က္ဍိုပ်သ္ကိုပ်ပၞာန်သီအဝဵုဂှ် သွက်ဂကောံ EAO တအ် ဂွံတိုန်စိုပ် အခန်ကၞာပေၚ်သၞာံ လိက်ကသုက်ဒေါံပန်ပှော်အလုံံကၟိန်ဍုၚ် (NCA) ပေၚ် (၈) သၞာံ ကၠုၚ်စိုပ် ပ္ဍဲဂိတုအံက်တဝ်ဗာ စၟတ်တ္ၚဲ (၁၅) ဏံဂှ် ကော်ဘိက်ကၠုၚ်ရ။ သွက်ဂွံတိုန်စိုပ်အခန်ကၞာ NCA ပေၚ်သၞာံဂှ် သီုကော်ဘိက်လဝ် ကၟိန်ဍုၚ်သ္အာၚ်တအ်တုဲ ညံၚ်ဂကောံထ္ပက်လဝ်စၟတ်တဲ NCA သီုဖအိုတ် ဂွံတိုန်စိုပ်မာန် က္ဍိုပ်သ္ကိုပ်ပၞာန် ဟီုလဝ်ရ။
ဟိုတ်ဂှ်ရ လစွံစိုတ် လ္တူအခန်ကၞာ NCA ပေၚ်သၞာံ ကံၚ်ဇြဳပၞာန်ကၠောန်ဗဒှ်ဂှ်ကီု၊ သွက်ဂွံတိုန်စိုပ် နွံ ဟၟဲကီု၊ ပ္ဍဲအရာဒက်ပ္တန်ကၟိန်ဍုၚ်ပံၚ်ကောံ ဖေတ်ဒရေဝ်ဒဳမဝ်ကရေဇြဳအနာဂတ်ဂှ်လေဝ် လိက်ကသုက် NCA ဏံ ပၟိက်နွံဒၟံၚ်ဟာ။ စပ်ကဵုအကာဲအရာဂမၠိုၚ်ဏံတုဲ ဆက်စၠောံသၟာန်လဝ်ကဵု သ္ဂံၚ်သလိုၚ်ယျဝ်အောၚ် ညးလုပ်ဂကောံကဝ်မတဳက္ဍိုက်က္ဍိုပ်ဗဟဵု ဒပ်ပၞာန်ဒဳမဝ်ကရေတ်တေတ်ကွးဘာကၟိန်ဍုၚ်ဗၟာ (ABSDF) ရ။
၁။ ကၠာအိုတ်ဏံ နကဵု ABSDF ထ္ပက်လဝ်စၟတ်တဲ ပ္ဍဲ NCA ဂှ် ပ္ဍဲတ္ၚဲပေၚ်သၞာံဏံ လစွံစိုတ် ဗီုလဵုနွံရော။ ယဝ်ရကံၚ်ဇြဳပၞာန် ကော်ဘိက်ကၠုၚ်တှ်ေ တိုန်စိုပ်အာဟာ။
NCA ပိုဲဟီုဂှ် ဒှ်ထ္ပက်လဝ်စၟတ်တဲလိက်ကသုက်ကဵု အလဵုအသဳ လက်ထက်အလဵုအသဳ ဥူတုၚ်ဇြုၚ် သၞာံ ၂၀၁၅ တေံရ။ ပိုဲထ္ပက်လဝ်စၟတ် အကြာဒပ်ပၞာန်ကဵု ပိုဲဟွံသေၚ်ပုဟ်။ ကၠောန်လဝ်ပရေၚ်ဒေါံပန်ပှော်ကဵု ဂကောံဏောၚ်။ ကၠောန်လဝ်ကဵု ဒပ်ပၞာန်ဟွံသေၚ်ပုဟ်။ သီကေတ်အဝဵု ၂၀၂၁ ဂှ် ဒပ်ပၞာန်ဏောၚ် သီကေတ်လဝ်အဝဵု၊ ပ္ဍဲပရေၚ်သီအဝဵုဂှ်လေဝ် တၚ်ထ္ၜးဟိုတ်ဍေံတအ်ဂှ် တၚ်ထ္ၜးဟိုတ်ခိုၚ်ၚ် ဟၟဲပုဟ် ပိုဲကၠိုဟ်ကေတ်လဝ်ရ။ ဟိုတ်ဂှ် ပိုဲဂှ် ကြဴနူသီအဝဵု ၂၀၂၁ တုဲ သ္ကုတ်လကြဴဏံ ပ္ဍဲကဵုကိစ္စသ္ပစၟတ်သမ္တီ ဒပ်ပၞာန်ဂှ် ညံၚ်ပိုဲဟွံဂွံပါလုပ်ချဳဒရာၚ် ဖျေံလဝ်သ္ဂုတ်သွာတ်ရ။
