ပေါဲကောံဓရီုသဳကၠဳ ဗော်သွးညးဗြဴကရေၚ် KWO မရနုက်ကဵု (၈) ဝါဂှ် ကၠောန်ဗဒှ်လဝ် ပ္ဍဲဒေသတၟေၚ်ဗဟဵု နူဂိတုဂျောန် စၟတ်တ္ၚဲ (၂၉) စဵုကဵု ဂိတုဂျူလာၚ် စၟတ်တ္ၚဲ (၁)ရ။ ပ္ဍဲကောံဓရီုသဳကၠဳဂှ် သဳကၠဳသ္ၚဳဂၠိပ်လဝ် တၚ်ဂွံဇြဟတ်၊ တၚ်ဍိုန်လျ လ္တူလၟေၚ်ကမၠောန် ကၠောန်ရေၚ်တၠုၚ်လဝ် ပ္ဍဲပွိုၚ် (၆)သၞာံတုဲကၠုၚ်တေံကီု၊ ဖ္ဍိုက်ဗပေၚ် သၞောဝ်သ္ဇိုၚ်ဒက်ပ္တန် ကေုာံ မူဝါဒပဝ်လေတ်ဇြဳကီု၊ သ္ၚဳဂၠိပ်လဝ် အကာဲအရာပရေၚ်ဍုၚ်ကွာန် လၟုဟ်ဏံကီု၊ ဖျေံလဝ်မဟာဗျူဟာ လၟေၚ်ကမၠောန်အဓာန်ဂတကီု ကၠောန်သ္ပလဝ်သ္ပလဝ်ရ။
သ္အာၚ်နူဂှ်ပၠန် ညံၚ်ညးဗြဴကရေၚ်တအ် ဂွံပါလုပ်ချဳဒရာၚ် ပ္ဍဲပရေၚ်ဍုၚ်ကွာန် ဂၠိုၚ်တိုန်ကၠုၚ်မာန် သွက်ဂွံဓမံက်ရုပ်ရဴဂှ် သဳကၠဳ တုပ်လဝ်စိုတ်ညးသ္ကအ်တုဲ ညံၚ်ဂွံဓမံက်ရုပ်ရဴ လၟေၚ်ကမၠောန်ဏံမာန် သွက်ဂွံဆက်ရေၚ်တၠုၚ်အာလၟေၚ် ကမၠောန် သၠုၚ်ပတိုန်ဍာ်ဒကေဝ်ပရေၚ်ဍုၚ်ကွာန် က္ဍိုပ်သ္ကိုပ်သၟတ်ညးဗြဴတအ်ဂှ် ဖျေံလဝ်သ္ဂုတ်သွာတ် တုပ်လဝ်စိုတ် ပ္ဍဲပေါဲသဳကၠဳကောံဓရီုဂှ်ရ။
စပ်ကဵု တၚ်သ္ဂုတ်သွာန်တုပ်လဝ်စိုတ်ကီု၊ လၟေၚ်ကမၠောန်ဆက်ကၠောန်ရေၚ်တၠုၚ်အာ ကေၚ်ကာညးဗြဴတအ်တုဲ ဆက်စၠောံသၟာန်လဝ်ကဵု ဒုတိယဥက္ကဋ္ဌ ဗော်သွးညးဗြဴကရေၚ် KWO နဝ်ဇြေဇြေဟေဝ်ရ။
-ကၠာအိုတ်ဏံ တၚ်လဝ်စိုတ်ဖျေံလဝ်သ္ဂုတ်သွာတ် သွက်ဂွံကၠောန်ရေၚ်တၠုၚ်အာ လၟေၚ်ကမၠောန်သၠုၚ်ပ္တိုန်ဍာ်ဒ္ကေဝ်ပရေၚ်ဍုၚ်ကွာန် သွက်ညးသၟတ်ညးဗြဴတအ်ဂှ် ပါလုပ်ဒၟံၚ်ရ စပ်ကဵုအကာဲအရာဏံတုဲ သောၚ်ကလးလဴထ္ၜးကဵုညိ။
