ၜၚ်ကံက်၊ ဂျာန္နဝါရဳ ၂၉
ဂိုန်ကြုက်လီဠာန် ပ္ဍဲပရေၚ်ဆက်စၠောံဂှ် လီဠာန်သြန် စွံကၠုၚ်ပွန်မၞိဟ်ဂမၠိုၚ်တုဲ မခါန်ကၞက်ပ္တိုန်လဝ် ကောန်ကလောန်မွဲကိုဋ်ပြၚ်ဂှ် နွံဒၟံၚ် ၃၆ ဂိုန်ရောၚ် လစှ်ေဝန်ဇၞော်ဂီုကၠီုဍုၚ်ကြုက် စိုပ်ဒၟံၚ်ဍုၚ်သေံဂှ် ဟီုလဝ်တုဲ ဂွံဗ္တိုက်သ္အး ဂိုန်တံဏံဂှ် ဖ္တိုက်ဖ္အောဝ်လဝ် အလဵုအသဳသေံရ။
ပ္ဍဲဂိတုဂျာန္နဝါရဳ ၂၇ အခိၚ်ဆဵုဂဗကဵု သ္ကိုပ်ဗၠာဲသၟိၚ်သေံ ပ္ဍဲဗျူရိုဝ်ဂၠိုက်ဂၠါဲစၟဳတ် အမှုရာဇဝတ်သာ်ဗာ နွံတွဵုရးနန်တာဘူရဳဂှ် လစှ်ေဝန်ဇၞော် လွဳချံၚ်ဂျဳ ပါ်ပရအ်လဝ် တၚ်နၚ်ပရိုၚ်ဏံရ။
ဂွံသောၚ်ကလး ပြဒ္ဒညာဂိုန်ကြုက်လီဠာန် မနွံဒၟံၚ် ပ္ဍဲဍုၚ်ဗၟာ ဍုၚ်မြဝတဳဂှ် ဂကောံညးစၞးကြုက် သၟဝ်ပၠတရဴလစှ်ေဝန်ဇၞော် လွဳဂှ် ကၠုၚ်စိုပ်ဍုၚ်သေံတုဲ အာတ်မိက်လဝ် အရီုအဗၚ်ရ။
ဂိုန်တံဏံဝွံ ဗွဲအဓိက လှေံလှန်ကော်ကေတ်ကောန်ဍုၚ်ကြုက်တုဲ စကာကဵုကၠောန်ဒၟံၚ်ကမၠောန် ပ္ဍဲအကာဲအရာ ဟၟဲကဵုပရေၚ်ဗ္စာရဏာမၞိဟ်တံဂှ်ရ။
ဌာနဝန်ဇၞော်ကာဍုၚ်သ္အာၚ် ဍုၚ်ကြုက်ဂှ်လေဝ် ဂိုန်ကျာဖျ ချဳဒရာၚ်ဒၟံၚ် အပ္ဍဲဒေသတံသီုဖအိုတ်ဂှ် သွက်ဂွံဗ္တိုက်သရိုဟ်အာဂှ် ဖ္တိုက်ဖ္အောဝ်လဝ် ဍုၚ်အာဇြဳယာန်ဂမၠိုၚ်တုဲယျ မဒှ်ရ။
ပ္ဍဲကဵုဂိုန်တံဏံဂှ် မၞိဟ်မ္ဒးကၠောန်ကလောန်လ္ၚဵုတံဝွံ ဒးဒုၚ်ပျဲပျာံတုဲ ဒဒှ်ရချိုတ်အာလဝ်ဂှ် ညးမကလေၚ်ဗၠးကၠုၚ်ဂမၠိုၚ် ဟီုရ။
အကြာဏံ ကောန်သၟိၚ်ထ္ၜးရုပ်ကြုက်မွဲတၠ ဒးဒုၚ်ရပ်လဝ် ပ္ဍဲကဵုဂိုန်ကျာဖျ ပ္ဍဲဍုၚ်ဗၟာတုဲ ကြဴနူကလေၚ်ရီုပ္တိတ်လဝ်တုဲဂှ် အလဵုအသဳကြုက် ကၠောန်ကၠုၚ်သ္ဂောံရပ်စပ် ကမၠောန်ကျာဖျဏံ တေၚ်ၚ်ဂြတ်တ်ရ။
ကုကောန်ဍုၚ်ကြုက် မဒးဒုၚ်ရပ်လဝ် ပ္ဍဲဍုၚ်ဗၟာတံဂှ် သွက်ဂွံဘိုၚ်ရီုထ္မံက်ပ္တိတ်ကဵုဂှ် ကြုက် အာတ်လဝ်အရီုဗၚ် သၞာဲဒဴသေံတံရ။
စပ်ကဵုဂဗုတ်ကောန်သၟိၚ်ထ္ၜးရုပ်ကြုက်ဂှ်တုဲ ဒပ်ဗၠာဲသၟိၚ်သေံ ရပ်လဝ် မၞိဟ်ဒှ်သံသယ ၂၀ တၠဂှ်တုဲ လှဲပြံၚ်ဏာလဝ် ဇရေၚ်ဍုၚ်ကြုက်ရ။
ဂွံတာဒၞါ ကၟာတ်လဒဵုကၠေံ တမ်ရိုဟ် ကေုာံ ဂၠံၚ်ဍာန် ကမၠောန်ဂိုန်ရာဇဝတ်တံဏံ ဂေတ်ဂြိပ်ဂှ်လေဝ် ကြုက် အာတ်မိက်လဝ်အရီုဗၚ် ကုသေံရ။
Ref: Bangkokpost