အတိုၚ်မူဏံရ ပိုဲဒ္ဂေတ်ဗက်အာဏောၚ်။ ဂိတုအံက်တဝ်ဗာ ၁၅ တ္ၚဲ NCA ပေၚ်သၞာံဂှ်လေဝ် သွက်ပိုဲတှ်ေ စၟတ်သမ္တီကေတ် တ္ၚဲအဓိပ္ပါယ်ဟၟဲ မွဲတ္ၚဲရ။ မုဒှ်ရောတှ်ေ ဖံက်ပ္ကဝ်လဝ်လိက်ကသုက် NCA ဂှ် ဒှ်ကောန်ဒပ်ပၞာန်ရ။ သၞောဝ်သ္ဇိုၚ်ဒက်ပ္တန် ၂၀၀၈ မိက်ဂွံဟီုဟီု၊ စပ်ကဵု NCA တုဲ ဍေံတအ်ဖံက်ပ္ကဝ်ဒၟံၚ်ရ။ ပေါဲဗတိုက်တအ် ဒှ်ဒၟံၚ်။ ဒၟာနူဍေံတအ်ကၠုၚ် ဒှ်ဒၟံၚ်ပေါဲဗတိုက်ရ။ ဒးဟီုဍန်န်တှ်ေ ဍေံတအ်ကော်ဘိက်လေဝ် သွက်ဂွံတိုန် ဟၟဲပုဟ် မိက်ဂွံဟီုရ။
၂။ နကဵု ABSDF ကြဴဴနူဒပ်ပၞာန်သီအဝဵုတုဲ လကြဴဏံ ဒေါံဇူလဝ် ပရေၚ်သဳကၠဳကဵုကံၚ်ဇြဳပၞာန်တုဲ ပါလုပ်ကၠုၚ် ပ္ဍဲပၠန်ဂတးက္ညၚ်ဂှ် ပါဲတးထောံလဝ် NCA ပေၚ်ၚ်ရ၊ မူ ကတိကဝတ် ပါဒၟံၚ်ပ္ဍဲ NCA တအ်ဂှ် သွက်ဂွံဒးဒ္ဂေတ်ဗက် ဟၟဲရပုဟ် ဒှ်ဗီုပြၚ်ဂှ်ဟာ။ နကဵု ABSDF ပ္ဍဲလ္တူ NCA လစွံစိုတ် ဗီုပြၚ်လဵုစွံလဝ်ရော။
NCA ဟီုဂှ် ဒှ်လိက်ကသုက်မွဲရ၊ လိက်ကသုက်ဏံ ဒှ်အာ ဝၚ်မွဲပ္ၚံက်ရ။ လၟုဟ် ကြဴနူသီကေတ်အဝဵု ၂၀၂၁ တုဲ သ္ကုတ်လကြဴဏံ သွက်ဂွံဓမံက်ရုပ်ရဴ NCA ဟီုဂှ် ဝါတ်ဂါတ်အာ ဇၞော်ကဵုဇြဟတ်ယျ။ အာဂတနူဏံ NCA ဟီုဂှ် ဆက်ဒှ်ကၠုၚ်ပၠန်ဟာ၊ ဟွံဒှ်ကၠုၚ်ရပုဟ်ဟာဂှ်။ ပိုဲဂွံဟီု ဝါတ်ဂါတ်အာယျ။ အခန်ကဏ္ဍ NCA ဂှ် ဒေါံအာ မွဲအခန်ယျ အဲညာတ်ကေတ်ရ။ ဂါံကွာ်အာဒၟံၚ် ဗလးပရေၚ်ဍုၚ်ကွာန်တၟိယျဂှ် ညာတ်ကေတ်ရ။ ယဝ်ရဒပ်ပၞာန်ဟွံသီကေတ်အဝဵုပုဟ်တှ်ေ ကိစ္စ NCA ဂှ် ကာလလမျီုလုပ်တှ်ေ လုပ်မာန်ဏောၚ်။ ဆ္ဂးကြဴနူဍေံတအ် သီကေတ်အဝဵုတုဲ လကြဴဏံဂှ် ယဝ်ရတိုန်စိုပ် NCA ဍေံဘိက်လဝ်ဏောၚ်တှ်ေ ဣဏံဂှ် ဒှ်ပရေၚ်သ္ပစၟတ်သမ္တီ ပရေၚ်ဍုၚ်ကွာန်ဍေံတအ်ရ။ ဒှ်ညံၚ်ဒုၚ်ဒၟံၚ်တဲကဵု ဍေံတအ်သီကေတ်လဝ်အဝဵုရ။ NCA ဂှ်တှ်ေ ဒှ်လိက်သုက်မွဲ၊ ဒှ်ဝၚ်မွဲပ္ၚံက်ရဂှ် မိက်ဂွံဟီုရ။
