ဟဏဳ၊ မာတ် ၃၀
ၚုဟ်မးဗၞိက်ပ္တိတ်အပ္ဍဲဍုၚ် ဗဳယေတ်နာမ်ဝွံ ဟိုတ်နူဇြဟတ်ပလံၚ်ပ္တိတ် ဍုၚ်သ္အာၚ်တံ ခိုဟ်ကၠုၚ်တုဲ သၞာံဏံ အပ္ဍဲပွိုၚ်ပိဂိတုဂှ် တောတက်ကၠုၚ် ၅ ဒဿမ ၆၆ တၟံကၠံ ဂၠိုၚ်နူကဵုသၞာံတုဲကၠုၚ်တေံဂှ် ဂွံတီကေတ် အတိုၚ်တၚ်လလောၚ်တြး အလဵုအသဳရ။
သၞာံတုဲကၠုၚ်တေံ အပ္ဍဲပွိုၚ်ပိဂိတုကၠာအိုတ်ဂှ် ပရေၚ်ဖောအ်ဗြေဝ်တောတက်ပရေၚ်ပိုန်ဒြပ် ၃ ဒဿမ ၄၂ တၟံကၠံ နွံလဝ်တုဲ ပ္ဍဲသၞာံဏံ ပရေၚ်ဖောအ်ဗြေဝ်တောတက် သာတုဲမြက်တိုန်ရောၚ် သ္ဂးလဝ်ရ။
ဆ္ဂး သၞာံတုဲကၠုၚ်တေံ အပ္ဍဲပွိုၚ်ပိဂိတု လက္ကရဴအိုတ်ဂှ် ပရေၚ်ဖောအ်ဗြေဝ်ပရေၚ်ပိုန်ဒြပ် ၆ ဒဿမ ၇၂ တၟံကၠံနွံလဝ်ဂှ်ရ ပရေၚ်ပိုန်ဒြပ်တောတက် ပွိုၚ်ပိဂိတုကၠာအိုတ်သၞာံဏံဂှ် သဝ်နူကဵု အခိၚ်ကာလတေံဂှ် ဂွံတီကေတ်ရ။
အပ္ဍဲပွိုၚ်ပိဂိတု ကၠာအိုတ်ဏံဂှ် ဟိုတ်နူတ္ၚဲဇူကမၠောန်ညးဍုၚ်ကွာန်ဂမၠိုၚ် ဂၠိုၚ်ဂှ်ရ ပရေၚ်ပိုန်ဒြပ်ဖောအ်ဗြေဝ်တောတက်ဂှ်ဝွံ အောန်ဒၟံၚ်လၟိုန်ဂှ် ဂွံတီကေတ်ရ။
ဒှ်ပၞေဟ်ပရေၚ်ကၠောန်ပ္တိတ်ဗၞိက် အပ္ဍဲဒေသတုဲ ဗဳယေတ်နာမ် ပလံၚ်ပ္တိုန်ဒၟံၚ် သမာတ်ဖုၚ်၊ ကပေါတ်အဳလက်ထရဝ်နေတ် ကေုာံ ဂၠိက်ယာတ်အဓိကဂှ်ဝွံ သၞာံတုဲကၠုၚ်တေံ သီုကဵုပရေၚ်ပိုန်ဒြပ်ဂၠးတိအိၚ်စှ်ေ ဂှ်ကီု သီုကဵုတၚ်ရန်တၟံ မစၟတ်လဝ်ဂှ် ဟွံပေၚ်က္တဵုဒှ်လဝ်တုဲ ပ္တိတ်ဒၟံၚ်ဇြဟတ် ညံၚ်ပရေၚ်ပိုန်ဒြပ် ဂွံကလေၚ်ခိုဟ်ပလန်မဒှ်ရ။
ပ္ဍဲသၞာံဏံ အလဵုအသဳဗဳယေတ်နာမ် ပရေၚ်ပိုန်ဒြပ်ဖောအ်ဗြေဝ်တောတက် နူ ၆ တၟံကၠံ ညံၚ်ဂွံတောတက်ကၠုၚ် စဵုကဵု ၆ ဒဿမ ၆ တၟံကၠံဂှ် ရန်တၟံလဝ်ရောၚ် ဂွံတီကေတ်ရ။
ပ္ဍဲလိက်ဒုၚ်စဳရေၚ် ရုၚ်စရၚ်အၚ်နာနာဗဳယေတ်နာမ် GSO ဂှ် သွာၚ်ကၠောန်ပ္တိတ်ကဵု သွာၚ်သိုၚ်ခၞံတံဝွံ ၆ ဒဿမ ၂၈ တၟံကၠံ၊ သွာၚ်ကမၠောန်ရေၚ်တၠုၚ်ကဵု ပရေၚ်ဒုၚ်ကာတံဂှ်ဝွံ ၆ ဒဿမ ၁၂ တၟံကၠံ တောတက်ကၠုၚ်လဝ်ဂှ် ထ္မံက်ထ္ၜးလဝ်ရ။
ပ္ဍဲၜဳဗ္ကေတ် ဟိုတ်နူပရေၚ်ဗ္တိုက် ညးသပုန် ဟူတဳတံတုဲ ပရေၚ်ပလံၚ်ပ္တိုန်ဗၞိက် ကုက္ၜၚ်ဂှ် အရာမပလာပ်ပထုဲတံ နွံဒၟံၚ်ကီုလေဝ် ပရေၚ်ပလံၚ်ပ္တိုန်ဗၞိက် ဗဳယေန်နာမ် အပ္ဍဲပွိုၚ်ပိဂိတုကၠာအိုတ်ဏံဂှ်ဝွံ တောတက်ကၠုၚ်လဝ် တီတီရ။
အခိၚ်လၟုဟ် ခရိတ်အိုတ်ဗၞိက်ပလံၚ်ပ္တိုန် နူဗဳယေတ်နာမ် ဗစိုပ်ဍုၚ်သ္အာၚ်တံဂှ်ဝွံ နူ ၅၅ တၟံကၠံဂှ် သၠုၚ်တိုန်အာ စဵုကဵု ၇၃ တၟံကၠံယျဂှ် ကဵုလဝ်သမ္တီရ။
Ref: Reuters