ဒပ်ကံၚ်ဇြဳပၞာန် ထ္ပက်လုပ်ကၠုၚ်ကရောၚ်ပၞာန် ပ္ဍဲမွဲဗွိုၚ် ဍုၚ်လိုၚ်ဇြာ ဒၞာဲဌာန်ဂအုပ်ဗဟဵု ဒပ်ပၞာန်ဗၠးၜးကချေၚ် (KIO) ဂှ် သ္ပတံနူ ဂိတုဂျူလာၚ် စၟတ်တ္ၚဲ (၈)တုဲ ပန်ဖျေံဒၟံၚ်ကဵုလွဟ်ဇၞော် အဆက်ဆက်ရ။ ဟိုတ်နူကရောၚ်ပၞာန်ဒပ်ကံၚ်ဇြဳပၞာန် ထ္ပက်လုပ်ကၠုၚ်တုဲ ပ္ဍဲပွဳပွူကွာန်နာမ်သာန်၊ ပွိုၚ်ဍုၚ်ဝိုၚ်မဝ်ဂှ်လေဝ် ပေါဲဗတိုက် က္တဵုဒှ်ဒၟံၚ်တုဲ အကာဲအရာပရေၚ်ပၞာန်ၜါလ္ပာ် သာတုဲကြံၚ်မ္ၚိုဟ်ကၠုၚ်ဒၟံၚ်ရ။
ဟိုတ်ဂှ်ရ စပ်ကဵုအကာဲအရာပရေၚ်ပၞာန် အကြာဒပ်ကံၚ်ဇြဳပၞာန်ကဵု KIO၊ ပရေၚ်ဒပ်ကံၚ်ဇြဳပၞာန် ပလေဝ်ပလေတ်လဝ် ပရေၚ်ပၞာန်ကီု သီုကဵုအကာဲအရာ ညးပါဲဘဲပၞာန်တအ်တုဲ ဆက်စၠောံသၟာန်လဝ်ကဵု ညးတာလျိုၚ်လလောၚ်ပရိုၚ် ဒပ်ပၞာန်ဗၠးၜးကချေၚ် (KIO) သ္ကိုပ်ဗိုလ်ဇၞော် နဝ်ဘူရ။
၁။ ကိုပ်ကၠာအိုတ်ဏံ ဒပ်ကံၚ်ဇြဳပၞာန် ပန်ဖျေံဒၟံၚ်လွဟ်ဇၞော် ပ္ဍဲပွဳပွူဗ္ဒာဲဍုၚ်လိုၚ်ဇြာ အရိုဟ်တ္ၚဲအဆက်ဆက်ရဂှ် ဂွံမိၚ်ကေတ်ရ။ အကာဲအရာပရေၚ်ပၞာန်ၜါလ္ပာ် ဗီုပြၚ်လဵုဆက်နွံဒၟံၚ်ရော။
ပ္ဍဲဂိတိတုဂျူလာၚ် စၟတ်တ္ၚဲ(၈)ဂှ် ပန်ဖျေံလဝ်လွဟ်ဇၞော် ပ္ဍဲလ္ပာ်လိုၚ်ဇြာ နွံ။ ပ္ဍဲစၟတ်တ္ၚဲ(၉)ဂှ်လေဝ် ပန်ဖျေံလဝ်။ စၟတ်တ္ၚဲ(၁၀)လေဝ် ပန်လဝ်ရ။ ဆ္ဂး အရာပ်မၞိဟ်မံၚ် ပ္ဍဲလိုၚ်ဇြာဂှ် ဟွံပါပုဟ်။ အဓိကဂှ်တှ်ေ ပ္ဍဲလ္ပာ်ကွာန်နာမ်သာန်ရ။ ပ္ဍဲဒၞာဲလ္ပာ်ဍေံတအ်ထ္ပက်လဝ်ကရောၚ်ပၞာန်ရ ဒှ်ဒၟံၚ်။
