုဇြဟတ်ယျ ဟီုစဂွံရ။
– နကဵုဒပ်စဵုဒၞာဒေသ PDF ဖျေံသ္ဇိုၚ်ရေဝ်၊ ဇြပ်ဗု ချဳဒရာၚ်ဒၟံၚ်ဂှ် အခိၚ်လၟုဟ်ဏံ ၜိုတ်ကဆံၚ်လဵု ဗတိုက်လဝ်ကဵုကံၚ်ဇြဳပၞာန် မာန်ကၠုၚ်လဝ်ရော။ ပရေၚ်ထိၚ်ဒဝ်အုပ်ဓုပ်တိဍာ် ၜိုတ်ဂလိုၚ်လဵု နွံဒၟံၚ်ယျရော။
သွက်ပၠန်ဂတးဏံ ဂွံတုဲဒှ်အာပြဟ်ဟ်မာန် ဂကောံပိုဲသီုဖအိုတ် ၜိုတ်ဂိုတ်ဂစာန်မာန် ဂစာန်ပ္တိတ်လဝ်ဇြဟတ် လုပ်ဒၟံၚ်ပေါဲဗတိုက်ရဂှ် မိက်ဂွံဟီုဏာ ဂလာန်ပဏာမရ။ ပရေၚ်ပံၚ်တောဲရေၚ်တၠုၚ် အကြာဂကောံပၠန်ဂတးမွဲမွဲကဵုဂှ် ကၠောန်သ္ပလဝ် ညံၚ်ဂွံစိုပ်တရဴမာန်ကၠုၚ်ရ။ ဒက်ပ္တန်ကၠုၚ် ကရောၚ်ပၞာန်ဇၞော်ဇၞော်မာန်ကၠုၚ်။ ထပ်တုဲပၠန်လေဝ် သွက်ဂွံထပ်ဒက်ပ္တန်ပၠန်ဂှ် စဳဇန်လဝ်နွံရ။ ဆ္ဂး ဟိုတ်နူဒှ်ဒၟံၚ် ကာလပၠန်ဂတးဂှ်ရ အကာဲအရာပရေၚ်စဵုဒၞာပၞာန်ကျာကၠဵုပၞာန်တအ် ထံက်ရံၚ်ကဵုလမျီုသ္ၚိဌာန်ညးဍုၚ်ကွာန်တအ်တုဲ ပရေၚ်ထိၚ်ဒဝ်အုပ်ဓုပ်တိဍာ်ဂှ် ကၠောန်ဟွံမာန်ဏီ။ အခိၚ်လၟုဟ်ဂှ်တှ်ေ ပ္ဍဲလတူဍာန်ကွဳစက် မတ်မလီု၊ ရေဝ်၊ ထဝါဲ ကောန်ဒပ်ကံၚ်ဇြဳပၞာန်တအ် ဇြဟတ်ညိညဓဝ် စိုပ်ဒၟံၚ်အကာဲအရာ ဟွံဂံၚ်အာကၠုၚ်ရ။ စိုပ်မံၚ်ဘဝ ဒးကၠတ်အာကၠုၚ်ဒၟံၚ်ကဵု ကွဳစက်ကောန်အရာပ်ညးဍုၚ်ကွာန်သာမညတအ် ဍိုက်အာကၠုၚ်ဒၟံၚ်ယျ။ ရံၚ်ကဵုအကာဲအရာဏံတုဲ ဂၠံၚ်ကွဳစက် မတ်မလီု-ရေဝ်-ထဝါဲဂှ် ဂကောံပၠန်ဂတးပိုဲ ထိၚ်ဒဝ်လဝ်ၜိုတ်ထေက်ကြိုက်မာန်ဒၟံၚ်ယျ အဲမိက်ဂွံဟီုဏာရ။
-လ္ပာ်ကံၚ်ဇြဳပၞာန်ရော ပ္ဍဲဒေသဂှ် အခိၚ်လၟုဟ်ဏံ ၜိုတ်ကဆံၚ်လဵု ထိၚ်ဒဝ်လဝ်မာန်ဏီရော။
အကာဲအရာလၟုဟ်ဂှ်တှ်ေ လ္ပာ်ကံၚ်ဇြဳပၞာန်ဂှ် ဒေသဍုၚ်ဇၞော်ကဵု ပ္ဍဲမွဲဗွိုၚ်ဗဒိုပ်ပၞာန်ဍေံတအ် ဖျေံလဝ်သ္ဇိုၚ်ဂှ်ရ ဍေံတအ်ထိၚ်ဒဝ်လဝ်မာန်ရ။ လၟုဟ်တှ်ေ ဒပ်ကံၚ်ဇြဳပၞာန် ပ္ဍဲကမၠောန်ကၠောန်သ္ပဒၟံၚ် ပရေၚ်ပသောၚ်သ္အးတိဍာ်လၟေၚ်ဍာံဂှ် ဟွံညာတ်ကေတ်ရပုဟ်။ ဟီုတှ်ေ မိက်ဂွံဟီုဂှ် ပါနူကဵုဒေသဍုၚ်ဇၞော်ကဵု ပ္ဍဲမွဲဗွိုၚ်ဗဒိုပ်ဒပ်ကံၚ်ဇြဳပၞာန်ဖျေံလဝ်သ္ဇိုၚ်ဂှ်တှ်ေ ဒေသတၞဟ်ဂှ် ပရေၚ်ဍေံတအ်ထိၚ်ဒဝ်လဝ် ညိဟၟဲရပုဟ်ဂှ် ပိုဲဟီုမာန်ရ။
