ဂွံလဝ်အခေါၚ်ဆဵုဂဗ ကုဒဝ်အံၚ်သာန်သုကျဳ က္ဍိုပ်သ္ကိုပ်ညးဍုၚ်ကွာန် ဒးဒုၚ်ဖျေံလဝ်ဒဏ်ထံၚ် ပွိုၚ် (၃၀)သၞာံပြၚ် ပ္ဍဲဂိတုဂျူလာၚ် စၟတ်တ္ၚဲ (၉) ပ္ဍဲနေပျဳဒဝ်ရဂှ် ဝန်ဇၞော်ဍုၚ်သ္အာၚ် ဒုတိယဝန်ဇၞော်သေံလေဝ်ဒှ် ဒွောန်ပရာမုဒ်ဝိနာဲ ဟီုသ္ဂးလဝ်ရ။ ဂအုပ်ဗိုလ်ဇြဝ်မေန်ထောန် ညးမၞုံအခေါၚ်ဟီုဂးကံၚ်ဇြဳပၞာန်လေဝ် ဒဒှ်ရညးတအ်ညးၜါဆဵုဂဗလဝ်ဂှ် ဒှ်ဍာံကီု မုဟီုဂးသဳကၠဳလဝ်ရော ဟွံဂွံတီကေတ်ချိုတ်တ်ပၠိတ်တ်ရဂှ် သ္ပလဝ်ဒ္တန် ပ္ဍဲဂိတုဂျူလာၚ် စၟတ်တ္ၚဲ (၁၃)ဂှ်ရ။
လ္တူကံၚ်ဇြဳပၞာန် ပ္တိတ်သုၚ်စောဲကၠုၚ် ဒဝ်အံၚ်သာန်သုကျဳ က္ဍိုပ်သ္ကိုပ်ညးဍုၚ်ကွာန်ဂှ် ဗီုလဵုညာတ်ကေတ်ရော။ ပ္ဍဲအကာဲအရာဏံ နကဵု NUG ဗီုပြၚ်လဵု ဆက်ရပ်စပ်အာ လ္တူပရေၚ်ပၠန်ဂတးရော။ စပ်ကဵုအကာဲအရာဏံတုဲ ဆက်စၠောံသၟာန်လဝ်ကဵု ညးမၞုံအခေါၚ်ဟီုဂး ရုၚ်သမ္မတ အလဵုအသဳပရေၚ်ညဳသၟဟ်ကောန်ဂကူ (NUG) ဥူကျဝ်ဇြဝ်ရ။
၁။ ကိုပ်ကၠာအိုတ်ဏံ လ္တူကံၚ်ဇြဳပၞာန် ကဵုအခေါၚ်ဝန်ဇၞော်ပရေၚ်သ္အာၚ်သေံ ဒွောန်ပရာမုဒ်ဝိနာဲ ဆဵုဂဗကဵု က္ဍိုပ်သ္ကိုပ်ညးဍုၚ်ကွာန် ဒဝ်အံၚ်သာန်သုကျဳတုဲ ဗီုလဵုညာတ်ကေတ်ရော။
ဝန်ဇၞော်ပရေၚ်ဍုၚ်သ္အာၚ်သေံ ပၞုက်ဓလုက်တုဲတှ်ေ ဆဵုဂဗလဝ်ကဵု ဒဝ်အံၚ်သာန်သုကျဳရဂှ်ဂးတုဲ ပရိုၚ်ပ္တိုန်ထ္ၜးဟီုဂးလဝ် ပ္ဍဲကောံဓရီုဝန်ဇၞော်ပရေၚ်ဍုၚ်သ္အာၚ်အာဇြဳယာန်ဂှ် ပြးတိတ်ကၠုၚ်ရ။ ဝန်ဇၞော်ပရေၚ်ဍုၚ်သ္အာၚ်သေံလေဝ် ဒဒှ်ရဆဵုဂဗလဝ် ဍာံဍာံဂှ် ဟီုဂးလဝ်လေဝ် ဂွံတီကေတ်ရ။ အရာဏံ ဒှ်တၚ်ဝဵုစၞာဲ စကစရ။ ဒှ်ပွဂြိုဟ်စာပရေၚ်ဍုၚ်ကွာန်၊ သုၚ်စောဲပရေၚ်ဍုၚ်ကွာန်ရဂှ် ဂွံညာတ်ကေတ်ရ။ တုဲပၠန် လ္တူဂွံဆဵုဂဗလဝ်ကဵု ဒဝ်အံၚ်သာန်သုကျဳ၊ ဟွံဂွံဆဵုဂဗပုဟ်ဟီုဂှ် တုဲတဴကဵုလဟီုညးမွဲတၠဓဝ် ပရိုၚ်ပြးတိတ်ကၠုၚ်ရ။ လ္ပာ်ဒဝ်အံၚ်သာန်သုကျဳဂှ် မုလေဝ်ဂွံကလေၚ်ဟီုပၠန်လဝ်တဲဂှ်ဟၟဲပုဟ်။
ဒှ်ဆဵုဂဂဗလဝ်တုဲတှ်ေ ဂွံသဳကၠဳလဝ် နွံဟာ။ ဂွံဆဵုဂဗလဝ် ဇေတ်တ်ရဟာ။ သွက်ဂွံဒးသၟာန်ဗီုဏံ နွံဗွဲမဂၠိုၚ်ရ။ မုဒှ်ရောတှ်ေ သက်သဳသာဓကလေဝ် မုထ္ၜးကဵုမာန် ဟၟဲပုဟ်။ အရေဝ်ကံၚ်ဇြဳပၞာန်ဟီုကဵု အရေဝ်ဝန်ဇၞော်ပရေၚ်ဍုၚ်သ္အာၚ်သေံဟီုရ နွံမံၚ်။ မုသက်သဳသာဓက ဟၟဲပုဟ် ။ ယဝ်ရသီုညးၜါလ္ပာ် ဆဵုဂဗဟီုသဳကၠဳလဝ်ဏောၚ်တှ်ေ တၚ်လလောၚ်တြးပံၚ်တောဲၜါလ္ပာ် ဒးနွံကီု သီုၜါလ္ပာ် တၚ်လလောၚ်တြးမွဲမွဲလ္ပာ်လေဝ် ဒးနွံရ။ လၟုဟ်ဂှ် မွဲလ္ပာ်ဓဝ်ဟီုဂးဒၟံၚ်ဟီုတှ်ေ အရာဏံဂှ် အဓိပ္ပါယ်ဟၟဲပုဟ်ဂှ် ညာတ်ကေတ်ရ။
ဝန်ဇၞော်ပရေၚ်ဍုၚ်သ္အာၚ်သေံဂှ် ယဝ်ရဆန္ဒမိက်ဂွံရီုဗၚ်ကဵု ပရေၚ်ကၟိန်ဍုၚ်ဗၟာ ညံၚ်ဂွံဒှ်ဂုဏ်ဖိုလ်ဏောၚ်တှ်ေ ဟွံလုပ်အာ ပ္ဍဲဂွန်ကံၚ်ဇြဳပၞာန်တုဲ ညံၚ်ဂွံဗလးပ္တိတ်ကဵု ဒဝ်အံၚ်သာန်သုကျဳ သီုကောန်ထံၚ်ပရေၚ်ဍုၚ်ကွာန်သီုဖအိုတ် လွာဲလၟုဟ်ဂှ် ညးတအ် ဒးရေၚ်တၠုၚ်ကဵုထေက်ဏောၚ်၊ ထေက်ကဵုဒးအာတ်မိက်ဏောၚ်။ ဂွံဆဵုကဵုညးတအ်တုဲ ယဝ်ရဒဝ်အံၚ်သာန်သုကျဳဗၠးတိတ်အာတှ်ေ တၚ်ညးကၠောန်ရေၚ်တၠုၚ်ဂှ် ဟီုဗီုဏံဂွံရ။ လၟုဟ်ဂှ် ဒဝ်အံၚ်သာန်သုကျဳ ညးကဵုကသပ်ကၟိန်ဍုၚ် ဒဝ်အံၚ်သာန်သုကျဳဒးဒုၚ်ထိၚ်ဒဝ်လဝ် ဟွံဗဗွဲဓဝ်၊ သမ္မတဥူဝေန်မျေတ် သီုကဵုကောန်ထံၚ်ပရေၚ်ဍုၚ်ကွာန် ဍိုက်ကဵုလက်ဂွံကလေၚ်ဗၠးတိတ်ကၠုၚ်ကၠုၚ်ဂှ် ညးဟီုပ္တိတ်လဝ် ဟၟဲပုဟ်။ သွက်ဂွံကၠောန်ရေၚ်တၠုၚ်ဂှ် ဟီုဂးလဝ်သ္ၚိတ်တ်ဇြဇြဟာဂှ် ဟွံတီပုဟ်လေဝ်။ ဟီုဏောၚ်ဂှ်လေဝ် ဟွံထေၚ်ပုဟ်။ လၟုဟ်ထေက်ကဵုဒှ်ဂှ် နကဵုဥက္ကဋ္ဌအာဇြဳယာန်(ဟွံသေၚ်)ညးမၞုံအခေါၚ်ဟီုဂးတၟေၚ် ဂွံအခေါၚ်ဆဵုဂဗဂှ် ထေက်ကဵုဒးဒှ်ရ။ ဒးထေက်ကဵုဒှ် ဗီုဏံ မွဲလေဝ်ဟွံဆဵုကေတ်ပုဟ်။ ဟွံဒ္ဂေတ်ဗက်တအ်ဏံဂှ်တှ်ေ ဒှ်အရာထေက်ကဵုဒးသၟာန်ရ။
၂။ ပ္ဍဲလ္တူကဵုအခေါၚ်ဆဵုဂဗဗီုဏံဂှ် နကဵုအလဵုအသဳပရေၚ်ညဳသၟဟ်ကောန်ဂကူ (NUG) မုမိက်ဂွံဟီုကဵု တၚ်စၟတ်ဗီုလဵုနွံရော။
အရာဏံ ကံၚ်ဇြဳပၞာန် ဝဵုစၞာဲသုၚ်စောဲယၟု ဒဝ်အံၚ်သာန်သုကျဳတုဲ ဒှ်ဂွန်ဗ္ဂေတ်ဒၟံၚ် ပရေၚ်ဍုၚ်မွဲရ။ အတိုၚ်ပရေၚ်ဍုၚ်ကွာန် ဒှ်ကမၠောန်ဂြိုဟ်စာမွဲ ကၠောန်လဝ်ရ။ တ္ၚံက်စၞာဲတုဲသုၚ်စောဲဒၟံၚ် ဒဝ်အံၚ်သာန်သုကျဳဂှ် ဇၟာပ်မၞိဟ်တီဒၟံၚ်ရ။ ညးဍုၚ်ကွာန်ဗၟာသီုဖအိုတ်လေဝ် တီဒၟံၚ်ရ။ ကိစ္စဏံဂှ် ကမၠောန်ဍေံတအ်ကၠောန် ဟွံအံၚ်ဇၞးလးလးရ။ ဒှ်သွက်မၞိဟ်ဂွံဂြိုၚ်စရ။ သိက္ခာဍေံတအ်ဟၟဲလ္တူဟၟဲဂှ် ထပ်တုဲဒှ်အာအကာဲအရာ သိက္ခာစှ်ေအာပၠန်ရဂှ် ညာတ်ကေတ်။
၃။ ကံၚ်ဇြဳပၞာန် ဗလးပ္တိတ်ဒဝ်အံၚ်သာန်သုကျဳတုဲ သွက်ပရဲပရေၚ်ဍုၚ်ကွာန်ဍေံတအ် ယဝ်ရသုၚ်စောဲကၠုၚ် ပ္ဍဲပရေၚ်သဳကၠဳပရေၚ်ဍုၚ်ကွာန်တှ်ေ နကဵုက NUG ဗီုပြၚ်လဵု ရပ်စပ်အာ လ္တူပရေၚ်ပၠန်ဂတးဏံရော။
