ၜၚ်ကံက်၊ ဂျာန္နဝါရဳ ၂၆
ကမၠောန်ကျာဖျ လီဠာန်ဒၟံၚ်မၞိဟ်ဂမၠိုၚ် သီုနကဵုဖုၚ် သီုလ္တူလပှ်ကျာ မွဲဒမြိပ်ပယျဵုဗၟာ၊ ကာမ္ဗောဒဳယျာ ကေုာံ ဍုၚ်သေံတံဂှ် သွက်ဂွံဗ္တိုက်သရိုဟ်ဂှ် ကြုက် ကေုာံ သေံ ပံၚ်တောဲရေၚ်တၠုၚ်အာဏောၚ် ဂွံတီကေတ်ရ။
ကမၠောန်လီဠာန်သြန် လ္တူလပှ်ကျာဏံဂှ်ဝွံ ကော်ကေတ်ညးဒးဒုၚ်သွံရာန်လဝ်တံဂှ်တုဲ စကာကဵုကၠောန်ဒၟံၚ် ဗွဲအနိၚ်အပိုၚ်ရ။
ကြဴနူယဲကပ်ကဝ်ဝေဒ်က္တဵုဒှ်တုဲ ပ္ဍဲအာယှဒိုဟ်အဂၞဲ ဗွဲတၟေၚ် မွဲဒမြိပ်ပယျဵု ဗၟာ၊ သေံ၊ လာအိုဝ် ကေုာံ ကာမ္ဗောဒဳယျာတံဂှ် ဒှ်ကၠုၚ်ဒေသ ဒၞါဲကမၠောန်မၞိဟ်လီဠာန်သြန်လပှ်ကျာ ကေုာံ ပရေၚ်ဆက်စၠောံတံ ကောံကၠုၚ်မွဲဂှ် ဂွံတီကေတ် အတိုၚ်ကုလသမဂ္ဂ ထ္မံက်ထ္ၜးလဝ်ရ။
သွက်ဂွံကၠောန်ကလောန် ပ္ဍဲကမၠောန်မၞိဟ်လီဠာန်တံဏံဂှ် မၞိဟ်ဒးဒုၚ်သွံရာန်လဝ် ဂၠိုၚ်ကဵုလ္ၚီ နွံရောၚ် ကုလသမဂ္ဂ သ္ဂးရ။
သေန်တာပံၚ်တောဲရေၚ်တၠုၚ်ၜါဍုၚ်ဂှ် ပံက်အာ ပ္ဍဲဌာန်ဂအုပ်ဗၠာဲသၟိၚ်ကောန်ဂကူ ဍုၚ်ၜၚ်ကံက်ဏောၚ်ဂှ် ဒပ်ဗၠာဲသၟိၚ်သေံ ဟီုလဝ်တုဲ သၞာဲဒဴကြုက်တံဂှ်တှ်ေ ဂွံထပ်ပံၚ်အာ သေန်တာမွဲပၠန် ပ္ဍဲမာဲချံက် စဳဇန်လဝ်ဂှ် ဂွံတီကေတ်ရ။
ကမၠောန်ကျာဖျ မွဲဒမြိပ်ပယျဵုကာမ္ဗောဒဳယျာ၊ ကေုာံ ပ္ဍဲမြဝတဳဂှ် ကောန်ဍုၚ်ကြုက်ကဵု ကောန်ဍုၚ်သေံ ဗွဲမဂၠိုၚ်ဂၠေၚ် ပါလုပ်ဒၟံၚ်ဂှ် ဂၠိုက်ဂၠါဲထ္မံက်ပ္တိတ်အာဏောၚ်တုဲ ပံၚ်တောဲကဵုကြုက်တုဲ ဗ္တိုက်သရိုဟ်အာဏောၚ်ဂှ် ဒပ်ဗၠာဲသၟိၚ်သေံဂှ် သ္ဂးရ။
နကဵုသေန်တာပံၚ်တောဲရေၚ်တၠုၚ်ဏံ ပ္ဍဲသၞာံ ၂၀၂၅ ဂိတုဖေဖဝ်ဝါရဳဏံမ္ဂး စအာကမၠောန်ဏောၚ်ဂှ် စၟဳကေတ်လဝ်ရ။
သၞာဲဒဴဂီုကၠီုသေံကဵု ကြုက်တံ ဆဵုဂဗသဳကၠဳညးသ္ကအ် ပ္ဍဲဍုၚ်ၜၚ်ကံက်တုဲဂှ် တၚ်တုပ်စိုတ်သာ်ဏံ တိတ်ကၠုၚ်လဝ်ရ။
သေံ၊ ဗၟာ ကေုာံ ကြုက်တံဂှ်တှ်ေ ပံၚ်တောဲဗ္တိုက်သရိုဟ်အာ ကမၠောန်ကျာဖျတံဏောၚ် လလောၚ်တြးလဝ်ကီုလေဝ် ဒၞါဲကမၠောန်တံဏံ နွံဂှ် ဒှ်တိဍာ်ကံၚ်ဇြဳပၞာန်လုပ်စိုပ်ဝါတ်မွဲရ။
ကောန်သၟိၚ်ထ္ၜးရုပ်ကြုက် ဝါန်ယှေန် ဒးဒုၚ်တံၚ်ရပ်တုဲ ကြဴနူကလေၚ်ရီုပ္တိတ်ဂွံ နူကဵုကမၠောန်ကျာဖျမွဲတုဲဂှ် ပရေၚ်ဒှ်ဓဝိၚ် စပ်ကဵုကမၠောန်ကျာဖျဏံ သၠုၚ်တိုန်ကၠုၚ်ရ။
အပ္ဍဲသတ္တာဟဏံ ဂကောံညးစၞးကာစဵုဒၞါသေံ ကဵု ဒုက္ဍိုပ်သ္ကိုပ်ပၞာန် သဵုဝေန်တံ ဆဵုဂဗညးသ္ကအ် ပ္ဍဲနေဗျဳဒဝ်တုဲ စဳဇန်လဝ် သ္ဂောံသဳကၠဳပရေၚ်ဗ္တိုက်သရိုဟ် ပရေၚ်သွံရာန်မၞိဟ် ကေုာံ ကမၠောန်ကျာဖျ ပ္ဍဲဍုၚ်ဗၟာဂှ် ဂွံတီကေတ်ရ။
Ref: Reuters