ဗရာတ်သေဲ၊ ဒဳဇြေမ်ဗာ ၅
ပ္ဍဲဍုၚ်မဟာမိတ်ဂမၠိုၚ် အခိၚ်ဒးဆေၚ်ဒၟံၚ်မုက်ကဵု ပြဝကြုက်ကဵုရုယှာတံ မဂၠါဲသၞ မပလီုပလာ်တံဂှ် ညံၚ်ဂွံစဵုဒၞါကဵု စမြိုၚ်သ္ဇိုၚ် မဇၞော်ကဵုပၟိက်တံမာန်ဂှ်ကီု၊ ပရေၚ်ပါ်ပရအ် တၚ်နၚ်ပရိုၚ်ထံၚ်ပရိုၚ်တံ သွက်ဂွံသၠုၚ်ပ္တိုန်အသိၚ် ရေၚ်တၠုၚ်အာဂှ် ဇၞော်သ္ကိုပ်ဂကောံနေတိုဝ် မက်ရူတဳ ဟီုလဝ် ပ္ဍဲဂိတုဒဳဇြေမ်ဗာ ၃ တေံရ။
သၞာံတုဲကၠုၚ်တေံ ကြုက် ကေုာံ ရုယှာတံ ကၠောန်ကၠုၚ်လဝ် ပြဝပလီုပလာ်ဂမၠိုၚ်၊ ပရေၚ်ဗ္တိုက်သာ်ပါတံ၊ ပရေၚ်တြးပရိုၚ်ဗၠေတ်တံ ကေုာံ စပ်ကဵုကရေပ်ဓရတ်ကၠုၚ် ပရေၚ်အစောံဇြဟတ် သွက်ဂွံဗ္တိုက်ညးတံဂှ်တုဲ ညံၚ်ဍုၚ်ညးတံ ဟွံဂွံညိၚ်ဝတ်ဂှ် ကၠောန်လဝ်ရောၚ် ဇၞော်သ္ကိုပ်ရူတဳ ဟီုလဝ်ကဵု အ္စာပရိုၚ်ဂမၠိုၚ်ရ။
အခိၚ်ဒးဆေၚ်ဒၟံၚ်မုက်ကဵု အန္တရာယ်သာ်ဏံဂှ် နကဵုဍုၚ်မလုပ်ဂကောံမဟာမိတ်ဂမၠိုၚ် ရပ်စပ်အာနဲကဲနာနာတုဲ ဆက်ဒတူလိုၚ်အာ မွဲစွံဏောၚ်ဂှ် ညးထပ်ဟီုဗပေၚ်လဝ်ရ။
ပ္ဍဲကဵုကောံဓရီုဝန်ဇၞော်ကာဍုၚ်သ္အာၚ် ဂကောံနေတိုဝ် မကၠောန်ဗဒှ်လဝ် ပ္ဍဲဍုၚ်ဗရာတ်သေဲ ပ္ဍဲသတ္တာဟဏံဂှ် သွက်ဂွံခၠေဝ်ပလန် တာဒၞါအာ ပရေၚ်ဗ္တိုက် နူကဵုကြုက် ကေုာံ ရုယှာတံမာန်ဂှ် ဗျူဟာတၟိတၟိ ဂွံတိတ်ကၠုၚ်နွံဒၟံၚ်ရ။
ရုယှာ ကေုာံ ကြုက် ဒဒှ်ရကၠောန်ဒၟံၚ် ပရေၚ်ဗ္တိုက် ကုမဟာမိတ်နေတိုဝ်တံ ကြပ်အရိုဟ်ဒဒှ်တ္ၚဲဂှ် ဇၞော်သ္ကိုပ်ရူတဳ စောဲစပ်လဝ်ရ။
ပ္ဍဲကဵုပၟတ်တူက္တဵုဒှ်လဝ် ပ္ဍဲဍုၚ်ဗျိတိၚ်၊ ဂျာမနဳ ကေုာံ ပဝ်လာန် ပ္ဍဲဂိတုဂျူလာၚ်ဂှ် ဒှ်ပွရုယှာ မပလီုပလာ် မိက်ဂွံကဵုပရေၚ်ဗ္တိုဟ်ထ္ကးတံ က္တဵုဒှ်ဂှ်ဏောၚ်ဂှ် ဌာနထံၚ်ပရိုၚ် ဍုၚ်ပလိုတ်တံ ဟီုလဝ်ရ။
အပ္ဍဲဂိတုနဝ်ဝေမ်ဗာတေံ ပရေၚ်ဇုက်ကေဗဴ ပရေၚ်ဆက်စၠောံ နွံပ္ဍဲၜဳဗဝ်တေတ် မပိုတ်သ္ကုတ်အာဂှ်ဝွံ ဒၟါနူပြဝပလီုပလာ်တံတုဲ ဒှ်လဝ်ဟာဟီုဂှ် ဍုၚ်ယူရောပ်ဂမၠိုၚ် ဂၠိုက်ဂၠါဲစၟဳတ်ဒၟံၚ်ဖိုဟ်ရ။
ပ္ဍဲသၞာံ ၂၀၂၁ တေံ ကြုက် ကၠောန်သ္ပဗ္တိုက်လဝ် ကုအေဂျေန်ဇြဳအလဵုအသဳမွဲရောၚ် အလဵုအသဳဂျာမနဳ စောဲစပ်လဝ်ကီုလေဝ် လ္ပာ်ဗေကျေန် တးပါဲလဝ်ရ။
ဍုၚ်မလုပ်ဂကောံလ္ၚဵုတံ ဒှ်ဒၟံၚ်ဓဝိၚ် ဂွိၚ်ကဵု ပရေၚ်ကြံၚ်မ္ၚိုဟ် ကုရုယှာ မသၠုၚ်တိုန်ကၠုၚ်ဂှ်တုဲ ဂွံဂွံတၚ်တုပ်စိုတ် သာ်လဵုဂွံခၠေဝ်ပလန်အာ ကုပရေၚ်ဗ္တိုက်သ္ဇက်ဒးဒှ်သံသယတံရောဟီုဂှ် အခက်အခုဲနွံဒၟံၚ်ရောၚ် သၞာဲဒဴယူရောပ်ဂမၠိုၚ် ဟီုရ။
Ref: Reuters