ပ္ဍဲတွဵုရးကရေၚ်ဍာဲ ပါဲနူပေါဲဗတိုက် အကြာဒပ်ကံၚ်ဇြဳပၞာန်ကဵု ဂကောံဇြဟတ်ပၠန်ဂတးတအ်ဂှ် ဟိုတ်နူဒပ်ကံၚ်ဇြဳပၞာန် ထ္ပက်ကရောၚ်ပၞာန်၊ ပန်ဖျေံလွဟ်ဇၞော်တုဲ လၟိဟ်မၞိဟ် (၃)ဂအုံ (၂) ဂအုံပြၚ် ဒးဂြိပ်ဒဴပါဲဓလေတ်ဒၟံၚ်ရ။ ပ္ဍဲကဵုဂှ် ညးဍုၚ်ကွာန်ပါဲဘဲပၞာန်တအ် ဟိုတ်နူပေါဲဗတိုက်သ္ကာတ်မြဟ်တိုန်ကၠုၚ်ကီု၊ ဟိုတ်နူဗွိုၚ်ပၞာန် သၠဲတိုန်ကၠုၚ်ကီုဂှ်ရ ဒးထပ်ပါဲဒၟံၚ်ဘဲပၞာန် နူမွဲဒၞာဲကဵုမွဲဒၞာဲလေဝ် နွံဒၟံၚ်ရ။
ဟိုတ်ဂှ်ရ ဗက်ကဵုဂကောံအိန်ထံၚ်တုဲ စပ်ကဵုအကာဲအရာဂြိပ်ဒဴကၠုၚ် နူဍုၚ်ဗဝ်လခေဝ်ကီု၊ အခက်ခုဲ ဒးဆေၚ်လဝ်မုက် အကြာဂြိုပ်ဂၞိၚ်ကီုတုဲ ဆက်စၠောံသၟာန်လဝ်ကဵု ညးပါဲဘဲပၞာန် မယေန်ချေန်နဳ သီုဒှ်မိယာဲကောန်ၚာ်မွဲတၠရ။
၁။ ကၠာအိုတ်ဏံ နူဍုၚ်ဗဝ်လခေဝ်ဂှ် စပ်ကဵုအကာဲအရာဒးပါဲလဝ်ဘဲပၞာန်တုဲ ဟီုထ္ၜးကဵုညိ။
ဒးပါဲလဝ်ဘဲပၞာန် ဍုၚ်ဗဝ်လခေဝ် ခရိုၚ်ယွာတေတ်ဂှ်ရ အခက်ခုဲဂှ် ကၠာဟွံဂွံဂြာတ်ထောံဖျေံ ကဵုက္ၜၚ်ကျာပၞာန်ဏီဂှ်တှ်ေ ပိုဲဒးအာတိက်ဒၟံၚ် ပ္ဍဲဗ္ၚသြောံမှောဝ်ဂှ် က္ၜၚ်ကျာပၞာန် ကၠုၚ်ဂြာတ်ထောံဖျေံဂှ် လ္ပာ်လဵု ပိုဲဂွံထပ်ဂြိပ်ရော ဟွံတီရ။ ခိုဟ်မံၚ်ရ အာမံၚ်လဝ် သၟဝ်ဘာလကျာ် ပ္ဍဲကွာန်တၟိရ။ တ္ၚဲဂှ် ကၠုၚ်ဂြာတ်ထောံဖျေံလဝ် ပ္ဍဲဘာတန်သၠုၚ်၊ ဘာတန်လ္ဒောဝ်ရ။ အခိၚ်ဂှ်တှ်ေ အာမံၚ် ပ္ဍဲဘာလကျာ် ဟွံဂွံရပုဟ်။ တ္ၚဲလကြဴဂှ်တှ်ေ ကရောၚ်ပၞာန် ထ္ပက်ကၠုၚ်ကၠုၚ်ယျတှ်ေ ပ္ဍဲကွာန်ဂှ် ကရောၚ်ပၞာန်ထ္ပက်လုပ်ကၠုၚ် ပိကရောၚ်ပၞာန်ရ။ စိုပ်ဒၟံၚ် ပ္ဍဲကွာန်ဂှ်ယျ။ ဂွံကလေၚ်ယိုက်ကေတ် သ္ၚုခၟာဲပ္ၚာန်သှ်ေၜက်ဒၟံၚ်ဂှ် ဟွံဂွံရ။ ဂကောံအိန်ထံၚ်အောန်အိုတ် ၜိုတ် (၃၀)အိန်ထံၚ်နွံဏောၚ်။ တက်တာဲ ပ္ဍဲသၠာတ်သြောံမှောဝ်တုဲ ကလေၚ်တိက်ရ။ အရိုဟ်ဟ်အရိုဟ်ဒဵုပိုဲစိုပ်အာဂှ် ဒရုမ်ကၠုၚ်ဒၟံၚ် ကၠိုဟ်ဗ္တံရ။ ဂေတ်ဂါဲဒၟံၚ်ရ။ က္ၜၚ်ကျာထံက်ကၚ် ဗက်ကၠုၚ်ဒၟံၚ်။ ပဝ်ဒၟံၚ်လ္တူပိုဲရ။ ဂွံကၠောံအာသြၚ်လ္ပာ်တေံဂှ် ဂၠုၚ်စက်ဟွံရုမ်ပုဟ် နွံဒၟံၚ် မသုန်မဓဝ်ရ။ တုဲပၠန် ပိုဲလေဝ် ဂွိၚ်ဖေက်အိန်ထံၚ်ဇကုပြးတုဲ ပ္ဍိုက်ဏာကောန်ၚာ်တအ်ကၠာဏောၚ်ဟီုတုဲ ပိုဲဂွိၚ်ဖေက် ဂကောံအိန်ထံၚ်ပိုဲ ပြးအိုတ်တုဲ အလန်လကြဴမှ ဂွံဗက်အာရ။ တုဲဂှ် အာတိက်ထောံလ္တူဒဵု မွဲဗ္တံရ။
၂။ ဒးပါဲပၞာန် အကြာဂြိုပ်ဒဵုဏောၚ်တှ်ေ ဒးဆေၚ်ဒၟံၚ်မုက်ကဵု အခက်ခုဲဗီုပြၚ်လဵုရော။ တုဲပၠန် ဂွံစိုပ်ဒၞာဲဂီုကၠီုဂှ် ဒးဆဵုဂဗလဝ် ဒဒိုက်ဗီုလဵုနွံရော။
က္ၜၚ်ကျာပၞာန် ဂေတ်ဒၟံၚ်ကၠိုဟ်တ္ၚဲရ။ ပိုဲဂှ်မုကၟဳဗ္ဒၚ်ဟၟဲပုဟ်။ ကဵုကၞဴမွဲၝောံရ ဒက်တုဲ ဒးတိက်ရ။ ယာတ်ၜိုတ်နွံကဵုနွံဂှ် ပါတ်ဂွဳကောန်ၚာ်တုဲ ဒးတိက်ရ။ ဒးဆဵုဂှ်တှ်ေ သီုဒးဒုၚ်ကိတ်ကဵုအယဴဏီ။ သ္ကဝ်ဟၟဲဒးတိက်လဝ်ဂှ်ရ ဒးဒုၚ်ကိတ်လဝ်ကဵုအယဴရ။ ဂျိလေဝ်တိုန်ဒၟံၚ်။ အာသၟာန်ညးတၞဟ်ဂှ် ကဵုလသိုန်ဗ္တာၚ် ဂွံမံၚ်ဂးတုဲ ကိတ်ကေတ်လသိုန်ဗ္တာၚ်မွဲနှေဝ်တုဲ လံက်စုတ်ရ။ ပွိုၚ် ၂၄ နာဍဳ ယိုက်ကောန်ၚာ်ဟွံဂွံ တုဲဂှ် ပွိုၚ် ၂၄ နာဍဳဂှ် တဲအဲ ဂွံကလေၚ်ချဳဂွံရ။
