ၜၚ်ကံက်၊ ဂျာန္နဝါရဳ ၂၄
ပ္ဍဲဍုၚ်သေံ ကြဴနူသၞောဝ်သ္ပမ္ၚဵုထပ်တဲညးလိၚ်တုပ်တံ လမျီုလုပ်ကၠုၚ်တုဲဂှ် ပ္ဍဲဂိတုဂျာန္နဝါရဳ ၂၃ ဂှ် ဆောဖွက်မၞိဟ်တြုံ မၞိဟ်တီဂၠိုၚ်မွဲတောဲ မပါလုပ် အလုံဍုၚ်မွဲ တောဲဆော LGBTQ ဂၠိုၚ်ကဵုကၠံ ထပ်လဝ်တဲအိုတ်ရ။
ကောန်သၟိၚ်ထ္ၜးရုပ်သေံ အပဳဝတ်သေယဳ အာယုက် ၄၉ သၞာံကဵု သာပ်ဖါန်ယော အာယုက် ၃၈ သၞာံတံဝွံ ကျိုၚ်လဝ်ကယိုၚ်တုပ်ပ် သ္ပလဝ်မ္ၚဵုထပ်တဲတုဲ နူရုၚ်ပ္တိုန်စရၚ် ဍုၚ်ၜၚ်ကံက် ပ္တိတ်ကဵုလဝ်စၟတ်တဲသ္ပစၟတ်သမ္တီ ဒဒှ်ရညးၜါတၠထပ်တဲ တုဲဒှ်အာဂှ်ရ။
ဂွံဂွံအခေါၚ်အရာသာ်ဏံဂှ် နကဵုညးတံ ဒးလုပ်ကၠုၚ်လဝ်ပေါဲဗ္တိုက် ကဵုစှော်သၞာံတုဲ တ္ၚဲဏံဂှ်တှ်ေ ဒှ်တဴတ္ၚဲသ္ဇက်ဒးစၟတ်သမ္တီ ဒဒှ်ရထ္မံက်ထ္ၜးဏာ ဓဝ်ဆာန်ဂှ်တှ်ေ ဒှ်ဓဝ်ဆာန်ရဂှ် ညးချဳဒရာၚ်ပရေၚ် LGBTQ မွဲတၠ ဟီုလဝ်ရ။
ဆောဖွက်ညးလိၚ်တုပ်တံ မပါလုပ် သမ္ဘာတၠသ္ၚိ မထပ်လဝ်တဲသီုဖအိုတ် ဂွံကၠုၚ်အခေါၚ်လွဳစကောန်ၚာ်ယျတုဲ အခေါၚ်ဂွံစွံညးမဒုၚ်အာဲကၟာဲတံလေဝ် ဂွံယျဂှ် ဟီုရ။
ဆောဖွက်လိၚ်တုပ် မၞိဟ်ဗြဴ အာယုက် ၆၄ ကဵု ၅၉ တံဂှ်လေဝ် ကၠောန်ဗဒှ်လဝ်ပေါဲမ္ၚဵုထပ်တဲ ပ္ဍဲဍုၚ်ၜၚ်ကံက်တုဲ လစိန်ညးတံထပ်လဝ်တဲဂှ် ထ္ၜးပျးကၠုၚ်လဝ် ဂတမုက်မဳဒဳယျာတံရ။
မၚ်ဒၟံၚ်တ္ၚဲဏံဂှ် ဂွံ ၁၀ သၞာံယျတုဲ ဒဒှ်ရမိပ်စိုတ်ဗွဲမလောန်ဂှ် တောဲဆောညးဗြဴလိၚ်တုပ်ဏံ ဟီုလဝ်ရ။
ၝောံခန် သေန်တာရာန်ဖျာ ဍုၚ်ၜၚ်ကံက်ဂှ်လေဝ် နူကဵုဂကောံမွဲဂကောံ သ္ကိုပ်သ္ကတုဲ ကၠောန်ဗဒှ်ကဵုလဝ် ပေါဲမ္ၚဵုထပ်တဲဇၞော်ဇၞော်မွဲ သွက်တောဲဆော LGBTQ မဂၠိုၚ်ဂၠေၚ်ဂှ် မွဲအခိၚ်ဓဝ်ရ။
ဍုၚ်သေံဂှ်တှ်ေ ပ္ဍဲဓဝ်လအေၚ် ပ္ဍဲအရာဒုၚ်တဲမာန် လ္တူ LGBTQ တံဂှ် နူကၠာတေံရ နွံဒၟံၚ်ကဆံၚ်လ္တူတုဲ အခိၚ်လၟုဟ်တှ်ေ ပ္ဍဲအာယှဒိုဟ်အဂၞဲဏံ ဒှ်ကၠုၚ်ဍုၚ် မကဵုအခေါၚ်ညးသ္ဍိုက်ဆာန်လိၚ်တုပ်တံထပ်တဲ ကိုပ်ကၠာအိုတ်ဂှ် ချူဏာဝၚ်တၟိရ။
သၞောဝ်အပြောံ အခေါၚ်ပရေၚ်ညးလိၚ်တုပ်ထပ်တဲ ဍုၚ်သေံဂှ် တုဲကၠုၚ်ဂိတုဂျူလာၚ်တေံ သ္ပဒတန်လဝ်တုဲ ဣဏံဝွံ ကြဴနူထိုၚ်ဝါန်ကဵု နဳပဝ်တုဲမ္ဂး ပ္ဍဲအာယှဏံ ဒှ်ကၠုၚ်သၞောဝ် မသ္ပဒတန်လဝ် မရနုက်ကဵုတတိယရ။
သၞောဝ်ဏံဂှ် ဨကရာဇ် မဟာ ဝဂျဳရာလံၚ်ကောန် သ္ပဒတန်ကဵုလဝ် အပ္ဍဲဂိတုသေပ်တေမ်ဗာဂှ်တုဲ လအ်အာ ပွိုၚ် ၁၂၀ တ္ၚဲတုဲ ပ္ဍဲဂိတုဂျာန္နဝါရဳ ၂၃ ဂှ် သၞောဝ်ဏံ လမျီုစလုပ်ကၠုၚ် မဒှ်ရ။
Ref: AFP