ပံက်လဝ်မုက်ပၞာန် ကြပ်ဒှ်သီုအလုံမွဲကၟိန်ဍုၚ်တုဲ ကံၚ်ဇြဳပၞာန် ဒးဆေၚ်ဒၟံၚ်ဂှ် စဳဇန်ဒၟံၚ် သွက်ဂွံကၠောန်ဗဒှ် အခန်ကၞာလိက်ကသုက်ဒေါံပန်ပှော် အလုံကၟိန်ဍုၚ် (NCA) ပေၚ် (၈) သၞာံဇၞော်ကဵုဇြဟတ် ပ္ဍဲဂိတုအံက်တဝ်ဗာ စၟတ်တ္ၚဲ (၁၅) ကၠုၚ်ဂတဏံရ။ သွက်ဂွံကၠောန်ဗဒှ်အခန်ကၞာမာန်ဂှ် ပရေၚ်သဳကၠဳပ္ညဳပ္ညပ် အကြာဂကောံသဳကၠဳပရေၚ်ၜိုဟ်လလံကံၚ်ဇြဳပၞာန် (SNPNC) ကဵု ဂကောံရပ်လွဟ်ကောန်ဍုၚ်အရၚ်လ္ၚဵုနွံဒၟံၚ်တုဲ အလဵုက္ဍိုပ်သ္ကိုပ်ပၞာန်လေဝ် ကော်ဘိက်ဒၟံၚ် က္ဍိုပ်သ္ကိုပ် EAO လ္ၚဵုတအ် သွက်ဂွံတိုန်စိုပ်ရ။
ဟိုတ်နူပရေၚ်သီအဝဵုတုဲ အခိၚ်ပၟတ်ပၞာန်ပ္ဍဲဍုၚ် ဂဵုသၠာန်ဒၟံၚ်ဏံ စပ်ကဵုကၠောန်ဗဒှ်အခန်ကၞာ NCA ပေၚ်သၞာံဂှ်ကီု၊ ပရေၚ်ကြက်ရှ်သာ NCA ကၠေံဗ္ဒန်အာကီု သီုကဵုလ္တူဂကောံပၞာန် ကၠောန်ဗဒှ်အခန်ကၞာဂှ် ဗီုလဵုညာတ်ကေတ်ရော။ စပ်ကဵုအကာဲအရာဂမၠိုၚ်ဏံတုဲ ဆက်စၠောံသၟာန်လဝ်ကဵု ညးမၞုံအခေါၚ်ဟီုဂး ဂကောံဒေါံပန်ပှော် သ္ကိုပ်ဗိုလ်ဇၞော် သဝ်ကျဝ်ညောအ်ရ။
၁။ ကၠာအိုတ်ဏံ ဟိုတ်နူပရေၚ်သီအဝဵုတုဲ အခိၚ်ပၟတ်ပၞာန်ပ္ဍဲဍုၚ် ဂဵုသၠာန်ဒၟံၚ်ဏံ ပ္ဍဲလ္တူကၠောန်ဗဒှ် အခန်ကၞာ NCA ပေၚ်သၞာံဂှ် ဗီုလဵုညာတ်ကေတ်ရော။
အရာဏံလေဝ် ပြဟ်ဟ်ဏံ ပရေၚ်ဓမံက်ရုပ်ရဴ NCA ဂှ် ပိုဲကၠောန်ဟွံမာန်ဏီပုဟ်။ ဣဏံဂှ် အ္စာတအ်လေဝ် အတိုၚ်တီဒၟံၚ်ရ။ ကြဴနူဒပ်ပၞာန် သီအဝဵုတုဲ သ္ကုတ်လကြဴဴဏံတှ်ေ ပ္ဍဲကဵုဂၠံၚ်တရဴဴ NCA ပိုဲ ပရေၚ်သဳကၠဳပရေၚ်ဍုၚ်ကွာန်လေဝ် ဒေါံဒေၚ်အာရ။ ဂကောံသီုၜါလ္ပာ်တအ်လေဝ် ဟွံစုၚ် အခိၚ်ဒှ်ဒၟံၚ်ဂှ် အတိုၚ်တၚ်တုပ်စိုပ် NCA