ဂကောံ KNPP/PDF တံ လုပ်ဗ္တိုက်လဝ် ဗ္ဒိုပ်မေဝ်သေအ်ကီုလေဝ် သီဟွံမာန်လဝ်ပုဟ်ဂှ် ရဲထံက်ဂလာန်ကံၚ်ဇြဳပၞာန်တံ တြးဝါဒ

ဒး၊ ဗၠေတ်

မ္ၚဵုရအဴ။ ဒုၚ်တၠုၚ်ဏာ နူကဵုအစဳဇန်ဒးဗၠေတ် သြၚ်လောန်တိုၚ်(မ်) ပိုယ်တံရအဴ။ ကြဴနူဒပ်ပၞာန်သီအဝဵုတုဲ စပ်ကဵုပရေၚ်ချဳဒရာၚ် ပၠန်ဂတးညးဍုၚ်ကွာန်တံတုဲ ပရိုၚ်ဗၠေတ်၊ ပရိုၚ်ဒး မပြးထၞာန်ဒၟံၚ် လ္တူဇာဇၞိက် ပရေၚ်မၞိဟ်တံဂှ် နူကဵုအစဳဇန်ဒးဗၠေတ် သြၚ်လောန်တိုၚ်(မ်) ပိုယ်တံဏံ စၟဳစၟတ်ကဵုအာဏောၚ် မဒှ်ရ။

တ္ၚဲဏံ ပရူပရာ မပါလုပ် ပ္ဍဲဗီုဓာတ် အကံက်ပ္တောံကံၚ်ဇြဳပၞာန်တံ မတြးဒၟံၚ် “ဂကောံ KNPP/PDF တံ လုပ်စိုပ်ဍိုက်ဗ္တိုက်သီလဝ် ဗ္ဒိုပ်ဗၠာဲသၟိၚ်ဍုၚ်မေဝ်သေအ် တွဵုရးကရေၚ်ဍာဲတံဂှ်ကီုလေဝ် သီဟွံမာန် လဝ်ပုဟ်” ဂှ် စၟဳစၟတ်ကဵုအာရောၚ်။

ပရူပရာဏံဂှ် ပ္ဍဲဂိတုဂျောန် (၁၃) တေံ နူကဵုအကံက်ထလဳဂရာမ် KYAW SWAR, ဟာန်ညုၚ်ဥူတံ တြးလဝ်ဂှ် စၟဳစၟတ်ဂွံဆဵုကေတ်ရ။ ပရူပရာ လ္ပာ်ကံၚ်ဇြဳပၞာန်တံ မတြးဒၟံၚ်ဍိုက်က်ပေၚ်ၚ်ဂှ် “ ဟိုတ်နူအစောံသတ္တိ ကောန်ဒပ်ကံၚ်ဇြဳပၞာန်တံဂှ်တုဲ ဗ္ဒိုပ်ဗၠာဲသၟိၚ်ၝောံဍုၚ်၊ ပွိုၚ်ဍုၚ်မေဝ်သေအ်ဂှ် ဟွံဒးဆောံလေၚ်လဝ်ပုဟ်။ ၜိုတ်ဗ္ဒိုပ်ဗၠာဲသၟိၚ်ရဂှ် သီဟွံမာန်မွဲသာ် အံၚ်ဇၞးယျ၊ အံၚ်ဇၞးယျ က္ညာၚ်ဒၟံၚ်အဂှ်” ဂးတုဲ တြးလဝ်သီုကဵုဗီုဓာတ်ဂမၠိုၚ်ရ။

စပ်ကဵုပရူပရာ မပါလုပ် ပ္ဍဲဗီုဓာတ် အကံက်ပ္တောံရဲထံက်ဂလာန်ဒပ်ပၞာန်တံဂှ်တုဲ နူကဵုသြၚ်လောန်တိုၚ်(မ်) စၟဳစၟတ်စမ်ရံၚ်ဂှ် ဒဒှ်ရဒှ်ဒၟံၚ်ပရိုၚ်ဗၠေတ် တြးဝါဒမွဲဂှ် စၟဳစၟတ်ဂွံဆဵုကေတ်ရ။

