ဒမက်သကာတ်၊ ဂျာန္နဝါရဳ ၃၁
ဂကောံပၠန်ဂတးသဳရဳယျာ မပလှ်ဖျေံလဝ် သမ္မတ ပါယှာအေဝ် အာသာတ် ပ္ဍဲဂိတုတုဲကၠုၚ်တေံဂှ် ပ္ဍဲဂိတုဂျာန္နဝါရဳ ၂၉ တေံ ပ္တိုန်လဝ် က္ဍိုပ်သ္ကိုပ်အေဿလာံမေတ်တြေံ မွဲတၠ နဒဒှ်သမ္မတကၟိန်ဍုၚ် ယာယဳရ။
ပၞာန်အပ္ဍဲဍုၚ် က္တဵုဒှ် ပွိုၚ် ၁၄ သၞာံတုဲ သွက်ဂွံကလေၚ်ဒက်ပ္တန်ကၟိန်ဍုၚ်ဂှ် ဂကောံဇြဟတ်ပၠန်ဂတးသဳရဳယျာတံဝွံ အခိၚ်ဒးဆေၚ်ဒၟံၚ်ကဵုတာလျိုၚ်ဇၞော်ဇၞော်ဂှ် သွက်ဂကောံဂမၠိုၚ် ဂွံပံၚ်ကောံညဳသာဂှ် ပ္တိုန်လဝ်က္ဍိုပ်သ္ကိုပ်ပၠန်ဂတး နဒဒှ်သမ္မတယာယဳရ။
ဂကောံဇြဟတ်ပၠန်ဂတးတံဂှ်တှ်ေ သၞောဝ်သ္ဇိုၚ်ဒက်ပ္တန်သဳရဳယျာ မရပ်စပ်ကၠုၚ်လဝ် ပ္ဍဲလက်ထက်သမ္မတ အာသာတ်ဂှ်လေဝ် ပလီုထောံတုဲ ခြာဟွံလအ် ချူခၞံအာတၟိဏောၚ်ဂှ် ဟီုလဝ်ရ။
က္ဍိုပ်သ္ကိုပ် အာမက် အေဝ်ယှာ ကေၚ်ဒှ်လဝ်မဟာမိတ် ကုဂကောံအေဝ်ကိုၚ်ဒါ မွဲအခိၚ်တေံဂှ် ခါန်ကၞက်ပ္တိုန်လဝ်ညး နဒဒှ်သမ္မတယာယဳ သွက်အခိၚ်ကာလအပြံၚ်လှာဲဏံဂှ်ဝွံ ကြဴနူဂကောံဇြဟတ်ပၠန်ဂတးတံ ဆဵုဂဗသဳကၠဳညးသ္ကအ် ပ္ဍဲဍုၚ်ဇၞော် ဒမာတ်သကာတ်တုဲဂှ် မံက်တိတ်ကၠုၚ်လဝ်ရ။
နကဵုနဲကဲသာ်လဵု ရုဲစှ်လဝ် အာမာတ် အေဝ်ယှာ နဒဒှ်သမ္မတယာယဳရောဟီုဂှ် ဟွံဂွံတီကေတ် သောၚ်ၚ်ကၠးကၠးဏီရ။
က္ဍိုက်လဝ်က္ဍိုပ်ပၞာန်ထ္ပက် မပလှ်ဖျေံ အလဵုအသဳအာသာတ်ဂှ်တှ်ေ ဒှ်ဂကောံ ဟာယက် တဳဟဳရာ အေဝ် ယှာဟာမ် သၟဝ်သ္ကိုပ်သ္က က္ဍိုပ်သ္ကိုပ်အေဝ်ယှာရ။
ဂကောံဏံဝွံ ကၠာတေံ ကေၚ်ဒှ်လဝ်မဟာမိတ် ကုဂကောံအေဝ်ကိုၚ်ဒါကီုလေဝ် ဗွဲကြဴဏံ ဟီုဖျေံလဝ်ပရေၚ်ဆက်ဆောံညးတံ ကၠာတေံဂှ်ရ။
အေဝ်ယှာအာ မဒှ်ကၠုၚ် သမ္မတယာယဳဂှ် ကၠာတေံ အမေရိကာန် ပ္တိတ်လဝ်သြန်လာပ် ၁၀ ပြကောဋိကိုဋ်ဒဝ်ဠာကီုလေဝ် ပ္ဍဲဂိတုတုဲကၠုၚ်တေံ ဂကောံညးစၞးအမေရိကာန် စိုပ်ကၠုၚ်သဳရဳယျာတုဲ ကလေၚ်ရုပ်သီလဝ် သြန်လာပ်မပ္တိတ်လဝ်ဂှ်ရ။
ဂကောံဇြဟတ်ပၠန်ဂတး သဳရဳယျာတံဂှ်တှ်ေ သွက်ဂွံကလေၚ်ဒက်ပ္တန်ကၟိန်ဍုၚ် မသရိုဟ်လီုလာ်ဒၟံၚ် လ္ပာ်ဇဳဒိုဟ်ဂှ် အခိၚ်ပ္တိတ်ဒၟံၚ်ဇြဟတ်ဂှ် အာတ်မိက်လဝ် သွက်ဂွံရုပ်သီကဵု ပရေၚ်ကၟာတ်လဒဵုကေတ်အရေဝ် နူကဵုအမေရိကာန် မဖျေံစၟတ်လဝ်ဂှ်ရ။
ကောန်ဍုၚ်သဳရဳယျာဂမၠိုၚ် ဒုၚ်တၠုၚ်လဝ်ပရိုၚ် မခါန်ကၞက်ပ္တိုန် သမ္မတယာယဳဂှ်တုဲ လ္တူဂၠံၚ်ဇၞော်တံဂှ် ဍဵုပတ်ကၠုၚ်လဝ်ဟောန်ကွဳစက် ဗွဲမထတ်ရ။
နကဵုညးအုပ်ဓုပ်တၟိ ဍုၚ်သဳရဳယျာတံဂှ်တှ်ေ ဒးဆေၚ်ဒၟံၚ်မုက်ကဵု တာလျိုၚ်ဇၞော်ဇၞော်တံဂှ်ရောၚ် က္ဍိုပ်သ္ကိုပ်အေဝ်အာယှ ဟီုလဝ်ရ။
Ref: AP