-မွဲဒမြိပ်သၞာံကာလစသီအဝဵုကဵု ပရေၚ်သီအဝဵုအခိၚ်လၟုဟ် စိုပ်ကၠုၚ်ပွိုၚ် (၂) သၞာံပြၚ်ကၠုၚ်ဏံ လ္ပာ်ကံၚ်ဇြဳပၞာန် ဗီုပြၚ်ပရေၚ်ပၞာန်ဗီုပြၚ်လဵု ပြံၚ်သၠာဲက္တဵုဒှ်ကၠုၚ်ဒၟံၚ်ရော။
ကာလစသီအဝဵုဂှ် ဒပ်ကံၚ်ဇြဳပၞာန် အတိုၚ်ဍေံတအ်ဂွံလဝ်ဇြဟတ်လွဟ်စေဝ်လ္တူဂှ် ကၠောန်သ္ပဒၟံၚ်ပရေၚ်ချဳဒရာၚ် နကဵုဇြဟတ်ညိညရ။ ကၠောန်သ္ပဒၟံၚ်ပရေၚ်ပသောၚ်သ္အးတိဍာ်။ အခိၚ်သီအဝဵုတုဲ လအ်လောန်ကၠုၚ် ပွိုၚ်(၂) သၞာံပြၚ်ဂှ်တှ်ေ ဒပ်ကံၚ်ဇြဳပၞာန်တအ်ဏံ သုၚ်စောဲကၠုၚ်ဇြဟတ်ပေၚ်ၚ်တုဲ ထ္ပက်ကၠုၚ်ကရောၚ်ပၞာန်ကဵု ဂကောံဇြဟတ်ပၠန်ဂတးတအ်ဂှ် ပိုဲဂွံညာတ်ကေတ်ရ။ သီုအရီုဗၚ်ပၞာန် က္ၜၚ်ကျာသၞေၚ်ၜဲ၊ က္ၜၚ်ကျာဂျေတ် ထ္ပက်ကၠုၚ်ကရောၚ်ပၞာန်ဂှ် ပိုဲဂွံဆဵုကေတ်ရ။ ပ္ဍဲလ္တူဇြဟတ်ဒပ်ကံၚ်ဇြဳပၞာန် ဍိုန်စှ်ေကၠုၚ်ဂှ် ဗဒိုပ်သၞေဟ်ကၚ်ဍေံတအ်၊ တုဲပၠန် ပ္ဍဲကဵုဒၞာဲပရေၚ်ဂီုကၠီု ဗီုကဵုဒဒန်တအ်ဂှ် ထ္ပက်စုတ်အဇာ ပၞာန်ညးဍုၚ်ကွာန်ကဵု BGF တအ်ဂှ် ဂွံဆဵုကေတ်ရ။ မွဲလ္ပာ်ပၠန် ဂကောံဇြဟတ်ပၠန်ဂတးတအ်ဂှ် သာတုဲစန်ပကောံမာန်ကၠုၚ်ရ။ အခိၚ်ကၠာတေံ နူကဵုဗတိုက်ပၠန်ဂတးဒၟံၚ်ကဵုကၠဵုပၞာန် နူဗီုပြၚ်ဒပ်ဒမၠုက်ဂှ် လၟုဟ်တှ်ေ သွက်ဂွံထ္ပက်ပၞာန်မာန်ဂှ် ဒက်ပ္တန်ကၠုၚ် ကရောၚ်ပၞာန်ဇၞော်ဇၞော်မာန်ကၠုၚ်ရ။ ဂွံအခေါၚ်တှ်ေ ပၞာန်ထ္ပက်လေဝ် ပိုဲချဳဒရာၚ်ကၠုၚ်မာန်ဏောၚ်။ ပရေၚ်ပြံၚ်သၠာဲဗီုပြၚ်ဏံ နွံကၠုၚ်ရဂှ် မိက်ဂွံဟီုဏာရ။
-အလန်လကြဴအိုတ်ဏံ လ္တူအကာဲအရာပရေၚ်ပၠန်ဂတးက္ညၚ်ဂှ် သ္ၚဳဂၠိပ် ဟီုထ္ၜးကဵုပၠန်ညိ။