ဂှ်တှ်ေ ကၠောန် လဝ်ကမၠောန်ဟွံမာန်ရ။ ဆ္ဂးအရာဟီုလဝ် နူကၠာဏံဂှ်တှ်ေ လ္တူနူဟီုဒၟံၚ် NCA ပေၚ်သၞာံဂှ်လေဝ်။ ထ္ပက်လဝ်စၟတ်တဲ NCA ပေၚ် ၈ သၞာံဏောၚ် ပိုဲကၠိုဟ်ကေတ်လဝ် ဗီုဂှ်ရ။ ဒၟာနူဂှ်ရ က္ဍိုပ်သ္ကိုပ်ထ္ပက်လဝ်စၟတ်တဲ NCA တအ်ကဵု အခန်ကၞာပေၚ်သၞာံဂှ် ကလေၚ်ဘိက်ကော်တုဲ ဒှ်အခန်ကၞာတိုန်စိုပ်မွဲဏောၚ် ပိုဲကၠိုဟ်ကေတ်လဝ် ဗီုဂှ်ရ။
၂။ မွဲကရောံကဵုပြဿနာပရေၚ်ဍုၚ်ကွာန် ဒှ်ဒၟံၚ်ပ္ဍဲဍုၚ်ဂှ် ကြက်ရှ်သာ လိက်ကသုက် NCA ၜိုတ်ဂလိုၚ်လဵု ကၠေံဗ္ဒန်အာယျရော။ လ္တူဏံ သ္ၚဳဂၠိပ်ထ္ၜးကဵုညိ။
ဆၜိုတ်ကၠောန်အခန်ကၞာ NCA ဓဝ်ဂှ် ဖိုလ်ဍေံနွံဏောၚ် ပိုဲဂှ်တှ်ေ ဗီုဏံဟွံသေၚ်ပုဟ်။ NCA ဟီုဂှ်လေဝ် အကြာအလဵုအသဳကၟိန်ဍုၚ်ပံၚ်ကောံ ကၟိန်ဍုၚ်ဗၟာကဵု ဂကောံရပ်လွဟ်ကောန်ဍုၚ်အရၚ်တအ် ဒှ်လိက်ကသုက် ထ္ပက်လဝ်စၟတ်တဲရ။ ယဝ်ရဟီုအာ အလဵုအသဳကၟိန်ဍုၚ်ပံၚ်ကောံ ကၟိန်ဍုၚ်ဗၟာဗက်ဂှ်လေဝ် အလဵုအသဳ၊ ကၠတ်ထဝ်၊ ဒပ်ပၞာန်ဟီုဂှ် နူကၠာတေံရ ပရေၚ်ကောံကလောံ တအ်ဂှ်လေဝ်။ အခိၚ်ဏံ ညံၚ်ကဵုဍိုက်ပေၚ် နွံဒၟံၚ်ကီုရ။ ဂကောံရပ်လွဟ်ကောန်ဍုၚ်အရၚ်ပိုဲ ထ္ပက်လဝ်စၟတ်တဲ သီု (၁၀) ဂကောံဂှ်လေဝ် ပ္ဍဲအကာဲအရာဏံ လညာတ်လ္တူ NCA နွံဒၟံၚ် ဗီုညးကဵုညးရ။ ဆၜိုတ်ကၠောန်အခန်ကၞာဂှ်ဓဝ်ကဵု NCA ဟီုဂှ် လ္တူနူကဵု ကၠောန်အခန်ကၞာ၊ ဟွံကၠောန်အခန်ကၞာဂှ် ပရေၚ်ဓမံက်ရုပ်ရဴ ဂကောံသီုၜါလ္ပာ် ဟွံစုၚ်မွဲသာ် ကၠောန်ကမၠောန်ဂွံ လိက်ကသုက်တုပ်စိုတ် နွံဒၟံၚ်ဂှ်ရ လ္တူဏံဂှ် ဒှ်ဒၟံၚ်တၞဟ်ခြာဏောၚ် ပိုဲကၠိုဟ်လဝ်ဗီုဂှ်ရ။
