ဟဏဳ၊ ဒဳဇြေမ်ဗာ ၄
နကဵုညးဗြဴတၠကမၠောန် ဂကူဗဳယေတ်နာမ် သေဌဳဇၞော် မိုၚ်လာန်ဂှ် ယဝ်ဟွံမိက်ဒးဒုဟ်ဒဏ် အတိုၚ်ဒဏ်ဂစိုတ် မဖျေံစဳရေၚ်လဝ်ဂှ်မ္ဂး ဒးလေဲကဵုအလဵုအသဳ ၉ ဗဳလျာန်အမေရိကာန်ဒဝ်ဠာဏောၚ်ဂှ် ရုၚ်သၞောဝ်ဓဝ်ဂှ် သ္ဂုတ်သွာတ်လဝ်ရ။
ဟိုတ်နူရပ်လဝ်ဇုက် လ္ပာ်လက္ကရဴ ပ္ဍဲကဵုပရေၚ်လီဠာန်တိုက်သြန်ဂှ်တုဲ သေဌဳၝောံ အာယုက် ၆၈ သၞာံဂှ်ဝွံ ပ္ဍဲဂိတုဨပရဴဂှ် ဒးဒုၚ်ဖျေံစဳရေၚ်လဝ် ဒဏ်ဂစိုတ်ရ။
ဣဏံဝွံ ပ္ဍဲဍုၚ်ဗဳယေတ်နာမ်ဂှ် ဒှ်ဒုဟ်ဒဏ်သ္ဇက်ဒးလကိုတ် ဇြိုၚ်ကဵုဒှ်မွဲတုဲ ညးဗြဴဒးဒုၚ်ဖျေံလဝ်ဒဏ်ဂစိုတ် သွက်ပရေၚ်လီဠာန် လအာတုပ်သာ်ဏံဂှ် နွံဒၟံၚ်ညိညကီုရ။
အတိုၚ်သၞောဝ် ဗဳယေတ်နာမ်ဂှ်မ္ဂး နကဵုညးမလီဠာန်လဝ်မွဲတၠ လၟိဟ်ပမာဏသြန် ညးမလီဂွံလဝ် ၜိုတ် ၇၅ တၟံကၠံဂှ် ယဝ်ရကလေၚ်လေဲမာန်မ္ဂး နူကဵုဒဏ်ဂစိုတ်ဂှ် ပြံၚ်ဒးဒုၚ်ဖျေံစၟတ် ဒဏ်ထံၚ်မွဲအာယုက်မာန်ရောၚ် ခုတ်ပ္တန်လဝ်ရ။
တိုက်သြန်ပရေၚ်ပိုန်ဒြပ်ဇၞော်အိုတ် မရနုက်ကဵုပဉ္စမ ပ္ဍဲဍုၚ်ဗဳယေတ်နာမ် တိုက်သြန်ပရေၚ်ပိုန်ဒြပ် Saigon ဂှ် ထရူအောန်မိုၚ်လာန် ထိၚ်ဒက်လဝ်တုဲ နူကဵုကမ္ပဏဳဒုၚ်လဝ်ယၟုမွဲကဆံၚ် ပ္တိတ်ကေတ်ဒၟံၚ် သြန်ဓလေံတံကဵု မသြန်တံ ဂွံကၠုၚ် ၁၀ သၞာံပြၚ်ယျဂှ် ရုၚ်သၞောဝ်ဓဝ်ဂှ် စၟဳတ်ဂွံဆဵုကေတ်ရ။
ပမာဏသြန် ညးမလီဠာန်ကလိဂွံလဝ်ဂှ်ဝွံ ဒဒှ်ရ ၄၄ ဗဳလျာန်အမေရိကာန်ဒဝ်ဠာနွံဂှ် ဂွံတီကေတ် အတိုၚ်သက်သဳတၞးလိက်ရုၚ်သၞောဝ်တံဂှ်ရ။
ဟိုတ်နူပရေၚ်ညးမလီဠာန်ဏံဂှ်တုဲ ကောန်ဍုၚ်ဗဳယေတ်နာမ် ဗွဲမဂၠိုၚ်ဂၠေၚ် ဒးဇီုကပိုက်ဂိအာလဝ်တုဲ ညံၚ်တိုက်သြန် Saigon ဟွံဂွံသရိုဟ်စှ်ေအာဂှ် တိုက်သြန်ဗဟဵုကၟိန်ဍုၚ် ဒးထံက်ပၚ်ကဵုလဝ် သြန်ဗွဲမဂၠိုၚ်ဂၠေၚ်ရ။
ပြဟ်ဟ်ဏံ ပ္ဍဲကဵုသေဌဳၝောံဂှ် ပလဝ်တၠပိုန်ဒြပ် နွံတၟာဂလိုၚ်ကီုလေဝ် ဟိုတ်နူဒှ်အရာမပိုၚ်ပြဳလဝ် ဆုဲပြံၚ်ဟွံဂွံတံဂှ်တုဲ ဂွံဂၠါဲ ၉ ဗဳလျာန်ဒဝ်ဠာဂှ် အခက်အခုဲနွံဒၟံၚ်ဂှ် ညးရေၚ်တၠုၚ်ဂဗုတ်ညး ဟီုလဝ်ရ။
Ref: BBC