မဝ်သကိုဝ်၊ ဂျာန္နဝါရဳ ၂၅
အခိၚ်ဒေါအ်လဝ်ပန်ပှော် ကုရုယှာ အစဳဇန်မဖျေံအာ ကောန်ဒပ်ပရေၚ်ထိၚ်ဒဝ် ပရေၚ်ၜိုဟ်လလမ် ဍုၚ်နေတဝ်တံ ပ္ဍဲယူကရုၚ်ဂှ် ရုယှာ တးပါဲထောံလဝ် ပ္ဍဲဂိတုဂျာန္နဝါရဳ ၂၃ ဂှ်တုဲ ပြဝသာ်ဏံဂှ်တှ်ေ ဘဲအန္တရာယ် မသၠုၚ်ပ္တိုန်အသိၚ် ထိၚ်ဒက်ဟွံဂွံတံ နွံရောင် ဟီုလဝ်ရ။
အစဳဇန်သာ်ဏံဂှ်ဝွံ သွက်ရုယှာဂှ် သ္ဇက်ဂွံဒုၚ်တဲမာန် ဟွံသေၚ်ပုဟ်ဂှ် ညးဗြဴမၞုံအခေါၚ်ဟီုဂး ဌာနဝန်ဇၞော်ကာဍုၚ်သ္အာၚ် မၞုံယၟု မာရဳယာ ဇြာခါရိုဝ်ဗာ သ္ဂးရ။
ညးမၞုံအခေါၚ်ဟီုဂး မၞုံယၟု မာရဳယျာ ဇြာခါရိုဝ်ဗာဂှ်တှ်ေ ရန်ကဵု ပရေၚ်သဳကၠဳအကြာ သ္ကိုပ်ဝန်ဇၞော်ဗျိတိၚ် ကဳယာ သတာမာ ကေုာံ ဝန်ဇၞော်ကာစဵုဒၞါ ဗိုဝ်ရေတ် ပေဿတိုဝ်ရဳယျာတ်တံ မဟီုဂးလဝ် စပ်ကဵုဍုၚ်ညးတံ သ္ဂောံဗလးကဵုအာလၟိဟ်ကောန်ဒပ် သွက်ဒပ်ထိၚ်ဒဝ်ပရေၚ်ၜိုဟ်လလမ် မသ္ဂောံဖျေံအာ ပ္ဍဲယူကရုၚ်ဂှ်တုဲ ဟီုကၠုၚ်လဝ်ရ။
နကဵုဂျာမနဳ မဒှ်အဖဝ်မိတ်ဇၞော်အိုတ် ဂကောံနေတဝ် ပ္ဍဲယူရောပ်ဂှ် ဂွံပါလုပ်ဂှ် အခန်ကဏ္ဍမွဲမွဲ နွံဒၟံၚ်ရရတုဲ ခြာဟွံလအ် သဳကၠဳအာ ကိစ္စဏံဏောၚ်ဂှ် ဝန်ဇၞော်ကာစဵုဒၞါ ပေဿတိုဝ်ရဳယျာတ် ဟီုသှ်လဝ်ကဵုအေန်တာဗျူ ပ္ဍဲဂိတုဂျာန္နဝါရဳ ၁၈ တေံရ။
သ္ကိုပ်ဝန်ဇၞော် ကဳယျာ သတာမာဂှ်တှ်ေ ဂွံဒက်ပ္တန်ဒပ်ထိၚ်ဒဝ်ပရေၚ်ၜိုဟ်လလမ်တံဂှ် သဳကၠဳလဝ် ကုမဟာမိတ်ညးတံ တၞဟ်ဟ်ဂှ်တုဲ လ္ပာ်ညးတံ ဒဒှ်ရပါလုပ်အာ တၟံကၠံပေၚ်ၚ်ဏောၚ်ဂှ် ပ္ဍဲဂိတုဂျာန္နဝါရဳ ၁၆ တေံ လလောၚ်ပ္တိတ်လဝ်ရ။
ကုသမ္မတထြာပ် မဟီုကၠုၚ်လဝ် ညံၚ်ပေါဲပၞာန်ရုယှာ−ယူကရုၚ် ဂွံတုဲဒှ် ဗွဲမပြဟ် မရေၚ်တၠုၚ်အာဏောၚ်ဂှ်လေဝ် ဂွံသဳကၠဳဂှ် ပံက်လဝ်ဂၠံၚ်ရောၚ် ရုယှာ ဟီုလဝ်ရ။
သမ္မတယူကရုၚ် ဗလာဒဳမာ ဇြဳလာန်သကဳ မပ္တိတ်ဒၟံၚ်ဇြဟတ် ဂွံဂွံအခေါၚ်ဆဵုဂဗ ကုသမ္မတထြာပ်ဂှ် ယဝ်ရဂွံကၠုၚ်တၚ်တုပ်စိုတ်ဒေါအ်ပန်ပှော်မ္ဂး ညံၚ်ဒပ်ရုယှာတံ ဟွံဂွံထပ်ဗ္တိုက်ကၠုၚ်ဂှ် ဗွဲတွဵုမအောန် ဒးကေတ် ကောန်ဒပ်ပရေၚ်ၜိုဟ်လလမ်ၜါကိုဋ်ဏောၚ်ဂှ် ဟီုလဝ်ရ။
ပ္ဍဲကဵုပရေၚ်ဂကောံနေတဝ် ဖျေံစွံအာ ဒပ်ပရေၚ်ၜိုဟ်လလမ်ဂှ် အမေရိကာန်လေဝ် ဟွံပါဟွံဂွံ ဒးပါလုပ်ကဵုဏောၚ်ဂှ် သမ္မတဇြဳလာန်သကဳ ဟီုလဝ်ရ။
အစဳဇန်ဏံဂှ်တှ်ေ နကဵုရုယှာ သာ်လဵုမှ ဒုၚ်တဲဟွံမာန်တုဲ ယဝ်ရဂကောံနေတဝ် ဆက်ကၠောန်အာ အတိုၚ်အစဳဇန်မ္ဂး ပေါဲပၞာန်ဝွံ ဒဵုကဵုအကာဲအရာ ထိၚ်ဒက်ဟွံမာန် အန္တရာယ်ဍေံ အသိၚ်သၠုၚ်တိုန်ကၠုၚ်မာန်ရောၚ် ရုယှာ ဟီုလဝ်ရ။
Ref: Reuters