လၟေၚ်ဒဒှ်ဍာံဂှ် ပ္ဍဲဂိတုဂျောန် (၁၃) တေံ ဂကောံဒပ်ပံၚ်ကောံပၠန်ဂတးကရေၚ်ဍာဲတံ မွဲအခိၚ်ဓဝ် လုပ်စိုပ်ဗ္တိုက်လဝ် ဗ္ဒိုပ်ဗၠာဲသၟိၚ်ၝောံဍုၚ်၊ ဗ္ဒိုပ်ဒပ်ကရေၚ်ဍာဲကံၚ်ဇြဳပၞာန် မၞုံပွိုၚ်ဍုၚ်မေဝ်သေအ် တွဵုရးကရေၚ်ဍာဲ (ကယျာ) တံဂှ်တုဲ လ္ပာ်ကံၚ်ဇြဳပၞာန်ဂှ် ပါလုပ်သီုကဵုသ္ကိုပ်ဗၠာဲသၟိၚ်ၝောံဍုၚ်မေဝ်သေအ်ဂှ် ချိုတ်အာဗွဲမဂၠိုၚ်ဂၠေၚ်ရောၚ် စၟဳစၟတ်ဂွံဆဵုကေတ် အတိုၚ်တၚ်လလောၚ်တြး ဒပ်ပၞာန်ကရေၚ်ဍာဲ (KA) ကေုာံ ဌာန်ပရိုၚ်ပတှ်ေဖျေံစိုတ်ဂွံတံ မဒှ်ရ။

ပေါဲဗ္တိုက်သီဗ္ဒိုပ်ဂှ် က္တဵုဒှ်လဝ် ပ္ဍဲဂိတုဂျောန် (၁၃) နူ (၅) နာဍဳဂယး စဵုကဵု (၁၀) နာဍဳတုဲ မ္ၚးနူသ္ကိုပ်ဒပ်ဗၠာဲသၟိၚ်ပွိုၚ်ဍုၚ်မေဝ်သေအ် ချိုတ်အာလဝ်ဂှ် ဒဒှ်ရသီုကဵုသီဂွံလဝ် သေနာတ်(မောၚ်းပြန်) ဗၞတ် ၄၀ ဇကိုအ် နူကဵုဗ္ဒိုပ် ၃ ဗ္ဒိုပ်ဂှ်ကဵု နူကဵုဗ္ဒိုပ်ဒံၚ်လှဂှ် သီဂိုၚ်ဂွံလဝ် လွဟ်ဇၞော် ၁၂၀ မမ ၜါဇကိုအ်ဂှ် ညးမၞုံအခေါၚ်ဟီုဂး KMIC ခူညေယျေဝ် ဟီုဂးလဝ်ဂှ် ဌာန်ပရိုၚ် Myanmar Now ချူထ္မံက်ထ္ၜးလဝ်ဂှ် စၟဳစၟတ်ဂွံဆဵုကေတ်ရ။

ဂကောံဒပ်ပံၚ်ကောံပၠန်ဂတးကရေၚ်ဍာဲဂှ် လုပ်စိုပ်ဍိုက်ဗ္တိုက်လဝ် ဗ္ဒိုပ်ကံၚ်ဇြဳပၞာန်တံဏံ ဍာံဍာံတုဲ ပ္ဍဲကဵုဒၞါဲဒှ်လဝ်ပေါဲဗ္တိုက်ဂမၠိုၚ်ဂှ် နူကဵုဒပ်ကျာကံၚ်ဇြဳပၞာန်တံ အခိၚ်နူဂယး နူကဵု ဗၞတ် ၁၀ နာဍဳ စဵုကဵုတ္ၚဲယး ၜိုတ် ၁ နာဍဳဂှ် ဒပ်ကျာဒပ်ကံၚ်ဇြဳပၞာန်တံ ဗ္တိုက်ဂြာတ်လဝ်မခတိုဟ် ၆ ဝါတုဲ ကောန်သ္ဂံၚ်တံ ညံၚ်ဂွံဒးဂိ အောန် သီကေတ်လွဟ်လက်နက်ဂမၠိုၚ်တုဲ ကလေၚ်ဆုတ်ကလေၚ်လဝ်ဂှ် စၟဳစၟတ်ဂွံဆဵုကေတ်ရ။