၂။ ပ္ဍဲပေါဲဗတိုက်ဂှ် လ္ပာ်ကံၚ်ဇြဳပၞာန် ဗတိုက်ကၠုၚ်ကဵုပၞာန်ကျာရော နွံဒၟံၚ်ကီုဟာ။
ကဵုပၞာန်ကျာဂှ် ဟွံသေၚ်ပုဟ်။ ပန်ဖျေံလဝ်လွဟ်ဇၞော်ရ။ ကလေၚ်ပန်ပှော်လဝ်ကဵုလွဟ်ဇၞော် ဂတးဂတန်ရ။ ဒှ်မံၚ်အကာဲအရာဗီုဏံရ။
၃။ ပ္ဍဲပေါဲဗတိုက်တုဲကၠုၚ်ဏံဂှ်လေဝ် ကြတ်ဗတိုက်လဝ် ဒပ်ကံၚ်ဇြဳပၞာန်ရဂှ် ဂွံတီကေတ်ရ။ အခိၚ်လၟုဟ်ဏံ အကာဲအရာဗီုလဵုနွံဒၟံၚ်ရော။
ပိုဲတအ်ဂှ်တှ်ေ ၜိုတ်သ္ပမာန် ဒးကြတ်ဗတိုက်တွဵုရ။ ဒးကြတ်ဗတိုက်ပၞာန်ရီု အကြာဂၠံၚ်ဂှ် ဒးဗတိုက်တွဵုရ။
၄။ ဒပ်ကံၚ်ဇြဳပၞာန်လေဝ် ဟွံကလေၚ်ဆုတ်တုဲ ထ္ပက်ဒၟံၚ်ကရောၚ်ပၞာန်ဟီုတှ်ေ ပေါဲဗတိုက်ၜါလ္ပာ် ဗီုပြၚ်လဵု ဆက်ဒှ်ကၠုၚ်မာန်ရော။
ပြဟ်ဟ်ဏံ ဒဵုကဵုအခိၚ်လၟုဟ် ဟွံဂွံမိၚ်ရမျှာၚ်လွဟ်ဏီပုဟ်။ ပ္ဍဲဒၞာဲစုက်ကဵုလိုၚ်ဇြာပိုဲဂှ် ၜိုတ်ဇိုၚ်သဝ်တ္ၚဲမှ ဂွံတီ ချိုတ်တ်ပၠိုတ်တ်မာန်ဏောၚ်။ ဆ္ဂးပ္ဍဲလိုၚ်ဇြာကဵု ဒၞာဲဂွံမိၚ်ဒၟံၚ်ရမျှာၚ်လွဟ်တအ်ဂှ် ဟွံမိၚ်ရပုဟ်။
၅။ အလန်လကြဴအိုတ်ဏံ အခိၚ်လၟုဟ် ညးဍုၚ်ကွာန်ပါဲဒဴဘဲပၞာန်တအ် ၜိုတ်ဂလိုၚ်လဵုနွံဒၟံၚ်ယျရော။ သွက်ညးတအ် မုနွံဒၟံၚ်ပၟိက်ကဵု အရီုဗၚ်ဗီုလဵုရော။
ပ္ဍဲလ္ပာ်လိုၚ်ဇြာပိုဲဂှ် ပါဲဓလေတ်ဒၟံၚ်ဟၟဲပုဟ်။ ဒၞာဲဂွံပါဲဓလေတ်လေဝ် ဟၟဲပုဟ်။ ပါဲဓလေတ်ဒၟံၚ်ဂှ်တှ်ေ ညးဍုၚ်ကွာန် နူနာမ်သာန်တအ်ရ ပါဲဓလေတ်ဒၟံၚ်။ အဓိကဂှ်တှ်ေ ပ္ဍဲလ္ပာ်ဂၠံၚ်ကွဳစက်မျေတ်ဂျဳနာ ပါဲဓလေတ်အာဒၟံၚ်လ္ပာ်ဍုၚ်မျေတ်ဂျဳနာရ ။