ဒပ်ကံၚ်ဇြဳပၞာန်ဒးဂိဒၟံၚ် ဟိုတ်နူပရေၚ်ချဳဒရာၚ်ပၞာန် ၁၀၂၇ ဂကောံမဟာမိတ်ကောဒေံပိဂကောံဂှ် ကောံဓရီု ပရေၚ်စဵုဒၞာကောန်ဂကူကဵု ပရေၚ်ဂီုကၠီု (စဵုဒၞာဂီုကၠီု) အခိၚ်ကာလအယုက်ကာလကာတၟေၚ်အိုတ်မှ ကော်ဒၟံၚ်ဂှ် ကော်ကေတ်ကၠောန်ဗဒှ်လဝ် ပ္ဍဲကဵုဂိတုနဝ်ဝေမ်ဗာ စၟတ်တ္ၚဲ (၈)ဂှ်ရ။ ပ္ဍဲကဵုကောံဓရီုဏံ သ္ကိုပ်ပၞာန်ဇၞော်မေန်အံၚ်လှာၚ်ဂှ် ဂကောံကိုဝ်က MNDAA သုၚ်စောဲ ပရဲဂွံနၚ် နူကဵုဂဥုဲၜူမာဲတုဲ ဟိုတ်နူမိက်ဂွံဒက်ပ္တန် အဝဵုဩဇာဂှ်ရ စချဳဒရာၚ်ကၠုၚ် ပရေၚ်ချဳဒရာၚ်ပၞာန် ၁၀၂၇ ရဂှ် စောတ်စောဲလဝ်တုဲ ကၠောန်ရေၚ်တၠုၚ်အာ ပရေၚ်ကလေၚ်ပလန်တဲရောၚ်ဂှ် ဟီုကြဵုဇာလဝ်ရ။
တၚ်ကလေၚ်ပလန်တဲ ပ္ဍဲလ္တူတၚ်စောတ်စောဲ က္ဍိုပ်သ္ကိုပ်ပၞာန်ကီု၊ အကာဲအရာပရေၚ်ပၞာန် အခိၚ်လၟုဟ်ဏံကီု၊ အကာဲအရာသီကေတ်လဝ် ဗဒိုပ်ဒပ်ကံၚ်ဇြဳပၞာန်တအ်ကီု စပ်ကဵုအကာဲအရာဂမၠိုၚ်ဏံတုဲ ဆက်စၠောံသၟာန်လဝ်ကဵု ညးမၞုံအခေါၚ်ဟီုဂး ဂကောံကိုဝ်က MNDAA လဳကျာဝေန်ရ။
သြၚ်လောန်တိုၚ်မ် – ကၠာအိုတ်ဏံ က္ဍိုပ်သ္ကိုပ်ပၞာန်ဂှ် ပြဿနာက္တဵုဒှ်ဒၟံၚ် ပ္ဍဲတွဵုရးသေံသၟဝ်ကျာတအ်ဂှ် ဒှ်ကၠုၚ်ဒၟံၚ် ဟိုတ်နူမိက်ဂွံကေတ်အဝဵု နကဵုဂဥုဲၜူမာဲရ ဟီုကၠုၚ်လဝ်ဂှ် ဂွံညာတ်ကေတ်ရ။ တုဲတှ်ေ ဂကောံကိုဝ်ကဂှ် ပ္ဍဲကဵုကမၠောန်လီဠာန်သြန်အောန်လာၚ်(ကျာဖျာန်) ဂှ်လေဝ် ပါလုပ်ဒၟံၚ် လ္တူတၚ်စောတ်စောဲဏံ နကဵု MNDAA မုမိက်ဂွံက္လေၚ်ဟီုပလန် နွံရော။