ဗီုဟီုလဝ် နူတုဲကၠုၚ်ဂှ်ရ သီုအလုံမွဲဍုၚ်လုပ်ဒၟံၚ်ပေါဲဗတိုက်ကဵု ကံၚ်ဇြဳပၞာန်ဂှ်ရတှ်ေ လ္တူကောန်ဒပ်ကံၚ်ဇြဳပၞာန်တအ် ဒးပြဟ်လလုဲဂၠိုၚ်ဒၟံၚ်ဂှ် ကိစ္စပရေၚ်ဂီုကၠီုသာမည ပ္ဍဲကိစ္စပရေၚ်ဂီုကၠီုဒဒန်တအ်ဂှ်တှ်ေ ပ္တိတ်ကၠုၚ်ဇြဟတ်ကဵု ပၞာန်ညးဍုၚ်ကွာန်တအ် ဂွံညာတ်ကေတ်ရ။ ပ္ဍဲရာသဳယးတၟး ကၠုၚ်စိုပ်ဂတဏံတှ်ေ နူကံၚ်ဇြဳပၞာန် မ္ၚးနူဂွံဗတိုက်ကဵု ဂကောံဇြဟတ်ပၠန်ဂတးတအ်ဂှ် ပ္ဍဲလ္တူဂကောံဇြဟ်ပၠန်ဂတးတအ် ထ္ပက်လုပ်ပၞာန် ဗတိုက်ကၠုၚ် ပ္ဍဲဍုၚ်ဇၞော် ဒၞာဲဍေံတအ်ထိၚ်ဒဝ်လဝ်လၟုဟ်ဏံကဵု ဒေသဒပ်ပၞာန်ဖျေံလဝ်သ္ဇိုၚ် ဂွံဒုၚ်ဗတိုက် ခိုၚ်ၚ်မာန် ကၠောန်ကၠုၚ် ပရေၚ်သိုၚ်ခၞံ ခိုၚ်ၚ်ကၠိုက်က်ဏောၚ် အဲမိက်ဂွံဟီုရ။ ဒပ်ကံၚ်ဇြဳပၞာန်ဂှ် အကာဲအရာဟွံခိုဟ်တှ်ေ အတိုၚ်ဍေံတအ်ကၠောန်သ္ပဒၟံၚ်တွဵုဂှ် သာတုဲ ကၠောန်သ္ပကၠုၚ် ပရေၚ်ဗတိုက်ကဵု ပၞာန်ကျာမာန်ကၠုၚ်ဏောၚ်။ ကမ်လှောဝ်ပန်ခရာဇမ္ၚောဲ ခရာဇမၠေံတအ်ဂှ် သာတုဲဍေံတအ်သုၚ်စောဲကၠုၚ်မာန်ရ။ ဗွဲတၟေၚ်တှ်ေ ဗတိုက်ကၠုၚ် ညးဍုၚ်ကွာန်ဒုဟ်ဒဏ်ဟၟဲတအ် သ္ကာတ်တ်မြဟ်ဟ်ဏောၚ် အဲညာတ်ကေတ်ရ။
ယဝ်ရဒးဟီုမွဲအဆက်ဓဝ်တှ်ေ ပ္ဍဲသၞာံ ၂၀၂၃၊ ၂၀၂၄ ကၠုၚ်စိုပ်ဂတဏံဂှ် ပရေၚ်ပြံၚ်သၠာဲ ကၠးကၠးတၟးတၟးမွဲ ဒှ်ကၠုၚ်ဏောၚ် အဲဂှ် ဟွံညာတ်ရ။ ဆ္ဂးပေါဲဗတိုက်ဇၞော်ဇၞော် ဗီုပြၚ်ဒှ်ကၠုၚ် နွံဒၟံၚ်ဏောၚ်ဂှ် ညာတ်ကေတ်ရ။ ဒေသဟွံဂွံဒှ်ပၞာန်ဏီဂှ် ဒှ်ကၠုၚ်ပၞာန်ဏောၚ်။ ညးဍုၚ်ကွာန်တအ်လေဝ် သာတုဲ ဒးကၠုၚ်ဘဲဒဏ်ပၞာန်ဏောၚ်။ လုကဴပၠန်ဂတးဇၞော်ဏံ ဟွံတုဲဒှ်ဏီတှ်ေ ညးဍုၚ်ကွာန်တအ် ဒးဆက်ဒုၚ်ဒၟံၚ်ဘဲပၞာန်ဏီ။ လုကဴတၠအဝဵုပၞာန်ဟွံကလှ်စှ်ေတှ်ေ ပ္ဍဲကၟိန်ဍုၚ်ဗၟာဂှ် ပၞာန်ပ္ဍဲဍုၚ်အခိၚ်လဵုလေဝ် တုဲဒှ်အာဟွံသေၚ်ပုဟ်။ ဂကောံဇြဟတ်ပၠန်ဂတးဏံ ဒဵုကဵုတၠအဝဵုပၞာန် ရိုဟ်ကၞက်ပိုတ်သ္ကုတ်အာ လုပ်အာပေါဲဗတိုက်ဏောၚ်။ ဟိုတ်ဂှ်ရ သွက်ပၠန်ဂတးဇၞော်ဏံ ဂွံတုဲဒှ်အာပြဟ်ဟ်မာန် ညးဍုၚ်ကွာန်တအ် ပါလုပ်ရီုဗၚ်ကဵုညိဂှ် နကဵုအဲမိက်ဂွံဟီုဏာရ။