ပ္ဍဲအရာဖျေံသ္ဂုတ်သွာတ်ဂှ် ဍေံတအ်ဂှ် နူဂကောံလဵုဒှ်ဒှ် ညံၚ်အစောန်စရာဲဍေံတအ် ဂွံနွံ ပ္ဍဲအရာဖျေံလဝ်သ္ဂုတ်သွာတ်ဂှ် ညံၚ်ဂွံပါလုပ်မာန် ကဵုဒၟံၚ်တန်ဗ္တောန် သၠုၚ်ဍာ်ဒကေဝ်ရ။ တန်ဗ္တောန်သၠုၚ်ဍာ်ဒကေဝ်ပရေၚ်ဍုၚ်ကွာန် တန်ဗ္တောန်ဒဳမဝ်ကရေဇြဳတအ်ဂှ် က္ဍိုပ်သ္ကိုပ်သၟတ်လ္ၚဵုတအ် တိုန်လဝ်တုဲဒၟံၚ်ယျ။ ဆ္ဂး ညးဟွံဂွံတိုန်ဏီတအ်ဂှ် တန်ဗ္တောန် စပ်ကဵုပရေၚ်ဍုၚ်ကွာန်၊ တန်ဗ္တောန်ဒဳမဝ်ကရေဇြဳ၊ သွက်ဂွံကဵုတန်ဗ္တောန် ဗလးပရေၚ်ဍုၚ်ကွာန် က္တဵုဒှ်ဒၟံၚ် လၟုဟ်ဏံရ။
– ဗော်သွးညးဗြဴကရေၚ် KWO ဂှ် ရီုဗၚ်ထ္ၜလဘာ်အာ က္ဍိုပ်သ္ကိုပ်ညးဗြဴ ပါလုပ်ချဳဒရာၚ်ဒၟံၚ် ပ္ဍဲပရေၚ်ဍုၚ်ကွာန်ဏောၚ် ပါလုပ်ဒၟံၚ်ရ။ ဗီုပြၚ်လဵု ရီုဗၚ်ထ္ၜလဘာ်အာ ဗွဲအဓိကရော။
ညးဗြဴပါလုပ်ဒၟံၚ် ပ္ဍဲပရေၚ်ဍေုၚ်ကွာန်ဏံလ္ၚဵုတအ်ဂှ် ဒၟာနူဒှ်ဒၟံၚ်မိယာဲကောန်ၚာ်ဂှ်ရ ယဝ်ရပါလုပ် ပ္ဍဲပရေၚ်ဍုၚ်ကွာန်ဏံတှ်ေ ဍာ်ဒကေဝ်သွက်ညးတအ် ဍာ်ဒကေဝ်ပရေၚ်ဍုၚ်ကွာန်ညးတအ် နွံပၟိက်ဟာ ထ္ၜလဘာ်ကဵုဏောၚ်။ တၚ်နွံပၟိက်ပူဂဵုနွံလေဝ် ဗီုနွံပၟိက်ဂှ် ရီုဗၚ်ကဵုဏောၚ်။ က္ဍိုပ်သ္ကိုပ်သၟတ်ညးဗြဴတအ်ဂှ် ယဝ်နွံပၟိက်တှ်ေ ရီုဗၚ်ကဵုဏောၚ်။ ပ္ဍဲပေါဲရုဲမာဲကဵုဒှ်၊ ယဝ်ရလုပ်ပြိုၚ် ပ္ဍဲဒၞာဲတၞဟ်တှ်ေ ညးဗြဴတအ်ဂှ် ညံၚ်ဂွံပါလုပ် ပ္ဍဲဒၞာဲကဵုသ္ဂုတ်သွာတ်ဂှ် နကဵုဗော်သွးညးဗြဴကရေၚ်ပိုဲ သ္ပလဝ်ဒ္တန်ရ။ ၜိုတ်ပိုဲသ္ပမာန် ရီုဗၚ်ထ္ၜလဘာ်အာဏောၚ်။
-အခန်ကဏ္ဍညးဗြဴတအ် ၜိုတ်ကဆံၚ်လဵု ပၟိက်ဇၞော်ဒၟံၚ်ရော။
အခန်ကဏ္ဍညးဗြဴတအ်ဂှ် ပၟိက်ဇၞော်ဒၟံၚ် ဗွဲမလောန်ရ။ ယဝ်ပိုဲကၠောန်ကမၠောန်တှ်ေ သွက်ညးဍုၚ်ကွာန်ကဵုဒှ် ညးဗြဴတအ်ဂှ် ပၟိက်ဇၞော်လောန်ရ။ ပရေၚ်ပညာကဵုဒှ်၊ ပရေၚ်ထတ်ယိုတ်ကဵုဒှ်၊ ညးဗြဴ ဒးပါလုပ်ဒၟံၚ်လၟိုန်ရ။ တၚ်ဒုၚ်စသိုၚ်ညးဗြဴ၊ တၚ်နွံပၟိက်ညးဗြဴတအ်ဂှ် ညးဗြဴတအ်ရ တီဏောၚ်။ ဟိုတ်ဂှ်ရ ညးဗြဴတအ်ဂှ် ဒးပါလုပ်ဏောၚ်။ ပ္ဍဲဇၟာပ်ဒၞာဲ ပၟိက်ဇၞော်ဂှ်တှ်ေ။
