က္ဍိုပ်သ္ကိုပ်ညးဍုၚ်ကွာန် ဒဝ်အံၚ်သာန်သုကျဳဂှ် နူထံၚ်စာတ်ပြံၚ် စၠောံဏာ ပ္ဍဲစမြိုၚ်ကၟိန်ဍုၚ်ပိုၚ်တုဲရဂှ် ဓမံက်ထ္ၜးလဝ် ပ္ဍဲဌာန်ပရိုၚ် ပ္ဍဲဍုၚ် မ္ၚးဍုၚ် လ္ၚဵုဂှ် နွံရ။ အတိုၚ်ဌာန်ပရိုၚ်တအ် ဓမံက်ထ္ၜးလဝ်မ္ဂး ဂိတုဂျူလာၚ်တုဲကၠုၚ် နူစၟတ်တ္ၚဲ (၂၄)တေံ ပြံၚ်ပဆုဲလဝ်ရဂှ် ဟီုသ္ဂးလဝ်ရ။ ဆ္ဂးလ္တူပရေၚ်ဒဒှ်ဏံ လ္ပာ်ကံၚ်ဇြဳပၞာန် ဟွံဂွံဟီုပ္တိတ်လဝ် မမိက်ကဵုမွဲမွဲဏီတုဲ စွံပ္တန်လဝ် နဒဒှ်ကာပၞုက်ကဆံၚ်လ္တူရဂှ် ဂွံတီကေတ် နူတွဳဗွိုၚ်ဒပ်ပၞာန် ကေုာံ ညးစုက်လုက်တအ်ရ။
ဟိုတ်ဂှ်ရ လ္တူပရေၚ်ပဆုဲပြံၚ်လဝ် ဒဝ်အံၚ်သာန်သုကျဳ ပ္ဍဲအချုက်သ္ၚိ န NUG ဗီုလဵု ညာတ်ကေတ်ရော၊ ကံၚ်ဇြဳပၞာန် သုၚ်စောဲကၠုၚ် သွက်ပၞော်တိတ် ပရေၚ်ဍုၚ်ကွာန်မာန်ဟာ။ စပ်ကဵုအကာဲအရာဏံတုဲ ဆက်စၠောံသၟာန်လဝ်ကဵု ညးမၞုံအခေါၚ်ဟီုဂး ရုၚ်သမ္မ (NUG) ဥူကျဝ်ဇြဝ်ရ။
၁။ ကၠာအိုတ်ဏံ ပရေၚ်ပဆုဲပြံၚ်လဝ် ဒဝ်အံၚ်သာန်သုကျဳ ပ္ဍဲအချုက်သ္ၚိဂှ် လ္ပာ်ကံၚ်ဇြဳပၞာန် တၚ်ရန်တၟံဗီုလဵု နွံမာန်ရော၊ လ္တူဏံ နကဵု NUG ဗီုလဵုညာတ်ရော။
လၟုဟ်ဏံ ဌာန်ပရိုၚ်လ္ၚဵုပါလုပ်သီုဌာန်ပရိုၚ် AP ဂှ် နူထံၚ်စာတ် ပလံၚ်ဗစိုပ်လဝ် ဒဝ်အံၚ်သာန်သုကျဳ ပ္ဍဲသ္ၚိဒၟံၚ် မၞုံပ္ဍဲနေပျဳဒဝ်မွဲသ္ၚိရဂှ် ပရိုၚ်ပြးတိတ်ဒၟံၚ်ရ။ ပရိုၚ်တအ်ဏံဂှ် ညးလဵုလေဝ် ဂွံလဝ် တၚ်သ္ပဒ္တန်ဟၟဲဏီပုဟ်ဂှ်လေဝ် ဂွံဆဵုကေတ်ရ။ အဲမိက်ဂွံဟီုဂှ်တှ်ေ ဗီုလဵုမိက်ဂွံပြံၚ်ဒဝ်အံၚ်သာန်သုကျဳဂှ် ပြံၚ်ရ။ ဗီုလဵုဟီုဟီု သွက်ဒဝ်အံၚ်သာန်သုကျဳ ယဝ်ရပဆုဲပြံၚ် ပ္ဍဲဒၞာဲပြေပြံၚ်ဏောၚ်တှ်ေ နကဵုပိုဲ ဒးမိပ်စိုတ်ရ။