ညးကဵုကသပ်ကၟိန်ဍုၚ် ဒဝ်အံၚ်သာန်သုကျဳဂှ် ကဵုညးကၠောန်ကမၠောန်မွဲစွံ ဆဵုဂဗလဝ်ကဵုညးကၠာတေံ၊ အတိုၚ်လဟီုညးတၞဟ်တအ် ဟီုလဝ်ဂှ်တှ်ေ ညးဂှ် ဒှ်ဒၟံၚ်မွဲဖျုန်ကဵု ညးဍုၚ်ကွာန်ညးရဂှ် ညးဟီုလဝ် ဂွံတီကေတ်ရ။ တၚ်သၟတ်တအ်ကၠောန်ရေၚ်တၠုၚ်ဒၟံၚ်ဂှ် ညးဟီုထိုၚ်သးလဝ်ရဂှ် ဂွံတီကေတ်ရ။ ဣဏံဂှ် နကဵုညး အခိၚ်ကၠာတေံလေဝ် နကဵုက္ဍိုပ်သ္ကိုပ်ညးဍုၚ်ကွာန်မွဲ ညးကေၚ်ဟီုလဝ်နွံ။ ဒှ်ဒၟံၚ်မွဲဖျုန်ကဵု ညးဍုၚ်ကွာန်တအ်ဟီုဂှ် လၟုဟ်လေဝ် ညးဟီုဒၟံၚ်ရ။ ယဝ်ရညးနွံဒၟံၚ်မွဲဖျုန်ကဵု ညးဍုၚ်ကွာန်တအ်ဏောၚ်တှ်ေ မုလေဝ် သွက်ဂွံဒးဒှ်ဓဝိၚ်ဟၟဲပုဟ်။ ထံက်ဒၟံၚ်ဂလာန်ကဵု ပရေၚ်ပၠန်ဂတးညးဍုၚ်ကွာန်တအ်တွဵုရ။ ညးဂှ် အကြာအဓမ္မဝါဒဳ သၟာပ္ကီုပရာပ်ကဵု သၟာပၠန်ဂတးညးဍုၚ်ကွာန်တအ်ဂှ် ညးဒတူလာၚ် လ္ပ်ာလဵုရောဟီုဂှ် ဇၟာပ်မၞိဟ်တီဒၟံၚ်ရ။ ချိၚ်ခယျကေတ်ဒးဒၟံၚ်ရ။
ဟိုတ်ဂှ်ရ သွက်ပရေၚ်ပၠန်ဂတးက္ညၚ်ဂှ် မုလေဝ်ဂွံဒးဒှ်ဓဝိၚ် ဟၟဲပုဟ်။ ကံၚ်ဇြဳပၞာန်ဂှ်တှ်ေ တ္ၚံက်စၞာဲ ဗီုပြၚ်စုၚ်တွဵုရ။ ဒဝ်အံၚ်သာန်သုကျဳတအ်၊ ဥူဝေန်မျေတ်တအ် ကာဗၠးလေဝ် ဗၠးတိတ်ဏောၚ်။ ကာလပလံၚ်ဏာအချုက်သၠဲလေဝ် ပလံၚ်ဏာဏောၚ်။ ဗီုကၠောန်ဒၟံၚ် ပေါဲသဳကၠဳဏံ ပေါဲသဳကၠဳပတောံတအ် လၟုဟ်တှ်ေ ကဵုဂကောံထ္ပက်လဝ်စၟတ်တဲ NCA တအ်ဂှ် ကၠောန်သ္ပပေါဲသဳကၠဳ ထ္ၜးဗီုပြၚ်တုဲ ပ္တိတ်ဒၟံၚ်ပရဲပရေၚ်ဍုၚ်ကွာန်ရ။ ဆ္ဂးဒဝ်အံၚ်သာန်သုကျဳဂှ် သစ္စနွံဒၟံၚ် လ္တူကောန်ညးဍုၚ်ကွာန်တအ် ပေၚ်ၚ်။ သစ္စနွံဒၟံၚ် လ္တူကၟိန်ဍုၚ်ပေၚ်ၚ်ရ။ နကဵုညး ကၠောန်ကမၠောန် ညံၚ်ဂွံသ္ၚောဲတိတ်အာ နူညးဍုၚ်ကွာန်ဟွံသေၚ်ပုဟ် ပိုဲပတှ်ေကေတ်လဝ်ရ။ သုၚ်စောဲဒဝ်အံၚ်သာန်သုကျဳတုဲ ယဝ်ရဗ္ဂေတ်ပရေၚ်ဍုၚ်ကွာန်တှ်ေ အံၚ်ဇၞးဟွံသေၚ်ပုဟ်။ ညးဍုၚ်ကွာန်တအ်လေဝ် ဒုၚ်တဲဟွံသေၚ်ပုဟ်။ ညးဍုၚ်ကွာန်တအ်လေဝ် ဒုၚ်တဲ တၚ်စကစဗ္ဂေတ်ပရေၚ်ဍုၚ်ကွာန် ဟွံသေၚ်ပုဟ်ဂှ် မိက်ဂွံဟီုဏာရ။