-သၞောဝ်ဥပဒေသၠုၚ်ပ္တိုန် စဵုဒၞာကဵုအခေါၚ်အရာညးဗြဴ၊ ကောန်ၚာ်သၟတ် ညံၚ်ဂွံဒှ်သၞောတ်ဗဗွဲဓဝ် ဇြဟတ်ဂွံခိုဟ်တိုန်ကၠုၚ်မာန် ကၠောန်ရေၚ်တၠုၚ်အာ ကမၠောန်စန္ဒက်ဆဝ်ပ္ၚုဟ်ဏောၚ်ဂှ် သ္ဂးလဝ်ရ။ သောၚ်ကလးလဴထ္ၜးကဵုညိ။
စန္ဒက်ဆဝ်ပ္ၚုဟ်ဂှ် ကၠောန်အာဏောၚ်။ ညးဗြဴတအ် ဗွဲမဂၠိုၚ်ဂှ် ဒှ်တၠကောန်ရ။ ညးဟွံဒှ်တၠကောန်တအ်ဏီဂှ်တှ်ေ ပရေၚ်ဍုၚ်ကွာန်ကီု၊ သွာၚ်ပရေၚ်ထတ်ယိုတ်ကီု ဇြဟတ်ဍိုန်လျဒၟံၚ်ကွေံကွေံရ။ မုဒှ်ရောတှ်ေ ဒှ်ဒၟံၚ်ပၞာန်ဂှ်ရ ယဝ်ရဒှ်ဒၟံၚ်ပၞာန်တှ်ေ ဗွဲမဂၠိုၚ် မၞိဟ်ဒးဒုၚ်ဂှ် ဒှ်ညးဗြဴတအ်ရ။ ဒးဂြိပ်ဒဴ ပေါဲဗတိုက်ဒှ်ကၠုၚ်တှ်ေ ဗွဲဂၠိုၚ် ညးဗြဴတအ်ရ ဒးဒုၚ်ဂၠိုၚ်။ ဒးဂြိပ်ဒဴတိတ်။ ဒးရံၚ်ကောန်ၚာ်တအ်ရ။ အခိၚ်စန္ဒက်ဆဝ်ပ္ၚုဟ် သွက်ဂွံသၠုၚ်ပ္တိုန်ဍာ်ဒ္ကေဝ်ညးဗြဴဂှ်တှ်ေ သွက်ညးဗြဴတအ် ဗီုပြၚ်လဵု ဂွံဆက်အာဂမာန်ရော။ ဗီုပြၚ်လဵု ညးဗြဴတအ် ဂွံဒတူလာၚ်အာမာန်ရောဟီုဂှ် အခိၚ်စန္ဒက်ဆဝ်ပ္ၚုဟ်ဂှ် ပိုဲဒးဘိုၚ်ချပ်ကီုဏောၚ်။
-သ္ပလဝ်ဒ္တန် ပဝ်လဇြဳ ဆေၚ်စပ်ကဵု အရီုဗၚ်ဗ္စာရဏာပရေၚ်မၞိဟ် တၟိမွဲတၚ်ရ။ သောၚ်ကလးကဵုညိ။ လၟေၚ်ကမၠောန်အရီုဗၚ်ဗ္စာရဏာပရေၚ်မၞိဟ်ဂှ် ဗီုပြၚ်လဵု ရေၚ်တၠုၚ်အာရော။ နကဵု KWO ပရေၚ်ကၠောန်ရေၚ်တၠုၚ်ကဵုဒၟံၚ် အရီုဗၚ်ဗ္စာရဏာပရေၚ်မၞိဟ် ဗီုလဵုရော။ ဟီုထ္ၜးကဵုညိ။