၃။ လိက်ကသုက် NCA ဂှ် ဟိုတ်နူသီကေတ်အဝဵုတုဲ လိက်ကသုက်လီုလာ်အာယျ ပရေၚ်ဟီုဂးဒၟံၚ်လေဝ် နွံရ။ လ္တူဏံ ဗီုလဵုမိက်ဂွံဟီုရော။
က္ဍိုပ်သ္ကိုပ်ပိုဲထ္ပက်လဝ်စၟတ်တဲ NCA တအ်ဂှ်လေဝ် အခိၚ်လၟုဟ်ဏံ ဟၟဲစုၚ်ၚ်လေၚ်ၚ်ရပုဟ်။ နကဵုဂကောံဗွဝ် နူကၠာဏံဂှ် ယဝ်ဒးဟီုတှ်ေလေဝ် ဂကောံလ္ၚဵုတအ်ဂှ်တှ်ေ လညာတ်နွံ မွဲဗီုလေဝ် နွံဏောၚ်။ လ္ပာ်တေံ လ္ပာ်အလဵုအသဳဟီုဂှ်လေဝ် အလဵုအသဳ၊ ကၠတ်ထဝ်၊ ဒပ်ပၞာန်ဟီုဂှ်လေဝ် ဟၟဲစုၚ်ၚ်လေၚ်ၚ်ပုဟ်။ ဗီုလဵုဒှ်ဒှ်ရ၊ ဗီုကဵုအဲဟီုလဝ် နူကၠာဏံဂှ်ရ ဂကောံပိုဲမွဲမွဲဂကောံလေဝ် နကဵုဂကောံ PC ပိုဲဟီုတှ်ေ ထ္ပက်လဝ်စၟတ်တဲ ပိတၠတှ်ေ ၜါတၠဂှ် ဟၟဲရပုဟ်။ ဣဏံဂှ် နွံဒၟံၚ် မွဲတၠဓဝ်ရ။ ၜိုတ်အဲကၠိုဟ်ကေတ်လဝ်တှ်ေ က္ဍိုပ်သ္ကိုပ်ထ္ပက်လဝ်စၟတ်တဲတအ်၊ က္ဍိုပ်သ္ကိုပ်သက်သဳ ဃောထ္ပက်လဝ်စၟတ်တဲတအ် ကလေၚ်ဆဵုဂဗတုဲတှ်ေ ၜိုတ်အခန်ကၞာဗလး တိုန်စိုပ်မွဲ ဓဝ်ဟေၚ်ရ။ ဣဏံဂှ် ဖိုလ်ဍေံဂှ် လညာတ်ခိုဟ်ပရေံတအ်ဂှ် နွံဗီုပြၚ်နာနာသာ်ရ။
၄။ အလန်လကြဴဴအိုတ်ဏံ မုမိက်ဂွံထပ်ဟီုဗပေၚ် နွံဒၟံၚ်ဏီရော။
ထ္ပက်လဝ်စၟတ်တဲ NCA ပေၚ်အာ ၈ သၞာံယျ။ ရန်တၟံကဵု မိက်ဂွံကဵုက္လေၚ်ဂွံသတိ ထ္ပက်လဝ်စၟတ်တဲ ပေၚ် ၈ သၞာံဟာ မုဟာဂှ် ပိုဲဟွံတီပုဟ်လေဝ်။ အဓိကဂှ် က္ဍိုပ်သ္ကိုပ်ဇၞော် ထ္ပက်လဝ်စၟတ်တဲတအ် နဒဒှ်သသက်သဳဂှ် ကလေၚ်ကော်ဘိက် က္ဍိုပ်သ္ကိုပ် ပါလုပ်ထ္ပက်လဝ်စၟတ်တဲတအ်တုဲ ပေါဲစၟတ်သမ္တီဟာ မုဟာ မွဲမွဲဂကူရ။ ဣဏံဂှ်လေဝ် နကဵုပိုဲ မုလေဝ် သွက်ဂွံဒးဟီုကဵု တၚ်သမ္တီ တၟေၚ်ၚ်တၟဟ်ဟ်ဂှ် ဟၟဲပုဟ်။