မုဒှ်ရောတှ်ေ ညးဂှ် ဂွံအာယုက် ၇၈ သၞာံယျ။ လကြဴအိုတ်ဏံ ရပ်ဒက်လဝ်ညး ဟွံလုပ်ကဵုသၞောဝ် ဍာံဍာံတှ်ေတှ်ေ ဒးဗလးပ္တိတ်ကဵုညး လွာဲဂှ်ဏောၚ်။ နူဖျေံလဝ်ထံၚ်ကဵုညး ညံၚ်ဂွံစိုပ်ဒဒိုက်နာနာ ပ္ဍဲထံၚ်တုဲ ယဝ်ရပလံၚ်ဗစိုပ်ဏာ ဒၞာဲညံၚ်ဂွံပြေပြံၚ်ညိညဏောၚ်တှ်ေ နကဵုပိုဲ ဒးမိပ်စိုတ်ရ။ ဆ္ဂးမိက်ဂွံဟီုမွဲဂှ် ဗီုလဵုပြံၚ်ပြံၚ်ရ၊ ပြံၚ်ဗီုဏံဂှ် စွံလဝ်ညး နဒဒှ်ကောန်ထံၚ်ပရေၚ်ဍုၚ်ကွာန်မွဲတၠရဏောၚ်ဂှ် ဒးဒုၚ်တဲရ။
စဵုကဵုအခိၚ်လၟုဟ် ဒှ်ဒၟံၚ်ကောန်ထံၚ်ပရေၚ်ဍုၚ်ကွာန် မွဲတၠရ။ ဟိုတ်ဂှ်ရ ပရအ်အဝဵုပၞာန်တအ်ရ။ ဒဝ်အံၚ်သာန်သုကျဳကီု သီုဥူဝေန်မျေတ် သီုကောန်ထံၚ်ပရေၚ်ဍုၚ်ကွာန် ဒးဒုၚ်ရပ်ဒက် လဝ်ဟွံဗဗွဲဓဝ်သီုဖအိုတ်ဂှ် ဒးဗလးပ္တိတ်ကဵု ပြဟ်ဟ် နကဵုတၚ်ယောၚ်ယာဟၟဲဏောၚ်။ ကံၚ်ဇြဳပၞာန်ဂှ် ဟိုတ်နူဍေံတအ်ဟွံလ္ဂူတပ်တး ဟိုတ်နူဍေံတအ် ဒှ်သၟာပ္ကီုပရာပ်ဂှ်ရ ကဵုဒဒိုက်ကဵုမၞိဟ်ဏောၚ်။ နကဵုဍေံတအ်ကၠောန်သ္ပ နကဵုစေတနာပေၚ်ၚ်ဟွံသေၚ်ပုဟ်။ အကြာဂကောံဇြဟတ်ပၠန်ဂတးပိုဲ ဆီပါ်ဒကးဟာ ။ အကြာဂကောံဇြဟတ်ပၠန်ဂတးကဵု ဂကောံကၟိန်ဍုၚ်နာနာ ဆီပါ်ဒကးဟာ။ ဇြဟတ်ပရေၚ်ပၠန်ဂတးတအ် အောန်ယအ်စှ်ေဟာဂးတုဲ ကၠောန်ကၠုၚ်ဗီုဏံရ။