“သီတုဲဂှ် ကလေၚ်ဆုတ်ဟဂှ်ရ။ ပိုယ်တံဂှ် သီတုဲမံၚ်ဟွံဂွံပုဟ်။ က္ၜၚ်ကျာကၠုၚ်ဏောၚ်လေဝ်။ ပိုယ်တံဂှ်လေဝ် ရံၚ်ကဵုအကာဲအရာတိဍာ်တုဲ တိုန်သီတုဲ ကေတ်ကပေါတ် မနွံတံဂှ်တုဲ ဆုတ်ကလေၚ် ဟဂှ်ရ” သာ်ဝွံ ညးမၞုံအခေါၚ်ဟီုဂး ဂကောံလလောၚ်ပရိုၚ်ဗဟဵုကရေၚ်ဍာဲ စပ်ကဵုပရေၚ်ပၞာန် ခူညေယျေဝ် ဟီုလဝ်ဂှ် ဌာန်ပရိုၚ် Myanmar Now ချူထ္မံက်ထ္ၜးလဝ်ဂှ် စၟဳစၟတ်ဂွံဆဵုကေတ်ရ။

ဗ္ဒိုပ်ဒပ်ပံၚ်တောဲကရေၚ်ဍာဲတံ လုပ်စိုပ်ဗ္တိုက်ဂှ် ဒဒှ်ရဒှ်ဗ္ဒိုပ်ဒံၚ်လှ မၞုံဗ္ဒါဲကွာန်ဒံၚ်လှ သ္ကုတ်ဗၟံက်ၜဳသြၚ်လောန် ပွိုၚ်ဍုၚ်မေဝ်သေအ်ဂှ်ကဵု ဗ္ဒိုပ်မေဝ်လနွတ် ကေုာံ ကုန်ဗ္ဒိုပ် မၞုံပ္ဍဲ BP 14 ( စၟတ်တိုၚ် ၁၄ ပိုၚ်ခြာလဝ် သေံ−ဗၟာ ၜါဍုၚ်) ဂှ် ဂကောံလလောၚ်ပရိုၚ်ဗဟဵု စပ်ကဵုလ္ပာ်ကရေၚ်ဍာဲ (KMIC) တံ လလောၚ်တြးလဝ်ပရိုၚ်ဂှ် ဌာန်ပရိုၚ် RFA ကဵု Myanmar Now ချူထ္မံက်ထ္ၜးလဝ်ဂှ် စၟဳစၟတ်ဂွံဆဵုကေတ်ရ။

ဌာန်ပရိုၚ် Myanmar Now ထ္မံက်ထ္ၜးလဝ်ဂှ်

https://shorturl.at/gpqsU

ဌာန်ပရိုၚ် RFA ထ္မံက်ထ္ၜးလဝ်ဂှ်

https://shorturl.at/vCW69

ဌာန်ပရိုၚ် Mizzima ထ္မံက်ထ္ၜးလဝ်ဂှ်

https://shorturl.at/frvJX

ဟိုတ်နူတၚ်နၚ်တံဏံတုဲ ပရူပရာ မပါလုပ် ပ္ဍဲဗီုဓာတ် ရဲထံက်ဂလာန်ဒပ်ပၞာန်တံ မတြးဒၟံၚ် “ဟိုတ်နူအစောံသတ္တိ ကောန်ဒပ်ကံၚ်ဇြဳပၞာန်တံဂှ်တုဲ ဗ္ဒိုပ်ဗၠာဲသၟိၚ်ၝောံဍုၚ်၊ ပွိုၚ်ဍုၚ်မေဝ်သေအ်ဂှ် ဟွံဒးဆောံလေၚ်လဝ်ပုဟ်။ ၜိုတ်ဗ္ဒိုပ်ဗၠာဲသၟိၚ်ရဂှ် သီဟွံမာန်မွဲသာ် အံၚ်ဇၞးယျ၊ အံၚ်ဇၞးယျ က္ညာၚ်ဒၟံၚ်အဂှ်” သာ်ဝွံ မတြးဒၟံၚ်ဂှ်ဝွံ ဒဒှ်ရဒှ်ဆပရိုၚ်ဗၠေတ် တြးဝါဒမွဲဂှ် နူကဵုသြၚ်လောန်တိုၚ်(မ်) စၟဳစၟတ်ကဵုလဝ် သွက်ပုရိသာတ်သြၚ်လောန်တိုၚ်(မ်) ပိုယ်တံရ။

သြၚ်လောန်တိုၚ်(မ်)