ဝါယှေန်တာန်၊ ဂျာန္နဝါရဳ ၂၂
သမ္မတဒဝ်နေဝ်ထြာပ် ထပ်နုက်ပ္တိတ် အမေရိကာန် နူကဵုတၚ်တုပ်စိုတ်ရာသဳဥတုပါရဳ ပ္ဍဲဂိတုဂျာန္နဝါရဳ ၂၀ ဂှ်ရ။
အလန်ဏံဝွံ အပ္ဍဲပွိုၚ်စှ်သၞာံဂှ် ဒှ်အလန်ဒုတိယ အမေရိကာန် မဗလးပ္တိတ်ဒၟံၚ် ကာဗောန်ဒိုၚ်အံက်သာ်ဂၠိုၚ်အိုတ် နုက်တိတ်နူပရေၚ်ပ္တိတ်ဇြဟတ်သ္ဂောံဗ္တိုက်သရိုဟ် ပရေၚ်ရာသဳဥတုပြံၚ်လှာဲ စပ်ကဵုဂၠးတိဂှ်ရ။
ဂွံဖအောန်ဖျေံ ဗ္ၜတ်ဂမ္တဴဂၠးတိ စဵုကဵု ၁ ဒဿမ ၅ ဒဳဂြဳသေဲသဳယာတ်၊ ဂွံဝၚ်ပါဲ ဘဲဒဏ်ရာသဳဥတုပြံၚ်လှာဲ မသ္ကာတ်မြဟ်ဂှ်တုဲ ဍုၚ်သ္အာၚ်ဂမၠိုၚ် တုပ်လဝ်စိုတ် အပ္ဍဲသၞာံ ၂၀၁၅ တေံရ။
အခိၚ်လၟုဟ်ဂှ်တှ်ေ ပ္ဍဲကဵုတၚ်တုပ်စိုတ်ဂၠးတိဏံဂှ် အမေရိကာန်ဝွံ ညံၚ်ရဴအဳရာန်၊ လေတ်ပျာ၊ ယဳမေန်တံကီု ဟွံပါလုပ်ရပုဟ်ဂှ် ဂွံတီကေတ်ရ။
ထြာပ်ဂှ်တှ်ေ ရန်တၟံလဝ် ဂွံကၠောန်ပ္တိတ် ကၠေၚ်ဍေန် ကေုာံ သၟုဟ်ဓာတ်သဘာဝ ဂၠိုၚ်အိုတ်တုဲ ပရေၚ်ဂၠးတိဂမ္တဴကၠုၚ်ဟီုဂှ် ဒှ်အရာဘပဠမွဲရောၚ်ဂးတုဲ ပါ်ပါဲလဝ်ရ။
နူကဵုတၚ်တုပ်စိုတ်ရာသဳဥတုပါရဳ ဟွံဗဗွဲဓဝ် ဒှ်မံၚ်မွဲလ္ပာ်ဓဝ်ဂှ် ညးနုက်ပ္တိတ်လဝ် အမေရိကာန်ရောၚ် ထြာပ် ဟီုလဝ်ရ။
အခိၚ်ကြုက် ကၠောန်ဒၟံၚ် ညံၚ်ကျာဂွံကၠိခ္ဍက်တုဲ ဟွံဒးဒုၚ်ဒုဟ်ဒဏ်မွဲသာ်ဂှ် ကမၠောန်ကွတ်စက်ညးတံ ဂွံဒှ်အခက်အခုဲဂှ် ကၠောန်အာဟွံသေၚ်ပုဟ်ဂှ် ထြာပ် ဟီုလဝ်ရ။
အမေရိကာန် နုက်တိတ်အာကီုလေဝ် နကဵုဍုၚ် တွဵုရး မၞုံပ္ဍဲအမေရိကာန်တံဂှ်တှ်ေ ဂွံဖအောန်ဖျေံ ပရေၚ်ကၠောန်ပ္တိတ်ကာဗောန်ဒိုၚ်အံက်သာ်ဂှ် နကဵုအစဳဇန်ညးတံညးတံ ဆက်ကၠောန်အာဏောၚ် ဒဒှ်ရစှ်ေစိုတ်ဂှ် ညးအုပ်ကာကုလသမဂ္ဂ အာန်တိုဝ်နဳယိုဝ် ဂူတာရာသ် သ္ဂးရ။
အမေရိကာန်ဝွံ လ္တူဂၠးတိဏံ ဒှ်ဍုၚ်ကၠောန်ပ္တိတ် ကၠေၚ်ဍေန်ကဵု သၟုဟ်ဓာတ်သဘာဝ ဂၠိုၚ်အိုတ်မွဲတုဲ ပရေၚ်ကၠောန်ပ္တိတ် ကာဗောန်ဒိုၚ်အံက်သာ်ဂှ်လေဝ် ကြုက်တုဲမ္ဂး ဒှ်ဒုတိယဂၠိုၚ်အိုတ်ရ။
ဟိုတ်နူပရေၚ်ဂၠးတိ မကတဴကၠုၚ်ဂှ်တုဲ ရာသဳဥတု ပြံၚ်လှာဲဒၟံၚ်တံ က္တဵုဒှ်တုဲ ဘဲအန္တရာယ်သဘာဝ လၟိဟ်လ္တုန်က္တဵုဒှ်တံဂှ် ဂၠိုၚ်ကၠုၚ်တုဲ ဗ္ၜတ်သ္ကာတ်မြဟ်တံဂှ်လေဝ် သာဂၠိုၚ်ကၠုၚ်ဂှ် တၠပညာဂမၠိုၚ် ကဵုလဝ်သတိရ။
ထြာပ်ဝွံ အပ္ဍဲကဵုအာယုက်သမ္မတညး အလန်ပထမဂှ်လေဝ် ကေၚ်နုက်ပ္တိတ်လဝ်အမေရိကာန် နူကဵုတၚ်တုပ်စိုတ်ရာသဳဥတုပါရဳဏံရ။
Ref: Reuters