သဵု(လ်) ၊ ဒဳဇြေမ်ဗာ ၁၇
သမ္မတယောန်သက်ယော ပ္တိတ်ကၠုၚ်ဇြဟတ် သွက်ဂွံအုပ်ဓုပ် နကဵုပရေၚ်အုပ်ဓုပ်ပၞာန်တုဲ ညးဂမၠိုၚ် နူကဵုစောဲစပ်ပ္တိုန်ကၠုၚ်ဒုဟ်ကုညးတုဲ ကြဴနူဒးဒေါအ်ဇူတာလျိုၚ်တုဲ ဂွံမွဲတ္ၚဲဂှ် သမ္မတယာယဳ ဟာန်ဒက်သူ ရေၚ်တၠုၚ်ကၠုၚ်လဝ် ညံၚ်ဗွဝ်ဖျာသြန် ဂွံညိၚ်ဝတ်၊ ညံၚ်မဟာမိတ်ဂမၠိုၚ် ဂွံဖျေံစိုတ်ဂှ် ဂွံဆဵုကေတ်ရ။
သမ္မတယာယဳ ဟာန်ဝွံ ဒဒှ်ရတက်လဝ်ကျာကဵုဖုၚ် သဳကၠဳလဝ် ကုသမ္မတအမေရိကာန် ဂျဵုဗိုၚ်ဒေန် ခြာဟွံလအ် မနုက်တိတ်အာ နူကဵုကဆံၚ်ဒၞါဲညးဂှ်ရောၚ် ရုၚ်သမ္မတယာယဳ ကေုာံ သ္ၚိဗု ဟီုရ။
နကဵုဍုၚ်ကိုဝ်ရဳယျာသၠုၚ်ကျာ ဟွံမွဲကဵုပရေၚ်ပလာပ်ပထုဲမွဲသာ် ရေၚ်တၠုၚ်အာ မူဝါဒစပ်ကဵုပရေၚ်ဂီုကၠီု ကေုာံ ပရေၚ်ဍုၚ်သ္အာၚ်တံဂှ်ဏောၚ်တုဲ ညံၚ်ဂွံထိၚ်ဒဝ်အာ ပရေၚ်ဒက်မဟာမိတ် ကိုဝ်ရဳယျာသၠုၚ်ကျာ−အမေရိကာန်ဂှ်ကီု၊ ညံၚ်ဇြဟတ်ဂွံခိုဟ်ကၠုၚ်ဂှ် ရေၚ်တၠုၚ်အာဏောၚ် သမ္မတယာယဳ ဟာန်ဂှ် ဟီုလဝ်ရ။
လ္ပာ်က္ဍိုပ်သ္ကိုပ်ကၟိန်ဍုၚ် ညံၚ်ဂွံတန်ကြန် အရာမရေၚ်တၠုၚ်လဝ်ဂှ်တှ်ေ ပ္ဍဲအရာသမ္မတတြေံ ယောန်သက်ယော ဂ္စါန်လလောၚ်တြးလဝ် ပရေၚ်အုပ်ဓုပ်ပၞာန် ပ္ဍဲဂိတုဒဳဇြေမ်ဗာ ၃ ဂှ် ဒၟါနူပါလုပ်ဆက်စပ်လဝ်တုဲ ပ္တိုန်ဒုဟ်စောဲစပ်အာ ကုသမ္မတယာယဳဟာန် လၟုဟ်ဏံ ဟွံသေၚ်ပုဟ်ဂှ် လ္ပာ်ဗော်ဒစဵုဒစးအဓိကဂှ် လလောၚ်တြးလဝ်ရ။
သ္ပဒတန်လဝ် သ္ကိုပ်ဝန်ဇၞော် နဒဒှ်သမ္မတယာယဳတုဲဂှ်တုဲ ပရေၚ်စောဲစပ်ပ္တိုန်ဒုဟ် မလောန်ကာဲတံဂှ်ဝွံ က္တဵုဗဒှ်ကဵုပရေၚ်ယှုက်ထုဲ ပ္ဍဲပရေၚ်အုပ်ဓုပ်ကၟိန်ဍုၚ်မာန်တုဲ နကဵုညးတံ ကၠောန်သ္ပအာ ပရေၚ်စောဲစပ်ပ္တိုန်ဒုဟ်တံဟွံသေၚ်ရပုဟ်ဂှ် က္ဍိုပ်သ္ကိုပ်ဗော်ဒဳမဝ်ကရေတ် လ္ပာ်ဒစဵုဒစး လဳဂျေမန် ဟီုလဝ်ကဵု အ္စာပရိုၚ်ဂမၠိုၚ်ရ။
စပ်ကဵုလလောၚ်တြး ပရေၚ်အုပ်ဓုပ်ပၞာန်ဂှ်တုဲ သွက်ဂွံစၟဳတ်သၟာန်သၟုက် ကုသမ္မတတြေံဂှ် ကော်ဘိက်လဝ်ကီုလေဝ် ဟွံစိုပ်ကၠုၚ်ပုဟ်ဂှ် ညးရေၚ်တၠုၚ်ဂဗုတ်အလဵုအသဳဂှ် ဟီုလဝ်တုဲ ထပ်လလောၚ်ပ္တိတ်အာ လိက်ကော်ဘိက်မွဲပၠန်ဏောၚ်ဂှ် ဟီုရ။
သမ္မတတြေံ ယောန် ကေုာံ မဟာမိတ်ညးဂမၠိုၚ်ဝွံ ဒးဆေၚ်ဒၟံၚ်မုက်ကဵု တၚ်စောဲစပ် စပ်ကဵုက္တဵုသပုန်ဂှ်ကီု၊ ပွမရပ်စပ်အဝဵု ဟွံဗဗွဲကဵုဒၞါဲကီု၊ စပ်ကဵုကၟာတ်လဒဵုအခေါၚ်အရာညးဍုၚ်ကွာန်တံ မဒှ်ရ။
သမ္မတယာယဳဟာန် သြဇာပရေၚ်ဍုၚ်ကွာန်လေဝ်ဇၞော် သီုဒှ်မၞိဟ်သမ္မတတြေံယောန် မရုဲစှ်လဝ် နဒဒှ်သ္ကိုပ်ဝန်ဇၞော်ဂှ်ဝွံ အခိၚ်ရုၚ်သၞောဝ်ဓဝ် စပ်ကဵုသၞောဝ်သ္ဇိုၚ်ဒက်ပ္တန်ကၟိန်ဍုၚ် သ္ဂောံစၟဳတ် ဂဗုတ်သမ္မတတြေံယောန်နွံဒၟံၚ်ဂှ် ဒှ်ကၠုၚ်သမ္မတယာယဳ လ္ဂောံကဵုသၞောဝ်သ္ဇိုၚ်ကၟိန်ဍုၚ်ရ။
Ref: Reuters