ဒး၊ ဗၠေတ်
မ္ၚဵုရအဴ။ ဒုၚ်တၠုၚ်ဏာ နူကဵုအစဳဇန်ဒးဗၠေတ် သြၚ်လောန်တိုၚ်(မ်) ပိုယ်တံရအဴ။ ကြဴနူဒပ်ပၞာန်သီအဝဵုတုဲ စပ်ကဵုပရေၚ်ချဳဒရာၚ် ပၠန်ဂတးညးဍုၚ်ကွာန်တံတုဲ ပရိုၚ်ဗၠေတ်၊ ပရိုၚ်ဒး မပြးထၞာန်ဒၟံၚ် လ္တူဇာဇၞိက်ပရေၚ်မၞိဟ်တံဂှ် နူကဵုအစဳဇန်ဒးဗၠေတ် သြၚ်လောန်တိုၚ်(မ်) ပိုယ်တံဏံ စၟဳစၟတ်ကဵုအာဏောၚ် မဒှ်ရအဴ။
တ္ၚဲဏံ ပရူပရာ ရဲထံက်ဂလာန်ကံၚ်ဇြဳပၞာန်တံ မတြးဒၟံၚ် “ပရေၚ်ဗ္တိုဟ်ထ္ကး ဗ္ဒိုပ်ပါဲဒဴဘဲပၞာန် မုၚ်လာၚ်ခက်၊ လာၚ်ဇြာ၊ ကချေၚ်ဂှ် ကံၚ်ဇြဳပၞာန် ကလိလောန်လဝ်ဟွံသေၚ်၊ ရုၚ်ကြိုၚ်စွံလဝ် လွဟ်လက်နက်မကမ် အမိုဝ်နဳယာန်နိုက်ထြုက် ဗ္တိုဟ်ထ္ကးတုဲ က္တဵုဒှ်အာလဝ်ရောၚ်” ဂှ် စၟဳတ်ကဵုအာရောၚ် မဒှ်ရ။
ပရူပရာဏံဂှ် ပ္ဍဲဂိတုအံက်တဝ်ဗာ (၁၆) တေံ နူကဵုဇာဇၞိက်ပရေၚ်မၞိဟ်တြးဝါဒ ကံၚ်ဇြဳပၞာန်ဂမၠိုၚ် မပ္တံကဵု ဟာန်ညုၚ်ဥူ၊ မှိုၚ်ဝေ ကေုာံ မဳဒဳယျာ ကံၚ်ဇြဳပၞာန် ထိၚ်ဒက်လဝ်ဂမၠိုၚ်တံ စချူတြးလဝ်ရ။
စပ်ကဵုပရူပရာ မပါလုပ် ပ္ဍဲပသ်ထ် အကံက်ပ္တောံ ရဲထံက်ဂလာန်ဒပ်ပၞာန်တံ မတြးဒၟံၚ်ဂှ်တုဲ နူကဵုသြၚ်လောန်တိုၚ်(မ်) စၟဳတ်စမ်ရံၚ်ဂှ် ဒဒှ်ရဒှ်ဒၟံၚ်ပရိုၚ်ဗၠေတ် တြးဝါဒမွဲဂှ် စၟဳတ်ဂွံဆဵုကေတ်ရ။
လၟေၚ်ဒဒှ်ဍာံဂှ် ပ္ဍဲဂိတုအံက်တဝ်ဗာ (၉) အခိၚ်ဗ္တံ ပရေၚ်ဗ္ဒိုပ်ညးဒဒိုက် မုၚ်လာၚ်ခက် ဗ္ဒါဲဍုၚ်လာၚ်ဇြာ ပ္ဍဲတွဵုရးကချေၚ် ဒးဒုၚ်ဗ္တိုက်ဂှ် လ္ဂောံကဵုဂလာန် ညးဂွံဆဵုနမတ်တံဂှ်မ္ဂး ပ္ဍဲကဵုဗ္ဒါဲဗ္ဒိုပ်ဂှ် မခတိုဟ်ဇၞော်ဇၞော်မွဲမ ဗ္တိုဟ်ထ္ကးလဝ်တုဲ၊ နူကဵုဒၞါဲဒပ်ကံၚ်ဇြဳပၞာန်တံ နွံဒၟံၚ်ဂှ် ပန်ပှော်လဝ်လွဟ်ဇၞော်ရောၚ် ဂကောံအခေါၚ်ဗၠးဒုဟ်ဒဏ် ဍုၚ်နာနာ (AI) လလောၚ်ပ္တိတ်လဝ်ဂှ် ဌာန်ပရိုၚ် RFA ချူထ္မံက်ထ္ၜးလဝ်ဂှ် စၟဳတ်ဂွံဆဵုကေတ်ရ။