လဳကျာဝေန် – ပ္ဍဲလ္တူတၚ်စောတ်စောဲ စပ်ကဵုဂဥုဲၜူမာဲဏံ ပိုဲတအ် နကဵုဒေသတၟေၚ် ၁ ဂှ် တေံနူကဵု သၞာံ ၂၀၀၀ တေံရ ပ္ဍဲပရေၚ်ဥက္ကဋ္ဌပိုဲ ဥူဖုမ်ကျာယှေန် က္ဍိုက်လဝ်က္ဍိုပ်ဂှ် ဗတိုက်သရိုဟ်လဝ် ဂဥုဲၜူမာဲ အးအးမာန်လဝ်ရ။ ဣဏံဂှ်လေဝ် အရာလုပ်ဝၚ်မွဲရ။ ပ္ဍဲသၞာံ ၂၀၀၀ ဂှ် ညံၚ်ဂဥုဲၜူမာဲဂွံအးအာပေၚ်ၚ် ဗတိုက်ပလီုမာန်လဝ်တုဲ လက်ဖက်သကှ်၊ ၜဴတအ်ဂှ် စုတ်အဇာ တဵုလွဳကၠုၚ်မာန်လဝ်ရ။ လၟုဟ်မှ ဍေံတအ် ကၠုၚ်စောတ်စောဲပိုဲ နကဵုသြန်လုပ် ဂွံနၚ်နူဂဥုဲၜူမာဲဂှ်တှ်ေ အဲဟွံကၠးစိုတ်မွဲဂှ် အခိၚ်လၟုဟ်ဏံ ပ္ဍဲကဵုဒေသဂှ် ဂဥုဲၜူမာဲ နွံဒၟံၚ်ဖိုဟ်ဏီဟာ။
ယဝ်ခါရဂဥုဲၜူမာဲ နွံဒၟံၚ်ဏီဏောၚ်တှ်ေ ဂကောံကိုဝ်က ရုပ်ဂမ္စိုတ် နွံဒၟံၚ်ဗ္ဒာဲဂှ် ကၠောန်ဒၟံၚ်ဂဥုဲၜူမာဲ ဒှ်ဂွံရ။ ဂကောံကိုဝ်ကရုပ်ဂမ္စိုတ်တအ်ဂှ် ယဝ်ရကၠောန်ပ္တိတ်ဒၟံၚ်ဂဥုဲၜူမာဲတှ်ေ ဟွံဂွံအထံက်အရီု နူကဵုကံၚ်ဇြဳပၞာန်မွဲသာ် ဗီုလဵု ဍေံတအ်ဂွံကၠောန်ပ္တိတ်မာန်ရော။ သြန်လုပ်တအ်ဂှ် စိုပ်အာ ပ္ဍဲတဲညးဂှ်ရောဟီုတှ်ေ ပိုဲဒးက္လေၚ်ချပ် နွံမွဲတၚ်ရ။ တုဲပၠန် ဂုၚ်အောန်လာၚ်ကျာဖျာန်ဂှ် ယဝ်ရဒးဟီုကၠးကၠးတှ်ေ အတိုၚ်တီဒၟံၚ် သီုဍုၚ်ဂှ်ရ။ အောန်လာၚ်ဂုၚ်ကျာဖျာန်ဂှ် ပ္ဍဲကဵုလောက်ကိုၚ် ဒှ်မံၚ်ဂၠိုၚ်အိုတ်ရ။ လၟုဟ် ဍေံတအ်က္လေၚ်ပလံၚ်ဒၟံၚ် မၞိဟ်ဍေံတအ်၊ ဗတိုက်သရိုဟ်ဒၟံၚ်ဟီုဂှ် ပိုဲကၠောန်ချဳဒရာၚ်ပၞာန်တုဲမှ ကိစ္စဏံ ဂွံဒှ်ကၠုၚ်ရ။ နူကဵုကၠာတေံဟီုတှ်ေ ပရေၚ်ဗတိုက်သရိုဟ် ညိဟၟဲပုဟ်။ တုဲပၠန် ဍေံတအ်ဗတိုက်သရိုဟ်ဒၟံၚ်ဟီုဂှ်လေဝ် သေဌဳကၠောန်ဒၟံၚ်အောၚ်လာၚ်ဂုၚ် ဇေတ်ဇေတ်တအ်ဂှ် ပဆုဲပြံၚ်ထောံဒၞာဲ ကဵုက္ၜၚ်ကျာရ။ ကၠောန်ကမၠောန်သှ်ေဒၟံၚ် ကဆံၚ်သၟဝ်တအ်ဂှ်ရ ကလေၚ်ပလံၚ်ဗစိုပ်ဒၟံၚ် ဍုၚ်ကြုက်ရ။ သေဋ္ဌဳတအ်ဂှ် စိုပ်အာ အလဵုရော။ ပဆုဲပြံၚ်ထောံလဝ် ဒၞာဲလဵုရော။ ပဆုဲပြံၚ်ထောံဗီုဏံတုဲတှ်ေ သွက်ဂွံထပ်ကၠောန် ပ္ဍဲဒၞာဲတၞဟ်ပၠန်ဟာဂှ် ဒးချပ်ဏောၚ်လေဝ်။