ပဝ်လဇြဳလ္တူအရီုဗၚ်ဗ္စာရဏာပရေၚ်မၞိဟ်ပိုဲဂှ် နွံဒၟံၚ် နူကၠာတေံရ။ ဆ္ဂးဂှ် ဟွံဂွံစုတ်လဝ် ပဝ်လဇြဳအရီုဗၚ်ဗ္စာရဏာပရေၚ်မၞိဟ်ဏံပုဟ်။ စွံလဝ် နဒဒှ်တၚ်လလောၚ်တြးဓဝ်ရ။ ဆ္ဂး လၟုဟ်ဏံ တၚ်ဂှ်ကလေၚ်စုတ်လဝ် ပ္ဍဲပဝ်လဇြဳဂှ်ရ။ မုဒှ်ဂွံကလေၚ်စုတ်ရောတှ်ေ သၟတ်ထံက်ရံၚ်ဗ္စာရဏာပရေၚ်မၞိဟ် လၟုဟ်ဏံ ဗွဲမဂၠိုၚ်ဂှ် ယဝ်ရရီုဗၚ်ထံက်ပၚ်ကဵု စရိတ်ဏောၚ်တှ်ေ တၚ်နွံပၟိက်ဂှ် ဍေံဂၠိုၚ်လောန်ဒၟံၚ်ရ။ ပ္ဍဲကဵုဂှ် မုဂွံဆဵုကေတ်ရောတှ်ေ ပ္ဍဲတွဵုရးကရေၚ်ကဵုဒှ်၊ ညံၚ်အရီုဗၚ်ထံက်ပၚ်စရိတ် ဟွံဂွံထပ်ဂှ် တုဲပၠန် ယဝ်ရထံက်ပၚ်ဗ္စာရဏာပရေၚ်မၞိဟ်ဏောၚ်တှ်ေ ပံၚ်တောဲကဵု ဂကောံညးအရာပ် ပ္ဍဲဍုၚ်တအ်တုဲ သွက်ဂွံသၟာန်ဂှ် အလဵုဇကုတိုက်ရိုက်ဟွံပါလုပ်တုဲ မုမၞိဟ်တအ် နွံဒၟံၚ်ပၟိက်မုရော။ ယဝ်ရပိုဲဟွံဖျေံလဝ်ပဝ်လဇြဳဏံပုဟ်တှ်ေ တၚ်နွံပၟိက်ညးဍုၚ်ကွာန်တအ်ဂှ် တၠဒါန်တအ် တီကေတ်မာန် ဟွံသေၚ်ရ။ ညံၚ်ဂွံစိုပ်မၞိဟ်တအ်တိုက်ရိုက်ဂှ် ညံၚ်ဂွံပါလုပ် ပ္ဍဲကဵုပဝ်လဇြဳအရီုဗၚ်ဗ္စာရဏာပရေၚ်မၞိဟ်ဂှ် ပိုဲစုတ်လဝ်ရ။ တုဲမွဲပၠန်ဂှ် အရီုဗၚ်ဗ္စာရဏာပရေၚ်မၞိဟ်ဂှ် လၟုဟ်ဏံ အကာဲအရာပေါဲပၞာန်သ္ကာတ်မြဟ်ကၠုၚ်လောန်ဒၟံၚ်ရ။ ပေါဲဗတိုက်ဒှ်ဂၠိုၚ်ဒၟံၚ်ဏီရ။ ပ္ဍဲတွဵုရးကရေၚ်ပိုဲ ခရိုၚ်နွံဒၟံၚ် ၇ ခရိုၚ်ရ။ ပေါဲဗတိုက်တအ်တုဲဒေါံဟၟဲပုဟ်။ ညးဍုၚ်ကွာန်တအ်ဒးဂြိပ်ဒဴဒၟံၚ်ရ။ သၟာဒဒိုက်တအ်ဂှ်တှ်ေ နွံပၟိက်တှ်ေ ဗီုနွံပၟိက် သွက်ဂွံဆက်ရီုဗၚ်ကဵုအာနွံရ။
– အကာဲအရာ ညးပါဲဘဲပၞာန် ပ္ဍဲတိဍာ် KNU တအ် ဗီုလဵုနွံရော။ ဗွဲတၟေၚ်တှ်ေ ညးဗြဴကောန်ၚာ်သၟတ် ညးဗြဴနွံကဵု ယဲဒိုက်တအ်ရ။ အခိၚ်လၟုဟ်ဏံ ဒှ်ဒၟံၚ်အခိၚ်ကသီုဟီုတှ်ေ တၚ်နွံပၟိက်အရီုဗၚ် အခက်ခုဲပြသၞာပရေၚ်ထတ်ယိုတ် မုနွံရော။