အတိုၚ်ညးစိုန်သ္ကီု ဂကောံ AI တံ စၟဳတ်လဝ် ဗီုဓာတ်၊ ဗဳဒဳယော မမံက်တိတ်ကၠုၚ်လဝ် ကြဴနူပရေၚ်ဗ္တိုက်ဂှ်တုဲဂှ်မ္ဂး ဟိုတ်နူလွဟ်လက်နက်ဗ္တိုဟ်ထ္ကး မသုၚ်စောဲလဝ် ပ္ဍဲပရေၚ်ဗ္တိုက်ဂှ်တုဲ ဘာကျာ်၊ ဘာဗ္တောန်လိက် ကေုာံ သ္ၚိဌာန် ပွဳပွူဂှ်ဗွဲမဂၠိုၚ် သရိုဟ်အာတုဲ မ္ၚးနူတူအာပၟတ်အိုတ်ဂှ် ဟိုတ်နူပရေၚ်ဗ္တိုက်ဂှ်တုဲ မၞိဟ်နွံဒၟံၚ် ပ္ဍဲဗလးတိတံဂှ်လေဝ် အဝဲအၚ်္ဂဇိုၚ်တဲ ပိုတ်ပြာတ်တိတ်အိုတ်တုဲ ချိုတ်အာလဝ်ရောၚ် စၟဳတ်ဂွံဆဵုကေတ် အတိုၚ်တၚ်လလောၚ်တြးဂှ်ရ။
ဟိုတ်နူဒပ်ပၞာန် ဗ္တိုက်ဗ္ဒိုပ်ညးဒဒိုက်ပါဲဒဴဘဲပၞာန် မုၚ်လာၚ်ခက် ဗ္ဒါဲဍုၚ်လာၚ်ဇြာ တွဵုရးကချေၚ်ဂှ်တုဲ အောန်အိုတ် မၞိဟ် (၂၈) တၠ ချိုတ်အာလဝ်တုဲ ပရေၚ်ဗ္တိုက်ဏံဝွံ ဒှ်ပြဝ အမှုရာဇဝတ်ပၞာန်မာန်ဂှ် ပ္ဍဲဂိတုအံက်တဝ်ဗာ (၁၃) တေံ ဂကောံအခေါၚ်ဗၠးဒုဟ်ဒဏ်ဍုၚ်နာနာ (AI) လလောၚ်ပ္တိတ်လဝ် တၚ်လလောၚ်တြးတုဲ ဌာန်ပရိုၚ် ဗၠးၜးဂမၠိုၚ်လေဝ် ချူးပ္တိုန်လဝ်ပရိုၚ်ဂှ် စၟဳတ်ဂွံဆဵုကေတ်ရ။
အတိုၚ်ရဲထံက်ဂလာန်ဒပ်ပၞာန်တံ တြးဒၟံၚ်ပရိုၚ် ပရေၚ်ဗ္တိုဟ်ထ္ကး က္တဵုဒှ် ဗ္ဒါဲဗ္ဒိုပ် KIA ဂှ် ဟိုတ်နူဒပ်ပၞာန် ထောံမခတိုဟ်ဟွံသေၚ်မွဲသာ် KIA ကၠုၚ်ပံက်တန်ဗ္တောန်တုဲ နူကဵုဒၞါဲစွံလဝ်လွဟ်လက်နက်မကမ်ဂှ် ဗ္တိုဟ်ထ္ကးက္တဵုဒှ်လဝ်ဂးတုဲ နူကဵုချာန်နေဝ်ရဲထံက်ဂလာန်ဒပ်ပၞာန်တံ တြးဒၟံၚ်ပရိုၚ်ဗၠေတ် စုၚ်လေၚ်ဂှ် စၟဳတ်ဂွံဆဵုကေတ်ရ။
ဌာန်ပရိုၚ် RFA ထ္မံက်ထ္ၜးလဝ်ဂှ်
ဌာန်ပရိုၚ် Myanmar Now ထ္မံက်ထ္ၜးလဝ်ဂှ်
ဟိုတ်နူတၚ်နၚ်တံဏံတုဲ ပရူပရာ မပါလုပ် ပ္ဍဲဗီုဓာတ် ရဲထံက်ဂလာန်ဒပ်ပၞာန်တံ မတြးဒၟံၚ် “ပရေၚ်ဗ္တိုဟ်ထ္ကး ဗ္ဒိုပ်ပါဲဒဴဘဲပၞာန် မုၚ်လာၚ်ခက်၊ လာၚ်ဇြာ၊ ကချေၚ်ဂှ် ကံၚ်ဇြဳပၞာန် ကလိလောန်လဝ်ဟွံသေၚ်၊ ရုၚ်ကြိုၚ်စွံလဝ် လွဟ်လက်နက်မကမ် အမိုဝ်နဳယာန်နိုက်ထြုက် ဗ္တိုဟ်ထ္ကးတုဲ က္တဵုဒှ်အာလဝ်ရောၚ်” ဂှ်ဝွံ ဒဒှ်ရဒှ်ဆပရိုၚ်ဗၠေတ် တြးဝါဒမွဲဂှ် နူကဵုသြၚ်လောန်တိုၚ်(မ်) စၟဳစၟတ်ကဵုလဝ် သွက်ပုရိသာတ်သြၚ်လောန်တိုၚ်(မ်) ပိုယ်တံရ။
သြၚ်လောန်တိုၚ်(မ်)