ဝါယှေန်တာန်၊ ဂျာန္နဝါရဳ ၂၃
သွက်ဂွံသဳကၠဳပ္ညဳပ္ညပ် အရၚ်ဂွံပတုဲဒှ်ကၠေံ ပေါဲပၞာန်ယူကရုၚ်ဂှ် သမ္မတရုယှာ ဗလာဒဳမာပူတေန် တးပါဲကၠုၚ်မ္ဂး ကေတ်အာအရေဝ် ကၟာတ်လဒဵုအာ ရုယှာဏောၚ်ဂှ် သမ္မတအမေရိကာန် ဒဝ်နေဝ်ထြာပ် ဟီုလဝ် ပ္ဍဲဂိတုဂျာန္နဝါရဳ ၂၁ တေံရ။
စပ်ကဵုပရေၚ်ကၟာတ်လဒဵုကေတ်အရေဝ် မက္တဵုဒှ်ကၠုၚ်မာန်တံဂှ်တုဲ သမ္မတထြာပ် ထ္မံက်ပ္တိတ်ဟီုကၠုၚ်လဝ် ဗွဲလစှ်ဂှ်ေ ဟွံမွဲဏီရ။
ဟိုတ်နူပရေၚ်ဗ္တိုက်ၜက်ၜေတ်လဝ် ယူကရုၚ် ပ္ဍဲဂိတုဖေဖဝ်ဝါရဳ သၞာံ ၂၀၂၂ ဂှ်တုဲ အမေရိကာန် ကၠောန်သ္ပကေတ်ကၠုၚ်လဝ်အရေဝ်ကၟာတ်လဒဵု ကုရုယှာ ဗွဲမဂၠိုၚ်ဂၠေၚ် တုဲဒှ်ရ။
ကိစ္စဂွံပလံၚ်ဗစိုပ်လွဟ်လက်နက် ဇရေၚ်ယူကရုၚ်ဂှ်လေဝ် ဂကောံအလဵုအသဳညး ကလေၚ်သ္ၚဳဂၠိပ်ဒၟံၚ်ရောၚ် သမ္မတထြာပ် ဟီုလဝ်တုဲ သွက်ဂွံရီုဗၚ်ယူကရုၚ်ဂှ် လ္ပာ်ယူရောပ် ဒးကၠောန်ကဵုဂၠိုၚ်ၚ်ထေက်ဂှ် ဟီုရ။
ဒဒှ်ရတက်ကျာဟီုဂးဒၟံၚ် ကုသမ္မတယူကရုၚ် ဇြဳလာန်သကဳနွံဂှ်ကီု၊ ခြာဟွံလအ် သဳကၠဳအာကဵု သမ္မတပူတေန်ဏောၚ်ဂှ် သမ္မတထြာပ် ဟီုလဝ်ရ။
ပေါဲပၞာန်ယူကရုၚ် ဂွံဒေါအ်ဒေၚ်အာဂှ် ကြုက် သွက်ဂွံလုပ်အကြာသောၚ်ကလးကဵုဂှ်လေဝ် ဖ္တိုက်ဖ္အောဝ်လဝ် သမ္မတယှဳကျေန်ဖျေန်ရောၚ် သမ္မတထြာပ် ဟီုရ။
ကြဴနူပၞာန်ဂၠးကဝ်ဒုတိယတုဲ ပေါဲပၞာန်ယူကရုၚ် မက္တဵုဒှ်ဒၟံၚ်ပ္ဍဲယူရောပ် ဇၞော်အိုတ်ဂှ် အပ္ဍဲပွိုၚ် ၂၄ နာဍဳ ညံၚ်ဂွံဒေါအ်ဒေၚ်အာဂှ် ကၠောန်ကဵုမာန်ရောၚ် ကၠာဟွံဂွံယဵုဒုၚ်သစ္စာ နဒဒှ်သမ္မတတေံဂှ် ထြာပ် ကေၚ်ဟီုကြီုလဝ်ရ။
စပ်ကဵုပေါဲပၞာန်ယူကရုၚ်တုဲ ဂွံသဳကၠဳကဵုထြာပ် ဒဒှ်ရဒှ်ဒၟံၚ်ဒတုဲဂှ် သမ္မတပူတေန် ဟီုလဝ်နူကၠာတေံတုဲတုဲရ။
နကဵုယှဳကျေန်ဖျေန် ညံၚ်ပေါဲပၞာန်ယူကရုၚ် ဂွံတုဲဒှ်အာဂှ် ကၠောန်လဝ်ဂၠိုၚ်ၚ် မုဟွံမွဲဏီတုဲ ညးဝွံ ညံၚ်ညးတံကီု ဒှ်ညးဇြဟတ်နွံတၟာဂလိုၚ်ဂှ် ထြာပ် ဟီုလဝ်ရ။
ဟိုတ်ဂှ်ရ ပေါဲပၞာန်ရုယှာ−ယူကရုၚ် ဂွံတုဲဒှ်အာဂှ် နကဵုသမ္မတယှဳကျေန်ဖျေန် ထေက်ကဵုဒးပ္တိတ်ဇြဟတ် ဂၠိုၚ်နူကဵုဏံဂှ်လေဝ် သ္ဂးရ။
သမ္မတထြာပ် မဟီုကၠုၚ်လဝ် ဒဒှ်မကလေၚ်သ္ၚဳဂၠိပ်ဒၟံၚ် ပရေၚ်ပလံၚ်ဗစိုပ်အရီုဗၚ်ပရေၚ်ပၞာန် ဇရေၚ်ယူကရုၚ် သၟဝ်သ္ကိုပ်သ္ကအမေရိကာန်ဂှ်ဝွံ ကၠာတေံ ပါ်ပါဲလဝ် ပရေၚ်ပလံၚ်ဗစိုပ်အရီုဗၚ်ဏံဂှ်တုဲ ဒှ်သဘဴကျာကလေၚ်ဍိုန်စှ်ေအာဂှ် ဂွံဆဵုကေတ်ရ။
Ref: Reuters