သြၚ်လောန်တိုၚ်မ် – MNDAA ဂှ် ပ္ဍဲကဵုဒေသလောက်ကိုၚ် သွက်ပရေၚ်ဂွံက္လေၚ်ဒက်ပ္တန်အဝဵု၊ နကဵု TNLA သွက်ဂွံက္လိဂွံ တွဵုရးပလောၚ်။ နကဵုကိုဝ်က သွက်ဂွံက္လိဂွံ တွဵုရးကိုဝ်ကဂှ် က္ဍိုပ်သ္ကိုပ်ပၞာန်ဟီုလဝ်ရ။ ဟီုတှ်ေ ပ္ဍဲလ္တူဟီုဂးဒၟံၚ်ဏံရော လစွံစိုတ်ဗီုလဵုနွံရော။ မုမိက်ဂွံက္လေၚ်ဟီုရော။
လဳကျာဝေန် – သွက်ဂွံက္လေၚ်ဂွံ ကိုဝ်ကတအ်၊ သွက်ဂွံဒက်ပ္တန် တွဵုရးပလောၚ်တအ်ဂှ် ဒှ်အရေဝ်ဍေံတအ်ဟီုလဝ်ရ။ ပရေၚ်ချဳဒရာၚ်ပၞာန်ဏံ တၚ်ရန်တၟံအဓိကဂှ်တှ်ေ လလောၚ်တြးလဝ် တုဲတုဲဒၟံၚ်ရ၊ ပ္ဍဲကဵုလိက်ပံက်ထိုၚ်ပိုဲကီု၊ ပ္ဍဲကဵုတၚ်လလောၚ်တြး မဟာမိတ်ကောဒေံပိဂကောံတအ်ကီု ဓမံက်ထ္ၜး လဝ်တုဲတုဲဒၟံၚ်ရ။ ဣဏံဂှ် သွက်ဂွံဒးဟီုဂး တၟေၚ်ၚ်တၟဟ်ဟ် ဟၟဲပုဟ်။
သြၚ်လောန်တိုၚ်မ် – ပ္ဍဲကောံဓရီုစဵုဒၞာဂီုကၠီုဂှ် သမ္မတယာယဳကံၚ်ဇြဳပၞာန်ခါန်ကၞက် ဥူမျေတ်သွေဂှ် ဟိုတ်နူပရေၚ်ချဳဒရာၚ်ပၞာန် ၁၀၂၇ တုဲ ကၟိန်ဍုၚ် ပါ်ဒကးပြးတိတ်အာ ဂၠိုက်ကဵုကရေက်မာန်ဏောၚ်။ ပ္ဍဲလ္တူဏံ မုတၚ်မိက်ဂွံဟီုနွံရော။
လဳကျာဝေန် – သမ္မတယာယဳ ဥူမျေတ်သွေ တိုန်စိုပ်လဝ် ကောံဓရီုစဵုဒၞာဂီုကၠီုဏံဟီုဂှ် ဣဏံဂှ် က္လေၚ်ချပ်ရံၚ်ညိ။ နကဵုညး ဒးတိုန်စိုပ်လဝ် ဗီုပြၚ်လဵုရော။ ကြဴနူသီကေတ်အဝဵုတုဲ လ္ပာ်လကြဴဏံ အကာဲအရာညး နွံဒၟံၚ်ဗီုလဵုရော။ မုဟိုတ် အခိၚ်ဗီုလၟုဟ်ဏံ ဂွံစိုပ်ကၠုၚ်ကောံဓရီုဂှ်ရော ဟီုဂှ် တၚ်တအ်ဏံ ဒှ်တၚ် ထေက်ကဵုဒးချပ်ဏောၚ်။ တုဲပၠန် ကၟိန်ဍုၚ်ဂှ် ဒကးပရးအာ ဂၠိုၚ်ကဵုကရေက် မာန်ဏောၚ်ဟီုဂှ် ပိုဲတအ် ညိဓဝ် ဒုၚ်တဲဟွံမာန်လးလးရ။ ပရေၚ်ချဳဒရာၚ်ပၞာန်ပိုဲဂှ် သွက်သၞောတ်တၠအဝဵုပၞာန် ဂွံပၠိုတ်အိုတ်အာ၊ သွက်ဂွံဒက်ပ္တန် ကၟိန်ဍုၚ်ပံၚ်ကောံတၟိ ဖေတ်ဒရေဝ်ဒဳမဝ်ကရေဇြဳ။ သွက်ဂွံဗတိုက်သရိုဟ် ဗပိုတ်ရိုဟ်ကၞက် ဂုၚ်အောန်လာၚ် ကျာဖျာန်တအ်ဂှ် ဓမံက်လဝ်ရုပ်ရဴ ပရေၚ်ချဳဒရာၚ်ပၞာန်ဏံရ။ လီုဏောၚ်တှ်ေ ဂကောံပၞာန်ရ ဒးလီုလာ်ဏောၚ်။ ကၟိန်ဍုၚ်ဂှ် ဟိုတ်ဂွံလီု ညိဓဝ်ဟွံမွဲပုဟ်။ ပိုဲတအ်ဂှ် က္လေၚ်ပ္တန်ပ္တဴဒၟံၚ်ကၟိန်ဍုၚ်ရ။
သြၚ်လောန်တိုၚ်မ် – လၟုဟ်တှ်ေ ပရေၚ်ချဳဒရာၚ်ပၞာန် ၁၀၂၇ ဂကောံကောဒေံ ၃ ဂကောံတအ် ပေၚ်ဂွံ (၂) သတ္တာဟယျ။ ပ္ဍဲကဵုပွိုၚ် (၂) သတ္တာဟဏံ ဍုၚ်တအ်၊ ဗဒိုပ်ဇၞော်ဍောတ် ဗဒိုပ်ယာယဳ အပံၚ်ၜိုတ်ဂလိုၚ်လဵု ဂကောံကောဒေံ ၃ ဂကောံတအ် သီကေတ်မာန်လဝ်ရရော။
လဳကျာဝေန် – ပ္ဍဲမွဲကာလပိုဲဓမံက်ရုပ်ရဴ ချဳဒရာၚ်ဒၟံၚ်ပၞာန် ပွိုၚ်ၜါသတ္တာဟဏံ ဂကောံမဟာမိတ်ကောဒေံပိုဲ ပိဂကောံ အပံၚ်လၟိဟ်ဗဒိုပ်ဇၞော်ဍောတ် ဗဒိုပ်ယာယဳ ၜိုတ် ၁၅၀ ဂှ်တှ်ေ သီကေတ်မာန်လဝ်ယျ။
သြၚ်လောန်တိုၚ်မ် – အလန်လကြဴအိုတ်ဏံ အကာဲအရာပရေၚ်ပၞာန် ပ္ဍဲတွဵုရးသေံသၟဝ်ကျာ ဗီုလဵုနွံဒၟံၚ်ရော။ ဗွဲတၟေၚ်တှ်ေ လ္ပာ်ကံၚ်ဇြဳပၞာန် ဗီုပြၚ်လဵုက္လေၚ်ဗတိုက်ပလန်ဒၟံၚ် နွံရော။
လဳကျာဝေန် – အကာဲအရာပရေၚ်ပၞာန်တွဵုရးသေံသၟဝ်ကျာဂှ်တှ်ေ သွက်ဂွံဗပေၚ်ဇြဟတ်ပၞာန်ဂှ် ကၠောန်ဒၟံၚ် နွံရ။ တုဲတှ်ေ ပရေၚ်ပန်ပှော်လွဟ်ဇၞော်တအ်၊ ဗတိုက်ကဵုက္ၜၚ်ကျာတအ်ဂှ်တှ်ေ ကၠောန်ဒၟံၚ်တွဵုရလေဝ်။