၃။ သွက်ဂကောံဇြဟတ်ပၠန်ဂတးတအ်၊ EAO တအ် ပ္တဝ်ဒၟံၚ်က္ဍိုပ်ကဵု ပရေၚ်ဒက်ပ္တန်ကၟိန်ဍုၚ်ပံၚ်ကောံ ဖေတ်ဒရေဝ်အနာဂတ်တအ်ဂှ် နွံဒၟံၚ်ပၟိက် NCA ကီုဟာ၊ လ္တူဏံ သဳကၠဳသ္ၚဳဂၠိပ်ထ္ၜးကဵုညိ။
တရဴဴအနာဂတ်ဂတဏံဂှ်တှ်ေ ဟီုဂးကဵု NCA ဟွံဂွံရပုဟ်။ NCA ဂှ် ဒေါံဇူအာ မွဲခန်တုဲယျ ဒးဟီုရ။ မွဲစွံကဵုဗလးပရေၚ်ဍုၚ်ကွာန်တၟိ မံက်တိုန်ကၠုၚ်ဗက်ဂှ် ဂါံကွာ်ဗက်အာ ဗလးပရေၚ်ဍုၚ်ကွာန်တၟိဂှ်ဟေၚ်ရ။ ဍေံတအ်ဂှ် ကၠောန်တ္ၚဲပေၚ်သၞာံ NCA ဏောၚ်၊ ကော်ဘိက် ကၟိန်ဍုၚ်နာနာဏောၚ်။ ဣဏံဂှ် ဒဒှ်ရနွံဒၟံၚ်ပၟိက်ကဵု ဓဝ်ၜိုဟ်လလံ ထ္ၜးဂှ် ထ္ၜးရ။ နွံပၟိက်ကဵုဓဝ်ၜိုဟ်လလံ ကွေံကွေံဟွံသေၚ်ပုဟ်။ ဆၜိုတ်ကော်ဘိက်ဗီုဂှ်ဓဝ် ကၠောန်ပရေၚ်ၜိုဟ်လလံ ဂွံဟွံသေၚ်ပုဟ်။ ပရေၚ်ကော်ဘိက်ဂှ် ပရေၚ်ၜိုဟ်လလံဟွံသေၚ်ပုဟ်၊ ယဝ်ရမိက်ဂွံကၠောန်ပရေၚ်ၜိုဟ်လလံဇေတ်တ်တှ်ေ ဒပ်ဍေံတအ်ဂှ် ရုပ်ထောံ။ ကောန်ထံၚ်ပရေၚ်ဍုၚ်ကွာန်သီုဖအိုတ် သီုဒဝ်အံၚ်သာန်သုကျဳ ဒးဒုၚ်ရပ်လဝ်လၟုဟ်ဂှ် ဗလးကဵု၊ ကမၠောန်လ္ပာ်ခိုဟ်ဂှ် ကၠောန်ရ။ ဟီုတှ်ေ ညံၚ်နွံပၟိက်ညံၚ်ၚ် ပိုဲဂွံစၟတ်သမ္တီ ဂွံရ။ ဣဏံဂှ် အရိုဟ်ဟ်တ္ၚဲ ပြိုက်ဂစိုတ်ဒၟံၚ်ညးဍုၚ်ကွာန်၊ ဇၟာပ်ပ်ဒၞာဲ ဂစိုတ်ဒၟံၚ်ရ။ မၞိဟ်ကၠောန်ဒၟံၚ်ဗီုဏံဂှ် ဟီုဒၟံၚ် မိက်ဂွံၜိုဟ်လလံတှ်ေ နဲလဵုလေဝ် ပိုဲဂွံဒုၚ်တဲ ဟွံမာန်ပုဟ်။ ညိဓဝ် ဒှ်ဟွံမာန်ပုဟ် အဲမိက်ဂွံဟီုရ။ ယဝ်ရဒးသှ်ကဵုတၚ်သၟာန်ဂှ်တှ်ေ NCA ဂှ် ဒေါံဇူအာမွဲခန်ယျဂှ် မိက်ဂွံဟီုရ။ ဆက်တုဲကွာ်ဍံၚ်ဗက်အာ အတိုၚ်ဗလးပရေၚ်ဍုၚ်ကွာန် က္တဵုဒှ်ကၠုၚ်ဒၟံၚ်လၟုဟ်ရဏောၚ်ဂှ် မိက်ဂွံဟီုဏာရ။ တၚ်ဂုဏ်ရ။