သွက်ဗဒိုပ်ပါဲပၞာန် ဒးဂြိပ်ဒဴပါဲဓလေတ်ဒၟံၚ်လၟုဟ်တှ်ေ အခိၚ်ကသီုလေဝ် ဒှ်။ သ္ၚိဌာန်ဇကုလေဝ် ဟွံဂံၚ်က္လေၚ်စဴ။ ဂွံကလေၚ်စဴလေဝ် ဟွံပြေပြံၚ်။ လၟုဟ်ဏံ ဒှ်ဒၟံၚ်ကသီုဂှ်ရ က္ၜၚ်ကျာဟွံကၠုၚ်ရပုဟ်။ ဆ္ဂး ဒဵုကဵုလၟုဟ် က္ၜၚ်ကျာကၠုၚ်ပန်ဒၟံၚ်ဏီ။ ညးဍုၚ်ကွာန်တအ် ဒးဂြိပ်ဒဴဒၟံၚ်ဖိုဟ်ရ။ အခိၚ်ဒးဂြိပ်ဒဴဒၟံၚ် အခိၚ်ဗြဲလၟုဟ်ဏံတှ်ေ ကောန်ၚာ်တအ် ဒးဒှ်ဒၟံၚ်ယဲ ဆေၚ်စပ်ကဵု ယဲဇွဟ်ရ။ ပရေၚ်ရေၚ်တၠုၚ် ပရေၚ်ထတ်ယိုတ်တအ်လေဝ် ဟွံဂွံခိုဟ်ဟ်ပုဟ်။ ဗြဲလၟုဟ်ဂှ်လေဝ် ဂူတြိုပ်မံၚ်။ ဂၠံၚ်ဍာန်လေဝ် ဒးအာကၠုၚ်သ္ၚောဲဒၟံၚ်။ မိယာဲကောန်ၚာ်တအ်ဂှ်တှ်ေ ကၞဴဟွံရုမ်ဂပ်ပုဟ်။ ဂွံထိုၚ်ကၞဴလေဝ် ဟွံပြေပြံၚ်ပုဟ်။ ဒးတိက်ဒၟံၚ် ပ္ဍဲသၠာတ်။ ဒးတိက်ဒၟံၚ် အကြာအုပ်ခြုံရဂှ်ရ ဒးဒုၚ်ဒၟံၚ်ယဲဇွဟ်ရ။ စၞစသုၚ်လေဝ် ဟွံရုံဂပ်ပုဟ်။ ပရေၚ်ထတ်ယိုတ်လေဝ် ဟွံရုံဂပ်ပုဟ် ပ္ဍဲဗဒိုပ်ပါဲပၞာန်ဂှ်။
-နဒဒှ်အလန်လကြဴအိုတ်ဏံ တၚ်မိက်ဂွံဟီုဗပေၚ်တၞဟ်နွံဏီတှ်ေ ဟီုကဵုညိ။
ပေါဲရုဲမာဲတုဲဗက်ဂှ် အရာပိုဲဒးဆက်ကၠောန်အအာ တရဴပိုဲဒးဆက်ကွာ်အာဂှ် သ္ကာတ်မြဟ်ဒၟံၚ်ဏောၚ်။ လၟုဟ်ဏံ အကာဲအရာပရေၚ်ဍုၚ်ကွာန်ဂှ် ဟွံညိၚ်ဝတ်ပုဟ်။ ညးဍုၚ်ကွာန်တအ် ဒးတံၚ်တောဲညးသ္ကအ်ညဳညဳဏောၚ်။ သွက်အရာဗတိုက်သရိုဟ်ကံၚ်ဇြဳပၞာန် ညးဍုၚ်ကွာန်တအ် ဒးတံၚ်တောဲညဳညဳသာသာဏောၚ်။ ဒးကလၚ်ရမျာၚ် ဂကောံညးအရာပ်နွံဒၟံၚ်ပ္ဍဲပယျဵုတအ်ဏောၚ်။ ပရေၚ်ရီုဗၚ်ထံက်ပၚ် ယဝ်ရကၠုၚ်တှ်ေ ဒးဆက်စၠောံကဵု ဂကောံညးအရာပ် မၞုံဒၟံၚ်ပ္ဍဲပယျဵုဏောၚ်။ လၟေၚ်တရဴပိုဲ ပွိုၚ်ပန်သၞာံဏံ သ္ကာတ်မြဟ်ဒၟံၚ်၊ ဒးရီုဗၚ်ဒၟံၚ် ညးဍုၚ်ကွာန်တအ်ဏီ။ ဒးရီုဗၚ်ဒၟံၚ် ကောန်ၚာ်သၟတ်တအ်ဏီ အာဂတနူဏံဂှ်။