အကြာဂကောံဇြဟတ်ပၠန်ဂတး ဇြဟတ်ဂွံအောန်ယအ်စှ်ေအာ ညိဟၟဲလးလးရ။ ဂကောံဇြဟတ်ပၠန်ဂတး ဟိုတ်နူဍတ်ပါ်တိတ်ကၠုၚ် နူညးဍုၚ်ကွာန် ဟိုတ်နူဒှ်ဒၟံၚ်မွဲဖျုန်ကဵု ညးဍုၚ်ကွာန်တအ်ဂှ်ရ သွက်ဇြဟတ်ဂွံအောန်ယအ်စှ်ေ ဟၟဲပုဟ်။ ကောန်ဍုၚ်အရၚ် ညးဍုၚ်ကွာန်တအ်လေဝ် ကမၠောန်တမြအ်တၠအဝဵုပၞာန်တအ်ဂှ် ဟိုတ်နူတီဒၟံၚ် ကမၠောန်လီၜန်ဂှ်ရ ဗီုလဵုပလေဝ် ဂွံဝိဝိၚ်ဟိုတ်မာဲအာ ဟၟဲပုဟ်ဂှ် မိက်ဂွံဟီုဏာရ။
၂။ သုၚ်စောဲဒဝ်အံၚ်သာန်သုကျဳတုဲ နဒဒှ်ပၞော်တိတ်ပရေၚ်ဍုၚ်ကွာန် ညံၚ်ဂွံဒှ်ပေါဲသဳကၠဳပရေၚ်ၜိုဟ်လလံ၊ စဵုကဵုပေါဲရုဲမာဲ ဂွံဒှ်ကၠုၚ် လ္ပာ်ကံၚ်ဇြဳပၞာန် ကၠောန်ကၠုၚ်မာန်ဟာ၊ သ္ၚဳဂၠိပ်ထ္ၜးကဵုညိ။
သုၚ်စောဲဒဝ်အံၚ်သာန်သုကျဳတုဲ သွက်ဂွံကၠောန်ပရေၚ်ၜိုဟ်လလံဒုၚ်ယၟုဂှ် ကာလဍေံတအ်ဂစာန်ပ္တိတ်ဇြဟတ်လေဝ် ဂစာန်ကၠုၚ်ဏောၚ်။ ဆ္ဂး အတိုၚ်အဲဟီုလဝ် နူကၠာဏံဂှ်ရ ညးဍုၚ်ကွာန်တအ် တီညာတ်ဒၟံၚ်တုဲတုဲ ဂကောံဇြဟတ်ရပ်လွဟ်ပၠန်ဂတးတအ် တီလဝ်တုဲတုဲဂှ်ရ အတိုၚ်ဍေံတအ်ဗ္ဂေတ်ဂှ် ဂွံဟွံသေၚ်ရပုဟ်။ အရာဏံဂှ် ဒှ်အတိုၚ်ပၟိက်ဆန္ဒညးဍုၚ်ကွာန်တအ်ဟေၚ်မှ ညးဍုၚ်ကွာန်တအ်ဒုၚ်တဲဏောၚ်ဂှ် သောၚ်ကၠးဒၟံၚ်ရ။
၃။ အလန်လကြဴအိုတ်ဏံ လ္တူကံၚ်ဇြဳပၞာန် ပ္တိတ်ဒၟံၚ်ဇြဟ် ညံၚ်ဂွံသုၚ်စောဲဒဝ်အံၚ်သာန်သုကျဳဂှ် မုမိက်ဂွံဟီုနွံရော။
ကံၚ်ဇြဳပၞာန်ဏံဂှ် ယဝ်ရဍေံတအ်မိက်ဂွံကဵုဒှ်ဍာံဍာံဏောၚ်တှ်ေ ကလေၚ်စဴဌာန်ရေၚ်ပၞာန်ဂွံရ။ အရာပ္ကီုပရာပ်ပြိုက်ဂစိုတ်ဒၟံၚ်ညးဍုၚ်ဂှ် ဒေါံထောံလွာဲလၟုဟ်တုဲ ညံၚ်ဂွံကလေၚ်စဴအာရေၚ်ပၞာန်ဇကုဂှ် နွံဒၟံၚ်ပၟိက်ရ၊ ဒးတိတ်နူပရေၚ်ဍုၚ်ကွာန်ဏောၚ်။ ကာလဂှ်မှ ကၟိန်ဍုၚ်ဗၟာက္လိဂွံပရေၚ်ၜိုဟ်လလံဏောၚ်။