၄။ အလန်လကြဴအိုတ်ဏံ စပ်ကဵုကမၠောန်ပြဝကံၚ်ဇြဳပၞာန် ကၠောန်လဝ်တုဲ မုမိက်ဂွံထပ်ဟီုဗပေၚ်နွံဏီရော။
ဒဝ်အံၚ်သာန်သုကျဳဂှ်လကြဴဏံ အရေဝ်ညးကေၚ်ဟီုလဝ်လေဝ် နွံဒၟံၚ်။ တၚ်သ္ဂုတ်သွာတ်ပရေၚ်ဍုၚ်ကွာန်ဂှ် အခိၚ်ဆဵုဂဗကဵု CEC သီုဖအိုတ် ဗၠးဗၠးၜးၜးတုဲမှ ကၠောန်ဏောၚ်၊ နွံဒၟံၚ်မွဲစွံကဵု ညးဍုၚ်ကွာန်တအ်ရဟီုတုဲ သ္ဂးလဝ်ရ။ တၚ်လလောၚ်တြး NLD CEC တအ်လေဝ် တီဒၟံၚ်ရ။ NLD လေဝ် ပ္ဍဲပရေၚ်ပၠန်ဂတးက္ညၚ်ဏံ ကောန်ဗော် NLD တအ် ပါလုပ်ဒၟံၚ်ကၠာအိုတ်။ ဟီုတှ်ေ အရာဏံဂှ် မုလေဝ် သွက်ဂွံဒးဒှ်ဓဝိၚ် ဟၟဲပုဟ်။ ပရေၚ်ပၠန်ဂတးညးဍုၚ်ကွာန်ဂှ် ဒှ်ပရေၚ်ပၠန်ဂတးရပ်လွဟ် မွဲဂကူဓဝ် ဟွံသေၚ်ပုဟ်။ ပရေၚ်ပၠန်ဂတးရပ်လွဟ်ညးကွာန်ဂှ် ပရေၚ်ဍုၚ်ကွာန်၊ ပရေၚ်ပိုန်ဒြပ်၊ ပရေၚ်ကလုတ်တမာန်၊ ပရေၚ်ဆက်ဆောံ၊ ကဏ္ဍပရေၚ်ပၞာန် ပံၚ်ကောံတုဲ ပၠန်ဂတးတဝ်စၞေဟ် လုပ်ဒၟံၚ်ပေါဲဗတိုက်ညးသ္ကအ်ရ။ သွက်ပရေၚ်ပၠန်ဂတးက္ညၚ်ဂှ် မုပရေၚ်ပလာပ်ပထုဲ သွက်ဂွံဒှ်ကၠုၚ် ဟၟဲပုဟ်ဂှ် ပိုဲညာတ်ကေတ်ရ။
ညးဍုၚ်ကွာန်တအ်လေဝ် တီဒၟံၚ်ဂွန်လီၜန်ပရေၚ်ဍုၚ်ကွာန် စကစတုဲတုဲ။ ကၠိုဟ်ဒၟံၚ်တုဲတုဲရ။ တၚ်စကစ ကၠောန်ရေၚ်တၠုၚ်ဂှ် ဟွံပတှ်ေပုဟ်။ ယဝ်ရဂွံအခေါၚ်သုၚ်စောဲဒဝ်အံၚ်သာန်သုကျဳ ဗၠးဗၠးၜးၜးဏောၚ်တှ်ေ အကာဲအရာဍာံဂှ် ညးတီကေတ်တုဲ ညးမံၚ်တန်တဴအာ မွဲကရောံကဵုညးဍုၚ်ကွာန်တအ် မွဲဖျုန်ဏောၚ်ဂှ် မိက်ဂွံဟီုဏာရ။ ပတှ်ေကေတ်လဝ် ဗီုဏံရ မိက်ဂွံဟီုဏာရ။