ၜၚ်ကံက်၊ ဂျာန္နဝါရဳ ၃၀
ဇာဇၞိက်ကွဳပၟတ်ပရှ်ကျာ တတ်ကၠောံလာအိုဝ်တုဲ မဆက်စၠောံလဝ် သေံကဵုကြုက်ဂှ် အပ္ဍဲသၞာံ ၂၀၃၀ ဏံ သိုၚ်ပတုဲအာမာန်ဏောၚ်ဂှ် အလဵုအသဳသေံ စၟဳစလဝ်ရ။
ဂၠံၚ်ကွဳပၟတ်ဏံဂှ်ဝွံ ဒဒှ်ရပၟိက်ဇၞော်တဴ သွက်ပရေၚ်ဆက်ဆောံၜါဍုၚ်၊ သွက်အနာဂတ်ပရေၚ်သွံရာန်ဗၞိက်တံဂှ် သၞာဲဒဴသေံဂမၠိုၚ် ဟီုလဝ်ကီုလေဝ် လဇုဲဒၟံၚ်လအ်ယျ မဒှ်ရ။
ပရေၚ်ဖံက်ကၠောန်ဒၟံၚ်ဂၠံၚ်ကွဳပၟတ် မဆက်စၠောံလဝ် ဍုၚ်ၜၚ်ကံက်ကဵု ဍုၚ်နဃောန်ရာပ်ချာသဳမာ ကဆံၚ်ပထမဂှ်ဝွံ အခိၚ်လၟုဟ် ၃၆ တၟံကၠံ တုဲဒှ်ဒၟံၚ်ယျ မဒှ်ရ။
သ္ကုတ်ဂၠံၚ် ဒုတိယ မဆက်စၠောံလဝ်ကဵု ဏမ်ခိုၚ် တွဵုရး ပယျဵုသ္ကုတ်သၟဝ်ကျာဂှ် ပတုဲဒၟံၚ်ယျဂှ် ဂျဳရာယု ညးမၞုံအခေါၚ်ဟီုဂးအလဵုအသဳသေံ ဟီုလဝ် ပ္ဍဲဂိတုဂျာန္နဝါရဳ ၂၉ တေံရ။
သွက်ဂၠံၚ်ကွဳပၟတ် ပတုဲဒၟံၚ်ဏံဂှ် မၚ်ဒၟံၚ်အခေါၚ်သ္ပဒတန် နူကဵုအလဵုအသဳသေံဂှ် ဂွံတီကေတ်ရ။
ဂၠံၚ်ကွဳပၟတ်ဏံဂှ်ဝွံ ဇမၠိၚ် ၃၇၈ မိုၚ်နွံတုဲ စၟဳစလဝ် ၁၂ ဒဿမ ၉ ဗဳလျာန် အမေရိကာန်ဒဝ်ဠာ အိုတ်ဏောၚ် မဒှ်ရ။
ဇာဇၞိက်ဂၠံၚ်ကွဳပၟတ်သေံဏံဂှ် နူကဵုဒဒန်မသိုၚ်ခၞံလဝ် လ္တူၜဳမေဝ်ခံၚ်ဂှ်မွဲကဆံၚ် ဆက်စၠောံအာ ကုဂၠံၚ်ကွဳပၟတ် လာအိုဝ်−ကြုက် ဏောၚ် မဒှ်ရ။
နကဵုဍုၚ်သေံ အခိၚ်ပ္တိတ်ဒၟံၚ်ဇြဟတ် သ္ဂောံဍံၚ်ဗက်ပရေၚ်ပိုန်ဒြပ်ဖောအ်ဗြေဝ် ဍုၚ်ကဆံၚ်တုပ် အပ္ဍဲဒေသဂှ် ညံၚ်ပရေၚ်ဆက်စၠောံ ကုဍုၚ်ကြုက် မဒှ်သ္ကအ်ကၠောန်သွံရာန်ဗၞိက်ညးတံဇၞော်အိုတ်ဏံ ဇြဟတ်ဂွံခိုဟ်ဂှ် ပ္တိတ်ဒၟံၚ်ဇြဟတ်ရ။
မ္ၚးနူကဵုပရေၚ်သွံရာန်ဗၞိက်ဂှ် သွာၚ်ကမၠောန်အာတရဴအကြာၜါဍုၚ် ဂွံတောတက်ကၠုၚ်ဂှ်လေဝ် ရေၚ်တၠုၚ်လဝ်တုဲ သၞာံတုဲကၠုၚ်တေံ ကောန်ဍုၚ်ကြုက်ကဵု ကောန်ဍုၚ်သေံတံ ဟွံဒးကေတ်ဝဳဇြာမွဲသာ် ဂွံလဝ်အခေါၚ်အာကၠုၚ် အကြာၜါဍုၚ်ရ။
ဖံက်ဂၠံၚ်ကွဳပၟတ်ဏံတုဲမ္ဂး နူဍုၚ်ၜၚ်ကံက် အာဗဳယေန်ကျေန် ဍုၚ်လာအိုဝ်ဂွံတုဲ နူဏံမွဲကဆံၚ် အာဍုၚ်ကူမေန်၊ အာစိုပ်ဒဵုကဵုဍုၚ်ဇၞော် ဗေကျေန် ဍုၚ်ကြုက်ဂှ်ဂွံဏောၚ် မဒှ်ရ။
အတိုၚ်ကိုန်စဳမာန်အလဵုအသဳကြုက် BRI ဂှ်မ္ဂး ဇာဇၞိက်ဂၠံၚ်ကွဳပၟတ်ပရှ်ကျာဏံဂှ် စသိုၚ်ခၞံလဝ် ပ္ဍဲသၞာံ ၂၀၁၇ တေံရ။
အလုံကိုန်စဳမာန်ဏံမွဲ ပ္ဍဲကဵုလ္ပာ်ပရေၚ်ဓလိုက်တမ်ရိုဟ်သီုဖအိုတ်ဂှ် အလဵုအသဳသေံ ကေတ်တာလျိုၚ် မ္ဒးရေၚ်တၠုၚ်လဝ်ရ။
ဍုၚ်သေံ ညံၚ်ဂွံဒှ်ကၠုၚ်ဒၞါဲဌာန်ဒတန် ပရေၚ်ပလံၚ်ဗစိုပ် အာယှဒိုဟ်အဂၞဲဂှ် ဂၠံၚ်ကွဳပၟတ်ဏံကီု ကိုန်စဳမာန်ပရေၚ်ပလံၚ်ဗစိုပ်တၞဟ်သ္အာၚ်တံကီု ညံၚ်ဂွံရေၚ်တၠုၚ်ပတုဲကၠေံ ဗွဲမပြဟ်ဂှ် သ္ကိုပ်ဝန်ဇၞော် ဗဴဓေါန်ဓါန် ဒဒှ်ရစၞောန်လဝ်ဂှ် ဂွံတီကေတ်ရ။
Ref: Bangkokpost