၃။ ပ္ဍဲအကာဲအရာဒးပါဲဒၟံၚ်ပၞာန် နူမွဲဒၞာဲကဵုမွဲဒၞာဲဂှ် ဒးဆဵုဂဗကဵု အခက်အခုဲအဓိက ဗီုလဵုနွံရော။ ညးပါဲဘဲပၞာန်တၞဟ်ရော ဒးဆဵုဂဗကဵု အန္တရာဗီုပြၚ်လဵုနွံရော။
အခိၚ်နူဂယးပြဟ်တှ်ေ ဟွံဂီုကၠီုပုဟ်။ ဒးအာလ္ပာ်တေံဏောၚ်ဟီုတှ်ေ မၞိဟ်လေဝ်ဂၠိုၚ် မၞိဟ်ဇၞော်ဇၞော်လေဝ်ပါဒၟံၚ်။ ညးဟွံထတ်စောံလေဝ် ပါဂၠိုၚ်ဒၟံၚ်။ မိနော်ပါနော်တအ်ဂှ်တှ်ေ ဗာကအ်တုဲ ဒးတိုန်ရ။ လ္ၚဵုဂှ်တှ်ေ ဂုဏ်နူဂြာတ်ထောံဖျေံဗုမ် ပ္ဍဲကွာန်တၟိတုဲ ကောန်တၟံဒကးလဝ် နွံပိတၠရ။ မွဲတၠဂှ် ကောန်တၟံဒကးတုဲ ဘိၚ်ဘၚ်အာရ။ ဂၠံၚ်လေဝ်ကွာ်ဟွံမာန်။ ဒးပလံၚ်ရုၚ်ဂဥုဲလွိုၚ်ကဝ်ဏောၚ်ဟီုတုဲ ကောန်ပၞာန်တအ် ကၠတ်ပန်တုဲ ဒးချိုတ်အာရ။ တုဲပၠန် ဂုဏ်နူဒးဒုၚ်ကၠတ်ပန်ကဵု ကောန်ပၞာန်တုဲ အမူမၚ်ဒၟံၚ်ဂၠဴမွဲတၠ ဒးချိုတ်လဝ်ရ။
ပိုဲလေဝ် ဒၟာနူဂြိပ်ကၠုၚ်ပြဟ်ဏောၚ်။ တ္ၚဲဂှ်ယဝ်ရဟွံဂြိပ်တှ်ေ ပိုဲလေဝ် လမျီုဒးအိုတ် ဒးချိုတ်ရ။ တိုန်မွဲဒဵုတုဲ မွဲဒဵု၊ မွဲဒဵုတှ်ေ ဒးတိက်မွဲဗ္တံရ။ ကၠောံကဵုဂၠုၚ်စက်၊ ထပ်တိုန်ဒဵုမွဲမပၠန် ဒးတိုန်တိက်ရ။ ကၟဳဗ္ဒၚ်လေဝ် ညးမွဲဟွံပါညးသ္ကအ်ပုဟ်။ သ္ၚုလေဝ်ဟွံပါ။ ဂၠံၚ်ကွဳစက်လေဝ် ဟၟဲပုဟ်။ ကွဳလိုန်ဓာတ်လေဝ် ဟၟဲပုဟ်။ ဂွံကၠောံသြၚ်ဂှ် အာကဵုကွဳလိုန်ဓာတ်ဟွံဂွံ။ ဖျေံကပေါတ်တုဲ လမျီုဂှ် ပၟိက်ဇၞော်မံၚ်ဟီုတုဲ ဒးတိုန်လ္တူဒဵုရ။ ပိုဲဂှ် ဒုၚ်ဒဝ်ဟွံမာန်ပုဟ်။ ကလေၚ်စဴလွိုၚ်ကဝ်ဂွံဟာ လိၚ်ကွဳစက်က္လေၚ်စဴဂွံဒၟံၚ်ဏောၚ်ဟီုတှ်ေ လ္ၚဵုဂှ်သြန်နွံဒၟံၚ် ညးတၞဟ် တိုန်အာညးသ္ကအ်ယျလေဝ်။ ပိုဲဂှ်သြန်ဟၟဲ လ္ၚဵုဂှ်သြန်ညိလေဝ်ဟၟဲဟဂှ်ရ လ္တူဍုၚ်ဂှ် မသကလောကောဒေံလေဝ်ဟၟဲ လှုဲလှာ်လေဝ်ဟၟဲဂှ်ရ။ လ္ၚဵုဂှ်မိက်ဂွံတိုန်ဒၟံၚ်ရ အခေါၚ်တိုန်ဟၟဲ။ မိက်ဂွံချိုတ်တှ်ေ ချိုတ်ဒၟံၚ်ဒၞာဲဏံရ။ ပိုဲဂှ်တိုန်အာလ္တူဒဵုတုဲ တက်တာဲတိက်ရ။
အိန်ထံၚ်တၞဟ်ၜိုတ် (၂၅) တၠ က္လေၚ်စဴရ။ ဍာ်လေဝ်ဟၟဲတှ်ေ ဍာ်ဂှ်ဍုန်တုဲ သုၚ်လေဝ် အဖာတ်နွံဒၟံၚ်ဏီ။ ကောန်ၚာ်တအ်တှ်ေ ဂၞဴအာ ခအအ်ညးသ္ကအ်။ ကောန်ၚာ်တိုန်ဒၟံၚ်ညးသ္ကအ်ရ။ မုဂဥုဲလေဝ်ဟွံပါပုဟ်။ ကၠေၚ်သတ်ဗြဴကဵု ဂဥုဲပေါတ်ၚေက် ပါဒၟံၚ်ပ္ဍဲအဲဂှ် လံက်စုတ်တုဲ သက်သာအာရ။ အခိၚ်ဂှ်မှ ကောန်ၚာ် ဂွံတိက်ရ။ ဂွံလဝ်ၜိုတ် (၁) သၞာံကဵုၜါဂိတုညိကွေံ ကောန်ၚာ်ဂှ်။
၄။ မိကောန်ၚာ်မွဲတၠလေဝ်ဒှ်ဟီုတှ်ေ ပ္ဍဲကောန်ၚာ်ပါဲဘဲပၞာန်တအ်ဂှ် ဒးဆဵုဂဗကဵုပြဒ္ဒညာဗွဲမဂၠိုၚ် ဗီုလဵုနွံရော။
ကောန်ၚာ်စဂွံၜံၚ်သၠး ပါဒၟံၚ်ၜါတၠရ။ မိကောန်ၚာ်ဂှ်လေဝ် ကွာ်ဂၠံၚ်ဂွံဒၟံၚ်ရ။ ပိုဲဂှ် ကောန်ၚာ်ဇၞော်ဒၟံၚ်ညိယျတှ်ေ သက်သာဒၟံၚ်ညိဏီရ။ လ္ၚဵုဂှ်အာပယျဵုသေံဏောၚ်။ အာဟွံဂွံပုဟ်ကလေၚ်ဟီုပၠန်။ ဂကောံအာကၠာဂှ် စိုပ်အာပယျဵုသေံတုဲ ဒှ်ဒၟံၚ်ဒဒိုက်ပေၚ်တုဲ ညးတအ် ဒးကလေၚ်ဂတးစဴကၠုၚ်ရ။ အကြာဂၠံၚ်ဂှ် ဒးဒုၚ်ရပ်လဝ်လေဝ်နွံ။ ဒးဒုၚ်ဂစိုတ်လေဝ်နွံရ။